lunes, 9 de marzo de 2015

Sotres (Cabrales) - L'Escamelláu

11 d'Ochobre de 2014

Track: Sotres (Cabrales) - L'Escamelláu


Lo bono d'incrementar el grupu del GM Xuan de la Borrina, ye que'l nuesu sistema de puntuación da la posibilidá d'escoyer les rutes qu'a ún-y apetez facer, pero qu'a lo meyor a otru nunca nun-y daría por poner.

Poro, montes que lo mesmu nun acaben de convencete o que vas dexando por otru que te picó más por cualesquier motivu, acaba por escoyelu otra persona y vas casi con más ilusión que si lo punxeres tu mesmu... ésto pasóme nel Escamelláu... cumal que tas fartucu de velu y nun acabes d'atopar la ocasión pa visitalu.

Richar decidió poner esti prestosu monte, que fai la cota más baxa del cordal de Juan de la Cuadra,  pero que tien na so mole caliza, una presencia ablucante dende'l camín de Sotres hasta Áliva. Como non, decidimos salir dende'l pueblu cabraliegu aportando dende Xixón pel camín davezu.

Salida dende la curvona d'antes de Sotres (940 m)

Partimos de Xixón garrando l'autovía del Cantábricu hasta Posada de Llanes onde tomamos direición a Cabrales al traviés del Altu d'Ortigueru, y ya baxar a los pueblos de Canales, Carreña, Poo y a la fin Arenas onde almorzamos una vegada más nel Café Cares.

D'Arenas, tiramos pa Sotres pasando per Poncebos y Tielve, hasta topanos cola curvona onde dexamos el coche per un pelín, ya que tamos en día montañeru clásicu enantes de la dómina de ñevaes en Picos.

Magar de los preparativos, entamamos a caleyar a les 9 y media de la mañana, empobinándonos hacia las Vegas de Sotres con tranquilidá, pasando per Fresnidiellu, la Llosa la Cal, el Prau Noru y la Concha H.orniellu.

Caleyaremos sele pela pista hacia las Vegas de Sotres con vistes a L'Escamelláu

Llueu, saldremos con ánimu hacia'l valle de las Moñetas, garrando un senderu que sorprende pelo cenciellu de siguir pente h.itos nos tramos más calizos y sienda nos mayaos, faciéndose una ascensión cómoda.

Ésto, dános posibilidá d'esfrutar de bones vistes hacia los Cuetos de Castil o a la canal norte de L'Escamelláu. Tolo contrariu, pasóme na otra fastera de las Moñetas más pegada a Castil, pela que baxáremos va unos años na primer Travesera.

Perpasaremos per Carrazosu y conoceremos l'increyible Pozu Las Moñetas (1730 m)


Dempués de 2 hores y media, dexaremos un pelín el valle que tira pa las Coteras Roh.as, pa desvianos hacia la manzorga pasando pela vega Carrazosu, onde entama un tramu más tiesu que llevarános a conocer el Llagu Vieh.u (ensín agua) y a posteriori l'increyible Pozu Las Moñetas con bien d'agua y una estensión que nun m'esperaba enxamás.

Esti caberu tramu gana en belleza, siempre faciendo los bordeos tanto del llagu como del pozu pela mandrecha, con senderos colgaos nel casu del Pozu Las Moñetas que nos faen tener que poner les manes en dalgún pasín.




Bordiamos el Pozu y faldiamos pembaxo'l Paredón d'Albu

Con ún de los oxetivos algamaos, alcontrar esti guapu pozu de color averdosáu, siguimos per tola faldera del Paredón d'Albu, que paez tener ascensu cenciellu simplemente xubiendo a pinchu pela panda.

Camiento la posibilidá de tirame a por él, pero a vegaes el día siéntese fríu, con ñubes esnalando dacuando y nun quiero torgar l'ascensión cimera por dir a por un secundariu nel día de güei, poro déxolo pa otra vegada pel momentu.

Guapu faldéu hacia la h.orcada Los Glayos

Pasando del doblete, siguimos faldiando hasta garrar el final del Valleyón norte de L'Escamelláu, que tomando la so amplia parte final anque mui pindia, fadrános sudar enforma hasta la H.orcada Los Glayos (2007 m).

Llevamos 4 hores y media de ruta, metiéndonos nel tramu d'ascensión final y de pasu echando-y una güeyadina a la canal sur de la Raya que baxa hacia Piedra Llé, teniendo ya el nuesu descensu perclaru. Dexaremos entós les mochiles y bordiando un pelín l'espolón que baxa dende'l cumal, entamaremos l'ascensu.

Ascensu final hacia la cumera de L'Escamelláu

En tola xubida malpenes tendremos qu'usar les manes p'apoyanos y bien ceo, taremos nel cumal de 2084 m de L'Escamelláu, onde vamos esfrutar de bones vistes de tol macizu Central, con tola redolada del valle Las Moñetas dende Castil, Carnizosu, Osu, Morra... hasta Peña Vieh.a a la manzorga de las Coteras Roh.as.

Talamente, les vistes del Oriental acolumbren dende les cotes más baxes colos Picos de Cámara, Pozán, Jisu, Práu Cortes, Cortes, Morra Llechugales, H.ierru, Valdemingueru, Cuetu Teh.au y Picu Boru.... imposible nun sentise atrayíu pero tolos cumales a xubir.

Cumal de L'Escamelláu (2084 m) con parte de los Urrieles detrás

Magar de milenta semeyes, descendemos pel mesmu llugar hasta los Glayos, onde xintaremos con calma protexíos del vientu baxando un pelín de la boquera'l colláu. Bien fartucos, entamaremos el descensu pela canal sur que baxa xusto hacia la llende pente Asturies y Cantabria.

 Baxada llarga pela canal de la Raya hasta Piedra Llé

Sacante lo llargo de la canal y como ye vezu, de dalgún puntu de pedrera inestable, diremos baxando unos más apriesa y otros con más calma hasta la propia pista, onde a la so vera, xuntarémonos llueu de casi despertar de la siesta a los primeros en descender.

Como en tantes otres rutes, toca poner el mou muñecu pela pista que va dende Áliva hasta la curvona de Sotres. Siempre, al entamu de les rutes faise muncho más agradable de percorrer que pa los finales nos que vamos cansaos y tola guapura que nos arrodia pasa desapercibida nel pasu a pasu del camín.

 "Paséu" pela pista hacia Sotres

En resume, aportaremos de nuevu a los coches magar de 8 hores y cuartu de ruta, nes que percorrimos 16 kms ascendiendo casi 1300 ms acumulaos y lo más importante, conociendo una plizca más del macizu central teniendo al Pozu Las Moñetas como la mayor ayalga del día.

Otru día más y meyor...

Camudando'l Camín na fastera de las Moñetas

No hay comentarios:

Publicar un comentario en la entrada