domingo, 13 de diciembre de 2015

Puertu d'Aral.la (L.luna) - Cerru Pedrosu

28 de Payares de 2015

Track: Puertu d'Aral.la (L.luna) - Cerru Pedrosu



Tamos ante un finde montañeru enforma ya que'l sábadu presentámonos na primer xuntanza de Blogs de Monte d'Asturies y Llión. El placer d'esti alcuentru debémoslo a los pa mí desconocíos hasta'l momentu blogueros de Cotoya Pindia.

Nun soi mui avezáu a estes reuniones, ye más, malpenes caltengo un contautu continuu a través de comentarios nos blogues de Monchu, Cienfuegos y Los de las Claras sobretou y nestos años de xera montañera namái que conozo personalmente a Monchu en mediu d'una travesera.

Asina qu'una gran oportunidá yera esta pa conocer un pelín más a otros blogueros de monte como los organizadores de Cotoya Pindia, Mareando la Perdíz, el amigu Xistras de Montaña en Libertad, Rutas de Montaña Asturias, Montaña para Dos, Pindio Pindio y Sebastián Bravo.

Falten munchos blogues de los que siempre tengo dalgo que deprender como'l nomáu Cienfuegos y Los de las Claras, pero viénenme a la tiesta xente como JFCamina, MonteJuan, Al Filo de la Navaja..., Nuestras Montañas y munchos más qu'en menor o mayor medía fuí siguiendo nestos años a la gueta d'info d'una ruta o d'otra y qu'acaben siendo como conocidos de tola vida.

Semeya de grupu nel Puertu d'Aral.la (1546 m)

Dame muncha pena, ya que por mor d'entre otres coses como'l trabayu pal Pallabreru del Monte y la Escalada, llevo lluchando pa poneme al día nel blogue y eso tamién quitóme tiempu pa lleer entraes de los blogues que voi siguiendo y sobretou comentar detalles o ablucar coles rutes de collacios blogueros.

Y ye qu'ensín comentarios los blogues en xeneral, queden ermos, ensín gracia... el trabayu del blogueru y del blogueru de monte ye cansáu: escoyer semeyes, iguar los tracks, estudiar toponimia de la ruta, alcordase de los detalles y anéudotes de la ruta... camiento que toos tuvieron na tiesta dexalo dalguna vegada.

Nel mió caso, entamábemos un 2 de Xineru del 2009 y vamos aportar a 2016 con casi 400 entraes, 200000 páxines vistes y con munchu trabayu y en realidá munches satisfacciones sobretou cola oportunidá de facer esi Pallabreru ya incluso de poder dar charres a neños alrodiu d'esta gran afición que ye dir de monte.

Asína, que tamién pa mí, ye un día de cellebración, d'escaecer el trabayu que lleva'l caltenimientu del blogue y de siguir con ganes de llevalu alantre, viendo tamién con que ganes munchos d'estos collacios faen el suyu.

Saliemos del puertu hacia'l valle de Valmián


Pa tal cellebración, xuntarémonos nel Puertu d'Aral.la, n'Asturies Cismontana y más en concretu pente los conceyos de L.luna y Gordón. Pa ello, namái tenemos que salir de Xixón pela minera, hasta garrar en Mieres la A-66 que meterános nel Güerna saliéndonos nel desvíu a Vil.lablino.

Equí, garramos la carretera C-623 que bordéa'l banzáu de Barrios de L.luna pela manzorga hasta topanos col crucie cola LE-473 que xubirá por Aral.la de L.luna hasta'l Puertu d'Aral.la (1546 m) onde xuntarémonos toos coles debides presentaciones.

Magar de tol xaréu de xente, nomes y blogues saldremos a caleyar un ratín dende'l puertu, empobinándonos per una pista que xube bordiando l'Altu'l Juncial, que tien un potente cresteríu calizu hasta'l valle de Valmián.

Damos vista al colláu Pedrosu aldovinando'l Cerru pente la borrina

Los nuesos pasos, pente charres animaes con unos y con otros, llevarános al final del valle de Valmián onde fadremos un par d'envueltes que pondrános en dimposición d'ascender al colláu Pedrosu (1795 m).

Nel intre, vemos como la xelada y pequeña ñevada de la nueche, caltiense nos praos ensin problemes a les once de la mañana. Nun ye mayor problema, pero nes últimes cuestes dende'l colláu al cumal del Cerru Pedrosu sí que faínos tener curiáu pa nun tener dengún resbarión.

Grupu nel Cerru Pedrosu (1920 m)

Con pocu menos d'hora y media, aportamos al cumal de 1920 m del Cerru Pedrosu, que recíbenos tapecíos per una borrina fonda, qu'empéñase en facenos pasar fríu y calor, xugando'l borrín con nós, nun xube baxa que nos fadrá tar casi ún hora a la espera de les naguaes vistes.

