miércoles, 17 de junio de 2015

Pel.luno (Ayer) - Peña Mea

28 de Marzu de 2015

Track: Pel.luno (Ayer) - Peña Mea


Tercer vegada que voi ascender a la Peña Mea y como non, anque seya un plizcu intento camudar un pocu'l camín a garrar pa tala ascensión. La primer vegada ficiera camín dende Les Campes de Tolivia y la segunda con una ruta muncho más esixente dende Los Tornos en travesía per munches cotes de Llaviana y Sobrescobiu.

Asína qu'esta vegada tocaba garrar otru pueblu como entamu poro apaeceremos pel conceyu d'Ayer, magar de la ruta davezu dende Xixón, pela autovía minera hasta Mieres del Camín. Ellí garramos la A-66, hasta'l desvíu al corredor del Ayer pola As-112 pasando per Morea, L'Escuyu, Los Estrul.lones y Cabanaquinta onde topamos un chigre de milagru onde almorzar y siguimos pela AS-253 aportando a L.levinco, onde salímonos a la manzorga hacia Pel.luno, puntu de partida.

Salimos del pueblu ayerán de Pel.luno (650 m)

Nós, ya conocemos Pel.luno d'esguilar na so escuela, pero pa muncha xente al igual que con Peña Mea, sedrá la primer vegada que van conocer esta fastera llende nos conceyos d'Ayer y Llaviana que tan bones alcordances trainos.

Magar de los preparativos nel Barrocima de Pel.lunos, saldremos cabo la ermita'l pueblu, travesando'l pueblu hacia l'oriente hasta salir d'esti pel Nial, garrando siempre una pista formigonada qu'en pindiu ascensu tien de llevanos hacia'l Toral.

Ascendemos hacia la col.lada Pel.luno con vistes hacia la muria de Peña Mea

El día ye inmeyorable y con sol dende'l primer pasu, xubiremos altor, siempre con guapes vistes del pueblu y de los parés que cayen dende la Peña Castro y tola Xerra Pel.luno. Bien ceo, tamién sedremos a ver l'ablucante muria de Peña Mea, qu'a más d'ún de los participantes na ruta pocu avezaos al monte da-yos respetu enforma.

Siguiremos caleyando pela pista, paralelos a la riega Moradiel.lo a lo baxero y a la cumera del Piquín de la Mota enriba nós, hasta aportar a les cabañes de Cerreo, onde posponemos la ganancia d'altor, ensin llegar a la col.lada Pel.luno, saliéndonos hacia les canales que baxen de les muries de Peña Mea.

Empobinámonos hacia la canal de Cueves

Desde esta fastera de Peña Mea, tenemos dos canales clares a percorrer, la primera ye la de L'Arcón de Peña Mea, amplia canal qu'asciende hacia'l perconocíu furacu nel paré del Picón de Pedro Moro y llueu tenemos la canal de Cueves, muncho más guapa y estrechina con ciertu toque a Picos d'Europa.

Aparte, la esperiencia dizme que xubir pela canal de Cueves, ye muncho más guapo por mor del so estilu y sobretoo porque caleyaremos col Arcón de Peña Mea tapecíu poles muries que dixebren ambes canales... dándonos una visión de sutrucu al aportar al final de la canal.

Esfrutamos d'esta guapa canal que llévanos al momentu más guapu del día: L'Arcón

Poro, travesaremos de Cerreo hacia la canal de Cueves dexando la mayá L'Arcu baxo nos y pali pali, diremos ganando-y tarrén a esta guapa canal, pela qu'esfrutaremos caún al so ritmu. Asigún vamos xubiendo diremos alcontrando dalgún ñeveru hasta aportar al final de la canal onde axúntense la de Cueves y la de L'Arcón... alcontrándonos cola vista suprema del día... l'ablucante furacu de frente, en tol so esplendor.

