lunes, 16 de noviembre de 2015

La Uña (Valdeburón) - Peña Ten

27 de Setiembre de 2015

Track: La Uña (Valdeburón) - Peña Ten



Cuarta vegada que voi a pola Peña Ten y cómo nun querer facer esta maraviya de monte les vegaes que toque. La primera acabáremos con fartura y reventaos de fozar na ñeve y la segunda tamién acabáremos reventaos pero por xuntar Ten y Pileñes, ese par de peñes que dieron pié a la semeya de portada de Camudando'l Camín.

La tercer vegada había que camudar un plizcu la ruta asina que fuimos hasta la Uña pa xubila pela fastera llionesa, pero nel puertu Tarna taba ñevando y la opción fué conocer el Tabayón del Mongallu, poro la cuarta sí que fuimos con un día preciosu hasta La Uña. La pena fué nun dir nes meyores condiciones magar de durmir nel coche tres d'esfrutar del Seronda Fest de cerveza artesano en Rusecu.

Puntu de partida na redolada de La Uña (1198 m)

Asina que col cuerpu fechu una llaceria llevantámonos p'almorzar en Rusecu y siguir pela As-17 direición Puertu Tarna, empobinándonos pente pueblos casinos de Tañes, El Campu, Bezanes y La Foz. Llueu, con un día soleyeru enforma, baxaremos hasta La Uña onde dexaremos el coche un kilómetru aprosimáu enantes del propiu pueblu, baxo los parés de la Peña Torbenera onde tenemos una escuelina d'escalada que ya visitáremos.

Demientres preparámonos pa salir, acolumbro una sombra moviéndose pente'l ganáu nos praos d'enfrente y doime cuenta que ye un llobu, pudiéndo-y sacar una semeya bastante curiosa a pesar de lo lloñe que taba. Con esto, ya tengo visto pel monte les dos másimes autoridaes xabaces de la fauna astur: l'osu y el llobu.

Caleyamos per pista al llau del Esva hasta topanos cola Peña Ten

Magar d'esta visión pantasmagórica, cruciamos la carretera hacia'l puertu y garramos una pista a la mandrecha que sal al llau d'un cartelu d'información del parque rexonal de Picos d'Europa. Per esti camín tan cómodu, diremos percorriendo dellos kilómetros que coinciden colos primeros del rigu Esla.

Rigu Esla que sorprendiónos pola guapura de les sos poces y tabayones al nuesu pasu pela pista y que llevónos entreteníos hasta'l desvíu de la pista hacia la braña El Cantil. Ellí, ábrense dos opciones: tirar a l'ascensión normal de Ten dende la fastera asturiana o siguir pel valle de Las Corvas hasta la Mah.ada las Corvas onde alcontraremos una cabaña solitaria.

Xubimos tol valle Las Corvas hasta'l colláu final del valle onde les vistes son brutales

Dicir que ye facer una envuelta perllarga, ya qu'aportar del valle las Corvas hasta'l colláu faese pesáu, anque d'otra miente ganamos unes vistes increyibles del Cornión, pero a cambiu llueu tenemos un crestéu caleyando hasta la vertical de la cabaña pa garrar finalmente'l senderu de xubida a la Peña Ten.

Tornamos al bon senderu hacia la Peña Ten

Tien munchu más xacíu, empobinase hacia la cabaña acortando per una amplia canal enantes d'aportar a la propia braña. Asina, tamién ganaremos un cómodu ascensu pero muncho más curtiu que'l que ficimos nós siguiendo una especie marques verdoses. La verdá ye que perdimos el tiempu pero bono cómodu fué enforma en comparanza cola pindia ascensión "normal" dende la fastera astur.

Garramos tol senderu y facemos la prestosa arista hasta la Peña Ten

Con too ello, cuando ves el vértice enfrente tuya y tan lloñe desanima, pero aína méteste nel senderu perbonu que dirá per tol filu sur y llueu suroeste hacia'l cumal. Asína diremos con calma ascendiendo hasta aportar sin mayores problemes a los 2141 m d'altor de la Peña Ten.

L'anterior vegada qu'encumáremos la Peña Ten, siguiéramos hasta la Vegadona onde nel colláu anterior algamáremos una pindia y prestosa baxada hasta'l colláu Las Arriondas, onde Charly esperara por Simón y por mí, demientres ascendiamos al Pileñes tamién pegándonos una xatada bien curiosa.

Cumal de la Peña Ten (2141 m)

Pero esta vegada... dexámonos de palices y compartimos tranquilamente cumal con delles presones más, xintando los pinchos lo más relaxádamente posible. La verdá ye que'l día taba pa echar la siesta anque entre que nun salimos mui ceo y que la vueltona que dimos fízonos llegar un pocu tarde al cumal échamos a andar p'abaxo magar de 45 minutinos esparciendo.

La baxada ficímosla nel mesmu sen hasta garrar la eterna panda suroccidental pela que xubiéramos Charly, Simón y yo, baxándola a un ritmu bien curiosu p'arribar a la mayada del Cantil, al traviés de les Pedrices de Ten dempués de dalgo más d'una hora baxando.

Baxamos tola panda hasta'l Cantil onde tomamos la pista de nuevu hacia La Uña

Colos pies pelín machucaos del calor y de los 3 díes anteriores nos Urrieles paramos a la vera'l rigu Esla pa probar les sos agues. Agua que taba dafechu conxelada, pero que dió un toque d'spa a una ya de por sí sele ruta. Coles mesmes, pondremos les botes y siguiremos pela pista hasta l'aparcaderu onde dexaremos los coches casi 7 hores y media enantes.

En resume, ruta facilina que sacante'l desnivel a superar de 1075 m nun tien denguna dificultá téunica, más qu'escoyer bien los senderos más cómodos y superar con calma los 14,5 km de percorríu y de pindiu desnivel como comentamos enantes.

Perfeuta pa dar un pasín más nel monte... que vos preste!!

Camudando con llobos...

No hay comentarios:

Publicar un comentario