martes, 14 de enero de 2014

Bueida (Quirós) - Puertu Güeria

9 de Payares de 2013

Track: Bueida (Quirós) - Puertu Güeria


Un vienres, asina a lo llocu, magar de la primer ñevadona del iviernu, decidimos garrar bien trastos y averanos hasta'l Puertu Güeria, col envís d'intentar la Pena Ruea o al menos dar una vueltina y pasar el día tan guapamente.

Como ya conozo, l'ascensión dende L.lindes y la baxada a Cortes, decidimos anque más llargo, xubir dende Ricao, conociendo por mor, el Puertu Güeria en condiciones, ún de los llugares más increyibles d'Asturies con diferencia.

Partimos de Buieda (784 ms)

Pa ello, saldremos dende Bueida, nel conceyu Quirós. Como siempre garraremos dende Xixón la autovía A-8 hasta Uviéu, saliéndonos pela A-63 a Grau, hasta'l desvíu pa Trubia onde siguiremos valle alantre hasta Quirós.

Entraremos pasando per Valdemurio, Las Agüeras, Arroxo, La Fábrica, San Salvador y la capital Bárzana, pa siguir per Potonga y en Santa Marina, garrar la  Qu-3, onde travesaremos L'Aguadina, Ricao y a la fín, Bueida.

Xubimos pela pista Torbaniel.lu hasta'l desvíu nes Garrafes

Preparaos pa caleyar, salimos pela pista qu'empobínase hacia'l puertu Ventana, pasando per Torbaniel.lu. Podría llibrase, xubiendo en coche, pero nun día tan fríu como'l de güei, vien muncho meyor calecer per ella hasta'l desvíu nes Garrafes.

Facemos camín pasando pela Fontana hacia'l Prau Melchor

Media horina de camín, ye lo qu'andamos y unos 150 ms de desnivel que superamos con tranquilidá, cuando tomamos un camín a la manzorga, qu'a tramos empedraos y otros embarraos y de fueya, fainos conocer la guapa viesca d'embaxo'l Cuitu L'Aguila y la sorprendente Fontana, onde baxo'l camín, surde una riega que va pa la de Buxalve.

Aportaremos al crucie caminos onde descansamos unos minutos. Tamos nun prau ampliu, onde si seguimos hacia les cabañes de la mandrecha, diremos a Las Infiestas y si tiramos a la manzorga, travesaremos tol Prau Melchor.

Del Prau Melchor n'adelantre diremos alcontrando más y más ñeve

Nós escoyeremos siguir pel prau Melchor, ganando bon desnivel y entamando a pisar ñeve so los 1200 ms d'altor. Ceo, camudaremos la verde yerba, pola blanca ñeve, y nun tornaremos a pisar otru ellementu hasta bones hores más tarde.

Los nuesos pasos, llevaránmos pente la ñeve y la viesca hacia la fastera del L.laseiru. Ye perguapu ver la ñeve xelada, nos carrascos y asína entretenémonos hasta ver la pantasmagórica visión del L.laseiru.

Facemos buelga hacia'l L.laseiru

Esti llugar col día murniu entá, ye bicolor dafechu, solo la pena prieta y la ñeve blanca tenemos nos güeyos. Namái, el pelu roxizu de Kíla corriendo pente'l blancor ye a camudar la nuesa visión blanca y prieta.

Tenemos enfrente nuesa la l.lamarga de la Trelda, qu'ocupa casi tol L.laseiru y enriba d'ella, ablucante, el Güertu'l Diablu, una fuexa colgada y tapecía pela ñebla. Nunca un nome, vino-y tan bien a un llugar tan xabaz.

Travesamos la riega L.lamasalgá pa xubir pel val.le la L.lera

Dexamos unos instantes tala visión, y baxamos hacia la riega L.lamasalgá, col envís de siguir ascendiendo pel val.le la L.lera. Esta decisión, va dános quiciás la posibilidá de facer la ruta munchísimu más guapa si cabe.

