lunes, 2 de marzo de 2015

El Restañu (Amieva) - Picu'l Camperón

27 de Setiembre de 2014

Track: El Restañu (Amieva) - Picu'l Camperón


Tamos ante una de les rutes más esperaes por mí del añu, pero nin siquiera d'esti añu, ya que pertenecía a la temporada pasada quedándose nel tinteru por nun alcontrar les condiciones más afayaices pa llevala alantre.

Poro, Carlos, Richar y yo, aprovechamos la entrada de la seronda pa dir conocer con pelín de respetu esos afamaos seos d'Ozania nel conceyu d'Amieva. Pa ello, aportaremos a Cangues d'Onís pela autovía'l Cantábricu y la N-625, teniendo la guapa sorpresa de camín al almuerzu de la xuntanza con Fernan que llibró nun se cómo, pa venir a esta ruta.

Magar del desayunu nel chigre de la Huera, siguiremos pela N-625, pasando pelos pueblos de Cañu y Tornín, cruciando la ponte Dobra, pa entrar nel conceyu d'Amieva. Nesti conceyu travesaremos los pueblos de Miyares, Corigos, Pervís, La Vega Pervís onde topámonos col ríu Ponga nesti casu, y siguimos camín pasando per Santiyán, Precendi, Les Vegues, Campurriondi y Ceneya d'au saldrá a la manzorga la carreterina que xube hasta Amieva.

Preparaos na Ponte'l Restañu (736 m)

Al entamu del pueblu, sal una pista a la mandrecha qu'empobinarános durante un llargu tramu hasta'l colláu Angón a 823 ms d'altor, baxando de secute hasta'l ríu Dobra, onde podemos travesalu hacia la ponte'l Restañu, dexando'l coche y preparándonos pa una nueva aventura pel Cornión más occidental.

Partimos caleyando de los 736 m de la Ponte'l Restañu pel camín que diría al llau del banzáu de la H.ocica en direición a Vegabañu. Pero aína, separtámonos per un senderín a la manzorga, al llau d'un potreru, que tendrá de llevanos hacia la H.uente Prieta.

Los seos d'Ozania... ablucantes
Esta fonte, que na dómina del añu na que tamos baxa casi seco, cuando davezu tien un pequeñu tabayón, va llevanos hacia'l calce d'una riega pente la cual vamos ascender hacia los nomaos Seos d'Ozania.

Nesta ruta, según vas avanzando per cada sienda, albidres que les posibilidaes d'ésitu van de la man de lo moyáu que tea cada pasu que tenemos que superar. Nel intre, el calce secu de la riega fae qu'ascendamos pente los bloques ensín mayores problemes hasta la parte alta de la mesma.

Xubimos pela riega La H.uente Prieta

Saldremos a los praos d'enriba'l calce viendo como les posibilidaes de siguir ascendiendo per esti valle paecen desapaecer dafechu. Restoles salides per uquiera y ninguna tien bona pinta, zarrándose canales y viendo como les muries asemeyénse infranquiables.

Pero si llegamos hasta'l final de los praos, vemos como xube a la nuesa manzorga una rampla herbosa hacia una pequeña viesca d'ablanos. Ésta, xúbese bien asína en seco, garrándose a los gadeyos de yerba, pero si tuviera moyao baxar esnalando diba ser más bien cenciello.

Conocemos al fín los seos d'Ozania col primer tramu aéreu

Cruciaremos los ablanos siguiendo una especie de senderu hasta topános cola peña, onde paecen salir dos opciones de seu. Ún a la manzorga que finalmente nun va a dengún llau y otru a la mandrecha, con llarga cayida hacia la rampla herbosa y más allá.

Tenemos que cruciar esti seu con munchu curiáu, afitando cada pasu, sollertes a los agarres de manes y a onde pisamos porque un resbaríu ye sinónimu de matase. Nun pasará d'unos diez o quince metros en travesía a la mandrecha penriba la yerba hasta abelluganos al paré, onde escaecemos un pelín la sensación de vacíu y atopamos una marquina mariella que diz que vamos pel camín correutu.

Siguimos col segundu seu más téunicu magar de lluchar colos ablanos

Darréu, tendremos de superar otra viesquina d'ablanos muncho más gafa que la primera, hasta dar de frente col segundu séu, que ye más bien una trepada tumbada más que denguna traviesa o dalgo asemeyáu.

Sicasí, más complexa téunicamente que l'anterior, ye abondo más segura, con menos patiu y bonos agarres que faenmos salir hacia les playes qu'empobínense hacia'l valle d'Ozania. Una vegada que pasamos estos guapos seos, caleyaremos confiaos sacando los nervios d'enriba hacia la cueva d'Ozania.

Xubimos per playes hasta'l final del valle d'Ozania onde entama la peña caliza

Lloñe de finar la ruta, práuticamente los seos fueron namái que l'entamu, con muncha chispa pero l'entamu de l'ascensión, que tendrá'l valle d'Ozania en toda so estensión como'l cimeru protagonista, al empar de cumales que van apaeciendo nel nuesu andar: Cotalba, Requexón...

