jueves, 17 de agosto de 2017

Travesera Picos 2016 - 2017

Del 8 al 11 de Xunetu de 2017

Track: Travesera Picos 2015 - 2016 (Próximamente)

Otru añu más, afrontábemos el final de la temporada 2016-2017 nel GM Xuan de la Borrina y como non, facíemoslo cola nuesa mítica Travesera per Picos. Tengo que dicir, que nun fue'l meyor añu de monte, sobretou na parte final de la temporada y la Travesera diba ser el remate final.

La verdá, ye que cuando les coses déxense un pocu al debalu, pues acaben por pasar coses así. La mió desmotivación nel monte, dexaron los preparativos de la Travesera pa demasiáu tarde y llueu por mor del lleno nun refuxu, tuve que camudar los planes.

Bayurosu grupu nel entamu de la Travesera en Poncebos

D'otra miente, la xente respondió positívamente al nuevu trazáu y apuntóse con ganes, teniendo hasta que reservar una habitación entera pal segundu día de pernocta. Pero como siempre, de lo albidrao al resultáu final hai un mundiu y nel monte, siempre hai que llevar más ases na manga que pa xugar al poker.

Perguapa semeya nel H.ou Los Cabrones

Tou entamaba con un bayurosu grupu de montañeros, animósos de patiar pel monte y cola grata sorpresa de la visita de Josean, Bea y Mariano, que vinieron con Fernan y Tito, a despedir a los valientes, almorzando toos xuntos n'Arenas.

Grupu reducíu pal restu de díes de la Travesera

Llueu, la primer estaya de la travesera convertiríase nun infiernu pa la mayoría de los integrantes, faciéndose perdura la canal escoyida pa xubir dende Poncebos hacia'l H.ou Los Cabrones. Esto fadría que de los trece que saliéramos de Poncebos, tan sólo llegáramos al refuxu de Cabrones, siete cansaos montañeros.

Reposando ya hidratando en Caín

Al día siguiente, a les baxes del día anterior, amestámos-y otres tres, ya confirmaes, más una más por llesión, asína que quedábemos tres miembros sólo pal resto la Travesera. Esí día, confirmábemos qu'esta Travesera diba ser símplemente eso, facer travesíes, porque nun llevábemos enerxía pa facer ascensiones aunque pillaren de camín.

Preparaos pa la tercer estaya bien cargaos d'agua en Caín

Dempués de descansar de luxo en Caín, magar d'un llargu descensu nel segundu día, atacábemos el tercer día, con munches ganes, al menos pola mió parte, de facer dalgo distinto a xubir y baxar canales, ya que necesitaba pal ánimu dalguna ascensión divertida.

En Vegarredonda con un camude de planes total

Pero como non, dempués de díes perbonos de meteo, tenía qu'entrar a participar tamién la nuesa querida borrina y torganos cualesquier opción d'intentar la ruta trazada y les ascensiones plantegaes. Aún más, esti día dibemos tener que camudar tolos planes y acabar en Vegarredonda envede d'en Vega d'Ariu, por mayor seguridá.

Cuartu día nel que tocaba calcetinada hasta Poncebos

Dar les gracies al refuxu de Vegarredonda, nel que pudimos durmir col refuxu enlleno xente y les disculpes al d'Ariu, pero nel monte les coses son así y cuando toca trazar otra ruta por condiciones desfavorables na meteo, hai que tener esperiencia y tranquilidá pa camudar los planes.

Nun día ablucante pasando per Ariu un día dempués de lo planeao

D'esta miente, el cuartu día, que debía ser más tranquilu va facenos trabayar n'otra llarga xornada de monte, pa travesar el cornión más caóticu y descender otra mítica canal pa comiéndonos tol Cares, acabar en Poncebos realmente cansaos.

Mentalmente desanimáu y cansáu de la temporada montañera, aporté a Poncebos, diciéndome internamente, que debía descansar tol branu del monte y dedicame totalmente a la escalada, pa intentar entamar con xeitu la siguiente temporada.

