jueves, 13 de marzo de 2014

Fontún (Vil.lamanín - Llión) - Cuetu Fontún

11 de Xineru y 5 Marzu de 2014

Track: Fontún (Vil.lamanín - Llión) - Cuetu Fontún


A naide que pase per Vil.lamanín, prestándo-y la montaña, escápase-y al güeyu un monte en concretu... esti ye'l Cuetu Fontún. Tien una presencia brutal, con delles parés verticales y una amplia canal qu'amuesa'l camín pal so ascensu, poro nun quedaba namái que ponelu nel llistáu de pendientes y da-y preste.

Pero una cosa ye que-y tuviera ganes y otra facelu dos vegaes en dos meses, jaja. Esti añu, toi teniendo que repetir montes p'acompañar a Fernan nes sos incursiones astures al monte, col envís de que sume puntinos pa poner ruta l'añu que vien.

Partimos del pueblu llionés de Fontún (1154 ms)

Como ye vezu, p'aportar a Vil.lamanín salimos de Xixón pela Autovía Minera, hasta Mieres del Camín, onde siguimos pela A-66 hasta Campumanes, garrando la N-630 pel puertu Payares, pasando dempués per Arbas del Puertu, Busdongu, Vil.lanueva y Vil.lamanín onde toca l'almuerzu en Casa Ezequiel.

Nel primer día, apuntámonos los paisanos del GM Xuan de la Borrina, Richar, David, Dani, Pangua, Haritz y yo y nel segundu día tamos, Fernan, Ibán y yo mesmu. De cualesquier forma, acabamos con una fartura fina a base de bollería y tostes con mermelada.

Xubimos pela pista paralela a la riega del Aguilón col Fontún presente

Travesaremos Vil.lamanín pela Le-312 y en menos d'un kilómetru tamos nel pueblu de Fontún, onde dexaremos los coches casi al final del pueblu. Magar de los preparativos, garrando trastos pa la posible ñeve duro, entamamos a caleyar per un camín hacia'l nuesu destín.

El primer día un fonda ñebla, nun mos dexaba ver bien el picu, pero poquín a pocu fue llevantando quedando tan claru como nel segundu día con Fernan. El camín ye cenciello, pista alantre, hasta topanos con un desvíu a la manzorga hacia unes naves ganaderes.

Abandonamos la pista, per praos hacia la entrada de la canal d'ascensu

Anque en realidá, aconseyaría, pasar d'esti camín ganaderu y avanzar un pelín más pela pista, llibrando así tol barrizal formáu nel camín, a los caballos y a los mastines, qu'anque son nobles meyor nun molestalos.

Travesaremos praos y dalguna pequeña riega que ñaciendo na peña'l Gallo va amestase más abaxo de la pista col ríu Aguilón. En tou momentu, vamos alcontrar dellos senderos que lleven direutos a la canal que fórmase pente la peña'l Gallo y una muria perllarga que fai de contrafuerte a la canal de la Carba.

Metémenos na pindia canal, dexando la Peña'l Gallo a la manzorga

Tanto'l primer día (semeyes de riba) como'l segundu día (semeyes de baxo), esfrutaremos d'un ascensu pindiu pero mui prestosu, con un toque a gran canal de Picos, anque muncho más curtia jeje.

En Xineru malpenes alcontramos dalgún ñeverín, pero en Marzu, anque tamién portamos crampones y piolé nun somos a necesitalo a pesar de tar la parte más sombría de la canal con bona capa de ñeve.

Aportamos al hombru y entamamos l'ascensu final al Cuetu Fontún

Ensín descansu y con una bona sudada a pesar del fríu, facemos camín hasta l'hombru (1676 m) onde fina'l contrafuerte, dando vista a una cortada canal sol colláu de Gete. D'equí quédanos el tramu final hacia'l Cuetu Fontún, el cuál faise superando delles terraces nun amestáu de peña y yerba, y nel segundu día sobretóu ñeve.

Pente terraces calices y ñeverinos facemos el tramín final

Sin mayores problemes que llibrar con curiáu les travesíes llaterales pela ñeve, ya qu'en dalgún puntu tienen ciertu patiu, encumaremos los 1953 m d'altor del Cuetu Fontún. La grandísima pena del primer día, ye que metióse la ñebla nel tramu final y nun vimos res, quedándonos coles ganes de les vistes.

Cume nel Cuetu Fontún (1953 m)

Menos mal que'l segundu día, con un anticiclón entrante, pudimos ver dende'l Macizu de Penaubina, a cumales del cordal Cantábricu, como'l Cuetu Millaró, Nogales, Peñes del Faru y un horizonte repletu de blancu y azul, onde nun somos a pescanciar la cantidá de montañes por visitar.

Nel intre, Fernan, Ibán y yo, descansaremos un ratín y al abellugu del vientu picaremos dalgo, pa con pocu más de dos hores d'ascensu facer otres dos de baxada tranquila pela mesma canal. Eso sí, nesti descensu divertirémonos garrando tola canal pel ñeveru, esnalando coles botes pela ñeve dura y viendo como Kíla, nos pasa como un tiru corriendo penriba d'ella.