Descansaremos na cueva, de claru caltér ganaderu y siguiremos hasta'l final del valle, saliendo pela mandrecha de la torca del Pozu Mamperi col envís d'averanos, primeru per llambries y llueu per una guapa canalina hacia'l colláu de la Muda (1815 m), pasu normal del ganáu hacia les playes del valle d'Ozania.

Aportamos la Muda d'Ozania pa bordiar sele la xerra Mercader hacia'l colláu Verde 

Magar de más de 3 hores de ruta,falaremos un ratín na Muda, echaremos un vistazu al Cantu Cabroneru, Porra Valdepinu, Tiatordos, Pierzu... y Charly diz que pagó un pocu l'esfuerzu y los nervios de los seos, poro decidimos pasar de facer tol crestéu y bordiamos pela mandrecha'l Porru La Muda, garrando una guapa traviesa baxo la cresta de la Xerra Mercader.

Ensín dengún problema, avanzaremos esfrutando d'un paséu hasta'l colláu Verde (1951 m), onde sí que garramos la cresta acolumbrando les grandes cotes del macizu del Cornión, destacando penriba toes na nuesa posición la Peñasanta d'Asturies.

Crestiamos el final con precioses vistes y con un destrepe nuna frecha enantes del cumal

A pocu d'aportar al final del crestéu, tendremos una frecha, que nos fai facer destrepar hasta'l fondu, alcontrando una bona salida per un canalizu hacia los h.oyos de Mercader. Treparemos unos pocos metros hasta la cumera la xerra y fadremos los caberos pasos hasta'l so puntu más altu: El Picu'l Camperón de 2009 m.

Tamos felices, tuviemos un día ablucante, con bona temperatura y bones vistes, nun podemos más que sentanos caún colos sos camientos y mirar en tola redolada cume tres cume, picu tres picu, monte tres monte... son tantes les posibles ascensiones, les posibles aventures p'algamales que val más relaxase y dexar de pensar por unos minutos.

Cumal nel picu'l Camperón (2009 m)

Asina lo facemos y dexámonos llevar pola fame y tamién pol cansanciu. Taremos media horina nel cumal, hasta que decidimos descender, llevándome personalmente na cabeza too esa muria dende les Garites hasta la Cabra Blanca... ye xabaz enforma y m'encantaría conocela.

Tornamos a la ruta, con 5 hores de duración, destrepando del cumal hacia la frecha onde vimos la posible baxada que defechu acaba siendo un descensu estupendu hacia los h.oyos de Mercader y hacia la nuesa salida hacia la fastera contraria de la Xerra Mercader, pela la Boca Corrobre (1910 m).

Baxamos pela frecha a la Boca Corrobre col envís de faldiar pembaxo los Llastriales

Baxaremos per un típicu sistema de terraces hasta la Boca Corrobre, baxo l'atenta mirada del Camperón y dende ellí, acolumbramos una especie de cierre ganaderu pervieyu nun mayaín, el de Corrobre. Decidimos dir hasta ellí, albidrando una posible baxada hacia la sienda la H.ocica pero desvíase muncho hacia Vegabañu.

Nun mos interesa y decidimos faldiar pembaxo de los nomaos Llastriales, un sistema de llambries calices que cuelguen dende la xerra Mercader. Nós, diremos paralelos nun tarrén amestáu que sacante dalgún tramu más abegosu sedrá cenciello de caleyar, destacando tamién los atrautivos canalones (Agua, Pedromontes, Reh.uelle...) que dende la nuesa posición déxense cayer hacia'l banzáu de la H.ocica.

Ensín priesa sedremos a aportar hasta la mayada d'arriba de L'Abedulu, del que malpenes alcuéntrense dalgún restu d'edificación y dalgún pasu armáu, anque hai que dicir que ganao había abondo nesta dómina del añu.

Pasamos pelo que queda de L'Abedulu descendiendo a Velluenzu

De L'Abedulu (1350 m), cuesta un pelín garrar un camín bono hacia la parte baxa, onde acolumbramos los senderos que vienen tol valle alantre penriba'l banzáu. Diría que garramos el más complexu de toos, teniendo que destrepar per una especie de tabayón y agora sí garraremos bon senderu que tien de llevanos hasta'l guapísimu mayáu de Vellanzu pasando pel colláu Traviesu (1020 m).

Nesta mayada, empalmamos col camín que vien dende Vegabañu y ya baxaremos per camín empedráu hacia la ponte'l Restañu, onde aportamos 8 hores y media dempués dende que saliéramos ensín saber mui bien que dificultaes díbemos alcontrar, sobremanera nos Seos d'Ozania.

En resume, ruta de les más guapes, completes y motivantes que se pueden facer nel Cornión y too casi ensín perpasar los dosmil metros d'altor, anque los datos amuesen que nun ye una ruta nin muncho menos sele con 14 km de percorríu y 1300 ms de desnivel aproximáu.

Que vos preste....

Camudando'l Camín col Cornión

Nesta ruta ficimos el Camperón (2009 m): Dosmil del conceyu d'Amieva

Ver progresos en: Retos montañeros 

No hay comentarios:

Publicar un comentario en la entrada