miércoles, 18 de mayo de 2016

Xuntanza Asturvasca (2015 - 2016)

23 y 24 d'Abril de 2016

Tornamos p'Asturies na clásica Xuntanza Asturvasca (Eusko-Astur Biltzarra) y como novedaes positives tenemos que Fernan ye'l lehendakari del Baskonia Mendi Taldea y yo como siempre del Grupu Montaña Xuan de la Borrina, lo que paez será un cargu de por vida jeje.

Esa ye la gran novedá positiva, la xuntanza con dos presidentes de los grupos, pero la negativa ye la meteo que nos apurren les páxines del tiempu y sobretou l'estáu físicu de los collacios vascos, los cuales vienen más de visita qu'a facer monte.

Grupu de monte na ruta del primer día per Amieva

Nesti sestu añu, terceru n'Asturies, pasáramos los años anteriores per Nava y Somiedu, siendo'l conceyu agraciáu'l d'Amieva, anque'l nuesu campu base tuviera asitiáu nel vecín de Ponga, nel guapu hotel del Pontón de Bidosa.

Sábadu 23 d'Abril:

Axuntámonos en Cangues d'Onís baxo un orbayu intensu, por dicir dalgo amable. Asina que l'almuerzu lleva un nivel de tranquilidá fuera de lo normal, enantes de siguir camín hacia Santiyán, onde entamará lo que será'l plan B o el C, que tenía pa ún de los díes de monte.

Visita a Riaño con bona fartura nel menú del día

Aportamos a Santiyán, viniéndonos arriba parte del grupu, decidiendo salir hacia la ruta del Beyu Pen sí o sí, demientres que la parte lesionada de la Xuntanza o con poques ganes de moyase, lo más normal ta'l como taba'l día, prefirió tirar hasta Riaño, col envís de comprobar si la meteo yera menos repunante pa con unos humildes montañeros.

Santiyán (Amieva) - Beyu Pen - Picu'l Combre - Carmineru

Llueu de pasar les respeutives mañanes como meyor pudo caún, ellos con un paséu y una perbona fartura y nós con una ruta inesperada ya increyiblemente bona, reunímonos toos nel Hotel Bidosa, onde pudimos tomar delles bébores espirituoses demientres veíemos como l'Sporting, con aida arbitral, recibía una bona panadera del Barça.

Nel Hotel de Bidosa viendo'l partíu del Sporting col Barça

Lo postreru al partíu yera la cena, pelín floxa y escasa, por nun dicir na pior, pasando llueu a dalgún chupitín y dalguna copichuela qu'otra, enantes que caún fuera cayendo pol so propiu pesu pal sobre, a sabiendes qu'al día siguiente tocaba ruta.

Domingu 26 d'Abril:

Al día siguiente, llevantámonos con dalgo de resaca, pero con munches ganes de tornar al monte, xuntándose a los del día anterior, Zori que venía dende Cancienes y Benjamín, qu'esta vegada sí que yera a animase, no que paecía un meyor día metereolóxicu pa caleyar.

Semeya del periódicu "Donando n'Altura" pel Cantu Dobros

N'otru plan B, ya que lo que teníamos planiáu d'entamu, nin siquiera pudimos arimar el focicu pa intentalo, tiramos hasta'l pequeñu y pocu avezáu a montañeros, pueblu de la Fresneda n'Amieva, onde tuviemos la suerte de charrar con un simpáticu paisanu, aclariando delles duldes sobre la ruta.

La Fresneda (Amieva) - Xerra H.aces

Dempués d'otra ruta pasada por agua, nel so final, aportamos contentos poles dos rutes algamaes nesta xuntanza, al chigre de la xinta final de la Xuntana, nel Puente Dobra. Dicir qu'esta vegada sí que triunfamos y tola comida taba bien rica.

Maraviyosa xinta de despedida nel Puente Dobra

Con un tastu estupendu magar de la fartura, como tolos años, tocó despedinos con abrazos hasta'l próximu añu, nel qu'esperemos tar toos bien recuperaos físicamente, naguando por conocer un pelín meyor el país vecín norteñu.

 Tabayón d'Aguasalíu en Bidosa

Xente astur: Raúl, Richar, Zori, Alberto, Natalia, Dani, César, Lina, Carlos, Cantarero, Ana, Benjamín, Haritz y Berto.
Xente vasco: Jose Antonio, Bea, Bittor y Fernan.

No hay comentarios:

Publicar un comentario en la entrada