miércoles, 2 de noviembre de 2016

Torrebarriu (Santumichanu) - Práu Fontán - Picos del Fontán

18 de Setiembre de 2016

Track: Torrebarriu (Santumichanu) - Práu Fontán - Picos del Fontán


Primer ruta de la temporada 2016-2017 del GM Xuan de la Borrina, la cual abordamos cola mesma ilusión de tolos años ya intentando tener visión de futuru pa la temporada ivernal, quitando rutes d'alta montaña.

Poro, vamos escosar les rutes de munchu altor, pa que nel iviernu queden los montes más baxos y que podamos facelos, pesie a les ñevaes qu'haya pa los altos. Asína, anque solemos facer rutes seles d'entamu, vamos tirar a polos Picos del Fontán y pa camudar de puntu partida vamos entrá-y dende Torrebarriu en Santumichanu.

P'aportar a esti pueblu de Santumichanu, parte del grupu entró dende'l Güerna, percorriendo'l conceyu de L.luna pela CL-626, desviándose pocu dempués de Vil.lafeliz hacia'l Puertu Ventana, pasando per Santumichanu y finalmente Torrebarriu.

Partimos de Torrebarriu ( m) con tremendes vistes

Otros, tábemos en Teberga esguilando'l finde, asína que tocónos xubir el Puertu Ventana pela fastera asturiana, pasando pelos pueblos de Las Veigas, Riel.lu, El L.lanu y Parmu, magar d'almorzar en La Plaza.

Alcontrámonos entós en Torrebarriu y magar de los preparativos, salimos con un direición clara... pa la muria del macizu de Penubina. Ye increyible la poca vida que vese nesti pueblu y lo que tien enriba ye pa chiflar... en fin... coses de la despoblación rural.

Nós a lo nueso, cruciamos el pueblu hacia'l barriu La Vega, cruciando'l regueru los Muriales y saldremos per una pista en xubida, a la manzorga d'una ermita, siguiéndola durante tol tiempu, ensín pérda posible hasta los Llanos del Fontán.

Garramos la pista que tien de xubinos hacia la faldera del macizu de Penubina

Gracies a esta pista, xubiremos cómodamente unos 550 m de desnivel, nel nuesu casu en hora y media. Pero tolo cómodo y cenciello, se suel acabar y dende que salimos de Torrebarriu ya díbemos viendo per onde tendríemos de xubir... una pedrera gafienta enforma.

Nun hai munchu con contar... metímonos dafechu na pedrera siguiendo siendes mediu marcaes y la intuición xugónos una mala pasada, zampándonos tola pedrera, canal arriba, ensín descansu, ensín aliendu y con tramos perpindios en dalgún pasu.

Permala decisión, por nun mirar que la vía d'ascensión normal, malpenes raspia la pedrera y sálese pol espolón de la manzorga, pudiendo xubise práuticamente ensin tener que sofitase coles manes. Esta xubida aparte de dificultar munchísimu l'ascensión a xente del grupu punxó-yos en munchos problemes.

Pecamos de pininos y equivocámonos siguiendo canal arriba

Dicho esto y asumiendo l'error, camiento que tien de ser bien guapu xubir esta canal con crampones y piolé, pero en secu, meyor tirar pola vía qu'usamos pa descender. Cuando fuimos a axuntanos fuera de la canal, empatando cola vía normal, siguimos el grupu alantre, col tramu final d'ascensión hacia'l Prau Fontán.

El restu de l'ascensión, pindia pero cenciella, diremos faciéndola con más calma, más relaxaos y esfrutando muncho más d'un senderu mediánamente fitáu. Casi 4 hores dempués de salir de Torrebarriu, aportaremos a los 2363 m del Prau Fontán... el cuál sorpréndeme grátamente poles sos vistes y la so guapura visto dende otros montes de la redolada... como los Picos del Fontán.

