lunes, 19 de octubre de 2015

El Restañu (Amieva) - Canalón del Texéu - Cotalba - Vegarrionda - Vega d'Enol (Cangues d'Onís)

29 d'Agostu de 2015

Track: El Restañu (Amieva) - Vega d'Enol (Cangues d'Onís)


El monte, la escalada y la vida en xeneral, llévase alantre al traviés del algame de delles llinees qu'entren nel nuesu maxín. Esto ye asína, sólo ties que tar nun puntu, nun llugar y acolumbrar una nueva llinea a trazar como siguiente destín.

Ésto, pasónos cola muria que xube dende'l Dobra hacia les cotes occidentales del Cornión. Nun soi a alcordame en qué ruta, tuviemos embobaos mirando pa esi amiestu de caliza y yerba a parte iguales nes que destacaben dos llinees.

Eses llinees nun son otres que'l valle d'Ozania y el Canalón del Texéu, casi siempre a la solombra durante l'añu. Per elles, quisimos conocer un pelín eses ayalgues montañeres de Picos, que sólo la esperiencia y la motivación son el bonus pa metése neses "siendes" de pastores de Picos.

Na ponte'l Restañu (695 m) col picor de les grandes actividaes

Pa ello, aportaremos César, Carlos y yo a Cangues d'Onís pela autovía'l Cantábricu y la N-625, almorzando na Huera cola sóla compaña del chigreru y tres ciclistes tan motivaos como nosotros pa tar a eses hores activos.

Magar del desayunu, siguiremos pela N-625, pasando pelos pueblos de Cañu y Tornín, cruciando la ponte Dobra, pa entrar nel conceyu d'Amieva. Nesti conceyu travesaremos los pueblos de Miyares, Corigos, Pervís, La Vega Pervís onde topámonos col ríu Ponga nesti casu, y siguimos camín pasando per Santiyán, Precendi, Les Vegues, Campurriondi y Ceneya d'au saldrá a la manzorga la carreterina que xube hasta Amieva.

Al entamu del pueblu, saldrá una pista a la mandrecha qu'empobinarános durante un llargu tramu hasta'l colláu Angón a 823 ms d'altor, baxando de secute hasta'l ríu Dobra, onde podemos travesalu hacia la ponte'l Restañu, dexando'l coche y preparándonos pa una nueva aventura pel Cornión más occidental.

Entamamos camín per Carbuceru averándonos a Texéu

Colos nervios nel cuerpu y una mochila colo mínimu pa pasar dos díes nel Cornión, partimos caleyando de los 696 m de la Ponte'l Restañu pel camín que diría hacia'l banzáu de la H.ocica, pero nun facemos nin una envuelta cuando debemos desvianos al sen contrariu con h.itu de referencia... quiciás l'únicu casi en tol día, jeje.

Cruciaremos la riega'l Texéu per primer vegada y saldremos per sienda hacia Carbuceru, pasando pembaxu del final d'una pindia canaliza en curva, nomada pol guía Victor Sanchez como Requexu'l Muchacho y sólo prauticable a mou de barrancu nel so final.

Siguiremos, intentado nun perder los caberos trazos de sienda, siempre baxo los parés que cayen dende les playes de Carbuceru hacia la entrada al Canalón del Texéu. Nestos momentos, nunca sabes bien como facer, si siguir faciendo traviesa pa garrala lo más arriba posible y baxar dafechu hacia la riega.

Metémonos dafechu na riega'l Texéu trepando bloques empotraos

Magar de vueltes y revueltes... nun mos prestó muncho siguir en traviesa superando diversos espolones d'amestáu yerba y peña y preferimos descender pente escayos, ortigues y ablanos hacia'l calce de la riega Texéu.

Dicir que'l percorríu del gps pué ser de tou menos la rialidá de los nuesos pasos. Esti canalón ye tan encaxonáu col satélite vien y va, según-y apetez. Así que por favor, sentíu común ye l'únicu gps que tenemos que llevar.

Ye perfácil siguir pela parte alta y enriscase, poro baxamos al calce y fuimos resolviendo los pasos ún a ún, anque hai que dicir que siempre hai dos soluciones: xugásela trepando bloques más o menos difíciles y más o menos moyaos o metese pente la broza, ortigase, lluchar coles canes de los ablanos o colos xabaces escayos.

Dos opciones: bregar con escayos o trepar enormes bloques

Nun hai camín cenciello, pero aún así, vamos esfrutando, con picores infernales nes pates pero esfrutando. Tenemos la sensación de dir per llugares de Picos, onde hai tiempu que nun pasa naide y eso va metiéndose nel cuerpu pasu tres pasu que vamos superando.

Cada pocu miramos p'arriba, sabemos que nun hai salides alternatives a lo planeáu, pero vamos encantaos, sobretou cuando salimos a la parte alta del canalón del Texéu, el cúal ye dafechu prauticable y camínase a bon ritmu.

Asína lo fadremos y aportaremos al final del canalón del Texéu, onde cai un pequeñu tabayón qu'aprovechamos pa garrar agua, dempués de casi 3 hores d'una llucha continua, sin descansu nes que César y Charly tuvieron impresionantes como collacios d'aventura, ya seya trepando o sufriendo feríes ensín protestar.

