jueves, 28 de febrero de 2013

Tarañes (Ponga) - Vallimoru (Ponga)

26 de Xineru de 2013

Track: Taranes (Ponga) - Vallimoru (Ponga)


Otra vegada, inda col tastu a rutón nel ascensu a la Llambria, tamos en Taranes. La verdá, ye que quedamos tan a gustu col pueblu, que nun tenemos nengún problema en facer práuticamente una bona parte de la ruta de vuelta de la Llambria, pa conocer l'escondíu pueblu ponguetu de Vallimoru.

Y más, cuando van xunise xente, que nunca nun vieno con nós de monte, como ye David, collaciu virtual hasta esti día. Tamién, va venir una vegada más, Diego Currás, qu'apaez de monte dacuando y esta vegada al lleer nos correos que yera de "senderismu", traxo a la moza pa que viese lo guapu d'esta fastera asturiana.

Cuando falo de senderismu, ye porque nun hai ascensiones, nin crestes, nin dificultaes fonderes, salvo que p'acabar caleyando peles pindies cais del pueblu esaniciáu de Vallimoru, ye necesariu metese una kilómetrada cola compaña d'un desnivel mentable.

Salimos de la ponte'l ríu Taranes (565 ms)

Como siempre p'aportar a Ponga, lo más rápidu pa nós, ye salir pela Autovía'l Cantábricu de Xixón, hasta Lloviu, onde siguimos nacional hasta Cangues d'Onís. Ellí toca l'almuerzu davezu, onde xuntámonos toos y conocémonos munchos de nós y siguimos la N-625, onde en pasando los pueblos de Cañu y Tornín, cruciaremos el puente Dobra, pa entrar nel conceyu d'Amieva, pa travesando los pueblos de Buxil, Corigos, Pervís, La Vega Pervís y los Grazos topános col ríu Ponga.

Equí, tomamos la carretera que sal a la manzorga (AS-261), y nella travesaremos los pueblos de Parcia, La Vega de Sebarga, Les Polvoroses, Santoveña llegando a Sellañu, onde entramos en Ponga. Equí siguimos pela mesma carretera, pasando por Pilanegru, Sotos y La Casona de Mesta, hasta garrar la PO-4, que nos llevará al traviés de Tanda a la fín a Taranes. Cenciellu eh!!

Xubimos pel pueblu, abriéndose les vistes a les Peñes Santes

Aportamos entos a Taranes y dempués d'aparcar onde la ponte y preranos, salimos pueblu arriba, non antes de sacar la semeya de grupu y ablucar cola fuercia, con que baxa'l ríu Taranes. Siempre n'ascensu abandonamos les cais del pueblu, pa empobinanos per pista formigonada hacia la collada Taranes.

La Peña Taranes y la Foz de la Escalada acompáñenmos nel ascensu

La cuesta ye durina, poniéndonos les pates a fueu, anque como siempre les vistes paguen la pena l'esfuerzu. Bien aina, vamos tener la presencia de les Peñes Santes al fondu, demientres tola muria de la Llambria faínos compaña nel nuesu caleyar.

Topámonos bien ceo cola ñeve de camín a la collada Taranes

La ñeve, apaecerá de sutrucu nuna envuelta, alcontrándonos Pau y yo, a Kíla, como lloca fozando y mordiéndola pa saber como ye esi nuevu ellementu de la ñatura. La verdá, ye que camentábemos que tendríemos menos, pero bienllegada, ya que ta dándo-y un toque bien guapu, anque más duru si cabe.

Aportamos con una bona capa ñeve a la collada Taranes (1093 ms)

Nuna horina y cuartu, más menos, aportamos a la collada Taranes, faciendo lo que camentábemos el tramu más duru de la ruta, anque llueu daríemonos cuenta de que nun diba ser asína, lo más duro, ye lo que siempre queda por facer, jeje.

Les vistes ábrense hacia Picos

A les Peñes Santes, améstense per delantre'l Cantu Cabroneru y Peña Beza, pa completar una semeya perguapa de Picos si miramos p'atrás, anque preferimos mirar p'alantre, ya que tenemos un tramín llargu baxo la paré de la Llambria, que tien de llevanos hacia la collada Llués.

La Pica Cetín súmase al camín baxo la solombra de la Llambria

Si na xubida a la collada, quitáramos ropa, agora al metenos na solombra, tocará abrigase un pelín, lo qu'aprovechamos pa echar un triagu y comentar les guapes vistes. La Pica Cetín, será una nueva compañía, a la nuesa mandrecha, asína como'l Picu Pierzu, qu'apaez penriba la Cuguruta, sigún averámonos a Llués.

