lunes, 20 de octubre de 2014

Tarañes (Ponga) - Picu Tiatordos

10 de Mayu de 2014

Track: Taranes (Ponga) - Picu Tiatordos


Tornamos al Tiatordos magar de casi 5 años y vamos facelo dende la vertiente pongueta. Paez mentira que pasen los años tan apriesa y nun atalantamos que'l nuesu grupu ñaciera cuantayá, faísenos imposible dafechu, sobretou porque tenemos na tiesta les rutes como si fueren ayeri.

Pero bono, la vida ye asína...  y sigue alantre, poro p'aportar a Ponga, lo más rápidu pa nós, ye salir pela Autovía'l Cantábricu de Xixón, hasta Lloviu, onde siguimos nacional hasta Cangues d'Onís. Ellí toca l'almuerzu davezu y siguimos la N-625, onde en pasando los pueblos de Cañu y Tornín, cruciaremos el puente Dobra, pa entrar nel conceyu d'Amieva, pa travesando los pueblos de Buxil, Corigos, Pervís, La Vega Pervís y los Grazos topanos col ríu Ponga.


Partimos de Taranes (565 m) en Ponga 

Equí, tomamos la carretera que sal a la manzorga (AS-261), y nella travesaremos los pueblos de Parcia, La Vega de Sebarga, Les Polvoroses, Santoveña llegando a Sellañu, onde entramos en Ponga. Equí siguimos pela mesma carretera, pasando por Pilanegru, Sotos y La Casona de Mesta, hasta garrar la PO-4, que nos llevará al traviés de Tanda a la fín a Taranes.


La ruta pretende da-y la vuelta a la increyible mole del Tiatordos, poro camentamos que la ruta sedrá dura y mui llarga. Puede facese nos dos senes, pero nós preferimos xubir pela mañana pela fastera pongueta, ya que'l tramu d'ascensu pue llevar cenciello a erros.

Xubimos pel Valle Tanda hacia Carbanéu baxo la Copa del Tiatordos

Asina que saldremos del mesmu aparcaderu que n'otres rutes nes que visitamos Taranes (Vallimoru, Llambria), pero esta vegada envede dir hacia la Foz de la Escalada, siguiremos camín hacia'l valle Tanda, pel cual xubiremos de prau en prau (del Prau Mediu al de la Escuela pasando pelos Gatiles).

El camín d'entamu ye bono, pero si tuvieremos que dir con borrina otru cuentu sería, ya que nos praos, piérdese y pudiera costanos munchísimu orientanos. Col día abiertu como taba, sólo hai qu'empobinase hacia la copa'l Tiatordos y los perguapos mayaos qu'hai na so base: Carbanéu.

Pasamos del colláu Forada hacia la Mayada Brañadosu cola presencia del Fusu la Muyer

De Carbanéu fadremos un bordéu a la peña oriental del Tiatordos, les Ñarices de Malhome, teniendo poro que xubir hacia la collada Forada (1203 m). Dende ella, aparte de les vistes del macizu occidental de Picos, tendremos a güeyu otra ayalga del día, el nomáu Fusu la Muyer... perguapa aguya con formes perfemenines.

Nun sólo, tenemos esti finxu natural como entretenimientu nesti tramu, sinon qu'al final del bordéu a les Ñarices, parte en baxada, tendremos al final un guapu fayéu d'un altu valir ecolóxicu, que darános pasu al mayáu de Brañadosu.

Brañadosu dexa pasu al ascensu per Pandellanza

Llevamos 3 hores cuando conocemos el guapu mayáu de Brañadosu, onde magar de descansar un ratín, siguimos ascendiendo per una pindia vallina hacia Pandellanza, onde xúntase'l cordal de Ponga dende'l Maciédome al Tiatordos.

Les vistes según vamos ganando altor, ábrense per uquiera, ya seya a la nuesa espalda coles cotes penriba Sobrefoz (Recuengu, Zorru...), hacia'l sur (Maciédome, Ten y Pileñes) o cotes al occidente como'l Picu Cornielles o la fastera de Campigüeños.

Pindia xubida al Tiatordos

Namái que salimos de la viesca de Pandellanza, alcontrámonos con una pareya con una perrina, que diben non mui bien empobinaos. Poro, síguenmos de camín a la Mayá Tiatordos, onde garramos la llarga xuba hacia'l cumal del Tiatordos.

Sedrán menos de 300 ms de desnivel a pinchu, pero según vayamos de fuercies son a convertise nun castigu pergrande. Pa l'ascensu, hai que dicir que nun garramos el camín más trilláu que baxa hacia les Vegues del Pino, pero xúbese sin nenguna dificultá escoyendo caún el meyor pasu hacia los 1955 m del preciosu Picu Tiatordos.

Cumal nel Tiatordos (1955 m)

Los tiempos d'ascensu dende Taranes, fueron pergrandes (casi 6 hores), siendo les 4 menos cuartu, cuando entamamos el descensu. Ésto pa bien o pa mal, fizo que la borrina entrara pel norte y que nos complicare n'escesu una baxada que ya de por sí, yera esixente pol tarrén nel que teníamos de movenos.

Lo raru ye que díbemos bien de tiempu hasta Brañadosu, pero a partir d'ehí el cansanciu fizo que l'avance hasta la mayá Tiatordos y sobretou nel ascensu al picu, fuera llento por mor de la esixencia de la ruta en sí.

Según vamos baxando la borrina métese dende'l norte

Con too, nel cumal esfrutamos como bien merez un monte d'esti calibre. Tamos nel Tiatordos, faciendo la ruta más llarga d'ascensu dándo-y la vuelta a una mole enorme, poro, descansar, nun meter priesa y xintar con calma ye dalgo imprescindible.

