martes, 9 de junio de 2015

Carangres (Ponga) - Picu Pierzu - Cruz de Valdoré

8 de Marzu de 2015

Track: Carangres (Ponga) - Picu Pierzu - Cruz de Valdoré


Como digo nos últimos tiempos, el grupu aumenta en miembros y la escoyeta abierta de rutes llévame a repetir cumales, pero ello nun ye a quitame un plizcu de motivación, ya que faime restolar cómo facer una ruta dafechu distinta de l'anterior.

D'esti xeitu, vamos repetir el Picu Pierzu en Ponga, pero esta vegada vamos facelo dende'l pueblu ponguetu de Carangres. Pa ello, madrugamos y salimos de Xixón, garrando l'autovía cantábrica, hasta Lloviu, onde tiramos hasta Les Arriondes y d'ehí a Cangues d'Onís.

Ellí, almorzamos nel nuesu sitiu davezu (la Huera) y partimos otru bon trechu de viaxe garrando la N-625 onde pasaremos pelos pueblos de Cañu y Tornín, cruciaremos el puente Dobra, pa entrar nel conceyu d'Amieva y travesaremos los pueblos de Buxil, Corigos, Pervís, La Vega Pervís y los Grazos onde topámonos col ríu Ponga.

Salimos del pueblu ponguetu de Carangres (755 m)

Equí, tomamos la carretera que sal a la manzorga (AS-261), y nella travesaremos los pueblos de Parcia, La Vega de Sebarga, Les Polvoroses, Santoveña llegando a Sellañu, onde entramos en Ponga. Equí siguimos pela mesma carretera, pasando por Pilanegru y en Sotos, garraremos la carretera más alloriante que nunca nun sufrí conduciendo hasta Carangres.

Dicir, que los aproximádamente 4 km de carretera son una auténtica llocura, na que xubiremos nomando tolos santos, con tal de nun cruciar dengún coche. Namái, alcontraremos un par de llugares onde dexar pasu o que nos dexen pasu y conducir marcha atrás colos desventíos hacia'l Ponga nun ye lo más prestoso.

Xubimos per un evidente camín valle alantre algamando vistes increyibles

En cambiu, si tenemos un conducir relaxáu podremos esfrutar de xubir paralelos a la paré norte del Tiatordos, el cúal va acompañanos durante tola ruta namái tapándose un ratín demientres preparamos tol trasteríu nel perguapu pueblu de Carangres.

Entamaremos a caleyar hacia la parte alta del pueblu, saliéndonos per una pista asfatada al entamu y garrando'l camín qu'empobínase direutu al valle que fai'l ríu Carangres. Güeyu, porque en pocos metros de camín, salen tres... ún hacia'l cordal d'Aranga, otru hacia'l colláu los Bárganos y el nuesu que sigui de frente per una portiella.

Xubiremos entos, per esti camín hasta qu'estréchase'l valle y xurde otra vallina hacia'l colláu la Llama, ente la Porra'l Toyu y el Picu la Güerfana. Debemos xubir un pelín namás hacia'l colláu La Llama y garrar un senderu que va paralelu al valle de Riusecu, que cola riega Bustaciellu forma'l ríu Carangres.

Xubimos hacia la collada Sorbeyu (m)

Na xubida, tiramos penmediu'l valle y ye un pelín abegosu d'andar, pero a la baxada garramos esti senderín a la manzorga'l cauce (xubiendo) y ye muncho más cómodu. El senderu fina xusto onde zárrase dafechu'l Riusecu, baxando dende la faldera de la Cruz de Valdoré.

Nós, siguiremos de frente hacia'l nuesu destín, el colláu Sorbeyu. Pa ello, caleyarmos n'envueltes hasta los (1177 m) del colláu, algamando unes increyibles vistes de la mole de l'arista sur del Picu Pierzu.

Baxamos a la Mayada Sorbeyu pa da-y la vuelta a los Palombinos

Tamos nun colláu preciosu, con un trabe de ñeve fondu, qu'amuesa que va tardar muncho en marchar tola ñeve que cayera esti añu. Cola ascensión fuimos algamando vistes hacia cares norte, como la del Tiatordos, Llambria,... pero agora descubrimos la pala pela que pretendemos ascender al Pierzu y tola xerra d'Aranga que tamién queremos conocer a la vuelta.

Tenemos un día inmeyorable, poro siguimos alantre, baxando hacia la mayada Sorbeyu, decidiendo descansar unos minutinos en tan guapu llugar, al cuál tienen accesu los pueblos ponguetos de Villaverde, Sebarga... al traviés del Séu Espina, qu'espero conocer en próximes visites.

Ascendemos tola tremenda pala del Pierzu penriba d'Espina

Güei, saldremos de la mayada Sorbeyu, bordiando'l picu Los Pallombinos y la riega Salgaréu pel sur, hacia la fastera occidental del Pierzu. Fadrémoslu, tol tiempu per bon senderu, llevándonos poquín a pocu hasta la panda final d'ascensu al Pierzu, la cual llévanos penriba de la mayada Espina.