Aportamos al final del canalón del Texéu saliendo per un seu a la manzorga

Pero nun acababa equí l'aventura, darréu llegaba lo que más diba costá-y a Carlos. Nos minutinos que nos tomamos de descansu en tres hores garrando agua, ya nun tenía la mesma cara de tranquilidá. Cuando llegamos César y yo de vuelta taba blancu... sabía que veníen les nomaes playes de Picos... y como éstes de Teyeres nun hai otres de pindies.

Intento tranquilizalu y salimos pel seu de la manzorga'l canal, que nun tien denguna dificultá y meterémonos na playa de yerba más ablucante que nunca viera na mió vida. La yerba llarga y lo pindiu del tarrén impresiona, acoyona y fai que tomes les precauciones necesaries.

Aún así, fuimos superando tramu tres tramu, yendo primeru César y yo más atrás con Charly pa da-y seguridá. Tamos embaxo'l Mirador d'Ordiales, asina que la direición ye clara, a la manzorga y p'arriba hasta'l pasu del Seu Teyeres, puntu feble de la Cresta Teyeres.

De playes pel Cornión.... ensin toalla nin bañador

Sólo viendo les semeyes que nos sacó César, dámonos cuenta a posteriori de lo pindies que son estes playes. Dicir que'l corte al abilsu del Canalón del Texéu, tampoco tranquiliza así que los temores de Charly pa con esti tramu de la ruta yeren más que fundaos.

De toles maneres, el camín faíse andando y nesti casu si fai falta a cuatru pates, garrando los gadeyos de yerbes como si fuera la meyor presa del mundiu y tirando d'esa tracción tapín cola bota que más que nunca tenía que facer su función de bota de monte.

Nun hai restos de camín nes playes, tenemos d'orientanos y saber cual ye nuesu destín, superando casi doscientos metros de desnivel per playes, anque los primeros cien son los más inclinaos y peligrosos, superando dalgunos resaltes apretando duro de les yerbes y los pies.

Salimos pel Seu Teyeres hacia Ordiales

Más enriba, alcontraremos restos d'un senderu que paez venir dende Ozania, uniendo les desaniciaes mah.adas d'Ozania y Teyeres. Nós, fuimos a seguilu hasta'l más qu'evidente Seu Teyeres anque nun alcontramos res de restos de cabañes o mayáu en Teyeres.

Sicasí, cuando aportamos al pie del seu, tirámonos a descansar de tal esfuerzu y diónos igual alcontrar o nun alcontrar nada. Picaremos dalgo y superaremos el Seu Teyeres, pel que Carlos disfruta de los pocos pasos que tien y siguiremos bordiando la Cresta Teyeres hacia'l refuxu d'Ordiales.

Otres dos hores hasta Ordiales y decidimos siguir a xintar al picu Cotalba, poro tiraremos pel camín normal, notándose y relaxación nos cuerpos y cansanciu acumuláu que fai ver que les pates nun van ya cola tensión que llevaben dellos minutos enantes.

Facemos dende Ordiales la clásica ascensión al picu Cotalba

Personalmente, entamos a notar otra vegada'l problema de plantes de pies de la Travesera o del Tiru Navarro y ya tengo en mente, quitame les botes nel cumal del Cotalba y descansar estos pies un pelín, pero tovía qu'ascender y trepar per caliza un ratín.

Ye una ascensión perconocía y Carlos y yo, remontámonos a fai 5 años, cuando ficiéramos per primer vegada esti picu y paez que fuera cuantayá. El tiempu cuando aprovéchase paez durar muncho más y nestos años de monte llevo conociendo tanto d'Asturies que paez que llevo tola vida metíu nesto.

Esta vegada envede tiranos a les plaques d'adherencia na parte final de la xubida a Cotalba, trepamos pel canalizu y fué entreteníu pero quiciás más esixente de lo que nos apetecía a estes altures de ruta, sobretou a Charly que ya diba cola reserva.

Muertos nel Picu Cotalba (2021 m)

Con pocu menos de 6 hores aportamos a los 2021 m del picu Cotalba y antes les maraviyoses vistes desplomámonos nel calizu cumal. Quedándonos descalzos los tres, ya que la esixencia d'apretar nes playes y nel canalón del Texéu pasónos factura y díbemos reventaos dafechu.

Con media horina tiraos na xinta, toca siguir ruta alantre, ponemos les botes... que dolor y baxamos hacia'l colláu Santa María, teniendo que destrepar dalgún pasín a una h.orcadina col cumal inferior y llueu per un canalizu hacia'l colláu.

Magar del descansu y les vistes baxamos al colláu Santa María

Baxaremos los cien metros de desnivel y decidimos xubir César y yo hasta la Torre La Canal Vaquera... porque ta ehí y la verdá que nun vamos dexala pa meyor ocasión. Charly nun ta pa floritures y prefier esperar buscando la entrada a la Canal Vaquera pela que pensamos baxar.

