jueves, 28 de abril de 2022

Trail Pisada'l Diantre (Colunga)

24 d'Abril de 2022

Track: Trail Pisada'l Diantre (Colunga)

Web del Trail: Trail Pisada'l Diantre

Clasificaciones: Clasificaciones 2018 
 

La vuelta a les Carreres pel Monte sigue'l so cursu, sumando kilómetros n'entrenos y en carrera, intentando nun engorilame nos ritmos, tema perdifícil cuando sientes que pues dar más. Esto, sobromanera si tornes a correr penriba de la media maratón, onde saber dosificar ye lo más importante, pero seyamos serios, siguen prestándome les carreres onde tirar a fueu tolos kilómetros posibles y llegar a meta sintiendo que dístelo too.

Asina llantámonos na primer carrera "seria" de la temporada en cuanto a kilómetros y dureza, na Pisada'l Diantre, onde los 30 km, con un primer terciu mui correnderu pela costa de Colunga y Caravia, debería tomámelo con calma, pero los ritmos llévenme y tiro más fuerte de lo que debiera hacia la baxera'l Sueve.

Tornábemos a correr pela costa de Colunga

D'esti xeitu, siguiera a bon ritmu, na primer parte de la xubida hacia'l Pienzu, siendo esta vegada, pel picu Babú, pa crestiar con unes vistes ablucantes hacia Picos, Ponga, Casu y tola mariña centru oriental astur. A dicir verdá, nun hai una carrera más guapa qu'esti Trail del Sueve, poro vuelvo a dar les gracies a Cesar Pina y tola so compaña, por siguir investigando caminos y por facer d'esta carrera un referente total de percorríu correnderu y montañeru, pero sobretou un agasayu pa los güeyos coles vistes.  

Mar y monte presentes durante tola carrera

Na crestería pente'l Cuetu Les Duernes y el Picu Pienzu, entamo a sentir molesties y ciertos avisos en forma de calambres y ya veo, que voi tener que regular mui muncho, si nun quiero pasalo mal. Per delantre, quedaba una llarga baxada na que cualesquier resbarión, pue faceme pasar penuries hasta la meta, asina que baxamos vueltes y descendemos cola calma.

Increyibles les semeyes qu'apurriéronmos los fotógrafos durante la carrera

Per delantre, los "pros", Alberto y Carlinos, van como postes, faciendo un carrerón, notándose muncho que tómenselo mui en seriu y los sos entrenos costantes tan furrulando pero bien. Per detrás, Gus y Miguel, van tirando con puxu tamién faciendo un carrerón increyible, sufriendo colos pies el mió hermanu y llegando con mui bona cara Miguel, que de xuru pudiera forciar un pocu más.

Equipu motiváu durante tola carrera

De Silvia, nun se nada, ya que sin querer na primer parte ya escapé a mi bola, pero espero que-y vaya meyor que n'otres carreres llargues onde suel atragantase colos kilómetros, ya que de momentu, ye más de mecha corta y tien el so puntu fuerte nes baxaes y pa eso hai que llegar cola maquinaria ensin problemes.

Venga.... ta la prósima vegada pel Sueve

Van pasando los kilómetros de baxada col frenu manu echáu, lo que faime petar de cuadriceps y los xemelos ya nin pienso nellos, porque va muncho kilómetros que tan como piedres. Pasen los avituallamientos y nin paro, ya que nun voi nin cansáu, pero llevar les pates así, nun me dexa esfrutar como quisiera nin forzar una migayina pa nun perder posiciones na baxada.

Esfrutando munchísimu a tramos mui correnderos

Turno posiciones con dellos collacios colos que voi falando de les sensaciones y lo duro de la carrera y alcuéntrome con qu'un anormal espríntame a la entrada de meta, cuando nun lo viera en tola carrera. En fin, toi tan cansáu, que nin soi a enfadame, asina que charro un ratín con Sonia, que ficiera'l Diantrín esfrutándolo y forzándose más de lo que quisiera jeje y esperamos pol restu del equipu.

Felicidaes a Silvia pol carrerón... brutal

La élite del grupu, ya taben duchándose, raspiando les 3 hores y media de carrera, baxando yo de les 4 hores por un par de minutos y aportando a meta dempués pocos minutos dempués Miguel, pa siguir llueu Silvia y Gus nunos tiempos mui asemeyaos.
 
Nun pueu más que resaltar la carrera de Silvia, que per primer vegada facía podiu femenín na xeneral, quedando tercera femenín y segunda de la so categoría, lo qu'amuesa a les clares la so progresión y el potencial xabaz que tíen pa les Carreres pel Monte.

Camudando'l Camín nel Diantre un añu más

Como siempre, dar les gracies a la organización, voluntarios y a los fotógrafos porque personalmente danme una allegría cola calidá de les semeyes amosando la realidá y l'esfuerzu que llevamos enriba en dellos momentos


----------------------------------------------------------------------

29 d'Abril de 2018

Track: Trail Pisada'l Diantre (Colunga)


Web del Trail: Trail Pisada'l Diantre

Clasificaciones: Clasificaciones 2018 


Un añu más tornamos a la Pisada'l Diantre, esi trail mediu costeru mediu de monte, que tan sólo podría dase nel cordal del Sueve y nos conceyos costeros nos qu'alcuéntrase. Dempués de nun poder participar l'añu pasáu por tar lesionáu del piramidal, tornamos otru añu, más menos colos mesmos problemes físicos, tresformándose en problemes de calambres musculares cuando paso de ciertos kilómetros.

