martes, 25 de junio de 2013

El Pino (Ayer) - Pena Reonda

16 de Xunu de 2013

Track: El Pino (Ayer) - Pena Reonda


Última ruta del añu montañeru 2013-2013, la cual a pesar de la temporada ivernal tan llarga, fuimos a llibrar lo meyor que pudimos. Sicasi, que teníemos rutes más potentes o abegoses, pa finar, queríemos en realidá acabar con bon tastu entos sentíos, poro conocer les Foces del Pino y ascender a la Pena Reonda yera aseguranos l'esitu.

Asína que, una vegada más esti añu, vamos apaecer pel conceyu d'Ayer, magar de la ruta davezu dende Xixón, pela autovía minera hasta Mieres del Camín. Ellí garramos la A-66, hasta'l desvíu al corredor del Ayer pola As-112 pasando per Morea, L'Escuyu, Los Estrul.lones y Cabanaquinta onde topamos un chigre de milagru onde almorzar y siguimos pela AS-253 pasando por L.levinco, Entepenes, Col.lanzo, Yanos, La Pola Vieya y nel Pino aparcamos los coches na vera la carretera.

Grupu nel guapu pueblu d'El Pino (626 m)


Ellí, a los ya presentes (Charly, Pangua, Simón, Canta, Haritz, Zori, Ricardo y yo) va xuntásenos Iñaki y un collaciu Fernando, que lleven ya unos díes faciendo monte na fastera de Lliyu en Llión. El día, paez ser de calor abondo, pero al menos fuimos previsores y a les 9 y media la mañana ya tamos preparaos pa entamar a caleyar.

Y vamos, facelo travesando les cais d'El Pino, hasta la ponte'l Molín, onde perpasamos el ríu San Isidro y metémonos per pista asfaltáu hasta cruciar el ríu Pino, pasando a la otra vera, pela qu'entamaremos a xubir desnivel sol ríu, per una pista de tierra.

Caleyamos per pista hacia les Foces del Pino

Por suerte o mala suerte, na casi totalidá de la pista qu'averanos hacia les foces del Pino, nun vamos ver más qu'en dalgún claru la Peña Panda, espolón norte de la Reonda, pero per otru llau, vamos a la solombra bien fresquinos y eso agradezse.

Nuna horina aproximáu, y magar de pasar baxo les brañes de Cobes y Entreriera, diremos metíendonos pali pali, pente les dos muries que baxan dende la Panda pela mandrecha y del picu Pandos pela manzorga. Ye una preciosidá, dir viendo como'l ríu Pino, foi capaz de furacar pente les dos peñes de tala manera.

Travesamos alloriaos con tanta augua les foces del Pino

Malpenes son diez minutos los qu'esfrutamos d'esti espeutáculu d'augua y caliza, pero bien paga la pena averase hasta equí. Amás, esti añu con tanta ñeve, el Pino, baxa con una furia descomanada, teniendo tramos del ríu, nos que faise cortina d'augua refrescándonos un pocu al pasar al llau.

Dicen que lo buenu, si breve, dos veces buenu, así que salimos de les foces, p'alcontranos col crucie de caminos, onde casi entama la nuesa ruta defechu. Como pón nel cartelu, tiraremos hacia la mandrecha, xubiendo per un pindiu camín, embarráu a tramos que tien de llevanos hacia'l mayéu del Fondín.

Salimos de les foces pa empobinanos hacia la Pena Reonda

La solombra siguirá faciéndonos compaña, hasta'l puntu nel que la viesca acábase y el sol, danos un avisu de lo que va esperanos durante tol día. Por suerte, nel intre, ábrense ante nós delles vistes que perguapes, quedándome sobretou cola collá Pandos, baxo'l picu del mesmu nome. Ye guapísimu ver, como inda queden praos bien trabayaos nesti valle de Pedroso.

Pero nós a la nueso, y nun ye otra que siguir xubiendo desnivel y un desnivel duru de xubir, ya que les diverses siendes, traviesen pindios mayaos hacia'l Fondil, onde a la vera d'una cabaña, decidimos parar a beber y picar daqué.

Dende'l Mayéu Fondil (1220 ms) tamos a metá de camín de les foces y de la Reonda

A unos 1220 ms d'altor, llevamos unos 600 ms d'ascensión y quédenmos otros tantos, los cuales tamos viendo que van ser d'una bona dureza. Tamos allugaos, práuticamente pente dos ablucantes muries, que van zarrándose nun embudu ensín final visible pel momentu.

Tamos entrando no que nómase la canal de los Agriles y nun la podíemos imaxinar más guapa. D'entamu tenemos una amplia parte de prau, que va dir dando pasu, a un pedreru, el cual lo meyor ye dir llibrándolo lo más pegáu a la enorme paré de la mandrecha.

Xubimos la llarguísima y tendía canal de los Agriles hacia'l requexu final de la Reonda

Malpenes tira una brisina, la cual ta salvándonos de l'asfisia y ye que los parés, van apretándonos a cada metru xubiu. Con ciertu intervalu, vamos reuniéndonos pa que Zori, que sufriendo un pelín, nun quede mui atrás, pero los d'alantre que van como robezos tiren hacia'l final de la canal a lo xole.

