miércoles, 4 de enero de 2017

Vegarredonda (Cangues d'Onís) - Porru Bolu - Porru Llagu

11 d'Ochobre de 2016

Track: Vegarredonda (Cangues d'Onís) - Porru Bolu - Porru Llagu


Dempués del precalentamientu na Aguya Madalena, tocaba pasar a la acción de verdá y nun par de díes de vacas d'esos que suelo facer, tiro un martes con Dani hasta'l Cornión, lo cual entama a ser un vezu nos últimos tiempos.

Cómo aportar al macizu de Picos del Cornión? Pues tais fartucos de velo, asína que les señes pa conocer Vegarredonda tenéisles equí. Nós, entamamos l'aventura dende'l refuxu y el paséu dende Pandecarme ye pa entrar en calor y bona falta facía ya que'l día taba fresquín.

El Porru Bolu esperándonos impaciente

De Vegarredonda garramos el camín que xube pela Llampa Cimera en direición al colláu la Fragua, conocíu de milenta rutes tamién como cualquiera que nos lleve hacia'l H.ou Santu y qu'esti branu fartuqueme de facer col GM Xuan de la Borrina y con Fernan.

Bien ceo, alcontrámonos de frente col nuesu oxetivu cimeru, el Porru Bolu, pero vamos dando-y a la parpayuela, falando de milenta coses y la verdá ye que fízosenos hasta curtiu l'accesu. Xubiremos una llera incómoda hasta'l pié de vía y preparamos los trastos a la entrada del canalizu que ye'l primer llargu de l'ascensión.

Dani lluchando escontra'l fríu y la chimenea

Nesta cordada, Dani pon la esperiencia y conocimientos téunicos y yo humildemente pongo'l grau d'escalada y la inconsciencia. Asina qu'entama él, metíendose nesti canalizu que suel ponese de III grau namái... como podéis ver nos croquis de los collacios del Maquis.

Dicir que según onde miren, recomiendo metese un pocu pola drecha de la propia canal. Por qué? Pues porque esti canalizu ta pulíu enforma pola ñeve, ya que suel tar tapáu durante muncha parte del añu y los agarres aparte de pulíos son escasos.

Primer llargu pocu agradable nuna chimenea pelín guarra

Así que si somos llistos, saldrémonos al paré onde dicen qu'hai hasta clavos p'asegurase y nun vos meteréis nel fondu'l canalizu, onde aparte de nun tener muncho onde protexer curiosu, alcontrarémonos na metá del canalizu con un pasu d'oposición pelín gafientu.

Durante mi estancia asegurando a Dani, pasé más friu que la hostia y nin con guantes yera a entrar en calor, poro cuando aporté a la h.orcadina pente'l Porru Bolu y el Porru la Mayada, tuve un ratín soplando a ver si yera capaz d'esguilar a gustu.

Caleciendo les manes enantes d'entrar al segundu llargu

Pa enriba, como Dani nun lo pasó mui allá, col pasín d'oposición-empotramientu no fondu'l canalizu, dixo que tirase yo'l segundu llargu. A mí, tampoco prestóme gran cosa esti primer llargu y fuí poniéndome los cacharros al llombu, más bien, pocu convencíu.

Prepárome, falamos un ratín diciéndome que tengo d'alcontrar un clavu namás salir y cuando lo veo, meto'l primer esprés y veo les dos opciones que me comenta. O salir en travesía a una plaquina d'adherencia o tirar de frente per un canalizu onde entra un friend granducu a cañón.

Entramos nel segundu llargu per un canalizu vertical

Los gatos vieyos nun me dieron res de confianza nel canalizu, asina que como pa meteme nuna placa con caída al vacíu. Poro, prefiero tirar de frente y meter un friend pa protexer el pasu, siendo más duru qu'esi cuartu que marca los croquis pela manzorga, pero pa mí, muncho más seguru anque haya qu'apretar más.

Saldremos sin problemes y ya sigo tirando metros y tirando metros ensín meter nada, porque too paecíame pelín rotu, asína qu'avanzo pela placa de terceru, ensin esmoleceme muncho hasta que veo un reunión vieya con dos clavos que dan cosa hasta tocalos, pero bono al menos por asegurase que nun quede jeje.

Detalles de la entrada del segundu llargu

Salgo d'esa reunión en travesía hacia la mandrecha y tendremos que superar un murete con dos canalizos paralelos, los cuales déxense protexer con dalgún friend, pero nun soi a afitar bien del tou los seguros metiendo un quitamieos y sigo tirando p'alantre... hasta agüeyar un clavu.... UN CLAVU.

Dame la risa pensar en trepar en deportiva con seguros expansivos y nun fiase d'un vuelu y equí alcuéntreste con un clavu ferruñentu de cuando Panchu yera corneta y tíreste como si fuera un bolt del 12.

Finando'l segundu llargu y aportando a la reunión previa al cumal

Salgo al clavu, cintina y p'alantre per una placa increyible con un ambiente brutal so la Llampa Cimera. Menudu segundu llargu, na que ver col primeru, qu'anque metí pocos seguros, disfruté de cada tramu de trepada que fice hasta la reunión.