La baxada ficímosla pel camín más pisáu qu'empobinábanos hacia la fastera de la collada los Fitos. Nesti tramu baxo las colladinas de los Fitos, perderíemos unos venti minutinos por fallu míu, al baxar de más hacia la canal de la Muda envede tirar pola cumera de fitu en fitu.

Anque la perda fuera poca (unos venti minutinos), na mente cansada de Pau fué un interruptor pa que'l so cuerpu sintiérase más cansáu inda. Pa cuando tornamos al bon camín, ya tábemos enmediu del borrín y tou parecía igual, nun baxábemos desnivel y el final de la ruta asemeyábase a dalgo acullá casi imposible d'algamar.

Con dellos problemes orientámonos pasando peles mayaes d'Entregüé y Daón


Si dalguien nun conoz esta fastera de Ponga y Casu, hai qu'indicar que la baxada a la Foz de la Escalada, nun se puede facer direuta y hai qu'arrodiar nun llargu andar pembaxo del grupu de cotes del Campigüeños, hasta la cabecera del ríu Taranes que da forma a la guapa foz de la Escalada.

Como ya dixe, ésto supón caleyar per un tarrén quebrapates, pasando pente la ñebla, pembaxo del Picu La Magrera, hasta la vega y mayáu d'Entregüé del que malpenes distinguimos dalguna cabaña. D'esti mayáu pasaremos per delles siendes pembaxo de cumales de la xerra Les Vallesqueres hasta topanos con una fonte, onde paramos a beber agua ya intentar relaxar los ánimos.

L'esfuerzu yera más de lo que nunca nun ficiera Pau y caleyaba a un ritmu llentu quedándose atrás ca pocu enmediu la ñebla, lo cual yera mui peligrosu. Poro, xuntámonos y ya dende esa fonte (márcola nel track), fuimos toos al ritmu más afayaizu pal grupu.

Aportamos a la Foz de la Escalada garrando aliendu al fín hasta aportar a Taranes

Dende esta fonte, baxamos más a pinchu per una vallina, siguiendo'l gps al milímetru ya que nun veíemos res. Dicir que si nun ye por llevar gps, diba ser dafechu imposible aportar a Taranes de nuevu, pudiendo metenos nun gran problema, pasando la nueche o acabando en cualesquier llugar bien lloñe del nuesu destín.

Por suerte y gracies a caltener la tranquilidá, aportamos al mayáu Daón, onde ya pel conocíu valle Piegüé pa los que xubimos a la Llambria, alendamos y tomamos el restu de la baxada pela foz de la Escalada ensín nervios, intentando esfrutar de cada tabayón que la borrina dexaba agüeyar.

Con 12 hores de ruta, enllenes de sufrimientu, nervios y malos, regulares, bonos y estupendos momentos, aportamos a Taranes cansaos mentalmente y físicamente. Los 19 kms de percorríu pa dar la vuelta al Tiatordos, dexaron un total de 1910 m de desnivel acumuláu, qu'amuesa a les clares que la ruta nun ye apta pa tol mundiu y qu'hai que dir cola tiesta nel so sitiu y con un altu nivel de sufrimientu a soportar como fizo Pau.

En díes así, tener collacios que tan sólo amesten a la ruta, tranquilidá, rises y tomar los malos momentos con bon humor, ye mui d'agradecer pa una persona como yo, qu'intenta guiyar a los collacios del grupu pel meyor de los caminos, anque davezu toque camudalos un pelín, jeje.

Mil gracies xente




Nesta ruta ficimos el Picu Tiatordos (1955 m): vértice xeodésicu de Casu y cuarta cota de Ponga

Ver progresos en: Retos montañeros

8 comentarios:

  1. Ruta potente Berto. Y más que la ficisteis. Dende Entregüe nun facía falta dir hasta Daón. Hay camín que vos lleva direutos a la entrada la foz la Escalada. Per ahí bexé yo una de les vegaes que ficimos la Llambria. Por mor, ye un camín preciosu. Si Pau ya diba cansada, con esa vuelta finaste matala, ja, ja.
    Un saludu

    ResponderEliminar
    Respuestas
    1. Pues nun te digo que non, pero nun veía a dos metros cola borrina, nun me la podía xugar, así que tiré de track y camín más claro.

      La verdá que col día en condiciones, de xuru que facíemos una baxada más directa.

      Un abrazu Cienfuegos

      Eliminar
    2. Nun hay más que un par de semeyes d´esi camín, pero déxote el enllace al mio blog por si les quies ver.
      http://pelescaleyes.blogspot.com.es/2009/01/la-llambria.html

      Eliminar
    3. Pues paez bien guapu'l camín... habrá que conocelu pa otra vegada. La verdá que nun taba pa experimentos cola borrina.

      Una preguntina... echáste-y un güeyu al Pallabreru del Monte y la Escalada... yera por saber si teníes conocencia d'ello.

      Un abrazu

      Eliminar
    4. Si, si, vilo fae unos diés qu´alguien había puestu el enllace nel face. Nun había visto lo tu entrada. Cuando y eché un güeyu pareciome un trabayu perguapu y hasta onde yo llego, que ye poco, bien fechu.
      Un saludu

      Eliminar
    5. Alégrome que te prestare... ta fechu con ciñu, a ver si tien bona acoyida

      Un abrazu

      Eliminar
  2. Una de las pendientes que tengo, subir el Tiatordos desde Taranes.
    Guapa ruta y fotos.
    Un saludo!

    ResponderEliminar
  3. Gracies... la verdá que ye una ruta tremenda. Que te preste!!

    ResponderEliminar