En malpenes quince minutinos fadremos l'ascensu a la Canal Vaquera, ensín más problemes que'l cansanciu, poro aprovechamos César y yo, pa charrar de temes de curro informáticu, hasta encumar los 2040 m de la torre, que dános vistes inmeyorables a los Tres Poyones y al Requexón, asína como la mole que dende equí ye'l picu Cotalba.

Ascendemos con tranquilidá a la Torre La Canal Vaquera (2040 m)

Prefiero nun afondar na toponímia de los Poyones y el Requexón y tiramos p'abaxo al alcuentru con Carlos, pa siguir descendiendo hacia la canal Vaquera, la cual resultónos de lo más prestosa, anque llueu de casi 8 hores de ruta, la salida a los h.oos de la Güerta, fízosenos un pelín pesáu por tener que navegar la salida.

Ensín más, alcontraremos la salida de los h.oos hacia l'Altu'l H.uñazu y d'ehí ya baxaremos hacia Cueñe Cerrada alcontrándonos col míticu camín de Vegarrionda a Ordiales y coles primeres presones de tol día... por dalgo metímonos per llugares mui pocu frecuentaos o nada más bien.

Baxaremos la Canal Vaquera hacia Vegarrionda

Ye más, el propiu guarda del refuxu de Vegarrionda, nuna anterior visita dudaba de la posibilidá de pasar per ellí, pero esta vegada cuando aportamos al refuxu con ganes de charra y cerveza, nun tenía munches ganes de charrar y nun-y interesó lo que tuviéramos que cuntar.

Aún así, veníemos naguando pola cerveza y tirámonos nel prau d'enfrente cola compañía d'un montón de montañeros que taben inda más cansaos que nós... dalgunu nun yera a llevantar la tiesta d'entre les manes... nun sé lo que fadríen pero la xatada que llevábemos enriba nós... de xuru que non.

Coles mesmes y munches ganes de colar y aportar a la Vega d'Enol onde teníemos reserváu'l refuxu, caleyamos penósamente pel más que conocíu camín a Pandecarme pasando peles vegues de la Rondiella, la Piedra y el Güertu, pa siguir ya col atapecer persiguiéndonos hasta'l refuxu de pastores d'Enol.


Baxamos sele hacia la Vega d'Enol onde aportamos con un atapecer ablucante

Dicir, que fué llegar y tiranos tamién a la birra sentándonos a ver un preciosu atapecer sobre les Peñes Santes, a la espera de que diésenmos la cena... pelín cutre pa 28 euros de media pensión, anque la ducha caliente y un bañu onde sentase bien paga la pena jeje.

Tamién dicir, que mui cómodes les lliteres y más al tar sólos, anque hai que dicir que pocu ésitu-yos albidro a los nuevos refuxeros, por mor de sos polítiques de media pensión o na, dexando a dos guah.es de dieciochu años ensin durmir nel refuxu por nun tener perres pa la media pensión.... mal vamos así.

A lo que vamos....  rutón descomunal de 14 km en llugares mui pocu andaos y pinta que cada día que pase van tar menos andaos entá. Pa conocelos... pues hai que tar como nosotros unes diez hores y media y salvando un desnivel positivu acumuláu de 1850 m... eso sí, de caleyar fácil meyor escaecelo... una ruta con compromisu.

Camudando'l Camín nes playes de Picos

6 comentarios:

  1. Que pasada de ruta, Berto. Menuda triska xubir desde´l Restañu al Cotalba. Agora, preciosu, non, ablucante, tampocu, lo siguiente.
    Menuda "magic line".
    Un saludu

    ResponderEliminar
  2. Fue una de les rutes que con muncho más me prestó esti añu. El sentimientu de que nun pasa naide ya per ehí ye tremendu, presta munchísimu. Y ye mui montañera, sin dificultaes téuniques... pero ta mui perdíu'l Canalón na parte baxa y hai que dir con ganes d'ortigase, escayase y llugar colos ablanos... vamos con ganes de desbrozar. Eso sí, cuando sales na parte alta ye la hostia... y bono lo de les playes... pues tracción tapín y nun mirar muncho p'abaxo porque impresiona.

    Un abrazu

    ResponderEliminar
  3. Salvaje y espectacular, si señor
    Como y das caña Berto, esa si que ye una ruta potente. Fay tiempu que tengo nel puntu de mira esa canal pa salir a Ordiales, pero paez que siempre me echa p´tras.
    saludos

    ResponderEliminar
  4. Camiento que tou montañeru astur, tien que tenela na tiesta jeje. Sólo hai que buscar la dómina del añu que tan seques les playes (perpeligrosu moyao) y lo meyor... pantalón llargu pal entamu del Canalón... ehí fallamos y bien jajaja

    ResponderEliminar
  5. Molt guapa, exigent i canyera, el desnivell acumulat ho diu tot...aquesta quasi la vam seguir nosaltres en directe via whatsapp mentre pujàvem a Penya Castil jeje.

    ResponderEliminar
    Respuestas
    1. jajaja ya te digo... fué una pena que nun pudiera tar con vosotros, pero ya ves que lo que m'esperaba yera una ruta potentísima. Un abrazu

      Eliminar