martes, 24 de marzo de 2015

Amieva (Amieva) - Xerre d'Amieva

8 de Payares de 2014

Track: Amieva (Amieva) - Xerre d'Amieva


Sí, un día más en mui pocos meses tamos de nuevu n'Amieva. Les anteriores vegaes visitáremos la Porra Valdepinu y el Camperón, teniendo nesta ocasión unos oxetivos menores n'altor, pero bien guapos en cuanto a vistes hacia'l ríu Dobra y el Cornión.

Como siempre aportaremos a Cangues d'Onís pela autovía'l Cantábricu y la N-625, desayunando nel chigre de la Huera, pa siguir pela N-625, pasando pelos pueblos de Cañu y Tornín, cruciando la ponte Dobra entrando nel conceyu d'Amieva. Nesti conceyu, travesaremos los pueblos de Miyares, Corigos, Pervís, La Vega Pervís onde topámonos col ríu Ponga nesti casu, y siguimos camín pasando per Santiyán, Precendi, Les Vegues, Campurriondi y Ceneya d'au saldrá a la manzorga la carreterina que xube hasta Amieva.

Partimos del pueblu d'Amieva (584 m)

Dexamos el coche nel aparcaderu y preparámonos pa entrar al pueblu pel llau de la ermita travesándolo hacia la parte alta, onde sal una pista formigonada que xube hacia'l colláu de Rerdes, teniendo siempre a la vista los nuesos oxetivos de la Xerra d'Amieva: El Primiellu y los Redondos.

Xubimos hacia'l colláu de Rerdes (804 m) onde hai una aberración de mirador

Escaeceremos l'horror de mirador que ficieron nesti guapu llugar y saldremos per un senderu en direición a la xerra d'Amieva. Pa garralu, travesaremos una portiella y llueu llibrará un prau pela manzorga hasta dir ascendiendo per un senderín marcáu per pindiu abondo.

Les vistes ampliénse demientres dexamos a lo baxo Amieva

Hai qu'andar sollerte pa nun tracamundiar el bon camín, ya que crúcense dellos senderos y según el que garremos va dexanos más lloñe o más averáu al nuesu destín na Vó Parriellu, colláu que va danos pasu a ganar la panda hacia'l Picu Primiellu.

Aportamos a la Vó de Parriellu garrando l'arista al Picu Primiellu

Dicir, que nesta fastera d'Asturies, nómense a los collaos onde acolúmbrense dos valles como Vos... siendo cláramente un llugar onde pueden dase voces pa llamar a daquién o más bien al ganao, poro con esti guapu apunte toponímicu, ensín danos cuenta aportamos al vértice del picu Primiellu de 1229 m.

Semeya de cume nel Picu Primiellu (1229 m) con bona ventolada

Con menos de dos hores andaes y munchu vientu y fríu nel cumal, empobinámonos hacia'l puntu más altu de la xerra d'Amieva: Los Redondos. La verdá ye que nun ta pa munches esperes, asína que baxamos apriesa hacia l'abellugu de la Vó Timarru, penriba de la Campera Llarga.

Descensu hacia la Vó de Timarru col envís d'ascender a los Redondos

El día ta murniu y una boina tapa'l macizu del Cornión, dexándonos ensín ver los ñevaos cumales y teniendo que contentanos coles cayíes hacia'l Dobra como mayor espeutáculu del día. Personalmente, estes vistes sóbrenme pa trazar nel maxín delles rutes qu'intenten baxar a lo fondu'l valle y poder xubir hacia'l Cornión per canales imposibles.

Cenciellu ascensu a los Redondos que regálenmos vistes hacia'l Dobra

Toda ruta empalma con otra... y siempre ye al traviés de la nuesa mente. Siempre, día tres día qu'ando pel monte, trazo aldovinando pasos nos mapes y nel tarrén acolumbro pal futuru otres zones d'Asturies que conocer.

Los Redondos (1248 m) puntu más altu de la Xerra d'Amieva

Así, ente dellos camientos pasamos per Timarru y xubimos hacia los 1248 m de los Redondos, puntu más altu d'esta guapa xerra d'Amieva y perfectu mirador a la mecedura de los ríos Pelabarda, H.unh.umia y Dobra.

Baxamos por Seoriu hacia la pista que xube hacia Angón

Nel intre, decidimos que si apuramos somos a tomar el vermú y hasta xintar dalgún menú del día, poro, baxaremos a Timarru y descenderemos direutos hacia Seoriu pasando dempués pela Barga Seoriu, col envís d'aportar a la cabaña de la Guariza Vieh.a.

Descendemos con calma per pista hacia Amieva con vistes hacia'l Cornión

Dende ella, namái que tenemos que tomar la pista formigonada, que pasando poles Sangres y L'Esqueru, entrará pel barriu altu de la Cueña nel pueblu d'Amieva magar de 4 hores de fría aunque mui prestosa ruta mañanera.

En resume, con eses 4 hores, 7,5 km y 800 m de desnivel acumuláu, mudámonos de ropa y dempués del vermú n'Amieva, baxamos hasta Santiyán onde metímonos pal cuerpu un menú del día bien rico na Ruta.

Xintando na Ruta en Santiyán

Ta la próxima...

Camudando'l Camín n'Amieva

No hay comentarios:

Publicar un comentario