Un clásicu traveseru... tirar al contenedor los preseos montunos estrozaos

Sé, que los miós acompañantes nesta aventura en que convirtióse la Travesera, Silvia y Haritz, finaron con sensaciones dafechu distintes a les míes, ya que pa ellos yera la primer travesera que facíen íntegramente y eso marca.

Esti añu, nun sólo tengo que dar les gracies a los collacios que participaron, sinon pedí-yos perdón pola dureza del primer día y por esa canal innomable que supongo queréis escaecer pa siempres. A los qu'aguantaron conmigo los tres díes, Silvia y Haritz, da-yos mil gracies porque mi ánimu dempués de la criba del primer día nun yera'l meyor precísamente.

A los que tuvieron qu'abandonar por cansanciu, llesión o simplemente por trabayu, gracies y perdonái la soba y el percorríu pocu afayaizu (Tito, Fernan, Zori, Richar, Carlos, Natalia, Alberto, César, Raúl y Pangua).

Como siempre, vamos dexar unos datos a mou resumen y les correspondientes entraes del blog (que diré escribiendo lo más ceo posible):

Estaya 1: Poncebos (Cabrales) - H.ou Los Cabrones (Cabrales) (Próximamente)

Duración: ---
Llonxitú: ---
Ascensu: ---
Descensu: ---



Estaya 2: H.ou Los Cabrones (Cabrales) - Caín (Valdión) (Próximamente)

Duración: ---
Llonxitú: ---
Ascensu: ---
Descensu: ---

Estaya 3: Caín (Valdión) - Vegarredonda (Cangues d'Onís) (Próximamente)

Duración: ---
Llonxitú: ---
Ascensu: ---
Descensu: ---


Estaya 4: Vegarredonda (Cangues d'Onís) - Poncebos (Cabrales) (Próximamente)

Duración:  ---
Llonxitú: ---
Ascensu: ---
Descensu: ---


Totales:
 
Duración: ---
Llonxitú: ---
Ascensu: ---
Descensu: ---

viernes, 4 de agosto de 2017

Colláu Angón (Amieva) - Cantu Cabroneru

11 de Xunu de 2017

Track: Colláu Angón (Amieva) - Cantu Cabroneru


Seguimos con niveles de suerte ablucantes pal final de temporada del GM Xuan de la Borrina. Nesti casu, les nueses intenciones diben por conocer el nomáu traveséu de Peña Beza más l'ascensión al Cantu Cabroneru, pero como ya nos pasara na Travesera del añu pasáu, tuviemos qu'abortar la xera por mor del borrín.

Aún así, axuntáramonos un bon garrapiellu xente del grupu y con bon ánimu, entamamos a caleyar dende'l colláu Angón, onde ya tuviéramos va unos añinos p'ascender la guapa Porra Valdepinu. N'aquella ocasión tamien percorriéramos la trillada sienda del Arcedianu que si nun la conoces y ties bon día, ye agradable de patiar.

Cartelu del conceyu d'Amieva n'Angón (823 m)

P'aportar al aparcaderu d'Angón tenemos qu'aportar a Cangues d'Onís pel camín davezu dende Xixón y siguir pela N-625, pasando pelos pueblos de Cañu y Tornín, cruciando la ponte Dobra, pa entrar nel conceyu d'Amieva. Nesti conceyu travesaremos los pueblos de Miyares, Corigos, Pervís, La Vega Pervís onde topámonos col ríu Ponga nesti casu, y siguimos camín pasando per Santiyán, Precendi, Les Vegues, Campurriondi y Ceneya d'au saldrá a la manzorga la carreterina que xube hasta Amieva.

Al entamu del pueblu, sal una pista a la mandrecha, qu'empobinarános durante un llargu tramu hasta'l colláu Angón a 823 ms d'altor. Ellí como ya dixe, saldrá la sienda l'Arcedianu qu'aporta hasta Oseya de Sayambre.

Averándonos pel Arcedianu a Saubu

miércoles, 26 de julio de 2017

Tuíza Riba (L.lena) - Práu L'Albu

4 de Xunu de 2017

Track: Tuíza Riba (L.lena) - Práu L'Albu


Hai díes, nos que paga la pena quedase en casa o camudar los planes que ties d'entamu. Pero a los que nos presta dir de monte, nun sabemos de malos díes, nun sabemos de negatividá y siempre tenemos na tiesta la idega de xubir y a ver que pasa.

