lunes, 1 de febrero de 2016

El Corveru (Ribeseya) - La Peñe Pagadín

23 de Xineru de 2016

Track: El Corveru (Ribeseya) - La Peñe Pagadín



Los picores por trepar pueden ser tremendos, tanto que te faigan facer una kilometrada ensin xacíu un vienres tarde d'orbayu, cuntando con que nel desplome de turnu nun chorrée l'agua como si hubiese un tabayón. Esto ye así... crecen los díes y los vienres te piden griesca, actividá y sobretou allargar el finde a lo máximu posible.

D'esti xeitu, visitamos Navalones, pero taba pingando, colo que fuimos conocer esi "Centru Municipal de Teunificación y Altu Rendimientu de Deportes de Montaña y Escalada". A qu'acoyona'l nome eh... pues más acoyona cuando llegues un viernes a les 5 y ta pieslláu'l llocal, quedándonos con cara bobos, ya qu'al menos intentábemos a base de kilómetros aprovechar la tarde.

En fin... nun sabemos si tovía nun t'abiertu, pero un vienres tarde a les 6 casi, ye bona hora pa ello, asína que coles oreyes gaches colamos pa Xixón aburrios y deseyando qu'al día siguiente dalgún paré d'Asturies tuviera secu.

Atrevíos montañeros nel crucie d'El Corveru con Quintana Riba (222 m)

Al día siguiente con más ganes entá de trepar tiramos hasta la Forcada en Parres, paré sur con vistes a Picos, onde esperamos facer dalgo, quedando nes Arriondes con Zori y Richar, que tan adientrándose nel mundiu escalador.

Aportaremos a una hora tardía, pa dexar que'l sol faiga efeutu sol paré, pero cuando acolumbramos la Forcada, dámonos cuenta d'unes chorreres prietes nel seutor que camentábemos escoyer. Poro decidimos, perder un pocu de tiempu en facer una curtia ruta de monte a una peña qu'a dengún montañeru-y pasa inalvertía cuando tornamos pela autovía'l Cantábricu dende Llanes hacia Xixón.

Esi montucu, de forma piramidal al altor de Ribeseya, ye la Peñe Pagadín y ta nel entornu protexíu de Cueva Rosa. Esta Cueva Rosa ye de gran interés biolóxicu por mor de les munches especies d'inseutos y esperteyos que viven nel so percorríu soterraño d'unos 3,5 km y casi 150 m de fondura.

Cotolles nel ascensu con vistes al crestón d'El Picu'l Porrón

P'aportar a esti espaciu saldremos dende Xixón pela autovía'l Cantábricu hasta la salida de Ribeseya oeste, onde garraremos la As-341 en Pandu dando la vuelta a la Peñe Pagadín hasta La Obra onde pocu más alantre salimos a la manzorga per Calabrez.

Pasaremos per Xenra, Carrocéu y L'Arquera siempre en xubida pa baxar hasta'l crucie d'El Corveru con Quintana Riba, llugar onde dexamos el coche y entamamos a caleyar per un prau hacia la peñe caliza que nun ye otra que Pagadín.

Ábrense les vistes hacia Picos demientres entramos en tierra quemada

Nun hai munches más hestories, salimos de los praos y metémonos nun tarrén malu, amiestu de calizu y monte baxo cola presencia abondosa de la cotolla como ferramienta de sufrimientu nel nuesu avance. Si vos metéis nesti montucu, veréis trazos de sienda pero con poca continuidá, asína que tirái per onde vos pete y menos pinchazos llevéis.

Nós, tomamos como referencia una covacha a media faldera que ye namái qu'un abellugu y que dende ella entramos en tarrén quemáu polos incendios d'esta seronda seca, lo que va facilitar enforma l'avance hacia'l cumal de la Peñe Pagadín.

Cume na Peñe Pagadín (418 m)

Sorprendéntemente nel cumal alcontrámonos con xente, qu'entruguenmos si topamos bon senderu de xubida, retrucándo-yos que non, anque hai que dicir que nel estáu d'anguaño del monte, lo intelixente ye xubir pela so fastera occidental quemada dafechu, dende les cases de L'Ablanosa.

Nesi sen, magar de cansar de mirar pa Picos y la costa, decidimos descender hacia esa fastera durante dellos metros hasta dar con una canalina vertical, que lloñe de ser cómoda de baxar, convirtióse nun coñazu finu dexándonos unos cien metros penriba les cases d'El Corveru.

Descendemos per una abegosa canal de peña suelto y cotolles

Nel intre, toparíemos una especie de sienda que faldeaba'l monte y dábanos pié a intentar restolar les cueves de la faldera pa ver si yera dalguna, entrada a la Cueva Rosa. Lo únicu qu'alcontramos, fueron bien de cotolles en tola traviesa hasta los praos penriba onde dexáremos los coches, lo que convídanos a tornar per equí más informaos sol allugamientu de la Cueva Rosa, cosa que fice nos preparativos pa escribir esta entrada.

En resume, ruta de tachamontes, qu'anque pequeña en tamañu (190 m de desnivel) y percorríu (1,7 km), ye grande en vistes y en posibilidaes de xuntarla con una visita a la Cueva Rosa saliendo dende Carrocéu por exemplu.

Que vos preste y que la faigáis dalgo más curiosa...

Ablucantes vistes de Picos dende la Peñe Pagadín

2 comentarios:

  1. No habia oido hablar de esta Cueva Rosa, muy interesante pero por lo que leo está cerrada. Dejásteme con las ganas. Aguanta el mono de roca que pronto ye viernes.

    ResponderEliminar
    Respuestas
    1. Hostia... pues nun ví onde ponía que tuviere zarrada. Seguía pensando en facé-y una visitina un día y anque seya p'alcontrar la entrada de xuru que vuelvo

      Eliminar