sábado, 21 de noviembre de 2015

Vega de Cien (Amieva) - Picu Carriá

10 d'Ochobre de 2015

Track: Vega de Cien (Amieva) - Picu Carriá



Esti añu, nes miós rutes seleicionables nin quise escoyer rutes complexes nin casi tampocu rutes d'un altor descomanáu, poro intenté garrar montes que tuvieran un toque especial poles sos vistes y pol so percorríu... el primer d'ellos que tuvimos ocasión de facer fue'l Picu Carriá nel conceyu d'Amieva.

P'arribar, como siempre, aportaremos a Cangues d'Onís pela autovía'l Cantábricu y la N-625, desayunando nel chigre de la Huera, pa siguir pela N-625, pasando pelos pueblos de Cañu y Tornín, cruciando la ponte Dobra entrando nel conceyu d'Amieva. Nesti conceyu, travesaremos los pueblos de Miyares, Corigos, Pervís, La Vega Pervís onde topámonos col ríu Ponga nesti casu, y siguimos camín pasando per Santiyán, Precendi, Les Vegues, Campurriondi y Vega de Cien onde dexamos el coche y preparámonos pal traxín.


Partimos de la ponte sol ríu Seya en Vega de Cien (201 m)

L'anéudota del día tuviémosla demientres preparábemos los trastos, cuando Raúl nun yera a meter el pié na bota de monte, porque había un sapu dientu. Increyible pero ciertu, nun me dió tiempu a sacá-y un semeya pero riir, riímonos enforma, jeje.

Con pelín d'ascu por parte de Raúl y les botes puestes salimos cruciando la ponte y nel crucie empobinámonos hacia la pista que cuerre al llau del ríu Seya. Ye una pista cómoda y amplia qu'asciende hacia l'este aportando nun par d'envueltes a la braña del Pregondón, onde ellabórase un quesu perbono, del tipu gamonéu.

Ascendemos per bona pista pasando pela braña de Pregondón

Dende Pregondón tendremos vistes hacia la fastera d'Amieva... destacando como non la Xerra d'Amieva, pero llámanos l'atención la riega d'Obrangu col canal del Dobra abiertu a esgaya y préstanos munchísimu la vista hacia'l Picu La Corona... enriba del pueblu d'Amieva.

Xubiremos per Llavayu hacia l'altu qu'hai penriba de Vega de Cien... nomáu como L'Atalaya y d'ellí aportaremos al crucie en Moneru, per onde baxaremos a la vuelta hacia Argolibiu. Nel intre, fadremos envuelta a la manzorga empobinándonos hacia'l valle d'Oria entrando per Fresnéu.

Facemos camín pente los mayaos de Moneru y Oria

Fadremos les envueltes de Fresnéu hasta que vemos en Praumonte una cabaña hacia la que salímonos pa llueu dir pegaos a un paré per un senderín que tien que dexanos nel mayáu de Coviella, dende'l que vemos tol valle d'Oria pel que debemos ascender hacia Carriá.

Pa ello faldiamos pel prau hasta'l final de Coviella, metiéndonos per un senderín que crucia una viesca hasta aportar a la fonte L'Escalín. Aparte de garrar agua, alcontraremos un senderu cómodu que llevarános hacia l'oriente dexándonos casi na parte baxa del Picu Robre... demasiáu al este.

Tenemos que travesar dende Robre hacia'l Picu Carriá

Hai que dicir que muncha xente llega hasta'l Picu Robre y llueu crestea hasta Carriá pero nun yera esa la nuesa intención, así que camudamos el sen y siempre per senderos bien definíos averámonos hacia la faldera del picu Carriá... el cual dende la nuesa posición vemos ya el cumal cláramente.

Pasaremos pembaxo de la collada Robre onde oyimos como'l vientu sopla con ganes y siguimos alantre hacia'l cabezu calizu que ye la cume del Carriá, quedándonos alloriaos coles vistes de Picos una vegada que superamos l'altor de la Cabeza la Maeda.

Les vistes son increyibles en toles direiciones

Con casi 4 hores y media de ruta aportamos a los 1429 m del picu Carriá onde alcontrámonos con otros montañeros colos que charramos un ratín y coincidimos en baxar a xintar a un llugar un pelín más protexíu.

Aún así, echamos un bon ratín na cume ya que les vistes del macizu del Cornión son inmeyorables y que dicir tamién de montes de Ponga y Casu, como Peña Ten, nel que tuviéramos va pocu tiempu, Zorru, Recuengu, Tiatordos, Pierzu.... perguapes vistes y perguapos montes.

Mui contentos nel Picu Carriá (1429 m).. el día taba pa ello

Un cuartín d'hora nel cumal y descendemos hacia la collada Robre decidiendo esta vegada baxar a pinchu ya que vémoslo asequible, así que coles mesmes baxaremos pela Praería d'Oria que nun ye otra cosa qu'una pindia canal herbosa, onde a metá de camín decidimos parar a xintar casi media horina.

Llueu, retomaremos el descensu cómodamente per praos hasta aportar a la parte alta de la fonte L'Escalín ya sí que tomamos el mesmu senderu de la viesca, ya como'l so nome indica baxar pela Cueste La Maeda... nun ye lo más encamendable.

Les vistes del oriente astur acompáñanos na baxada de Carriá

Aportaremos a Coviella, baxando esta vegada pelos praos hasta la última cabaña, envede la travesía que ficiéramos pa xubir, hasta dar con una pista pela que baxaremos un pelín pa tornar a xubir hasta Fresnéu onde saliéramos pel Praumonte nel ascensu.

Equí, per pista siguiremos hasta Moneru, onde esta vegada siguimos de frente cruciando pela guapa braña hasta'l final del mayáu onde topámonos con un fayéu con un guapísimu camín de piedra que desciende la xerra La Canal hacia'l pueblu d'Argolibiu.

Baxamos per Argolibiu hacia la Vega de Cien

Pasiaremos per Argolibiu saludando a los paisanos y baxaremos ya per pista primeru y hasta per un cachín de carretera que fáisenos enforma llargu hasta aportar de nuevu hasta la Vega de Cien col atapecer sol picu Canellín penriba los Beyos... otru d'esos que paez ser que paga la pena visitar.

En resume... ruta mui, mui guapa con esi tastu al oriente astur de caliza y grandes montes, na que percorrimos 17 km durante 8 hores anque ye rebaxable abondo ya que l'ascensu per pista fué mui tranquilín anque los 1490 m de desnivel tamién son un datu a tener mui en cuenta.

Que vos preste!!

Camudando'l Camín nos Beyos

2 comentarios:

  1. Bien guapa Berto, una vegada tan solo xubimos por esi llau y muches dende Collá Llomena.
    Bien bona la anecdota del día jajajajajaaa

    ResponderEliminar
    Respuestas
    1. Guapu monte... nun lo conocía tovía y prestó muncho. Lo del sapu fue increyible jejje

      Eliminar