Dicir qu'a partir de la metá de fastera oeste del Pierzu, los senderos diríxense cláramente hacia Espina, pero nós, tendremos de siguir n'ascensu hacia l'arista norte del Pierzu, onde garramos pente tramos de ñeve, caliza y yerba, l'entepechu final hacia'l cumal de 1557 m del picu.

Aportamos al cumal del Pierzu... ablucante mirador

Tamos falando de dalgo más de 500 ms de desnivel, dende la baxera del faldón oeste hasta'l propiu cumal, poro tolos integrantes de la escursión, vamos dir aportando al cumal ún a ún, caún al so ritmu y xeitu d'ascender.

Eso sí, toos xuntos esfrutamos d'un de los montes con meyores vistes d'Asturies en toles direiciones. A los ya nomaos montes de Casu y Ponga, sumaránse les recién algamaes vistes hacia Picos d'Europa, destacando les Peñes Santes, dafechu blanques por mor de les abundantes ñevaes.

Grupu nos 1557m del Picu Pierzu

Llueu de descansar un hora faciendo un total de más de 5 hores de ruta, vamos facer el descensu pola ruta normal del Pierzu. Poro, garraremos tola arista sur, hacia la mayá Ceboes, pasando primeru pel Campu Les Fuentes y enantes de la mayá, pel Cantu Les Fuentes.

El crestéu nun ye que seya mui abegosu, pero con tramos amestaos de ñeve y roca afilao, hai qu'andar sollertes pa nun meter la pata en dalgún furacu. L'avance ta siendo pelín llentu y voi viendo que pa dalgunos de nós, va facese la ruta perllarga... asína qu'en Ceboes toca tomar decisiones como suel pasar nestos casos.

Facemos tola clásica arista hasta Ceboes (1203 m)

Son les 4 de la tarde, cuando acabamos de descansar nesti guapu mayáu y falando cola xente, paezme lo meyor separanos nun par de grupos. Los que tenemos el coche en Carangres y el que tenga ganes d'aventura... vendrá conmigo pela Xerra d'Aranga hasta'l pueblu y el restu, baxará hasta la collada Llomena pel camín normal.

Nun son coses que me preste facer, pero sé que la parte más téunica de la ruta ta por llegar n'Aranga y podemos acabar aportando al coche de nueche si vamos toos xuntos. D'esta miente, unos baxarán por Escueñu hacia la collada Llomena, alcontrándose con munchísima ñeve na pista, pegándose una paliza fina y los demás diremos a pol coche col envís de dir a buscalos.

Facemos el crestéu pela llomba Aranga hacia Valdoré

Defechu, los que vamos hacia Carangres diremos esnalando, corriendo a tramos casi, baxando de Ceboes hacia los llagos y xubiendo al primer altu de la xerra d'Aranga de 1339 m: la Llomba d'Aranga, xustu penriba del mayáu d'Aranga.

Una vegada que tamos na llomba, baxaremos al colláu'l Foyón y llueu pasaremos al del Visu, pa meténos nel tramu más abegosu de tola xerra, nos primeros crespos de la cruz de Valdoré. Nel intre, alcontrarémonos con pasos llaterales, pente la ñeve, con brezu y cotolla alta, que dificultará muncho saber onde tamos pisando.

Travesamos el tramu más abegosu pente'l colláu'l Foyón y el Visu hacia Valdoré

Magar de les travieses, pasaremos a una trepada vertical hasta la cumera de la cruz de Valdoré, la cual requerirá l'aida a Kíla y sobretou de Sua, que tenemos que pasánosla de man en man. Na cresta de nuevu, sólo tendremos que llibrar delles peñes per un llau o per otru hasta'l cumal de la Cruz de Valdoré de 1361 m.

L'esfuerzu fué importante, pero ya tenemos el segundu oxetivu del día cumplíu y nunos tiempos estupendos (una hora dende Ceboes a Valdoré) que llévenmos a tar más tranquilos de cara a nun facer esperar muncho al restu de los collacios.

Encumamos la Cruz de Valdoré ( m) baxando hacia la collada Sorbeyu

Asína, desdexamos la opción de siguir hacia la collada Busllín pel Cantu Pondies, baxando pegaos a la riega Bustaciellu y decidimos descender aina hacia Sorbeyu de nuevu, garrando'l mesmu camín n'envueltes hasta Carangres, garrando como dixe enantes un meyor senderu, esta vegada a la mandrecha de la riega.

8 hores y cuartu dempués de salir de Carangres, aportamos a los coches de nuevu, mudándonos de ropa a fueu, pa dir a la gueta del grupu que ya taba baxando de Llomena pela carretera hacia San Xuan de Beleño.

En total, tamos falando d'una prestosa de ruta de 12.5 km, pela que tuvimos que bregar con un desnivel acumuláu de 1170 m, conociendo una nueva y mui vistosa forma d'ascender al Picu Pierzu... auténticu y más guapu mirador de tolos montes de la redolada pongueta.

Camudando'l Camín dende Ponga

No hay comentarios:

Publicar un comentario