lunes, 12 de octubre de 2015

Sotres (Cabrales) - Tiros Navarro y Santiago

26 de Xunetu de 2015

Track: Sotres (Cabrales) - Tiros Navarro y Santiago


Día sueltu agostizu nel que tamos sólos Kíla y yo, poro quedar en casa nun yera una opción, tirando pa Picos col envís de saludar a los amantes del vivac (Pangua, Raúl, César y Haritz). Madrugamos enforma, plantándonos en Sotres pel camín davezu a les 7 y media de la mañana.

Esta vegada, magar del viaxe de coche dende Xixón a Posada, la xubida hasta H.ortigueru y la travesía de pueblos cabraliegos per Canales, Poo, Carreña y Arenas, nun tuvimos almuerzu y siguí con Kíla hasta la curvona de Sotres, saliendo al trote hasta las Vegas de Sotres en menos de media horina.

Corremos con L'Escamelláu de fondu dende Sotres (933 m)

A la postre, esta carrerina mañanera xunto a una ascensión esprés hasta'l Pozu Las Moñetas, camiento que pasóme factura, anque nel intre, demientres picaba dalgo xunto col restu de collacios nun yera a pescancialo.

Ellí, tuvimos la suerte de ver en direutu, aparte de les maraviyoses vistes a la Peñe Castil, como l'helicópteru contratáu per unos espeleos dexaba víveres pa una bona temporada, pasiándose durante varios vuelos hasta alcontrar el llugar del campu base.


Lloñe de poder esfrutar d'unos cereales con mermelada o delles caxigalines más que teníen, lo que más me sorprendió mirando l'inmensu sacu enllenu trastos, fué ver el mosquetón abiertu col que colgaba del helicópteru.

Nun sé como ye'l sistema d'apertura pa descolgalo, pero sí que sé de les fuercies que soporta un mosquetón abiertu y nun me fizo nin plizca gracia que se pasiase varies vegaes penriba mía pudiendo partir el mosquetón en cualesquier momentu.

Vivac nel Pozu Las Moñetas... tovía tan espertando cuando aportó'l páxaru

Sacante d'esti prestosu pero pocu seguru incidente, l'almuerzu colos cansaos collacios tocaba al so fín. El día anterior, xubieren hasta la Peña Vieh.a y taben dafechu reventaos, poro nengún animóse a acompañame a conocer una fastera del central que tenía un pelín dexada de la man.

Coles mesmes despedímonos, dexándolos recoyendo les mochiles y Kíla y yo, salimos penriba'l Pozu hacia'l valle las Moñetas, que nun ye otra cosa qu'una xuntanza de h.oos y morres, perdifíciles de siguir con ciertu orde, perdiéndome con muncha facilidá hasta nun día claru como pocos.

Navegando pel valle Las Moñetas con un calor infernal

Nun ye perdese de nun alcontrar camín, sinon que dacuando crucies un senderu meyor que'l que lleves y gárreslu y ves que nun te lleva na direición que paecía y así de continuu. Cola borrina metía, l'asuntu sí que pudiera ser peligrosu, pero nun día claru, nun tien más que baxar a un h.ou o xubir a una morra pa empobinate correutamente.

Ye perimportante tamién, conocer bien los cumales de la redolada ya que sirven pa orientase meyor que cualesquier cosa. Yo nesti día garré de referencia'l Cuchallón de Villasobrada, el cuál diba indicame que'l camín correutu yera siempre dexándolo a la mandrecha, pero sin averame demasiáu al cordal de H.uan de la Cuadra a la manzorga.

Alcontramos un fonte y ñeveros pa enfrescar un pocu nun día durísimu

Con estos finxos, diremos Kíla y yo, perpasando tol valle Las Moñetas, averándonos poquín a pocu a la base del llargu espolón oriental del Tiru Navarro... qu'hasta'l momentu nun vos dixera que yera l'oxetivu de güei.

En tol camín diremos sofriendo un calor cada hora más fuerte, teniendo que llibrar colos 3 llitros d'agua que llevaba ya intentando dexar a Kíla que se hidratase colos abondos ñeveros que dibemos alcontrando.

Aparte, pasaremos pela fonte de Mogu de la cual beberá Kíla nel ascensu y a la baxada tendré yo mesmu que garrar tamién agua, asína como nel propiu Pozu Las Moñetas, ya que como dixe'l calor va dir medrando a cada hora que diba pasando.

Garramos de referencia los Tiros Santiago p'ascender hacia'l Navarro

Pali, pali... voi aportando al altor d'unes pequeñes porres, unes con mayor presencia vertical y otres más amorraes... nomaes como los Tiros Santiago. Pel momentu, nun m'interesen res y sigo alantre, hacia'l Tiru Navarro, dexando esi llargu espolón a la manzorga y col envís de ganar per una amplia pedrera, el colláu pente los Navarros y los Santiago.