Tol tramu del val.le, sedrá un continuu pasu pente la viesca cargadísima de ñeve a un claru. Esto diónos un xuegu increyible, pasando per mantos de ñeve pente los carrascos, aportando a claros onde al empar, el cielu abríase, pa danos vistes picos ablucantes.

Xubiendo pel Val.le la L.lera demientres ábrense los claros nel cielu

A la nuesa mandrecha, entamando pol norte, apaecieron de secute, los cumales del Campu Faya, Pena sol Tambarón, Picu sol Prau la Siel.la tapando'l Penón Amenu, Pena Socel.lares y Picu'l Güertu'l Diablu, separtaos pol Canalón Rolamuela del Ranchón... el más impresionante.

Xugamos con Kíla hasta cansanos nun llugar máxicu

Nun mos cansamos de sacar semeyes, pero'l puntu másimu de prestor montañeru, vamos tenelo al salir a "campu abiertu" nel Zarradal. Ellí, el nivel de ñeve virxe cayío, el sol enfrente nuesa y les formes de metros de ñeve penriba los carrascos más mozos, faen les vistes máxiques.

Esfrutamos de les vistes ensín cansanos en dengún momentu

Ya va tiempu, que decidimos nin siquiera intentar la Pena Ruea, la cual sigue envuelta en ñubes qu'esnalen alrodiu'l so cumal. Agora, colos díes percurtios, hai que saber esfrutar del momentu y non aventurase a baxar per una montaña cargada de ñeve na nueche.

Averámonos seliquino hasta'l col.láu L.lingleo

Tamos encantaos, quiciás el día yera mui fríu y tardó un pelín n'abrir como les previsiones dicíen, pero tamos recibiendo de sópitu, tolo qu'esperábemos d'esta fastera del macizu Penaubina... soledá.

Quiciás esa ye la pallabra: soledá... Nun cruciamos una buelga del día, una pallabra, casi nin un soníu que nun fuese'l de les botes na ñeve o de les carreres de Kíla d'un llau a otru, pisando ñeve virxen, dexándose resbariar nes pendientes per ella... ta disfrutando y nós tanto como ella.

Un vistazu tranquilu hacia'l sur: Tapinón, Siegalabá, Fariñentu, Foiz Grande

Ensín querer, ponemos como final de ruta, baxo los tímidos rayos del sol, al col.láu L.lingleo. Averámonos unes vegaes sele y otres a la carrera pela ñeve virxe con Kíla hasta él y ellí acolumbramos cumales y fasteres del macizu qu'entá nun conozo pero que quiero y necesito conocer.

Con Kíla a la carrera

A los conocíos y ascendíos, Tapinón, Siegalabá, Fariñentu améstense tola fastera'l Ranchón, Panchón, Cigacha, Moyonera, Prau Fontán, Les Torres, Los Cintos... Hai un mundiu por descrubir nel Macizu Penubina, pero güei nun ye'l día, poro magar de les semeyes decidimos entamar la vuelta hacia Bueida.

Entamamos el descensu del col.láu L.lingleo

Con 4 hores y cuartu de ruta y siendo les 2 de la tarde, esto nun da pa más, asína que xintamos de pie nel llugar más caleciu pol solín qu'alcontramos, pa entainar la baxada cruciando la cabecera'l ríu L.lamasalgá.

Averámonos polos Tol.los hacia'l L.laseiru

Xubiremos un pelín un trabe, pa baxar hacia los Tol.los, apegándonos baxo les acoyonantes parés del Ranchón, peles qu'oyemos cayer argayos ensín parar, anque nengún d'importancia. A bon ritmu, siguimos camín hacia'l L.laseiru, el cual somos a ver dende lo alto, enantes de baxar hacia la buelga que nós mesmos dexamos nel ascensu pel val.le la L.lera.