Más lloñe'l ye'l Pierzu el qu'apruz penriba la Cuguruta

Otra horina y cuartu, tardaremos en "llanear", con tramos de bona capa de ñeve, hasta la collada Llués, ellí, acábanse les nueses andances peles cotes más altes del día. Ye una pena, pero esto ye así, pa conocer el pueblu de Vallimoru, tendremos per delantre una llarga baxada hasta'l ríu Semeldón.

El Maoñu y el Vizcares dende la collada Llués (1095 ms)

Pero enantes, la visión alpina del Maoñu y del Vízcares, son más que xustificables, pa parar un ratín a picar dalguna barrina y frutu secu. Dende equí, baxaremos un pocu abriéndose vista hacia la Peñe Crespa, y sabiendo que tan llargu accesu tien, camentamos como seríen les visites de xente de Nieves hasta Vallimoru, que tenemos oyíu, por mor de Pau.

La Peñe Crespa améstase a les vistes na baxada a Cuadramoñu

La verdá ye que nós, montañeros d'afición, ensín necesidá d'ello, nun somos a pescanciar, lo duro de tener que facer dalgo por obligación, pasando pasos difíciles per foces o cresteríes, ya que'l ganáu, foise pa dalguna fastera más llonxana de lo encamentáu y tas xugándote la supervivencia de la to familia.

Les aficiones d'esta xente de xuru que yeren, tar na comodidá de la ciudá y nós a la escontra, adentrámonos per pista en descensu nun de los llugares más tranquilos y separtaos d'Asturies. Los primeros pasos, serán hacia'l colláu Cuadramoñu, onde aínda vense, praos bien curiaos al llau de delles cabañes.

Baxamos col silenciu d'una guapa viesca hacia la visión esperada

Al contrariu de lo que suel pasar, de la que baxamos, envede empiorar les vistes, meyoren, ya que cuando la viesca ábrese un pelín, nes distintes envueltes nos Llanos o nel Prau la Xerra, les formes de dellos picos tapecíos pol so tamañu nel relieve, apaecen desafiantes, como'l picu Brañatorpe, xustu na vertical de Vallimoru.

Al fín, Vallimoru al alcance

Y al fín, nuna envuelta de la Xerra los Espinadales, vemos Vallimoru. La impresión ye clara, nun sabiendo mui bien el por qué, d'allugar un pueblu na faldera colgada d'un picu, con un desventíu, xustu embaxo de les propies cases hacia'l ríu Semeldón.

Nun podemos facer otra cosa que baxar apriesa hacia'l ríu Semeldón, anque enantes de topanos cola ponte que lu crucia, tendremos que travesar el regueru La Rotella, que baxa con un caudal d'augua perimportante, dándonos la única posibilidá de moyase, pa pasar al otru llau.

Cabañes col teyáu de madera na baxada a la ponte sol ríu Semeldón

A la fín, topámonos col calce del ríu Semeldón (570 ms), que baxa xabaz y cruciamos la ponte "nueva" que da pasu a l'ascensión hasta Vallimoru. Ta claru, que sin nun fuera pela ponte, nun seríemos a pasar, ya que vese l'antigua traza d'un pasu que con tala cantidá d'augua, sería dafechu imposible.

Nel intre, tamos cansaos. Pau lleva con un dolor agudu nel abductor, que ta faciéndo-y penosu cualquier ascensu, poro anque pocu queda p'aportar a les primeres cases de Vallimoru, prefier quedase con Bea, na primer envuelta onde pega'l solín. 

Un pequeñu o gran ascensu hacia'l pueblu de Vallimoru

Los demás, xubimos dalgo más d'un centenar de metros de desnivel, descubriendo poquín a pocu delles construcciones del pueblu. El llavaderu y capiya tan remocicaes de va pocu y tan faciéndose delles obres en casones bien guapes. Aparte, paez ser que ta recuperándose l'antigua romería del pueblu, llenándose de vida al menos una vegada al añu.

Que problema tien estes revitalizaciones d'aldees escaecíes, por parte d'un usu turísticu? Pues que de xuru, qu'inténtase estrozar les pistes de tierra d'antaño, con formigón, pa que puean llegar coches non touterrenu, cuando pudiérase ufrir un turismu rial y en consecuencia col llugar que pretendes visitar.

Pangua y Kíla nel pueblu de Vallimoru (687 ms)


Nós, con ñeve abondo, tardamos 4 hores y media en dir, pero'l caminar foi sele y con problemes físicos de Pau, poro les xubides yeren un auténticu supliciu pa ella. Cualquier persona, pue dir a pasar un fin de selmana, caleyando a Vallimoru ya esfrutando del paisaxe, pa conocer formes de vida ponguetes de cuantayá, durmir nuna bona casa rural y tornar al día siguiente, respetando los caminos y pistes ensín formigonar y urbanizar lo que tien que ser rural.

