lunes, 13 de abril de 2015

La Puela (Ayande) - Altu'l Palo - La Marta - Picu Cimeiru

7 d'Avientu de 2014

Track: La Puela (Ayande) - Picu Cimeiru



Tornamos al occidente magar d'un tiempín ensín pasar per ellí, pa face-y una visitina a los ayandeses Rebe y Pangua, col envís de conocer un pelín más esos montes qu'abelluguen la capital del conceyu d'Ayande: La Puela.

P'aportar a la Puela, saldremos de Xixón pela autovía A-66, pa garrar la de Grau hasta'l final, onde empobinámonos siempre hacia Cangas del Narcea pela As-15 hasta unos pocos kilómetros enantes de la capital, onde cruciamos la ponte L'Infiernu, garrando la As-14, pasando pelos pueblos ayandeses de la Ponte L.linares y Ruvena, hasta arribar a la capital del conceyu.

Salimos pel camín de Santiago dende la Puela (545 m)

Almorzaremos perbien na cafetería Victoria, onde axuntámonos los viaxeros de Xixón, los d'Ayande y dos collacios más, Ruma y Santi, que ya vinieren col GM Xuan de la Borrina a l'ascensión a la Peña Maciédome va unos añinos ya.

Saldremos de la mesma Puela pela carretera As-14 que xube hacia l'Altu'l Palo, pa desvianos pasáu un kilómetru al altor de Fontelvira, hacia les cases de Colobréu y Penaseita onde vamos atopando los finxos del camín de Santiago qu'amuesen el nuesu camín hacia l'Altu'l Palo.

Pasaremos per Colobréu y Penaseita

Dicir que la opción de salir pela carretera, podemos escaecela y facer el primer tramu pel mesmu camín que baxáremos del Picu Panl.lón dende Braniel.la, pasando pel Mazu empalmando col nuesu camín cruciando'l ríu Nisón en Colobréu. Con ello, algamamos un meyor y mas guapu entamu de ruta, desdexando caleyar pel odiosu asfaltu.

De toes formes, namái que tamos ya nos guapos caminos ayandeses escaecemos la carretera y esfrutamos d'un día d'agua en tolos sentíos. Nun sólo tendremos qu'aguantar pacientes un finu orpín en tol camín, sinon que tolos praos tan anegaos, viendo como de cualesquier barrancu cayen pequeños tabayones dando una guapura tremenda al nuesu caleyar.

Cruzamos les riegues de Fanfaraón y la Solana hasta La Reigada

A tou esto, tenemos qu'amestá-y la seronda tardía  que vieno esti añu, tando los árboles colos collores típicos d'esta dómina del añu, anque teamos más averaos a l'iviernu. Llueu de Colobréu y Penaseita empobinamos hacia la braña de la Reigada, magar de cruciar les riegues de Fanfaraón y la Solana, aportando al tramu más guapu de l'ascensión hacia l'Altu'l Palo.

Preciosu ascensu hacia l'Altu'l Palo

Siguiremos el ríu Nisón alantre, travesándolo per una prestosa ponte enmediu d'un fayéu ablucante, onde entemécese los collores serondiegos col mufu de les fayes que danos amuesa de la calidá del aire nesti paraxe.

Aportamos a la carretera cruciando hacia'l Palo per terrenu despeyáu

Siguiendo'l camín, daremos cola carretera As-14, que ta faciendo les caberes envueltes hacia l'Altu'l Palo, mientres que nós, na primer envuelta siguiremos valle alantre del llau del Nisón, hasta aportar a la fonte onde ñaz esti ríu.

Del Palo caleyamos baxo l'orbayu hacia la Fana La Freita

Enriba la fonte, taremos ya nel Palo dempués de 2 hores y media de ruta, onde aparte d'atopar una pequeña llaguna, veremos que lloñe d'abrir el día, tien pinta d'empiorar, pero al menos nun tirar l'aire... de momentu. Asína que pasamos pel Altu y siguiremos camín hacia la Fana La Freita onde nun ambiente borrinosu somos a pescanciar los estrozos de les antigües formes de minería "romana".