Rápidu descensu con ganes de dexar de pisar ñeve

Teniendo la sensación de grandísima ruta, baxo l'atenta mirada de la Pena Ruea al descubiertu, siguimos baxando del L.laseiru p'abaxo, despistándonos un pelín de la nuesa buelga, al fundir la ñeve y ensín querelo, baxamos esta vegada pelas Infiestas, aportando igualmente al crucie caminos onde descansáremos delles hores enantes.

Empobinámonos hacia la pista de Torbaniel.lu pa baxar a Bueida

Dende equí, namái quedó siguir coles últimes lluces del día, pel camín primeru y pela pista dempués hasta aportar de nuevu a Bueida, onde como non, la Pena Ruea, despedíase de nós, con un "quiciás con menos ñeve, otru día xubís"... tiempu habrá.

Ensín más, ruta de puru disfrute pela ñeve durante casi 7 hores y media, percorriendo 14.4 kms y superando un desnivel acumuláu de 1185 ms, anque como siempre lo que más prestó, foi conocer esti puertu Güeria que si dalguien nun lo conoz, nun se a que ta esperando.

Camudando'l Camín nel Puertu Güeria

12 comentarios:

  1. Perguapo too: descripción, ruta, semeyes,...Gracies por compartilo y norabona.

    ResponderEliminar
    Respuestas
    1. Gracies Arturo, ruta pa tolos públicos hasta ellí, y si hai ñeve pa esfrutar de les muries que caen del Ranchón, más guapu si cabe.

      Un saludu

      Eliminar
  2. Bona ruta y vaya dia escoyisteis pa dir. Perguapo con la ñeve reciente. Vosostros nun se si esfrutasteis, pero bien se ve que Kila pasolo de mieu. Tengo en mente tornar a los Puertos pa cuando caiga una bona nevada, con raquetes desde el pueblu de Cienfuegos (que ser, nun ye el miu). Ye la ruta a los puertos que me falta, pero ye pista y prestarame más facela con ñeve.
    Un saludu

    ResponderEliminar
    Respuestas
    1. Home, si ye por pista, con ñeve y marañones inmeyorable. Tuviera na fastera'l Güertu'l Diablu y na Pena Ruea, pero nunca nel puertu Agüeria... prestome muncho ver tou dende baxo.

      Un saludu

      Eliminar
  3. Vaya imágenes de Agüeria con esa cantidad de nieve, menos mal que no intentasteis Peña Rueda que si no otra de rescate.
    Ya solo te queda la Foz Grande par recorrer por ahí. Sería bonita la travesía hasta Lindes con un coche esperando.

    Un abrazu.

    ResponderEliminar
  4. Home, rápidu vimos que nun taba p'aventurase na Ruea. La Foiz Grande, téngola pensada cola Pena Arpín y baxada pola Foiz Pequena.

    Un abrazu

    ResponderEliminar
  5. Hola Berto, nun cayó Peña Rueda, pero salió una jorna muy guapa. Como bien dices, los días son cortos y nun dan pa más.
    Desde Ricabo, solo subí una vez a Rueda, pero sin nieve, con nieve si fui a Los Huertos del Diablu y que largo resultó.
    Lo importante, que disfrutásteis una buena jornada montañera.
    Un saludo

    ResponderEliminar
  6. Ye llargu l'ascensu, pero sincéramente, ye guapísimu. Sorprendióme gratísimamente y como dices ensín ñeve, saldría una xornada llarga, llarga.

    Un saludu

    ResponderEliminar
  7. que pasada esa zona Berto, pa mi lo mas guapo de Ubiña!! saludos

    ResponderEliminar
    Respuestas
    1. Pues sí... espectacular... lo más guapu sin duda. Un saludu

      Berto

      Eliminar
  8. Perguapa ruta, semeyes y descripcion.Munches gracies Berto

    ResponderEliminar
  9. Gracies Fabiu... les semeyes ya sabes... con un día así, salen soles jaja.

    Berto

    ResponderEliminar