Así lo voi faciendo, hasta qu'una evidente canal me llama. Nestos casos, lo meyor ye facese l'estúpidu y siguir los planes trazaos, pero paséme de llistu y siguí la llamada de lo xabaz, metíendo nesi canalizu, que finaba nun pindiu ñeveru, pel que Kíla pasó como si nada pero yo con playeros d'aproximación, con bon tacu, pero playeros, paselu un pelín pior... ya que taba viendo una posible esnalada ensín frenu.

Ascensión per un canalizu-ñeveru hacia'l cumal del Tiru Navarro

Nun fué así y Kíla y yo, salimos del ñeveru hacia una faldera enllena piedres sueltes, peles qu'había que con curiáu pero avanzábase cenciello, hasta'l cumal Norte del Tiru Navarro. Equí, tendremos unes increyibles vistes del macizu central, tando nuna de les cotes más altes d'Asturies, en concretu na segunda más alta colos sos 2604 m.

Equí, cellebramos los dos una xuba de les grandes... non en dificultá, ya que xúbese andando dende'l colláu colos Santiago, sinon pol esfuerzu y pol calor que pasamos nos 1725 m d'ascensión direuta y tovía quedábanos tola baxada casi ensín agua. Facémonos les semeyes de turnu y mando a Kíla quedase quietina demientres voi averame hasta'l cumal central, nel que namái qu'hai que descender
una h.orcadina y trepar per un tarrén podre hasta los 2597 m.

Cumal norte del Tiru Navarro (2604 m)

Nun hai malpenes diferencia y la verdá, ye qu'esta montonera piedres central ye pa collecionistes... el Navarro Norte, ye un cumal espléndidu, de perbones vistes y que domina la so fastera, con dos collacios como son los Santana, del mesmu altor defechu, sólo superaos n'Asturies pol tremendu Torre Cerredu.

Son les 2 menos cuartu y llevamos una soba tremenda, poro picamos dalgo y entamamos el descensu, ya que necesitamos dalgo d'agua p'acompañar la xinta. Poro, decido baxar pel mesmu sitiu p'atacar la fonte'l Mogu, pero del cumal vamos facelo pela arista norte, que vien cenciella dende la collada colos Tiros Santiago.

Descendemos pela arista norte y pa xubir al Tiru Santiago occidental (2440 m)

Baxaremos per ella nun tris, viendo l'erru que fué xubir pel canalizu y aportamos a la collada X, picándome un pocu y xubiendo al Tiru Santiago más occidental de 2440 m que nun tien más que xubir andando hasta'l so cumal casi col emburrión que nos dió la baxada del Navarro.

Intenté que Kíla nun viniera conmigo por si había vuelu, pero yera una cume prestosina y xuntos tuviemos mirando pal otru Santiago, viendo qu'ésti, presentaba mayores dificultaes, raspiando casi la esguilad, siendo dalgo más altu que'l que tamos encumando.

Baxamos hacia'l Pozu intentando facer el camín más cenciello

Con dos montes nuevos, nun mos quedaba otra que baxar pel mesmu camín hasta qu'aportamos hacia la fonte, onde Kíla sacióse d'agua y yo, acabé la que me quedaba y garré más por si acasu. La xinta, dió pasu a una baxada interminable, intentando esta vegada nun liame polas Moñetas, pero.... nun hubo forma y volví a perder un pelín el camín bonu, anque rápidamente lu retomé, aportando d'igual mena, fechu polvu al pozu, con munchísimu calor y colos pies ensín recuperar tovía de la Travesera.

Dellos minutos coles pates nel llagu y siguimos la perrina y yo, nuna interminable baxada hacia las Vegas de Sotres, pa garrar a lo postreru la pista hacia Sotres, más interminable si ye posible, llegando al coche con una reventada perimportante anque col placer de facer una ruta en solitariu casi en Picos... alcontrándome namái que con xente que nun sabía nin per onde andaba... cosa que día
que pasa ye más cómun.

En resume... ruta que nel día ye una bona xabazada por mor de los 22 km, 2140 m de desnivel acumuláu positivu y negativu y les casi 11 hores, per un tarrén de los más gafos si'l día nun acompaña como debiera y aún así, acabar engarmáu ye de lo más posible.

Que vos preste!!

Camudando'l Camín nel centru los Urrieles

2 comentarios:

  1. Hola Berto
    Buena pateada compañeru
    El Valle las Moñetas en verano es un horno, una buena alternativa estando en los Navarros es bajar por la Canal de Vidrio, porque aunque la ruta se hace algo más larga, es más cómoda.
    Esta semana he compartido ruta con Iñaki que et envía un saludo.
    saludos, Manuel

    ResponderEliminar
  2. Conozco la canal del Vidriu... y la verdá p'allargar más la ruta nun taba la cosa jeje. Da-y un saludu a Iñaki de mi parte... va tiempu que nun lo veo

    ResponderEliminar