Penubina y los picos del Fontán, sedrán los primeros n'apaecer y llueu dirán asomando'l focicu cumales llioneses nos qu'entá nun soi a conocer, pero con xente con tantos años patiando montes de la redolada ye un placer deprender nomes y llugares desconocíos pa mí.

Les vistes ábrense nel cumal y durante la baxada del Pedrosu

Pau ye atalantar el friquismu del asuntu xuntándonos Monchu, Xistras y yo, falando de mil pasos, cumales, crestes y demás hestories montunes, caún coles suyes, de pasalu bien y de pasalu un pocu pior, pero siempre cola emoción de buscar nuevos llugares a visitar.

El descensu fadráse mui agradable, col sol a la fín de protagonista, algamando les vistes qu'hasta entós nun tuviéramos, destacando al menos para mí, la figura d'un monte solitariu el Correcillas o Polvoreda, como non, dependiendo'l nome dende que pueblu queramos ascender.

Nuna hora y cuartu, con pasu calmáu taremos de nuevu nel puertu Aral.la, naguando por tomar daqué y siguir aldericando sobre monte, sobre los nuesos blogues y sobre los motivos polos que pusímonos a facer esti trabayu desinteresáu.

Relaxáu descensu hasta'l Puertu d'Aral.la


Caún a la so manera, fai un trabayu perimportante pa la conocencia y caltenimientu d'esti espíritu senderista y montañeru. Dar a conocer llugares nuevos pa los andariegos y mui antiguos pa los que realmente los usaben pol so trabayu, los ganaderos, ye siempre esi picor que nos anima a seguir describiendo les nueses rutes pel monte.

En resume, paséu agradable y tranquilu d'unes 3 hores y media, con 7,5 km y 540 m de desnivel acumuláu, que llevónos más qu'a conocer un monte, a conocer un bon garrapiellu d'amantes del monte.

El restu de les hores de lluz del día, fueron enllenes de rises y bon rollu alrodiu d'una mesa con un cocidu montañeru como platu fuerte, acompañáu de cafés y chupitos que ficieron más aún un ésitu esti primer alcuentru, qu'esperemos tan sólo seya l'entamu pa una bona tradición.

Esperemos que l'añu que vien... seyamos munchos más

Camudando'l Camín nel primer alcuentru de Blogueros de Monte

10 comentarios:

  1. Un encuentro muy ameno, Berto! Que será el primero de muchos más y al que seguro, se irán uniendo nuevos compañeros que en esta ocasión no pudieron asistir.
    Desde luego Kila y Dardo lo pasaron de maravilla.
    Enhorabuena nuevamente por el magnifico trabajo que has hecho con el "Pallabreru"!
    Un fuerte abrazo amigos!!

    ResponderEliminar
    Respuestas
    1. Gracies collacios. Préstame muncho que vos guste'l Pallabreru... lo que se fai con ganes y trabayu acaba saliendo bien.

      Un abrazu

      Eliminar
  2. Guapa entrada Berto, buena descripción en una sencilla ruta.
    Yo personalmente ya conocía a casi todos los compañeros blogueros participantes, pero aun me faltaban algunos y ya iba siendo hora.
    Sobre tu trabajo con el Pallabreru, además de darte las gracias, decirte que ye muy grande, lástima que les administraciones no se vuelquen en el tema.
    Un abrazu amigu

    ResponderEliminar
    Respuestas
    1. Na... Monchu... fué un placer trabayar nel pallabreru, pero como too nesta vida... si trabayes fuera casa y en casa... nun da pa too... y resintióse'l blogue.

      Aún así... ya casi tamos de vuelta jeje.

      Nun m'estraña que conocieras a tol mundiu jeje si lo andáis too.

      Un abrazu

      Eliminar
  3. Prestonos mucho conoceros y disfrutar un día con todos! Seguiremos por aquí viendo vuestras aventuras!
    Un saludo pareja!

    ResponderEliminar
    Respuestas
    1. Un abrazu pareya!! A siguir disfrutando pol monte!!!

      Eliminar
  4. Hola bonos díes!! Guapa ruta pero creo que ye Aralla y non Aral.la.
    Saludinos

    ResponderEliminar
    Respuestas
    1. Asina lo recueye L'Asturies Cismontana d'Ismael María González Arias... tendría d'investigalu más.

      Saludos

      Eliminar
  5. Igual sí. Pero yo sentí a lleoneses dicir que yera Aralla(L.luna).
    Saludinos

    ResponderEliminar
    Respuestas
    1. Pudiera ser, pudiera... nesi casu'l topónimu pudiera ser Araya... tendría d'investigalu

      Eliminar