miércoles, 15 de junio de 2016

Casares d'Arbas (Vil.lamanín - Llión) - Las Tres Marías

22 de Mayu de 2016

Track 2011: Casares d'Arbas (Vil.lamanín - Llión) - Las Tres Marías


Finales de mayu, entra'l calorín y la ñeve cola pa dexar pasu a verdes praos nos valles y peña seco nos cumales, poro vamos tornar a montes de mayor altor y con ciertu picantes como Las Tres Marías en tierres llioneses.

Como ye vezu, almorzaremos en Vil.lamanín, aportando dende Xixón pela Autovía Minera, hasta Mieres del Camín, onde siguiremos pela A-66 hasta Campumanes, garrando la N-630 pel puertu Payares, pasando dempués per Arbas del Puertu, Busdongu, Vil.lanueva y Vil.lamanín finalmente.

Los nuesos oxetivos al fondu dende Casares d'Arbas (1335 m)

Llueu del abondosu almuerzu, siguimos carretera dende Vil.lamanín hacia Rudermu, pa pasar a posteriori per Samartín de la Tercia, Pobladura, Viandangos y Casares d'Arbas, onde tenemos bon llugar pa dexar los coches y más tarde hasta autobuses otros grupos de monte.

Prepararémonos pal envite y saldremos pela pista a la mandrecha del ríu Casares, siempre n'ascensu y siempre con vistes a les tres protagonistes del día: Las Tras Marías. Bien ceo, podremos atacar la primer delles, ya que tenemos ún de los averamientos más seles en tiempu, cruciando'l ríu nuna ponte de formigón y garraremos senderu pindiu hacia la primer delles: El Paleru.

Salimos pista alantre hacia'l crucie del Ríu Casares

Con vistes perguapes del banzáu de Casares, vamos remontando la faldera d'esta pequeña xerra de las Tres Marías, hasta aportar a un hombru con un piquín en miniatura del Paleru, pero en direición contraria.

Un paleru ye un montón de lleña apiláu pal fueu y en cierta midía esta primer María, viéndolo dende'l llau oeste, col montón de lloses verticiales que paecen formalu paez eso... un montón de palos puestos en vertical pa la foguera.

Entamen les contines trepaes hacia'l cumal del Paleru

Dende l'hombru, fadremos una primer parte d'ascensión cenciella, pegadinos a una especie de pasamanos a mou de muria llateral, qu'aparte de guiyanos pol bon camín, facilita dalgún qu'otru agarre.

De secute, entraremos na parte más pindia, onde llueu d'un pequeñu colláu, tendremos una rampla perpindia con dos trepes ún a cada llau, que nun lleguen a ser canalizos dafechu, pero sí qu'empobínente a un accesu u otru a la parte alta.

Salimos de lo más pindiu a lo más espuestu

Nesti pasu Charly, nun anduvo seguro, prefiriendo quedase nel collaín, demientres los demás con curiáu y dexando pasar a un grupu con más prisa, fuimos llibrando pasín a pasu, hasta la salida a la cresta, onde tendremos un pasín picante pente dos peñes, que xustu a la salida nel puntu más aéreu, da fin a les dificultaes.

Con pocu más que siguir caleyando pel ampliu filu de la cresta, aportamos a los 1883 m d'El Paleru, onde como suel pasar nestos montes d'ascensión pelín complexa, siempre tenemos que pensar en descender con curiáu y cellebrar el monte na base.

Semeya de grupu na primer María (El Paleru) de 1883 m

Con pocu más qu'echar un vistazu hacia'l macizu de Penubina, dexamos a los collacios del otru grupu, baxar primeru y siguimos sele tres d'ellos, superando pali pali los pasos que vamos alcontrando.

Como non, el más espeutacular el de la entrada a la forcadina pente les peñes y el más complexu los semicanalizos pindios onde taba esperando Charly. Dicir que nun quedé mui a gustu dexándolo abaxo y quiciás tuviera que quedame un ratín tranquilizando ya intentar los dos solos superalo con calma y sin presiones de más xente.

Descensu d'El Paleru con tientu y vistes hacia'l macizu de Penubina

Xuntos tol grupu, siguimos el restu del descensu, magar de que Charly declinara la oferta d'intentalo los dos, faciéndolo sin problemes hasta'l final de los parés al sur, per onde podemos entamar el faldéu de la primer María.

Nun sé que pasa, pero sin danos cuenta, vamos dexando atrás a la xente, asína que tenemos tol tiempu del mundiu pa echar un vistazu al Paleru dende tolos puntos, siendo'l más increyible la so faza oeste, na qu'albidramos delles reuniones d'una vía con una pinta tremenda.