Que pasó esta vegada? Pues que ficimos tola ruta penmediu d'una borrina fonda y anque fizo dellos amagos de querer abrir pelos altos, nun fuimos a ver el sol en tol día y namái que lu sentimos calecer el pelleyu en contaes ocasiones.



Partimos dende'l refuxu del Meicín (1210 m)

miércoles, 19 de julio de 2017

San Andrés (Uviéu) - Guanga - Plantón - Grandamiana - Villanueva

20 de Mayu de 2017

Track: San Andrés (Uviéu) - Guanga - Plantón - Grandamiana - Villanueva


Paez ser que ta moda la ruta los tabayones de Guanga, lo cual ye mui d'agradecer ya que paezme una ruta cenciella y mui divertía de facer. Dígolo, porque la casa conceyu d'Uviéu a petición de Somos, quier facer d'esta ruta un atrautivu turísticu.

Personalmente, siguiendo coles entraes de los collacios Cienfuegos, Los de las Claras... faigo mi particular visión d'esti sistema de saltos d'agua, que puen facer les delicies de los senderistes nun día de calor pesáu como'l que tuvimos nós.

Preparaos na ponte sol ríu Trubia (X m)

martes, 27 de junio de 2017

Pendones (Casu) - Maciédome - Pandellanza - Tiatordos

7 de Mayu de 2017

Track: Pendones (Casu) - Maciédome - Pandellanza - Tiatordos


Tamos en mayu, díes llargos y rutes llargues suel ser el denominador común nel GM Xuan de la Borrina. Plantegábanos Benjamín una de les sos rutes d'esti añu, xuntando la Peñe Maciédome y el Tiatordos pela preciosa viesca de Pandellanza y como nun podía ser d'otra manera tocaba facelo realidá.

Otra cosa ye cuantos del grupu taben dimpuestos a facer una xatada tala. La verdá ye que nun creo que fuera pola ruta en sí, pero xuntámonos más bien pocos pa intentalo y Zori ya tenía claro que diba ser muncho pa ella y d'otra miente, Jenni que ta entamando a venir de monte nin siquiera diba plantegáselo.

Entamamos en Pendones (765 m)

martes, 20 de junio de 2017

Iondokorta (Bizkaia) - Lekanda

23 d'Abril de 2017

Track: Iondokorta (Bizkaia) - Lekanda


Segunda ruta de la Xuntanza 2016-2017, na que daremos un paseín mañaneru con ascensión al picu Lekanda. Pa ello, dempués del almuerzu, preparámonos nes afueres del refuxu del Baskonia y salimos caleyando pista un bon garrapiellu de montañeros.

Posando nel refuxu de Iondokorta (721 m)

viernes, 16 de junio de 2017

Atxarte (Bizkaia) - Alluitz

22 d'Abril de 2017

Track: Atxarte (Bizkaia) - Alluitz


Hai rutes, nes que según vas caleyando, ascendiendo, descendiendo, pasando les hores... nun yes a sintir otra cosa que plenitú. Plenitú total nel percorríu, plenitú total nel ambiente, plenitú total na belleza del llugar...

Y ye que nun pueu imaxinar, una ruta más perfeuta pa les hores de les que dimponíemos, ya que nes xuntances la parte montuna ye perimporante, pero tamién la parte folixera y tar nuna mesa d'alderique o tranquilamente nel pueblu de turnu tomando una cerveza, ye necesario enforma.

Poro, dar les gracies a Fernan y a Tito, por amosanos una ascensión entretenidísima, completa y que casi ensin querer faise hasta curtia de lo disfrutona. Agora, quédome cola sensación de que van tenelo complicáu p'alcontrar dalgo que lo supere jeje.