Tanto ye, que nun mos faen casu y envede garrar una evidente cueste a la manzorga al final de la canal, métense más fondamente nella al traviés de varies revueltes, col resultáu final, de dalgún enmarronamientu y pasinos dellos espuestos p'aportar a l'arista final.

Salímonos pela manzorga per delles terraces hasta la cresta

Esta vegada, los más retrasaos de ritmu, garramos el bon camín, y anque tuviemos que tener curiáu, cola yerba tumbao por mor de la ñeve d'esti añu, fuimos a dir ganando terraza tres terraza, un cenciellu camín hacia l'arista, aportando a ella, muncho más arriba y muncho antes que'l restu de collacios.

Una vegada que tuvimos na parte cimera de l'arista, ya siguimos poquín a pocu, pela arista, ascenciendo los pocos metros que nos diben separar de la cumera de la Pena Reonda, ensín arrimase muncho a la cayía pal norte.

Cenciellu crestéu hacia'l cumal de la Reonda

Ún de les coses qu'amuesen la dureza de l'ascensión, son les 3 hores y 45 minutos que llevónos facela, anque a dicir verdá, como siempre, cuando ye tan prestosa l'esfuerzu queda pa prau. Tamos nun de los miradores vamos centrales d'Asturies, teniendo unes vistes del conceyu d'Ayer y de toles sos cotes más altes increyible.

L'Esturbín, les Peñes del Faru, La L.laguna, el cercanu Nogales, Peña Mea al norte, el picu Torres y el Retriñón son dellos cumales mui reconocibles, pero atrás tenemos Picos d'Europa tamién y tolos cumales ponguetos y casinos.

Vistes ablucantes pa tolos llaos: Esturbín, Peñes del Faru, L.laguna, Peña Mea

Y una vegada que tamos toos reuníos nel cumal, con ganes d'esfrutar de la xinta y de les vistes na redolada, de sutrucu apaez una ñube d'aviespes, qu'escorriónos d'ellí como ta mandáu. La verdá ye que foi una putada, pero nun taba la cosa como pa quedase ellí.


Cumal de la Pena Reonda (1842 ms)

Así que, entainamos a sacar la semeya de grupu y baxamos pela arista, col envís de restolar una baxada hacia la fastera sur de la Pena Reonda. Ésta alcontrarémosla al pocu de l'arista viendo como una canaliza amplia va baxando con delles envueltes.

Primeru fadrémoslo, siempre per un tarrén amestáu de yerba y caliza, hacia'l SO y pa dempués dar una envuelta hacia'l SE, que tien de dir llevándonos con dalgún destrepe cenciello hacia les siendes que bordean el paredón sur de la Reonda.

Baxamos de la Reonda pela cara sur, hacia'l colláu de canal de la Reonda

Ya per senderu, vamos dir tranquilamente per un pedreru, hacia'l colláu onde entama la canal de Pena Reonda a 1694 ms. Ellí, dempués de baxar unos metrinos, p'abelluganos del vientu, tirarémonos al fin a xintar y echar la siesta durante media horina.

Magar del descansu, vamos baxar hacia la collá Palmián, anque tamién podríase baxar pela canal de Pena Reonda, con un descensu muncho más direutu. Pero bono, bien paga la pena, averase a esta collada p'almirar la Pena Reonda en tola so grandura.

Magar del descansu baxamos hacia la collá Palmián

Una semeya val más que mil pallabres, y la d'abaxo diz a les clares, lo guapa que ye esta montaña y la espectacular caliza que forma les sos parés. Si nun tuviera tan lloñe de cualquier complexu urbanu, de xuru que taba estrada de víes n'alpina jeje.

Despedímonos a lo grande de la Pena Reonda

Con pena dexamos les vistes a la Reonda, garramos augua na fonte de Palmián, y baxaremos hacia'l val.le Caniel.la, ensín aportar hasta'l mayéu Glayiru que ye onde llévanos el senderu. Poro, vamos baxar un pocu más a pinchu, pero ensín problemes el pindiu práu déxase facer bien n'envueltes, hasta la sienda que baxa del propiu colláu Caniel.la.

Empobinámonos per una llarga baxada dientro'l Val.le Caniel.la

A unos 1500 ms d'altor, garramos el camín que baxa a les foces y claro ta, tenemos un descensu llarguísimu hasta les foces. Nun queda otra, qu'esfrutar d'esti guapu valle y sobretou aprovechar tola solombra que va danos durante bona parte de la baxada.

Caberu vistazu a la Reonda y al val.le Caniel.la

Vamos baxando animosos, pero Zori paez que baxa mui cansada, así que dacuando esperamos a ver que tal, pero necesita baxar al so ritmu, ya que va cargada de pates. Poro, siguimos el descensu, despidiéndonos de la Reonda y del valle Caniel.la, pa dempués de pasar por Cuevas, aportar a las Campas, onde pocu más abaxo tenemos el cruce de caminos d'entrada a les foces.