Descendemos p'acometer el faldéu del Paleru

Dicir que d'El Paleru, puédese descender per una canal pembaxo del colláu de los canalizos, pero viendo lo pindiu del tarrén y que paecía entamar descendiendo per un espolón amestáu de roca y yerba, preferimos pasar olímpicamente.

Asina que coles grandioses vistes d'El Paleru, Charly y yo, escapámonos pel entepechu hacia la segunda María, la cual xúbese pel canalizu más a la manzorga de toos, el cual déxanos el trepe más divertíu na salida, con un pasín perguapu con bonos agarres... cenciello.

Ascensión a la segunda María de 1909 m

Güei voi pelín esmolecíu pel riesgu de tormenta qu'anunciaben, asína que paez que llevo a la xente a la carrera, lo cual dexa descolocaos a Pepa y Jose, collacios de Zori y Richar, que deben tar pensando que menudu ritmu pon el desgraciáu de la perilla.

El día caltiense nel intre, pero abandonamos el cumal de 1909 m magar de la semeya de turnu, intentando ganar tiempu a les ñubes. Fadrémoslu per una entretenía arista, que sólo daste cuenta de la la cayida que tien pal norte, cuando aportes al colláu cola tercera María.

Baxamos de la segunda María hacia la tercera

Camentando que ya taba too fecho, vamos gayoleros hacia la tercera, hasta que daste cuenta, que tampoco va ser un xuegu de niños, tendiendo que garmear de terraza en terraza yerbosa, lo cual puso pelín nerviosa a la xente.

A toos menos a Charly, que ya recuperara la tranquilidá y xubió tres de mí, ensín dengún nerviu aportando al cumal de la tercer María el primeru. Paezme que'l trepe del canalizu de la segunda, devolviéra-y l'ánimu y la confianza en sí mesmu.

Negociando la Tercer María (1968 m)

Ún tres d'otru vamos acomodándonos nos 1968 m de la Tercer María o Primer según d'onde vengamos y abellugándonos onde meyor podemos, intentamos escondenos d'un vientu xélidu que lleva tol día molestando y paramos a xintar o me tiren pel siguiente desbentíu, jeje.

Media hora dempués, siguiremos crestéu hacia la Peña La Esquina de 1953 m la cual nun tien mayor problema que buscar nun enmarronase de más en dalgún cresteríu de roca podre o arrimase muncho hacia'l norte.

Paseín hasta la Peña La Esquina de 1953 m

Na Peña La Esquina, entamaremos el descensu final, faciendo alendar a más d'ún del grupu, que ya ta faciéndose llarga la temporada. Fadrémoslo, descendiendo per un ampliu valle, baxo los parés que van cayendo dende caúna de las Marías.

Nun tendrá mayor problema y siendo una fastera bien amplia, decidimos desvianos a conocer la cabaña qu'hai baxo'l ablucante paré del Paleru, el cual amuésase más qu'intimidante, dende la privilexada posición d'esti guapu refuxu.

Baxamos pelos praos del valle hacia la riega Casares

Na Cabaña garraremos la mesma pista pela que xubimos, despidiéndonos del Paleru dándo-y la vuelta dende'l norte hasta'l sur, demientres les ñubes acaben por metese enriba nuesa dándonos una pequeña ducha por nun cumplir colos horarios establecíos y andar xugando, jaja.

En resume, ruta curtia de 8,6 km aprox, 990 m de desnivel y 6 hores de duración, que nun debe engañar ya que tolos cumales de las Tres Marías, tienen su puntu, siendo la más complexa la Primera, pero sin desdexar les otres dos, sobretou la Tercera si'l tarrén tuviera moyao.

Que vos preste... pero con cabeza!

Camudando'l Camín en tierres llioneses colas Tres Marías

4 comentarios:

  1. Hicimos ese mismo recorrido en mayo del 2015 y el verde del valle era realmente espectacular!
    Una ruta muy entretenida y agradecida que estamos seguros que no deja a nadie indiferente.
    Enhorabuena por la actividad y por el repor.
    Un abrazo!

    ResponderEliminar
  2. Sí que ye una ruta bien entrenida la verdá. Gracies pol comentariu y un abrazu pareya. Berto Xuan

    ResponderEliminar
  3. Coincidimos con vosotros ese día en casa Ezequiel y en ruta algunos compañeros tb del G.M la Montera, yo subí a la última peña. Al regreso de nuevo os vimos cuando salíais con los coches Un saludo.

    http://es.wikiloc.com/wikiloc/view.do?id=13417353

    ResponderEliminar
  4. Hola... sí que tuvimos con unos cuantos compañeros vuestros. Un placer conoceros. Un abrazu

    ResponderEliminar