Siguimos del Palo a la Marta per tol cordal alantre

Según vamos avanzando cordal alantre, la borrina métese más y más, pasando pela Bechida enantes de baxar al Puertu La Marta, onde garramos un pocu carretera pa xubir hasta'l Col.láu La Marta (1150 m), atopando otra llaguna y una rabasera que quítanos les ganes de facer pocu más.

Alloquecíos pel vientu y l'agua, la mayoría del grupu decide pasar d'ascender al Picu Cimeiru y baxen hacia los Hospitales. Carlos, Alberto y yo, siguimos ascendiendo primeru al altu Santiel.los (1219 m) y llueu a ciegues defechu daremos cola montonera peñes que ye'l cumal del Picu Cimeiru de 1297 m.


Cumal del Picu Cimeiru (1297 m)

Nun tenemos suerte nel occidente y pesie al bon facer de los nuesos collacios y la so hospitalidá, los montes occidentales nun mos quieren bien jeje. Nin siquiera los paragües d'apaisanar de Ruma y Santi pudieron col fuerte vientu y la lluvia en dellos momentos.

Baxamos hacia los Hospitales

Pingando dafechu, baxamos del Cimeiru al alcuentru del restu del grupu, pasando más apriesa de lo que diba prestar pel Altu L'Hospital y L'Hospital de Fanfaraón, que ye'l que más menos alcuéntranse en pié inda.

Al pocu de pasar les últimes edificaciones, llevántase la borrina y somos a ver a los collacios un pelín más alantre. Hasta bien pocu, casi nun fuéramos a venos bien pente los tres y na baxada del Cimeiru envede baxar a la fastera contraria pa ganar camín, despistámonos y preferimos baxar pel mesmu llugar.

Con un pelín más de lluz y menos fríu tenemos vistes de la Puela dende la Campa'l Tabión

Viéndolos a lo lloñe apuramos peles llagunes de L'Aguila, pasando al llau de la Fana Recuébanos, pa xuninos al grupu na Campa'l Tabión, onde somos a acolumbrar un pelín d'esta guapa fastera asturiana, contándonos una vegada más Pangua, l'orixe del tipu de camín: Antigua... que nun ye otra cosa qu'un canal d'agua "romanu" reconvertíu en pista a posteriori.

Ensín poder quitar nenguna de les capes que llevamos enriba, siguimos baxada hacia la Puela, ya per pista mui cómoda, con vistes hacia dalgún cortín de miel y col güeyu puestu nel palaciu de Cienfuegos nel barriu de Cimavil.la.

Baxamos pente ñubes y dalgún rayu sele de sol hacia la Puela


Cola suerte que solemos tener los borrinos, non col tiempu, Pangua que conoz al actual dueñu del palaciu consiguiónos una agradable visita cultural, qu'a pesar de calecer los nuesos sentíos, dexónos xelaos pal restu del día al tardar de más mudanos de ropa.

En resume, ruta bien guapa na que xubiremos pel tramu más guapu d'Asturies del Camín de Santiago y caleyaremos penriba'l cordal del Palo y de Fanfaraón, durante casi 7 hores, anque tuviemos 45 min de visita cultural, algamando un percorríu de 22,5 km y superando un desnivel de 1110 m.

Camudando'l Camín na Puela

3 comentarios:

  1. Una zona que apenas he tocado y que tengo ganas, me apunto el recorrido para hacer este otoño que veo que está muy guapo. Un saludo.

    ResponderEliminar
    Respuestas
    1. Si, está chula... fácil d'andar... pero sobretou intenta pillar un día de pocu vientu y sol, qu'ellí sopla con fuercia nos altos

      Un saludu

      Eliminar
    2. Aparte, le pues enchufar el Panl.lón de pasu

      Eliminar