martes, 24 de noviembre de 2015

Tuíza Riba (L.lena) - Pie Ferreru - Fariñentu - Pena L.lana

17 d'Ochobre de 2015

Track: Tuíza Riba (L.lena) - Pie Ferreru - Fariñentu - Pena L.lana



Tornamos al nuesu campu base favoritu, Tuíza Riba nos alpes tuízos jeje, asína que tendremos d'averanos hasta esti guapu pueblu como ye davezu saliendo de Xixón y garrando l'autovía minera hasta Mieres del Camín, onde siguiremos hasta'l pueblu de Campumanes en L.lena.

Magar del almuerzu, tiramos pela carretera 8 de L.lena, pasando pelos pueblos de Sotiel.lo, Espineo, Los Pontones, Teyeo, Rospaso, Tuíza Baxo y a la fin entramos en Tuíza Riba, onde aparcamos el coche con un día pelín más murniu de lo que teníemos en mente.

Partimos de Tuíza Riba (1207 m) como tantes vegaes

Pero bono, la meteo ye así, abrigámonos ya que nun sólo ta cubiertu sinon que tira un airón gafu y menos calor de too. Saldremos de Tuíza, pente bastantes montañeros, pero sólo nosotros desviámonos ceo de la xubida hacia'l Meicín, ya que debemos salir a la mandrecha enantes del depósitu d'agua, empobinándonos hacia una aguyes típiques.

Per senderu, diremos ascendiendo a la mandrecha de las Val.linas de Coriscu, empobinándonos hacia'l Val.le Corrales, pasando enantes pela fonte l'Aguilón, per onde fai dellos años desviámonos hacia la Plana, xubida normal tamién al Picu Fariñentu, pela Cuenchona y el Bocarón.
 
Empobinámonos pel guapu val.le Corrales

Esta vegada la intención ye conocer esti val.le Corrales, ampliu y cómodu d'ascender pel que con una charra animada vamos ganándo-y metros de desnivel a los altos cumales de la redolada. Por suerte, al dir metíos nel valle nun tamos sofriendo'l vientu fríu pero con un día así, voi desdexando oxetivos como aportar hasta'l Prau L'Albo y venir pol Pie Ferreru hasta'l Fariñentu.

D'esta miente, vamos siguir Corrales alantre, hasta la fastera'l Güertu Los Pioyos, baxo los parés de Peña Bermeya y Peña de Diego y aportaremos al Pozu Corrales, onde separámonos en dos grupinos: Richar y yo vamos a pol Pie Ferreru y Benjamín, Pau y Zori siguen con calma hacia'l Fariñentu.

Averámonos poquín a pocu hacia'l Pie Ferreru

El Pie Ferreru ye un amiestu de pequeñes picoretes, aguyes y trazos yerbosos pero de xuru seremos a encumalo. Pa ello, lo meyor ye averase hasta la h.orcada pente'l propiu Pie Ferreru y l'espolón sur del Fariñentu onde aporta una preciosa canal que xube dende los Fuechos de Cueva Palacios.

Pa mí, esti fué'l gran descubrimientu del día... ver dende riba, dende los 2102 m del Pie Ferreru, toles posibilidaes de conocer y andar los Fuechos de Cueva Palacios... tanto ye así, que pa esti 2016 que vien, lo mesmu la nomada travesera treslládase al cuartu macizu... al de Penubina.... ver veremos.

Guapu ascensu al Pie Ferreru (2102 m) ya increyibles vistes

La trepada al Pie Ferreru mui entretenida y cenciella per un canalizu yerbosu, da pasu a un pequeñu hombru pel qu'aportamos a la mínima cume. La verdá ye que nun da pa menease muncho pero si ye pequeña en dimensiones ye pergrande en vistes como ya dixe.

Coles mesmes y con Kíla raspiando llugares aéreos onde nun me presta que se pasee, descendimos de nuevu a la h.orcada y empobinámonos per un claru senderu que llevarános a travesar una pedrera y a la gueta d'un pasu que traviese l'espolón que baxa del Fariñentu.

Facemos la travesía superando un contrafuerte hasta'l picu Fariñentu

Nun fué difícil y Kíla, per una traviesa más baxa y Richar y yo, per una trepada más alta, aportamos casi al mesmu tiempu que Benjamín y Zori a la rampla final hacia'l cumal del picu Fariñentu. Pau y Kíla, que ya saliera corriendo hacia ella taben esperándonos tranquilamente nos 2174 m.

