jueves, 18 de junio de 2015

La Morca (Cangues d'Onís)

29 Marzu de 2015
 
Domingu con un día bien guapu y decidimos los Bertos, Haritz y Charly dir a conocer les escueles d'escalada de Parres na redolada de Les Arriondes. De primeres, tenemos la intención de dir a otra que ya presentaré na siguiente entrada, pero de pasu queríemos conocer l'estáu d'una parea que camiento alcuéntrase dafechu esaniciada.

Escuela d'escalada de la Morca

Poro, aportamos hasta Les Arriondes y salimos hacia Cangues d'Onís, parando al pocu nun apartaderu al llau de la sienda paralela al ríu Seya. Tamos en La Morca, enantes d'un hotel y del concesionariu de coches y vemos una parea húmeda dafechu y pocu soleyera que paeznos que tien de tar abandonáu va tiempu.

Echándo-y un vistazu a esta escuela esaniciada

Aún así, averámonos hasta ellí per un claru camín, qu'acaba aportando a un cierre d'un prau, penriba del cual tenemos que saltar, pa metenos nun bardial dafechu. Lo que nos temíemos... la sensación ye d'abandonu en cuanto al pie de vía, ya que l'equipamientu paez caltenese en bon estáu... chapes y reuniones siguen hasta rellumando.

Asina, que con eses sensaciones colamos d'ellí... yo con otres más atristayaes, ya que cola cantidá d'empreses de turismu activu qu'hai nesta fastera d'Asturies, da pelín de pena ver ensin curiar una escuela que tuvo que ser un referente pa los llocales cangueses y parraliegos.

Vista de la parea dende'l camín

Coles mesmes.... y una escuelina visitada más, anque sólo sea por conocela colamos de La Morca, escuela que de xuru pasó tiempos meyores, sobretou nel branu teniendo una solombra bien prestosa pa los meses braniegos. 

No hay comentarios:

Publicar un comentario