Poro, los 30 km d'esti percorríu quieren dame a entender que nun sé que tal lu voi pasar. Entamamos saliendo mui atrás y como siempre voi ganando posiciones llevando de referencia per delantre a Illán, que garró un ritmu mui curiosu, costándome pillalu hasta bien pasáu la sablera de la Griega.

Participación pergrande saliendo de Colunga

Fadremos xuntos tol tramu de los cantiles de Colunga llegando a la Espasa de mui bon humor, con ritmos afayaizos pero que dános pa dir echando unes rises y charrar tol camín. Magar de la Espasa entama la xubida y nel tramu d'enllaz hasta la Viescona, voi alcontrándome mui bien y faigo corriendo munchos km cuestos adelantándo bastantes posiciones y dexando a Illán atrás.

Tramu costeru preciosu peles sableres de la Isla

Dempués tendremos tola ascensión pela Viescona na que simplemente toca esfrutar y caltener un ritmu costante, teniendo dalgún qu'otru vache físicu, anque a l'altor del Bustacu, xinto daqué y vuelvo a recuperar faciendo tola pindia xubida al Pienzu a un bon ritmu.

Con bones sensaciones entamo la baxada y dempués de varios resbariones por mor del barru, siento los primero síntomes de calambres nos cuádriceps. Otra vegada más, toca baxar ritmu, munchísimu ritmu y toi baxando perllentu pasándome casi tol mundiu hasta que pego un resbarión más y xúbenseme los dos cuadriceps.

El clásicu de la Viescona nun de los llugares más guapos d'Asturies

D'esti xeitu tenemos que facer la baxada, hasta que dalguien veme sofrir y dame un par de pastilles de sales que me recuperen y pueu dir recuperando ritmu pela parte más téunica y embarrada hasta garrar de nuevu a Illán na última xubida a Carrandi.

Enantes d'aportar al pueblu, tomo la segunda pastilla con agua que préstame Illán y ensin dame cuenta que diba parar, sigo corriendo hacia Colunga llevando unos ritmos altísimos pa los kilómetros que llevábemos de carrera.

Aportando al caberu avituallamientu Carrandi

Paez qu'a él tampoco-y fue na mal nesti tramu porque llegó a un minutín míu y cuando aportó a la meta, echamos unes bones rises porque dixo que-y ficiera la 13-14, lo que fue pa na a costafecha ya que colo mal que lu pasé na baxada'l Pienzu, agora que diba bien nun pensaba parar nin de broma jaja.

Entrada a meta en Colunga

En resume, un carrerón, mui duro pol barru esti añu, pero como siempre una carrera que lo tien too, cantiles y sableres pela costa, guapes viesques tanto pa xubir como pa baxar y un ambiente estupendo en tol conceyu de Colunga

Como siempre, dar gracies a voluntarios y a los fotógrafos porque personalmente danme una allegría cola calidá de les semeyes amosando la realidá y l'esfuerzu que llevamos enriba en dellos momentos (Mariaw, MVFoto...) 


----------------------------------------------------------------------

1 de Mayu de 2016

Track: Trail Pisada'l Diantre (Colunga)


Web del Trail: Trail Pisada'l Diantre

Clasificaciones: Clasificaciones 2016  


Así, a lo llocu, llegó'l 1 de Mayu y preparámonos pa lo que diba ser el retu de carreres pel monte del añu, el Trail de la Pisada'l Diantre, una carrera que preparaba'l grupu monte del hermanu d'una collacia del GM Xuan de la Borrina, asína que nun podíemos faltar.

Semeya de grupu GM Xuan de la Borrina

Plantámonos en Llastres, Gus, Alberto, David y yo, con un día d'espatarrar, preciosu pa correr 30 km y unos 3200 de desnivel acumuláu, poro diba ser la nuesa carrera más dura en kilómetros, anque non en desnivel que Portudera fuéralo más.

Sablereando per Colunga... increyible correr nun llugar tan guapu

La carrera en términos xenerales fue increyíblemente guapa, pudiendo esfrutar de la costa de Colunga, pasando dende Llastres, pola Griega, la Isla, el Barrigón y finalmente la Espasa onde tocaba tirar p'arriba hacia'l Sueve.

Saliendo hacia la Isla pa finar la costa

Una vegada que dexamos atrás el tramu d'ocalitales, metémonos na Viescona onde la guapura del fayéu dexa atrás l'esfuerzu d'un tarrén tan pindiu hasta aportar al Bustacu onde pocu dempués de Mergullines xubimos per una canal hasta'l Bocón de les Duernes, per onde nunca xubiera y prestárame muncho, hasta'l propiu picu Pienzu.

Entrando a la Viescona del Sueve

Ya del Pienzu, descensu preciosu per un increyible senderu enmediu de la Texera, pero que nin s'avera a dengún texu siquiera, cosa que criticábase nes selmanes anteriores a la carrera. Agora ya pueu dar fé, de qu'esi camín lleva tola vida usándose a diariu y nun se cuerre penmediu la viesca como dicíase... ya que nun se pasa nin cerca d'ellos.

David con perbona cara a pesar de lo pindiu de la pista

El restu la carrera como ye normal, una vegada que te pases del Sol de Miguel hasta Carrandi baxa'l nivel prestosu y tocó sofrir los caberos kilómetros per pistes madereres que bien sobraben, pero de dalguna manera había que llegar hasta Colunga jeje.

En xeneral.... una pasada de carrera, de les más guapes a facer n'Asturies, eso sí controlando que respétese l'entornu ya que la moda de les carreres ta mui bien, pero siempre que contrólese la participación ya inténtese llendar entrar penmediu en tarrénes protexíos, cosa que nun lo fai n'absolutu'l percorríu.

No hay comentarios:

Publicar un comentario