viernes, 17 de mayo de 2013

Puertu Vegará (Ayer) - Picu Nogales

12 de Mayu de 2013

Track: Puertu Vegará (Ayer) - Picu Nogales


Entamo a escribir esta entrada nel blogue, dende'l respetu d'un humilde pisapraos hacia un alpinista de los grandes recién fallecíu, Alexei Bolotov. Estes coses pasen, muerren por facer en mayor medida lo mesmu que tamién préstanos a nós facer... conocer y ascender montañes.

Según les sos propies pallabres, les montañes son roca y xelu, y somos nós, los que-yos dámos entidá al intentar superar, les prebes que ponen nel camín pa la so ascensión. Al igual que la montaña, la nuesa entidá, grandísima entidá d'esti rusu, fuímos a conocela nel documental "Pura Vida", onde pudimos agüeyar como los más grandes montañeros tórnense empequeñecíos ante la fuercia d'una gran muyer.


Poro, la mió alcordanza pa esa muyer, esos pas y esos neños... ye lo primeru que vienme a la tiesta, cuando sabemos d'estes desgracies. Ye'l xuegu, sí, pero ye un xuegu col que nunca queremos perder y pesie a nun querer "esponer de más", les coses pasen onde menos s'espera, nesti casu bien averáu al campu base.

Que la tierra-y seya leve, a Alexei Bolotov... ún d'esos heroes que nunca quisieron tener fama y que del que nunca quisimos saber más, que lo gran alpinista que yera.... agora gracies al documental "Pura Vida", sabemos un pocu más de lo que lu arrodiaba y sentímos más fonda y más cercana la so perda.

Equí tamos nel míticu puertu Vegará (1552 ms)

Nós, baxo la nuesa pequeñez como montañeros, quisimos despedínos de la ñeve con una ruta corta pero de lo más prestosa. Nun será otra, que l'afamada ascensión al Picu Nogales dende'l Puertu Vegará, y cuando digo nomada ye poles alcordances del intentu qu'acabó nel ascensu al Picu L'Osu y la posterior recoyida na fastera contraria al entamu, nel puertu Vegará.

P'aportar a él, esta vegada tuvimos que tirar pol Puertu Payares pa trespasar la lleende y baxar a Vil.lamanín de la Tercia, onde almorzamos café, bizcochos y galletes en Casa Ezequiel. Llueu siguimos carretera por Cármenes, Almuzara, Valverdín y Pedrosa, ente los cuales ta una preciosa escuela d'escalada, y siguimos por L.lavandera, Xenicera y Valverde de Curueñu onde ya tomaremos el cruce a la nuesa manzorga, pa siguir el ríu Curueñu pasando polos pueblos de Vega de San Pedro, Tolibia d'Abaxo, L.lugueros, Ceruyea y Redipuertas pal fin arribar al Puertu Vegará.

Esta vegada, aportamos al puertu de día y durante'l trayeutu aparte d'alcordanos con rises de les vivencies d'esa nueche fría, na que recoyimos Pangua y yo, al restu'l grupu, pudimos saboriar tol valle del Curueñu, que taba dafechu preciosu, verde y enllenu d'augua.

Entamamos l'ascensión a la mandrecha la riega Nogales

Aparcaremos los coches en frente del refuxu, que paez ser, tan remocicando ya que na nuesa ruta a les Peñes del Faru, va unos añinos, taba praúticamente en ruines. Magar de preparanos, caleyamos senderu abaxo, hasta topanos cola carretera que xube a la estación d'esquí de Riopinos.

Ellí travesaremos, la riega Nogales, pa encomencipiar a siguir el so cursu, primeru ensín gota ñeve, siguiendo'l rastru de senderu, pente les cotolles y los escobones y llueu, atoparemos les primeres llingües de ñeve, peles qu'entamaremos a abrir buelga.

Metémonos dafechu en guapes llingues de ñeve

El día ta preciosu, abaxo nel puertu, tiraba dalgo d'airín y refrescaba, pero bien ceo, tendremos que quitar capes y ponenos crema pal sol, ya que Llorienzu tien ganes da-y fuerte. Tenemos la sensación de qu'hai más ñeve de lo camentáu, pero ta nunes condiciones estupendes, ya inclusu durina pa usar crampones.

A esto toi dándo-y vueltes, ya que tanto Charly como Pau, inda nun tuvieron la ocasión d'estrenalos dende que los mercaron. Así que namái, que tamos nun llugar llanín, paramos a que los pongan y deprendan a colocalos.

Bon día pa prebar los crampones demientres Kíla entruga por qué paramos, jeje

Esta vegada, personalmente, prefiero non usalos y xunime a Simón y David que nun tienen, p'abrir buelga fonda si ficiera falta. Nun ye así, y toos avanzamos más o menos seguros, pero esfrutamos a tope nel nuesu camín hacia la cubeta formada baxo'l colláu Nogales.

