jueves, 5 de mayo de 2016

Molinos de Razón (El Valle) - Alto de la Chopera

24 de Marzu de 2016

Track: Molinos de Razón (Soria) - Alto de la Chopera


Toi de selmana santa per Soria y aparte de cenes, meriendes, salir a correr ya intentar abrir una escuela de bloque de la que daré más info pal branu, tuviemos una migayina de cabeza y pegamos una escapada a la xerra de Cebollera pa fozar un pocu pela ñeve.

Más menos, el percorríu p'aportar a Molinos de Razón, sedría dende'l Burgo de Osma, salir direición Soria pola N-122 hasta'l desvíu de la SO-910 hacia Abejar. Ellí, garramos la CL-117 que va pal banzáu de la Cuerda del Pozo y bordiándolo pela manzorga, pasaremos per Molinos de Duero, Lagunas de Duero, El Royo, Sotillo del Rincón y por fin, Molinos de Razón.

Salimos del Quinto de la Chopera (1545 m)

Durante'l viaxe ya vemos los Picos de Urbión y la sierra de Cebollera estraos de ñeve, así que les ganes d'entamar la ruta van espoxigando col ánimu tamién d'un día de restallu. Pa cuando aportamos a Molinos de Razón nun ye que seya ceu nel intre, poro decidimos siguir pista alantre tolo que podamos col coche, ya que sinon aumentaríemos la ruta en dalgo más de 13 km.

Tenéilo en cuenta, dependiendo de les ganes de dar zapatu o non que tengáis, ya que pue ser un estra que faiga d'un paseín una soba senderista per pistes de pocu interés na realidá. Nós, conducimos col coche una amplia recta y ficimos unes cuatru envueltes enantes de dexar el coche nuna curva por mor de la cantidá de ñeve na pista.

Ascendemos per pista hasta la Chopera

Dende los 1545 m aprox, entamamos camín no que podría nomase como'l Quinto de la Chopera faciendo un par d'envueltes más hasta aportar al final de la pista onde alcontramos una valla con una señal de "Prohibíu'l Pasu".

Equí, garraríemos un pindiu senderu que con un altor de ñeve hasta'l todiellu, va facenos xubir unos doscientos metros de desnivel hasta topanos col Arroyo de la Laguna, onde paramos a descansar y restolar per onde crucialo.

Conocemos la guapa y xelada Laguna de Cebollera

Dende la riega, malpenes tendremos 5 minutos hasta la guapa Laguna de Cebollera, con un tamañu considerable, anque muncho menor que la nomada Laguna Negra de Urbión. En plenu marzu, la llaguna ta xelada y cubiera d'una bona capa de ñeve, pero meyor nun aventurase muncho perriba d'ella, ya que vese traza de que l'agua quier fuxir del so zarru xeláu.

Bordiamos la llaguna pela manzorga y upámonos a la muria oeste nun tramu curtiu pero vertical, pa siguir ya per una guapa rampla que nun ascensu tendíu y con ñeve en perbon estáu, tien de dexanos nel cumal del Alto de la Chopera de 2136 m.

Facemos una guapa ascensión hasta l'Alto de la Chopera

Nesta enorme fastera plana, nun hai dafechu diferencies pente dellos dosmiles marcaos en dalgunos mapes pertenecientes a Soria o a la Rioja. El más altu de la sierra ye'l monte Cebollera, del cual sí que nos separa un colláu curiosu dexando pa otra ocasión la so ascensión prefiriendo rematar los dosmiles más al este.

Alto de la Chopera (2136 m)

Pa ello, magar de dar un paseín na rodiada de la Chopera, asomándonos a echar un vistazu a los Picos de Urbión o a la Sierra de la Demanda col monte Cuculla o San Lorenzo como cumal más destacáu. Llueu del vistazu, sofriendo los rigores del fríu vientu qu'azota estes cordeleres damos media vuelta empobinándonos al altu de la Laguna.

Nun ye más qu'un hombru de la Chopera, pero nel camín tenemos prestoses vistes hacia'l Monte Solitario de Tolkien o la Cima de los Vientos, que nun ye otru que'l Moncayo nel que bien pudiera vivir el Nuberu asturianu, por mor de ser un monte onde la truena métese, atrayendo'l fríu vientu y la chispa.

Descendemos al hombru este... el Alto de la Laguna (2085 m)


Pararemos un segundu nel cumal del Alto la Laguna de 2085 m y garramos una amplia canal que desciendo direutos hacia la Laguna de Cebollera, faciendo un altu nel camín pa xintar un pinchín al abellugu d'unes peñes.

Recuperaos del fríu y de la fame, siguimos descensu alantre, faciendo un pocu de culuski, mui afayaizu nestos descensos, p'aportar lo antes posible hasta la oriella de la laguna. N'ella namái quedaranos bordiala al sen contrariu del ascensu, con curiáu de nun metenos penriba d'ella en nengún momentu.

Baxamos per una guapa pala hasta la llaguna de Cebollera

Aportando al desagüe de la laguna, tan sólo quédanos tornar so los nuesos pasos, pa facer un descensu pel senderu primeru y a lo postrero pela pista, muncho más cansino que pa xubir, ya que'l sol fizo efeutu na ñeve, fundiéndonos hasta la rodiella en dellos momentos.

Ensin mayores problemes que'l cansanciu y les ganes de tomar una cerveza finaremos ruta nel coche, magar de caleyar durante 3 hores y 40 min nos que percorrimos 9,5 km y superamos un desnivel de 695 m, dando preste a un par de dosmiles sorianos nel so meyor momentu posible... con bien de ñeve.

Camudando'l Camín en Cebollera...en tierres sorianes

No hay comentarios:

Publicar un comentario