Nun se, si'l negociu furrularía, pero les posibilidaes son increyibles. Aparte, paez ser que nun solo dende Taranes pue llegase, ya qu'esisten senderos perdíos que vendríen d'Ambigue y Cazu, dando la posibilidá a montañeros esperimentaos de facer una ruta increyible y poder descansar nun pueblu allugáu nun sitiu espeutacular.

Nun digo más, que vi la posibilidá, d'escuela d'escalada embaxo les propies cases, jeje....

Baxaremos de nuevu al ríu Semeldón nel nuesu tornar

En fin, nun m'importaría pasar un fin de selmana, con bona xinta y cama, nun pueblu como este y poder conocer meyor les siendes que parten y aporten a elli, y facer dalgo de deporte d'aventura (escalada, barranquismu, montaña...).

Polo demás, Diego y yo, baxamos a xintar con Bea y Pau, y los demás prefirieron metese'l bocadillu nel pueblu un ratín más. Magar de recuperar fuercies, nun queda otra que la vuelta hasta Taranes, baxando lo primeru al Semeldón, onde ficimos una visita al molín d'al llau de la ponte.

Despedímonos de Vallimoru, nun ascensu hacia Llués interminable

Con calma, paciencia y unes dotes de sufrimientu pergrandes, Pau fizo tola xubida dende los 570 ms del ríu Semeldón, hasta la collada Llues (1095 ms). Hai que dicir, que con dolor al caminar, lo que más pue prestate de la vida como ye la montaña, pue tornase odiosu hasta'l puentu de nun querer saber na d'ella.

La Llambria cola so ablucante presencia en Llués

Aún así, aportamos a Llués, onde entamó un tramu más favorable pal abductor de Pau, ya que nel llanu y baxada nun-y molestaba tanto. Poro, ficimos esti tramu más gayoleros, esfrutando del atapecer so los Picos y falando de mil coses, que nun teníen na que ver col dolor, jeje.

Colos Picos defrente nel pesáu camín hacia Taranes

Al llegar a la collada Taranes, aparte de recibínos la Peñe Recuengu con un anaranxamientu perguapu, topámonos con un muñequín de ñeve. Paez ser, que nun fuimos los únicos en xubir pa estes fasteres y tamién va quince díes, que xubieran unos rapaces, teniendo que dexar el coche na collada, al pillalos una invernada y nun poder baxalo.

Sigún cuntáronmos nel chigre de Taranes, taben de fin de selmana nuna cabaña en Llués y a la vuelta, ya nun pudieron baxar el coche, por mor de la ñeve y el xelu. Prestaríame saber si un mes dempués, tuvieron la oportunidá de baxalu, porque esti añu l'iviernu nun ta dando muncha tregua.

El Recuengu y el Zorru despídense de nós nel atapecer

En resume, ruta senderista pero dura, dura, por mor de la distancia (19.9 kms), del tiempu (8 hores y media) anque sin ñeve faise n'hora y media menos mínimu y sobretou y atentos al datu, pol desnivel acumuláu (1690 ms). Y eso que nun xubimos hasta la parte alta del pueblu, jeje.

Camudando´l Camín con Kíla pongueta

4 comentarios:

  1. Buena ruta Berto, si esas montañas ya son guapas de por sí, con nieve ni te digo.
    Es una pena que lugares como Vallimoru caigan en el olvido y el abandono, por aquí pasa algo muy parecido con las antiguas masías, sobre todo en el Maestrazgo, se abandonan, acaban derrumbándose y sólo quedan como ruinas y vestigios de lo que fue una vida (dura, aunque pienso que la gente sería feliz) de aprovechar cada recurso que la montaña ofrecía, perdona el rollazo, pero es que soy un apasionado del tema de las masías o despoblados en el monte.

    Un abrazu.

    ResponderEliminar
    Respuestas
    1. Que quies que te diga. Esto ye solu un exemplu de pueblu abandonáu. Hailos a miles n'Asturies. Lo que pasa que la so situación tan lejos de cualquier otru, failo especial.

      Si fuera a informame claramente, d'otros caminos hasta esti pueblu, cuando vengas de visita, sería la hostia acercanos de nuevu, jeje

      Un abrazu

      Eliminar
  2. Tengo que ir por Taranes que todavía no he estado ni en la Llambria ni en la Foz de la Escalada. Se me está quedando esa zona aislada. Hay que ir antes de montar el negocio ese de turismo rural en Vallimoru, antes de que llegue Cascos y ponga el funicular..

    Un abrazu.

    ResponderEliminar
    Respuestas
    1. Cascos ta contando los sobres de Barcenas, jeje
      Tengo pendiente la vueltona al Tiatordos dende Taranes, nun te digo más y ye de grupu, jeje

      Un abrazu

      Eliminar