Cumal del Prau Fontán (2363 m)

2 hores y media dende los Llanos del Fontán al Prau Fontán, d'amuesa del erru enorme de metenos pela canal, ya que perdimos munchísimu tiempu y ficimos sofrir enforma a varios de los miembros del grupu.

Llueu de descansar un ratín y charrar con otros montañeros, decidimos siguir alantre hacia los picos del Fontán, teniendo primeru que descender del Prau, non sin antes siguir colos güeyos el camín, que van faciendo dos de los nuesos collacios, Pepa y Jose, que güei acompañábenmos pa desviase a pola primer Torre.

Enllaz pente'l Prau y los picos del Fontán

Aportamos quiciás al únicu pasín complexu de la ruta, que ye l'enllaz pente la plataforma del Prau Fontán y les pandes norte de los Picos del Fontán. Primeru, tendremos que superar un cresteríu entreteníu y descenderemos a la forcada que baxa hacia'l canalón Cimeru, pa metenos nun canalizu pelín vertical.

A lo lloñe paez dalgo más seriu, pero sacante un pasu llateral aéreu, el canalizu nun presente dengún problema y ún a ún vamos pasando per caún de los pasos, superándolos con facilidá, dándo-y un toque bien prestosu a l'ascensión.

Siguimos panda arriba hacia los cumales norte y sur de los Fontanes

Metíos en plena panda, ya sólo tendremos que siguir el marcáu senderu y esfrutar d'un día increyible de monte, onde amás tamos arrodiaos de xente montañero, lo cual siempre ye una allegría. Aparte, yo quédome un pelín atrás, pa sentame y sacar semeyes a los collacios que taben a puntu d'encumar la Torre que-yos faltaba.

Dexo al restu del grupu qu'esfrute d'estos prestosos montes que tan bones alcordances traénme y fáigo-yos les semeyes de rigor n'ambos cumales. Nel día de güei, el GPS casi marcóme lo mesmu nos dos, raspiando ambos los 2415 m, pero siempre pembaxo de los 2421 m de la Penubina que tiénme marcáu les dos vegaes que tuvi nel so cumal.

Picos del Fontán (2415 m) nun gran día montañeru

Sopla un vientín molestu nos cumales, asína que decidimos descender un pocu hacia la forcada per onde pasamos col envís, d'alcontrar un abellugu onde xintar a gustu. Durante'l picotéu, quédome pelín embobáu mirando pal Prau y ye que tien una forma de pirámida casi perfeuta.

Sigo pensando que fué la sorpresa del día y prestóme más que los propios Fontanes, quiciás por ser nuevu tamién. Magar de fartucase un pocu y a pesar de que tase estupéndamente, decidimos entamar la baxada, pasando pela forcada'l Fontán con cuidadín y garrando esta vegada la sienda correuta pal descensu.

Baxamos de la forcada'l Fontán direutos hacia'l senderu

Esta vegada alcontraremos una baxada infinítamente más cómoda, baxando pel espolon y siguiendo un camín más normal, fitáu en munchos llugares. D'esta sienda, daremos colos nuesos pies na enorme llera, la cual, sirve de tarrén de xuegu pa los más avezaos al "lleroning".

Tirarémonos corriendo llera abaxo hasta la fastera de praos de los Llanos del Fontán, onde sentarémonos cola calma a esperar pol restu del grupu que baxa caún al so ritmu. Llueu, toos xuntos, quédanos por tragar la infumable pista que faise verdadéramente pesada pa unos pies ya cansaos.

Averámonos adulces a Torrebarriu de nuevu

En resume, ascensión clásica dende la fastera llionesa, que túvonos entreteníos durante pocu más de 8 hores, a ritmu calmáu, faciendo un total de 13.,5 km con un desnivel positivu acumuláu de 1295 m, lo que nun ta na mal, pa un entamu de temporada.

La próxima más y meyor como siempre...

Penubina cola so enorme arista oeste siempre presente

No hay comentarios:

Publicar un comentario en la entrada