Puntu partida n'Atxarte (285 m)

viernes, 9 de junio de 2017

Xuntanza Asturvasca 2016 - 2017

22 y 23 d'Abril de 2017

Sétima Xuntanza Asturvasca (Eusko-Astur Biltzarra, esta vegada en tierres hermanes vasques, tomando como campu base, el remocicáu refuxu del Baskonia Mendi Taldea. Tenemos que dicir, antes de na, que tuvimos tan a gustu y prestónos tanto'l llugar, que pola nuesa parte, taríemos encantaos de tornar tolos años a Iondokorta.

Nós, como somos probetayos, tenemos qu'andar moviéndonos d'un llau a otru d'Asturies, non tanto a la gueta de nueves rutes que compartir, sinon d'un llugar afayaizu onde sintámonos a gustu y podemos xuntanos la mayor cantidá de xente posible.

Escudu del Baskonia Mendi Taldea

Darréu, camiento que n'Asturies sedrá imposible nin tan siquiera averáse al númberu de participantes d'esti añu y ye que la llamada a la nuesa visita nel Baskonia fué acoyida de bon gustu y pudimos poner cara a munchísima xente del grupu que tovía nun tuviéramos el placer de conocer.

Como non, tampoco faltaron na nuesa particular collación Bittor, Oscar, Mariano, Jose Antonio y Bea, que suelen ser xente avezao a estos alcuentros. Los demás, anque nun mos conocíen más que d'oídes tratáronmos como si nos conociesen de tola vida y eso ye mui d'agradecer, poro nun pudimos colar más contentos d'Euzkadi.

Cocina y habitaciones del refuxu de Iondokorta

Sábadu 23 d'Abril:

Axuntarémonos nel polideportivu de Basauri, magar de madrugar de más, ya que nun controlamos mui allá los tiempos del viaxe y tuviemos que parar a almorzar una primer vegada y como llegamos sobraos, pues almorzamos con caña incluida una segunda nel propiu polideportivu.

Pali pali, vamos alcontrándonos con xente conocío y con xente nuevo, hasta formar el grupín de vascos y asturianos que van dir de monte. De tarde, tendremos la suerte de conocer a munchísima xente más nel refuxu.


Echando un gabitu na colocación de la bandera'l Baskonia

Conformáu el grupu, salimos en caravana hacia Atxarte, llugar pernomáu por allugase una escuela d'escalada con hestoria: Atxarte y una horripilante cantera que casi acaba con esti guapu llugar. Nós, dexaremos los coches y fadremos la siguiente ruta:

Atxarte (Bizkaia) - Alluitz

Dempués d'esfrutar d'una de les rutes más prestoses de los últimos tiempos, saldremos d'Atxarte hacia Durando, p'ascender el puertu d'Urkiola y dir a tomar un merecíu refrescu nel pueblu d'Otxandio, llugar de triste hestoria, con bombardeos al entamu la guerra civil que casi desanició tol pueblu.

Aparte de la hestoria, el pueblu tien un merecíu paséu, con muncha cai empedrao onde tomar dalgo nos chigres y tar a gustu. Esta vegada, tuvimos a bien tomar un pocu de txakolí, teniendo que colar d'Otxandio, más pola hora de la cena que poles ganes.

Momentos de folixa na cena y na post-cena

Colaremos d'Otxandio y fadremos un enguedeyáu camín hasta pillar la pista en Ipiñaburu que nos tien de depositar dempués de muncho xubir al refuxu del Baskonia Mendi Taldea en Iondokorta, onde pasamos al momentu d'abrazos y presentaciones.

Con ambiente increyible, diremos garrando sitiu nes habitaciones, duchándonos por turnos y pasando una agradable precena, compartiendo rises, culetes de sidra, cerveces... hasta qu'aportó la cena. Nun podemos más que dar les gracies pol menú que nos ufrecieron con un bacalao que saltábense les llárimes.

De la parte postcena, ya nun falamos, porque si amestamos el vinín de la cena, que taba bien rico, colos oruxos posteriores y hasta sidra escanciao a la lluz del frontal... ye cenciello imaxinar como fuimos la mayoría pa la cama.