Ellí, aseguramos a Dani que va cantándome la xugada según va xubiendo. Equí, podíes meter unu del 2, equí entra a fueu otru del 1,25 y yo pensando que prefería siguir esguilando que parame a buscar que meter jeje.

Trepe empotráu y minicume nel Porru Bolu (1994 m)

Dende la segundu reunión, ya sólo tenemos un trepe de II d'unos diez metros como muncho hasta'l cumal onde tenemos llaceáu tol bloque cimeru en casu que querramos aseguranos pa la semeya o rapelar dende ellí.

Nós, xubimos por turnos aseguraos sacándonos dalguna semeyuca y alloriando colo piquiñín que ye'l cumal de 1994 m y decidimos rapelar viendo que les ñubes vienen atacando dende Vegarredonda y nun tenemos munches ganes d'andar pente'l borrín trabayando coles cuerdes.

Un par de rápeles y al suelu a cellebrar esti porru tan prestosu

Asína qu'un par de rapeles cenciellos de llevar alantre y al suelu por turnos, quedándonos a gustu cola ascensión, la cual llevamos bien organizaos, pero viendo que lo del borrín fué un amagu paez que pícanos facer dalgo más.

Queda munchu día por delantre, asína que baxamos de la base del Porru Llagu y bordiámoslo pol norte, como si fuéramos al colláu Les Merines pa desvianos hacia una figura elegante qu'amuésase desafiante hacia'l noroeste.

Averámonos hasta'l Porru Llagu col envís de completar el día

Nun ye otra cosa, que'l Porru Llagu, otru non dosmil y pequeñu escaecíu del Cornión, pero que tien un paré oriental con caliza tremenda y que bien paga la pena intentar conocer, dalguna de los sos víes que xurden per ella.

P'allá nos tiramos dexando nos vivacs del Llagu Cebolleda, les mochiles y garrando les cuerdes y los trastos al llombu, trepando un primer llargu de III ensin encordar, hasta montar reunión nel final d'una fisura horitzontal que divide'l paré a la metá.

Croquis de la vía de la cara E del Porru Llagu

Ponémonos al líu y póngome a navegar con tola tranquilidá saliendo pero onde meyor lo voi viendo, aprovechando esta vegada toles posibilidaes que da la roca pa prauticar a meter seguros como si non costare.

Voi progresando a metá de llargu y métese'l borrín a tocar los coyones, pero ya nun hai munches ganes de destrepar o salime de la vía pa dalgún llau y tiro p'arriba, pasando olímpicamente del borrín y glayando dacuando con Dani por si nun me veía.

Una trepada hasta la primer reunión y un llargu bien prestosu, llimpiu y cenciellu de protexer

L'asuntu quede nun amago y entro nuna parte d'una caliza ablucante, con unos tubos d'órganu d'infartu, onde entren los pies, entren les manes y entren los friends a cañón. Maraviyosu, la vía ta completamente llimpia, pero va dexándose protexer hasta por mí, que nun tengo esperiencia.

Cuando doime cuenta, toi embaxo del techín que da salida pela manzorga hacia la placa final hacia'l cumal, asína que meto un últimu seguru y salgo del techucu pa la placa, cagándola un pocu col emplazamientu que fai que seya un infiernu siguir avanzando hasta'l cumal, por culpa del rozamientu de les cuerdes.

Cumal nel Porru Llagu (1924 m)

En fin, coses de les qu'apréndese vía d'alpina tres vía d'alpina, asína qu'escaezo la cagada y póngome a asegurar a Dani, al cual nun oigo n'absolutu por culpa del vientu qu'entama a soplar. Doi varios tirones a ver si dase cuenta que toi llibre, poniéndome a recoyer al cabu d'un ratín y espero a que faiga lo mesmu enantes de salir.

Asína lo fai y poquín a pocu, vamos averándonos, pudiendo falar o al menos oyernos el típicu "recueye más", "tensa", "voi"... y mil mierdes que se dicen cuando tovía nun andes fino col to compañeru y nun dexasti al menos 4 pallabres básiques pa nun andar a voces como un chifláu por mor del vientu.

Baxamos caleyando y despedímonos de los porros Llagu y Bolu

Aporta Dani a la reunión, dámonos un abrazu y comentamos la xugada, coincidiendo en qu'aparte de prestosina la vía, la calidá de la roca ye superior, teniendo'l tramu de canalizos como máximu llugar de disfrute d'escalada y autoaseguramientu.

Coles mesmes, recoyemos tou, echamos les mochiles al llombu y baxamos hacia Vegarredonda más contentos qu'unos rapacinos con zapatos nuevos y ye qu'ambos andábemos tiempu buscando una pareya de cordada pa trepar nel monte, n'alpina y ensín enmarronase con graos hasta nun garrar él, confianza y yo, esperiencia.

Hasta la próxima, que como non será siguiendo una d'eses ayalgues que son los llibros de Carlos "Llambriales", una cervecina a la so salú y pol bon facer de los sos llibros. Nesta, quedámonos con una actividá de 7 hores y 15 min, con 5,7 km y 650 m de desnivel a lo qu'habría qu'amestá-y la típica ascensión y descensu posterior a Pandecarme.

Camudando'l Camín con Yogui... y Mou

No hay comentarios:

Publicar un comentario en la entrada