Perguapes vistes (Penaubina, Cuetu Millaró y cordal cantábricu)

Escaecemos la segunda ascensión al Fontún de Marzu y centrámonos na primera en Xineru, quedándonos el grupu, camentando delles opciones por mor de la ñebla espeso, que tenemos metida nel cuetu.

Falamos un ratín y con esti tiempu, pasamos de crestiar absolutamente nada, asína que decidimos bordiar pel sur tala cresta y averámonos al hombru oriental del Fontún. Ellí, ensin ver entá'l nuesu siguiente oxetivu, la Peña Machamedio, entamamos la baxada a una fonda cubeta.

Bordiamos un pelín pembaxo la cresta del Fontún

Según vamos baxando, la borrina paez llevantase y vemos a lo lloñe la Peña Machamedio. Paez que'l día va llevantar finalmente y tomámoslo con tranquilidá, tanta que nun ñeveru llateral, ponémonos a prauticar autodetenciones.

Daremos vista al Machamedio, pero enantes pararemos a prauticar cayíes

Ya que cargamos col material, que meyor qu'echáse unes rises, dexándose resbariar pela pendiente ya intentando frenase col piolé. Cuando cansamos de facer el xabalí (20 min), siguimos camín hacia'l Machamedio, la cual vemos cerquino, decidiéndonos a bordiala pol Oriente, ascendiéndola ensín mayores problemes qu'afitar les manes en dalgún momentu.

Ascendemos al Machamedio bordiándolo pel Este

Agora sí, quedamos tranquilinos nel vértice xeodésicu del Machamedio... tranquilos pero xelaos de fríu, así que semeya de rigor, ver les vistes posibles y corriendo p'abaxo tol mundiu, al alcuentru d'un requexín onde refuxanos del vientu y poder xintar.

Cume nel Machamedio (1905 m)

Darréu de la xinta, entamamos el descensu hacia una estrecha canal que va sirvinos pa baxar hasta'l colláu de Gete, pero enantes tendremos una panda hasta'l fondu de la cubeta, demientres el borrín destapa al fin la cume del Fontún.

Col Fontún a la fín llibre de ñubes... baxamos hacia un canalizu de descensu

El descensu va facese cada vegada más guapu, ya que de la cubeta, garraremos un canalizu estrechu qu'empobinarase a un destrepe, nel que tardamos un pelín n'alcontrar el bon pasu. Nun ye difícil, nin muncho menos, pero hai qu'acertar bien pa nun metese en marrones.

Tenemos un tramu perguapu de destrepe

Dellos ánimos a Kíla dempués, tamos na parte baxa del guapu destrepe y ya la canal amplíase poquín a pocu, hasta abrise completamente hacia'l colláu de Gete (1594 m), al cual llegaremos con unes increyibles vistes del macizu de Penubina y de les Tres Maríes entre otros cumales.

La canal ampliáse hacia'l colláu de Gete

Dende Gete, tan sólo tendremos que siguir la pista, que xugando col ríu Aguilón, baxará n'amplies envueltes al entamu, pa siguir rectu hacia'l pueblu de Fontún. Ensín más, dedicámonos a charrar, esfrutar de les verticales parés del Fontún, qu'úsense pa esguilar n'alpina y dir pasín a pasu hasta'l pueblu.

Ensín perda per pista, baxaremos esfrutando del calizu Fontún

En resume, anque se puede facer como una prestosa ruta mañanera, con un bon día ye encomendable facela circular, saliéndonos con tranquilidá y quitando parones grandes que ficimos, una ruta de 6 hores, con un percorríu de 10 kms y un ascensu acumuláu de 915 ms de desnivel.

Que vos preste.... y nun escaecer... una ruta nesta fastera, nun ye ruta si nun fináis en Casa Maragato en Busdongu, dándo-y al quesu y embutíu, col tastu d'unes cervecines bien fresques.

Camudando'l Camín nel Fontún

4 comentarios:

  1. Vas a hacerte especialista en entradas estereofónicas. Lo de casa Maragato la verdad es que no hay que olvidar citar, es un punto inexcusable del día. Solo superado por el desayuno de Casa Ezequiel.
    Un abrazu. Buena entrada.

    ResponderEliminar
    Respuestas
    1. Joer espero que non Fernan, eso significaría que llevo un retrasu brutal nel blogue y por eso encadeno dos ascensiones por ruta jajaja. Nun citar casa Maragato ye casi delictivu jajaja. A mí, préstame más que los desayunos d'Ezequiel casi.

      Un abrazón

      Eliminar
  2. Muy buena Berto, eso de repetir una cumbre en tan pocu tiempu ya me tocó a mi munches veces y asegurote que bien me presta.
    Sobre el Fontún, que quies que te diga, ye una cumbre bien prestosa, pero en alguna ocasión fizonos pasales un poco p... por les condiciones de la nieve.
    Eso si, nosotros casi siempre finalizamos la ruta fartucándonos en casa Zequiel.
    Un abrazu

    ResponderEliminar
    Respuestas
    1. Ya veo que sueles repetir dalguna qu'otra al añu, normal con tolo qu'andes pel monte jaja. Nun soi mui d'ello, pero como dices si ye por acompañar a un collaciu y pasalu bien, que nun falten les repeticiones.

      Un abrazu

      Eliminar