Domingu 26 d'Abril:

Al día siguiente, llevantámonos con dalgo de resaca dalgunos y otros con muncha, pero como ganes de tornar al monte siempre tenemos, almorzaremos pa poner el cuerpu un pocu a tonu positiviu y ponemos les botes pa salir de monte dende'l propiu refuxu, faciendo la siguiente ruta:

Iondokorta (Bizkaia) - Lekanda

Dempués d'una rutina muncho más sele que la del día anterior, vamos llegar con un secañu perimportante tanto pol calorón que facía, como polos escesos de la nueche anterior. Asina que tocó rehidratase con calma y hasta echase un ratín una siestina enantes de xintar.

Semeya de grupu nel domingu pela mañana

La xinta y el montaxe, de primera otra vegada más, colos clásicos caparrones, que son unes fabes pintes a los qu'amiéstase-yos una especie de compangu, asína que la fartura y recuperar el cuerpu enforma yera dalgo cenciello.

Dempués de la nueche anterior, tol mundiu fue muncho más comedíu coles bébores espirituoses y poquín a pocu fuimos amatagando y dexándonos dir a una relaxada sobremesa, hasta que la hora convidábanos a recoyer y preparar la vuelta a la realidá.

Preparaos pa la xinta dempués de dar un bon paséu

Una realidá que diba llevanos a tener que conducir durante unes horines hacia la nuesa Asturies. Con un pocu de pena, ya que pasábemos otru día de xuru peles tierres hermanes vasques, vamos despidiéndonos ún a ún, con un esto hai que repetilo y nun ye que nos faiga falta decilo, porque ya van 7 años de xuntances y les que nos queden.

La próxima más... y n'Asturies.

Xente astur que vieno a disfrutar: Raúl, Richar, Zori, Alberto, Natalia, Carlos, Benjamín, Haritz y Berto.
Xente vasco que trabayó y tamién disfrutó:
A la cocina Pedro y Edurne como xefes, cola aida d'Iñaki y Aitor y la collaboración de otro Iñaki y otra Edurne y los pinches de cocina: Mariano, Oscar y Konstan controlando

En la parte montañera del Alluitz Tito y Fernan, y de sofitu per Urkiolamendi Txutxi, Angel y Loli.
Al Lekanda ficiéronmos compaña Kike y Aurea, Juanan, Bittor, Jose Antonio, Bea y Txemi.

miércoles, 31 de mayo de 2017

Castroviejo (Soria) - Muñalba - Tres Provincias

15 d'Abril de 2017

Track: Castroviejo (Soria) - Muñalba - Tres Provincias


Casi vien siendo una tradición, que los díes que paso en Soria de vacas, faiga una escapadina a dar una vuelta a los montes más altos de la provincia. Esta vegada quería conocer un pelín meyor los Picos d'Urbión entrándo-yos pela so fastera más occidental.

Pa ello, Miguel y yo, vamos averanos hasta Duruelo de la Sierra, siendo'l camín dende'l Burgo de Osma, direición Soria pela N-122 hasta'l desvíu de la SO-910 hacia Abejar. Ellí, garramos la CL-117 que va pal banzáu de la Cuerda del Pozo y bordiándolo pela manzorga, pasaremos per Molinos de Duero, Salduero, Covaleda y enantes d'entrar a Duruelo, saldrá una carretera hacia Castroviejo.

Saldremos de Castroviejo (1554 m)

jueves, 25 de mayo de 2017

Altu Ventaniella (Ponga) - Les Pandes - Pileñes - Miédome

9 d'Abril de 2017

Track: Altu Ventaniella (Ponga) - Les Pandes - Pileñes - Miédome


Cuantayá que nun tornaba pel Altu Ventaniella, anque facía menos tiempu que tuve per dalguna de les sos mítiques peñes. La primer vegada, nel 2010, facíemos Ten y Pileñes y fae muncho menos tiempu, tuviéramos en Ten saliendo dende la Uña.

Esta vegada, la idega yera ascender al Pileñes y facer una circular conociendo fasteres del norte d'esta peñe. Pa ello, aportaremos al Altu Ventaniella , dempués del llarguísimu viaxe dende Xixón per Autovía'l Cantábricu y N-625 que dende Lloviu déxanos en Cangues d'Onís.

Grupu nel Altu Ventaniella (1194 m) preparaos p'andar