Empobinámonos a bon ritmu hacia la cubeta del colláu Nogales

Meterémonos nella dafechu y siempre sollertes a la cornisa que tien na cumera, vamos avanzar pela pindia pala que llíbrala ensín peligru pela so manzorga. La ñeve sigue estupenda, hasta dalgo menos dura qu'ente los pinos na parte baxa del valle.

Esfrutando como neños na enorme pala de ñeve hacia'l colláu

Simón, intentando nun pillar ñeve, xube pegáu a les calves rocoses que tenemos a la esquierda, demientres Kíla corre d'un grupu a otru esfrutando como lo que ye, una cachorrina. Mientres, David, Charly, Pau y yo, siguimos abriendo buelga na última pala inclinada hasta aportar a los 1950 ms del colláu.

Unos pasinos más de buelga y ...

Charly y Pau, pasáronlo teta colos crampones y una pequeña cosina más que deprendieron, nel día de güei. Simón y David, viéronlos como una ferramienta necesaria, non pa esti día, pero quiciás pa otru día más fríu seríen imprescindibles pa siguir avanzando con seguridá.

Xuntos nel colláu, Simón entrúgame cuala ye la cume de la mandrecha y dígo-y que ye'l Picu L'Osu, así que p'arriba que tiren David y él, con Kíla. Nós, quedámonos cola ascensión del añu anterior, na que tastiamos una arista norte, ablucante en tolos sentíos y preferimos sentanos a echar unes rises nel colláu.

Descansu nel colláu Nogales (1950 ms)

Esperaremos por ellos, unos venti minutinos, pero fadrémoslo de lo más relaxáu, viéndolos ascender y acolumbrando les vistes que déxenmos Picos a lo fondo y dellos cumales más cercanos como'l Torres, Peña'l Vientu, Les Rapaines...

Siguimos col tramín final al picu Nogales

Descansaos y fartucos de sacar semeyes, apaez la primera Kíla, que baxó a fueu y dempués Simón y David, que coméntenmos que paez que taba más cerca, jeje. Aún así, tan fuertes así que dexámoslos picar dalgo y siguimos pela arista del Nogales.

Simón y Kíla col Nogales al fondu

Primeru, tendremos inda una palina de ñeve, qu'esapaecerá namái pasar l'antecima. Dempués nun-yos va quedar otra a Pau y Charly, que desfacese de la ferralla y siguir pel senderu, que pente la peña y la vexetación va seliquino hasta les peñes que formen la cumera.

Arista final erma de ñeve a la fín

En dos hores y media dende que saliéramos del Puertu Vegará, tamos nos 2079 ms del Picu Nogales. La verdá que coles ganes que-y teníemos a esti picu ayerán, nun podía recibinos nun estáu más guapu qu'esti, p'ascendelu.

Tamos encantaos, nun tira la brisa, el cielu nun pue tar más azul y tenemos tol tiempu del mundiu, pa tar mirando pa la nada o pa too o... simplemente aselar. El mar de ñubes que tapez Asturies, esnala penriba de dellos cumales y otros más altos, apaecen con más presencia si cabe, como'l macizu de Penubina que ta increyible tamién.

Perguapes vistes d'Asturies

Media hora nun cumal.... casi nin lo creyemos o al menos eso-y paez a Simón, que ya nun s'alcuerda la última vegada que tuviemos tanto tiempu de xinta, rises, descansando... Así que dimos bona cuenta, de quesu, chorizu de ciervu de Nava... etc... hasta quedar a gustu... y decidimos siguir camín.

Cumal del Picu Nogales (2079 ms)

Facémoslo baxando hasta la collá Verde, onde entama'l nuesu caberu finxu a dar preste del día, el picu la Xexa. Nun tien mayor dificultá, que trepar penriba d'unes peñes pasáu'l colláu o arrodiales con curiáu, anque les rimayes nun tan nel meyor estáu y la cornisa d'esta collá Verde (2010 m), ta pidiendo a glayios argayar.

Tramu pente'l Nogales y la Xexa

Magar d'esti pasín, siguimos ascendiendo con tranquilidá y aportamos a los 2064 ms de la Xexa, la cual tien un bon tapín de ñeve nel so cumal. La verdá, que durante tola ruta, echamos en falta a Rebe y Pangua, bonos protagonistes d'aquella aventura nel puertu Vegará, jeje pero'l trabayu y les carreres de montaña ficieron imposible tar con nós.