Aportamos al entamu de les foces del Pino, onde relaxámonos un ratín

Ellí, pararemos con tola tranquilidá del mundiu a sacar semeyes de dos canalizos que xuben pente muries altísimes de la Panda y qu'entrugámonos si tienen salida. Y como nun paez que Ricardo y Zori lleguen ainda, descalzámonos y ponémonos en mou Spa, dándome cuenta una vegada más, que nun aguanto l'augua frío na bien.

Colos pies sequinos y relaxaos, aporten hasta ellí, los nuevos miembros de Xuan de la Borrina, pa la próxima temporada y dicen que tiremos que van tar un ratín ellí y baxen darréu con calma. Así lo facemos metiéndonos tol tramu de pista de tierra primeru y d'asfaltu dempués hasta'l Pino, faciéndosenos pesadina, pesadina.

Tramu final pelín pesáu dende les foces al Pino

En resume, ruta d'inmeyorables condiciones pa esfrutar de la montaña, por vistes, por guapura de foces y pola ascensión d'una peña con un valir montañeru grandísimu. Pa ello, solo tocaría sufrir un pelín, durante los 15.6 kms de percorríu y 8 hores, aunque pue baxase bien el tiempu, ascendiendo un total d'unos 1400 acumulaos, siendo la mayoría son direutos dafechu.


Camudando'l Camín cola Pena Reonda


Amás de conocer les Foces del ríu Pino, ascensimos a la guapísima Pena Reonda (1842 ms): monte prestosu astur
 
Ver progresos en: Retos montañeros

6 comentarios:

  1. Me he perdido unas cuantas este año, pero esta me parece que es la que más me hubiera gustado no perder.
    Tengo trabajo para recuperar cuando tenga tiempo.

    Ya queda menos, a ver como se va iendo la nieve.

    Un abrazu.

    ResponderEliminar
    Respuestas
    1. Pues sí Fernan, ta claro que ye una de les rutes más guapes del añu, eso ensín dubia.

      Un abrazu

      Eliminar
  2. Hola Berto, casualmente ayer estuve yo en esa cumbre -ya la tengo hecho muches veces- el tema ye que teníamos que colaborar con el II trail Alto Aller como controladores, justo debajo de la arista SE y claro cuando pasó el cierre de carrera pues el compañeru y yo p'arriba y por esa arista, luego bajaríamos por la normal, osea por donde subisteis vosotros.
    El compañeru de control que estaba conmigo, nunca había hecho esa cumbre y alucinó con la arista. Yo la colgaré en el blog en dos o tres semanes, cuando ponga otres anteriores y pondré también el trakc. A ti que te gusta cogete a la caliza, suguro que te gustaría la arista, aunque te aviso que no es sencilla, tiene pasos algo complicaos y hay que buscar algunos que no son muy evidentes y por supuesto en mojao ni plantealo!
    Ye una cumbre que me queda cerca de casa y vamos mucho a ella y quitando los paredones del Fondil, ya la subí por cuatro sitios distintos. dos de ellos bastante complicaos.
    De todas formas, si quieres puedes ver y pequeño video que hice hace unos años y luego lo colgué en el blog http://monchujo.blogspot.com.es/2009/03/pena-redonda.html
    mi primera vez por esa arista
    Un abrazu y a ver si algún día coincidimos por el monte

    ResponderEliminar
    Respuestas
    1. Guapísimu'l vidiu, con un temazu de Llan de Cubel pa entamar, jeje.

      Ya sabía yo, qu'esi penona, tenía que poder xubirse faciendo una actividá más qu'interesante.

      A nós, como la ficimos encantónos, la xubida pola canal norte, ye preciosa y tien ciertu encantu metése nesi embudu.

      Esti finde, desapaezco durante 4 díes, na nuestra clásica travesera... el percorríu ya se conocerá a la vuelta, jeje

      Un abrazu Monchu

      Eliminar
  3. Pena preciosa que tengu apuntada pa subila dende El Pinu pal prósimu añu si puede ser. Gracias pol reportaxe.
    You subiérala fai dous años pola parte de Vegará que ye la que meyor me queda viniendu de Llión.
    Nun dimos cola canal afayadiza y nos metímos n'un buen berenxenal que nun se m'olvida facilmente... pasamoslas putas, vamos. Amás, díbamos confiaos pensandu que nun sería pa tantu la pena esta. Bueno, una aventura... jeje

    Norabona por outra parte por esti blog, préstame muitu velo escritu nesta llingua que tamién falamos algunos pal outru llau las montañas, sobretou pa L.laciana y l'Altu Sil. Por eso, ye un placer ver los nomes cona sua toponimia tradicional.

    Un saludín.

    ResponderEliminar
    Respuestas
    1. Mil gracies pol comentariu, Héroe de Leyenda.

      Equí siguiremos, comentando y amosando rutes a facer y calteniendo no que podemos, tola toponimia tradicional y la llingua que fai usu d'ella.

      No montañeru... ablucante pena la Reonda... guapa per toles fasteres.

      Un saludu a L.laciana

      Eliminar