jueves, 30 de marzo de 2017

Ruayer (Ayer) - L'Orria - La Fitona - Carbayalín

25 de Febreru de 2017

Track: Ruayer (Ayer) - L'Orria - La Fitona - Carbayalín


Ya ta escapándose l'iviernu n'Asturies, siendo ésti ún de los más secos de los últimos años, con mui poca precipitación y ñevaes en cotes altes pero ensin ser denguna maraviya defechu, poro teníemos ganes de metenos nuna ivernal y poner los crampones un puquiñín.

Pa ello, tornaremos al valle del rigu Ayer, saliendo del so caberu pueblu, Ruayer. P'aportar a esti pueblín facemos la ruta davezu dende Xixón, pela autovía minera hasta Mieres del Camín, onde garramos la A-66, hasta'l desvíu al corredor del Ayer.

Salimos de Ruayer (801 m)

Pela As-112, pasaremos per Morea, L'Escuyu, Los Estrul.lones y Cabanaquinta, siguiendo pela AS-253 per L.levinco, Entepenes y Col.lanzo pa siguir pela AE-6, travesando dellos pueblos como Cuergo, L.lamas, Rumañón, Casomera, La Paraya, pasando en coche les foces del ríu Ayer y aportamos al nuesu aniciu de ruta, Ruayer.

Va dellos años, saliéramos tamién dende Ruayer pal guapísimu ascensu a la Pena La L.laguna y esta vegada vamos llevar durante un bon ratu'l mesmu camín, baxando hacia la riega L'Orria y siguiendo per pindia pista alantre pasando pel Reconco, la Orellina o'l Rebel.lao, onde dixebramos ambes rutes yéndonos hacia la Braña L'Orria.

Xubiendo dende Ruayer hacia la braña L'Orria

Metíos de plenu nel Val.le L'Orria entraremos nun tramu de mayaos perguapos pasando lo primeru per Ortigosa, pa entamar delles envueltes dexando L'Orria a la nuesa manzorga y xubir pela Vegona y la Pozona onde les vistes hacia la muria caliza del picu Morgáu son ablucantes.

Nel intre, entamamos a pisar les primeres ceyes de ñeve y poquín a pocu nos tramos más sombríos veremos que casi de xuru vamos necesitar llantar los crampones p'avanzar más alantre. Nun tardareremos muncho más y conocer la situación y al altor del Arrañaeru (1560 m) decidiremos que ye bon momentu pa calzase curiosu.

Les vistes sobre'l mantu ñeváu enchénmos de felicidá

Una vegada que tamos preparaos, cruciaremos les caberes riegues que cayen dende la L.lomba'l Bolero y de secute entraremos dafechu nuna panda de ñeve increyible na que faise una maraviya caleyar sintiendo'l cruxir de los pinchos sola capa xelada de la ñeve.

Los nuesos pasos tienen de facenos aportar al col.láu la Maera (1785 m) onde quedamos un bon ratu mirando les vistes hacia'l sur colos montes llioneses petaos de ñeve dándonos una impresión perbona'l picu Valmayor qu'asoma per detrás de la L.lomba'l Bolero.

Avanzamos pela arista ñevada del Robequeres (2023 m)  y siguimos hasta la Fitona

Magar de les semeyes y el breve descansu, sigo abriendo buelga esta vegada metíendome un pelín más na fastera sur, onde la ñeve ta más blando y toca bregar, pero siempre que perbones sensaciones y un avance perpositivu poniéndonos na cota de 2023 m, nomada como'l Robequeres, nunos 50 minutos a llargu de casi 2 km d'arista.

Arista que nun va finar, siguiendo otros 500 m hacia'l nuesu monte cimeru del día, que nun ye otru que la Fitona de 2048 m. Col oxetivu cumplíu, quitaremos les mochiles, sacaremos semeyes a baruyu y tendremos un ratín pa quedar embobáu mirando monte a monte nomándolos como si los conociésemos como collacios.

Nel monte cimeru del día: La Fitona (2048 m)

Somos a acolumbrar tantos montes, dende l'occidente pel macizu de Penubina, pasando pel Cel.lón y L'Esturbín hasta l'oriente coles Peñes de Faru y más alantre tol cordal del Ayu hacia'l Tonéu y milenta más, que quedamos un ratín relaxaos esfrutando d'un día de los que faen afición.

Pero como siempre, ya ta'l repunante pa entainar al grupu y saco la guiyada pa esmenar a la xente, nesti casu a Silvia y Haritz pa siguir hacia'l siguiente dosmil del día, que lloñe de ser un hombru de la Fitona como lo fuera'l Robequeres, va tener un bon col.láu, el portiel.lu Cicueta, al que descender y una bona panda que xubir.

Descendemos y tornamos p'arriba hasta los 2016 m del picu Llastres

Sicasí, aportaremos al picu Llastres (2016 m) con 4 hores y media andaes y la revolución de la xinta entama, así que toca buscar un sitín p'abellugase d'un vientu un pocu frescu y descansar un ratu. Ya son hores y yo últimamente casi nin bebo nin xinto cuando voi de monte o corro nes carreres, así que tienen que dame'l toque los collacios.

Unos segundos acolumbrando montes y despedímonos de vieyos oxetivos ivernales como'l Xexe y el Nogales o la gran aventura nel Picu L'Osu na que Silvia tuvo implicada tamién y díonos pa echar unes rises un ratín.

Baxada y travesía pel valle Cicueta

Baxaremos pela cuerda del Llastres hacia'l norte y desviarémonos pel val.le Cicueta, baxándolo en llama colos crampones ya que tien la ñeve nun estáu perfectu. A metá del val.le topamos un resalte de piedra y yerba parando a xintar venti minutinos.

Magar de recuperar fuercies, siguiremos camín descendiendo'l val.le Cicueta hasta ver nel so final un posible saltu, poro vamos facer una pindia travesía hacia'l Picón de la Maeda los Rubios, col envís de camudar de canal de baxada.

Descensu complicáu hacia'l valle de Carbayalín

Al aportar al collaín del Picón, atopámonos con un pindiu descensu nel que tendremos de poner tol curiáu posible y trabayar perbien col piolé y los crampones si nun queremos esnalar un centenar de metros hasta parar escontra unes peñes.

Diremos baxando sele hasta tar a salvu y siguiremos camín cenciellu pa metenos nuna guapa viesca pente los Argayos de la Fitona y los Praecheros onde perpasamos la llende nival y quitamos los crampones enmediu d'un prau.

Camín sele dende Carbayalín pel valle de Ruayer hasta'l pueblu

Dende equí, descenderemos tol val.le Carbayalín ya per bon camín hasta'l Quentu La Teya onde amestámonos a la pista que vien dende'l Puertu Vegará. Nel intre, quedarános namái que dir charrando y faciendo camín sele durante los 3 km que nos restarán hasta Ruayer.

A la fín, damos preste a una prestosa ruta ivernal na que conocemos un pelín meyor estos altos montes ayeranos, dempués de 7 hores y media de ruta, un ascensu total de 1550 m de desnivel y na que caleyamos 15,7 km lo que nun ta na mal.


Camudando'l Camín pel cordal cantábricu

2 comentarios:

  1. Buena pateada y desnivel!! Cuando estuvimos por ahí haciendo las Peñas de Faro, barajamos llegar hasta la Fitona, pero al final el día estaba malo y no nos apeteció, así que tenemos pendiente esa parte de cordal.
    Bonita actividad, un abrazo!

    ResponderEliminar
    Respuestas
    1. Actividá facilina pa cramponiar y esfrutar de la ñeve... les vistes mui buenes. Un abrazu

      Eliminar