Aportamos al cumal ñeváu de la Xexa (2064 ms)

Equí nun pararemos muncho, pa siguir camín hacia´l colláu de la Camperonas, anque enantes intentemos guetar una baxada alternativa más divertida. Como nun ye así, ya que vemos les pales de ñeve, mui pindies, siguimos alantre, hasta casi'l colláu y axeitámonos pal descensu final.
Cresteamos hacia las Camperonas

Como nun siempre na montaña, va ser tou ser profesional y deprender a facer les coses con seguridá y bon facer, tamién hai que divertise y güei yera'l día pa ello, así que pusimos a garrar les meyores pales de ñeve, p'abrir una pista de culuesquí lo más llarga posible.

Facemos el meyor culuesquí de la hestoria del Xuan de la Borrina, jeje

Les semeyes dexen a les clares, les rises que pasamos anque quede claro, qu'ante too, somos unos montañeros serios y facémoslo por baxar desnivel lo más aina posible, jeje. El casu ye que plantámonos nel valle'l Xexa nun plis y siguimos baxando desnivel per esta fondonada que dará pasu a un estrechamientu nel nomáu canalón de Xexa.

Pa baxar pel valle'l Xexa y la canalón de Xexa

Percorrerémoslo, penriba la ñeve, la cual caltiense en condiciones perbones y sin fundinos nin una migaya, atopámonos nel puntu de dexar esti canalón, pa visitar les cabañes de les Vegues de la Reína en plenu puertu Vegará.

Desviámonos hacia les cabañes de les Vegues de la Reina nel Puertu Vegará

Baxaremos per un senderu hasta elles, camentando lo bien conservaes que tan, ya qu'esta fastera tien de ser un llugar de pastoréu inda sostenible anguaño, dalgo pocu común nestos tiempos. Con pocu menos, que caleyar pela pista que vien de Ruayer, aportaremos al refuxu, onde dexamos los coches unes hores enantes.

En resume, ruta curtia pero de gran valir montañeru, sobretóu faciéndola n'iviernu, a lo que súmase un guapu viaxe pela fastera de Los Argüeyos. El percorríu de 7 kms, llevónos 4 hores y 45 min, superando un desnivel acumuláu de 605 ms, nos que puédese esfrutar de la ñeve y de les vistes al máximu nivel.

Camudando'l Camín esfrutando n'Ayer de la ñeve

Nesta guapa ruta fuimos a facer dos dosmiles ayeranos: Picu Nogales (2079 ms) que ye monte astur prestosu y la Xexa (2064 ms)

Ver progresos en: Retos montañeros

10 comentarios:

  1. Menuda pasada, qué día y qué pila ñeve. Y gracies pol recuerdu, moralmente tábemos presentes. Ayyyyy yá caerá, yá caerá. Prestosísimo. Viendo les fotos siento la ñeve na mio propia regaña...

    ResponderEliminar
    Respuestas
    1. Mui divertida la verdá, foi una pasada da-y preste al fín al Nogales

      Eliminar
  2. Ya tenía ganas de que hicierais el Nogales, después de todo mereció la pena esperar. Estaba espectacular y día perfecto.

    Enhorabuena para todos.

    ResponderEliminar
    Respuestas
    1. Pues sí, Fernan. Nun podía tar meyor el día pa xubilo con tranquilidá y disfrutando de les últimes ñeves, espero, jajaja

      Un abrazu

      Eliminar
  3. Vaya pico guapo, y que paisajes, buena manera de despedir la temporada de nieves.

    El que diga que no ha hecho nunca el culoesquí, ¡¡¡miente!!!...

    Bonito recuerdo para Alexei Bolotov.

    Un abrazu.

    ResponderEliminar
    Respuestas
    1. Gracies Dani... lo del culuesquí yera imposible nun echarse unes rises, jeje

      Un abrazu

      Eliminar
  4. ¡Cómo me presta lleevos!
    Nun tien desperdiciu nada.
    Redaición, descripción, semeyes,...Too perbien y perguapo.
    Un saludu.

    ResponderEliminar
  5. Muuy guapa Berto, conocemos bien la zona, no en vano el refugio de Cerulleda lo lleva nuestro grupo de montaña desde hace casi cuarenta años!!!
    Suscribo el comentario de Arturo ....To perbien y perguapo
    No se si conoces las cumbres de los lados, si no las conoces, no te pierdas al O del Jeje, La cabritera, y al E del OsoLos Castillones y El Fuente, eso si, Los CAstillones sin nieve para hacer todas sus cumbres.
    Un saludo amigo

    ResponderEliminar
    Respuestas
    1. Pues si que voi conociendo aquello, L'Osu, Nogale la Xexa tan fechos ya... y tengo pendiente una travesía dende'l Tonéu hasta'l Fuente pola Cuerda L'Ayu.... esa si que téngola en mente y bien.

      Los Castillones habrá que conocelos en temporada seca, jeje

      Un abrazu

      Eliminar