lunes, 25 de mayo de 2015

Xivares (Carreño) - Costa de Carreño - Antromero (Gozón)

22 de Febreru de 2015

Track: Xivares (Carreño) - Costa de Carreño - Antromero (Gozón)


Siguimos nesti mes aselao d'actividaes montunes y como nun mos aguantamos ensín salir a patiar, decidimos dir Pau, Haritz, Kíla y yo a conocer la costera de Carreño, comunicándolo nel últimu momentu al grupu xuniéndose a nós, Zori y Richar que necesita probar que tal va esa pata de la lesión.

Pa facer la costera, saldremos de Xivares col envís d'empobinanos pasín a pasu hasta Antromero, onde tenemos la llende con Gozón. Poro, aportaremos a la sablera de Xivares, saliendo como non, per Xixón hacia Veriña, entrando a Carreño per L'Empalme, Carrió, La Granda y en La Piñera, salímonos pasando pela Xana hasta Xivares.

Partimos de la sablera de Xivares en Carreño

Con un día pelín murniu, xubimos de Xivares bordiando tola urbanización pela mandrecha, faciendo camín pegaos a la costa pela punta'l Regato hasta alcontranos col cartel de la ruta costera de Carreño onde facemos la semeya d'entamu ruteru.

Salimos caleyando pel llau de la urbanización hacia'l Tranqueru

Esta sienda llévanos pel antiguu carril del tren "El Carreño" poro tendremos que dir pasando per dalgunos túneles illuminaos, pasos armaos al llau de la mar ya inclusu dalguna ponte penriba les riegues que baxen a les distintes sableres o pedreres.

Como non... echámos-y una güeyada a la zona de bloque del Tranqueru

Al pocu pasar el primer túnel, tendremos la zona de bloque del Tranqueru, onde los bloqueros faen espoxigar llinees de dificultá nes peñes que cayeron cuantayá dende'l monte a la costa. Haritz y yo daremos media visita pelos bloques más pegaos a la sienda que baxa y llueu tendremos la suerte de ver a dos escaladores na mesma playa del Tranqueru faciendo bloque.

La sienda sigue les antigües víes del tren travesando pontes y túneles

El siguiente tramu, llevarános a travesar la punta Aviao per túneles, hasta salir a la urbanización residencial de Perlora y más en concretu a la sablera de Madrebona, a la que baxamos pa dar un paséu pel sable demientres Kíla báñase y cuerre como lloca.

Aportamos a les sableres de Perlora (Madrebona y Carranques)

Sele, caleyamos hacia la salida pal paséu de Perlora, magar de pasar per Carranques, yendo pela estaya más guapa quiciás de tola ruta, colos cantiles de Perlora con vistes hacia l'Islla d'Entrellusa y delles pequeñes sableres más, hasta la Punta Socampo.

Bordiamos Perlora peles puntes d'Entrellusa y Socampo hacia La Cabaña

Arrodiamos pela costa tol desaniciu urbanísticu de Perlora, el cúal danos muncha pena cuando facemos alcordanza de los domingos que pasamos casi toos coles nueses families y siguiremos hasta la pedrera de La Cabaña, saliendo de Perlora a la fín.

Salimos a Perán cruciando la ensenada si ye que se puede

Perpasaremos pela mandrecha'l depósitu d'agua baxando hacia la ensenada de Perán, qu'anque ta en plena baxamar va danos dellos problemes pa cruciar pel sable la riega Llinares, hacia les cases de Perán, al baxar con munchu caudal esti pequeñu ríu.

Demientres los demás deciden dar la vuelta, pa baxar pela ponte, Kíla y yo sí que cruciamos la riega d'un gran saltu y esperamos a qu'aporten pa parar a tomar el vermú nel chigre de la punta Perán, onde sáquenmos dalgún pinchín y tomamos una botellina.

Travesamos Candás pel sable dende la Palmera al puertu

Llueu siguiremos pel paséu al llau de la carretera As-239 hacia la Palmera, playa a la que baxamos pa facer más entreteníu'l nuesu caleyar hasta'l puertu de Candás, onde meterémonos dafechu na capital del conceyu de Carreño.

Pocu tardamos en salir penriba'l puertu hacia'l Prau Gervasia, onde ye la primer vegada qu'aporto dende baxo y de día, ya que siempre que tuvi nesti prau fue pa ver los conciertos del Rebolleres Rock.

Xubimos pel Prau Gervasia hacia'l Faru de Candás

Dende'l prau xubiremos hacia'l Faru de Candás, pasando al llau d'onde taba asitiada la ermita de San Antonio, qu'un argayu tuvo a piques d'esbarrumbar pa la mar y dexaremos atrás el faru pa baxar hasta la pedrera de Rebolleres, la cual ta recuperándose por mor d'años d'escombrera illegal.

A lo caberu, dende la parte alta de Rebolleres, xubiremos hacia Piñeres pasando al llau del cementeriu y siguiremos per un senderu travesando una guapa rasa con vistes a la costa gozoniega d'Antromero.

Dende'l pedreru Rebolleres xubimos hacia la Piedra pa baxar hasta Antromero

D'esta rasa, empobinarémonos baxo un finu orbayu hacia la nave ganadera de la Piedra, onde garramos camín asfaltáu hacia la llende de Carreño y Candás na ponte que perpasa la riega del Pielgo n'Antromero, aportando a la fín al coche que dexáremos al final de la ruta.

En resume, percorrimos tola costa de Carreño durante poco menos de 4 hores, faciendo un total de 9,2 km y superando un desnivel acumuláu de 230 m, asína que cenciella, cenciella pa una mañana. Eso sí, habrá que facer un pocu de lloxística colos coches o garrar el tren a Xivares a la vuelta que tamién ye bona opción.

Ta la próxima...

Camudando'l Camín pente la mina y la mar

No hay comentarios:

Publicar un comentario