Ellí, tamién taba la clásica cadarma de vaca que fizo de símbolu pal cartelo de la ultratrail Güeyos del Diablu, que percorría práuticamente tol macizu de Penubina y pa la que tuve la suerte d'aportar como agasayu a los correnderos na so bolsa: un Pallabreru del Monte y la Escalada.

Cumal nel picu Fariñentu (2174 m)

El día nun quier abrir del too, el vientu sigue azotando y calor como pa xintar nun fae, asina que facer unes semeyes, comentar los montes que vemos, los posibles llugares a conocer y tiramos p'abaxo a bon ritmu restolando un abrigu onde poder parar un ratín a meter pal cuerpu daqué.

Fadremos la baxada normal hacia'l L.leturbiu pero con poques ganes de perder altor, garramos un claru senderu que faldea la Peña Bermeya y la Peña de Diego, que ya ascendiéramos na nuesa primer visita al Fariñentu.

Cómodu descensu hacia L.leturbiu que danos pie a conocer la cercana Pena L.lana

Según vamos baxando y viendo la hora na que ponémonos a xintar, menos de les dos de la tarde, decidimos Richar y yo, averanos hasta la Pena L.lana, demientres los demás queden descansando un ratín más enantes d'entamar el descensu dende'l Bocarón.

Nesi tiempu, perpasaremos penriba'l L.leturbiu y tiraremos hacia l'únicu puntu feble que tien la Pena L.lana na so fastera oeste, un ampliu canalizu que lloñe de paecer pocu andáu, dexónos pelín sorprendios pol bon senderu qu'alcontramos.

La Pena L.lana ufreznos unes vistes de primer categoría

Y ye que munches vegaes creyemos qu'ascendemos a montes que tienen pocu valir o tapecíos por otros más altos, pero la Pena L.lana dexónos ablucaos pol llugar onde asitiase, teniendo al llau dos monstruos como'l Siegalabá y Tapinón, o la Pena Ruea enfrente, colos cumales del Puertu Güeria.

La L.lana (2042 m) con Kíla metiéndose enmediu la semeya jeje

Despedímonos de la L.lana y de les sos vistes y descendemos al Bocaron onde garraremos ún de los milenta senderos ganaderos que deberíen llevanos hacia la Cuenchona, pasu que debería llevanos hacia la Plana, pero.... nuestros rastreadores decidieron garrar el camín direutu y diéronmos la posibilidá de conocer el Val.le Las Estacas.

Esti valle perpindiu, ye otra d'estes canales abiertes qu'abunden pel macizu y que siempre ye un placer dir conociendo, poro Richar y yo, diremos ganándo-yos tarrén hasta xuntanos a metá de canal, pa facer en grupu la parte más cenciella, animándose finalmente'l día p'acompañanos hasta'l pueblu de Tuíza Riba con un calorín bien prestosu.

Escoyemos el val.le Las Estacas pa un pindiu y rápidu descensu

Magar de 6 hores y venti minutinos d'una ruta guapa, tranquila y que por un pocu d'esfuerzu tenemos una gran recompensa con grandes montes y grandes llugares por conocer como'l L.legu y el L.leturbiu dos pequeñes ayalgues de Penubina.

Asina que... por pocu más de 6 hores, 8,5 km de percorríu y 1210 m de desnivel positivu acumuláu, fadremos 3 montes de más dosmil metros... nun de les fasteres de monte más guapes d'Asturies.

Que vos preste....

Los Güeyos del Diablu nel Fariñentu

2 comentarios:

  1. Clásica y guapa ruta Berto. Lo que dices de faer la proxima trevesera pel cuartu macizu, perbién, hai munches posibilidaes.
    Nesa canal de Peña L.lana tuvi yo un pequeñu incidente que nun voi escaecer jamas.
    Un saludu

    ResponderEliminar
    Respuestas
    1. Gracies Monchu... nunca se sabe onde la tenemos... hai qu'andar siempre con mil güeyos. Prestóme muncho facer esos picos... nun tuviera nellos y completen estupendamente col Fariñentu.

      Un abrazu

      Eliminar