Dende equí, magar de les milenta semeyes que ficímonos con él, siguiremos ya con ñeve nel pisu de continuu y va ser un mantu resbariosu y de pocu fondu, el que va danos los mayores problemes ya que nos tramos más pindios nun facemos otra cosa patinar.

Namái salir de Cueves topámonos con una capina de ñeve pelín resbariosa

Menos mal que pa la baxada, toda esta ñeve dirá desapaeciendo, sinon más d'una culada diba ser asegurada. D'otra miente, siguimos ascendiendo pelo que sería la ruta normal, pasando una pequeña trepadina en travesía d'un espolón qu'empobínanos hacia la parte cimera de Peña Mea o Penamea na fastera ayerana.

Llueu d'esi pequeñu trepe, aportaremos al tramu más ñeváu nel que tendremos d'abrir buelga hasta unes terraces yerboses, onde saldrémonos de lo que sería la vía normal arrodiando una peña pela mandrecha y xubiremos per un pindiu canalizu nel que tenemos d'andar sollertes sobretou los menos avezaos a los trepes.

Negociamos lo meyor que podemos el tramu más pindiu de l'ascensión

Una vegada qu'arribamos a la parte más alta de Penamea, veremos que la vía normal vien per un canalizu pindiu y estráu de ñeve, que nin siquiera tien marques de buelgues nin recientes nin de va munchu tiempu tando dafechu virxen.

Asína col aciertu por bandera a la hora del trepe, siguimos caleyando darréu hacia la caseta y vértice xeodésicu del Picu Mea, cumal de 1557 m de tola Peña Mea. Na cume, descansaremos esfrutando d'un de los llugares d'Asturies con meyores vistes sobretou pa tolos montes orientales.

Cumal de Peña Mea (1557 m)

Llevamos unes 4 hores de ruta dende que saliéramos y magar d'acolumbrar Picos, los altos montes del parque de Reres (Retriñón, Torres,...) y d'Ayer (Reonda, Esturbín...) y cumales más piquiñinos pero que dieron un xuegu brutal como'l Corbellosu o la Xerra'l Crespón, decidímonos a entamar la baxada y xintar nun de les praeres de más baxo, llibrándonos d'un molestu vientu.

Perguapes vistes dende Peña Mea hacia Picos, montes de Reres, Ayer...

Aparte, viendo que nun tol mundiu ta d'andar pel monte con esperiencia, prefiero que se relaxen na parte de baxo y tean sollertes a los pasos de la parte alta enantes de la xinta. D'esti xeitu, baxaremos del cumal desdexando de xuru, la baxada pela norte, la cual ta con muncha ñeve nel tramu de playes hasta la col.lá Los Palomos.



Descendemos hacia la canal del Arcón de Peña Mea con vistes hacia Ubina

Ensin más, baxaremos con curiáu, esfrutando de vistes bien guapes del cordal Cantábricu y del macizu d'Ubina, como les de les semeyes, parando a xintar na parte alta y como non, embaxo de L'Arcón, al que-y dí la vuelta pero nun supe como entrá per detrás, ya que per delantre coles botes pingando nun había manera de trepar con seguridá.


Baxada cenciella hacia la mayá L'Arcu y descensu hacia Pel.luno

De L'Arcón... tol grupu baxó pela canal de L'Arcón y yo esperé-yos na so parte baxa, ya que de tanto restolar pola entrada trasera acabé dándo-y la vuelta entera al picón de Pedro Moro. De vuelta en Cerreo, nun tendremos más que desandar el camín hacia Pel.luno cola mayor tranquilidá.

En resume, mítica ruta a la Penamea (fastera ayerana) o Peña Mea (pa llaviana) faciendo un percorríu de 9,4 km y ascendiendo un total de 950 m de desnivel acumuláu nun total de 7 hores y 25 min... anque hai que restá-y munchu tiempu paraos (casi un par d'hores entre cume, xinta y visita a l'Arcón).


Que vos preste!

Camudando'l Camín en Penamea

No hay comentarios:

Publicar un comentario