domingo, 25 de diciembre de 2016

La Peñona (Xixón)

18 d'Agostu, 4, 6 d'Ochobre de 2016

Cuando crees que la Peñona ya nun da va más, siempre sorpréndte esta pequeña escuela y el so mayor finxu, la propia Peñona, da pa sacar un par de víes más nun pañu roca, qu'agora sí, ya nun da pa más, ta completu.

Al mayor esponente de la escalada na Peñona, Abel, incansable equipador y aperturista de bloques, sumámos-y esta última temporada a Miguel Poch que descubrió esti llugarín y punxose a finiquitar los últimos requexos de roca que-y quedaben a la Peñona.

Que significó esto? Pues que dempués de dar por terminada esta escuela, encadenando toles víes, tuve que volver a probar les víes nueves, alcontrándome con dos nueves: Grillu Camochu y El Retacu que rondarán el 7a y una variante de salida direuta del Reto que pudiera sumá-y un plus a la vía aportando tamién al 7a.

Volviendo a apretar na Peñona


Ya sabéis que l'estilu equí ye mui bloquero, entos vos alcontraréis con preses minimes y unos apretones de cuidáu, colo que cualquier pasu en cualquier vía d'Asturies que pasare per preses d'este estilu andaría nestos graos, pero equí son 4 chapes namás.

En tres díes d'Ochobre, cuando les tardes van amatagando y la lluz escápase cola entrada la Seronda, tuve per ellí, probando les víes y sacándoles pali pali. Grichu Camochu ye una vía, con un pasu increyíblemente duru a una presa ínfima, solo apta p'auténticos fanáticos del ñapéu y nesos m'alcuentro, jaja.

Abel, colos sos dedarros nun yera nin a sentila jajaja. Coses de la escalada, pa unes coses bien y pa otres, andar más finu de deos da más xuego pa estes preses tan pequeñes. Polo demás, cayó nun par o tres de pegues, ya que si-y metes munchos más desmontes la pelleya.
Solucionando Grillu Camochu

Llueu la otra nueva el Retacu, ye menos guapa pa mín, más aleatoria y con más posibilidaes según estilos.  Pue llanzase de frente y a distintes preses, pero nun quita que seya guapina, pero non tanto como Grillu que tien los pasos totalmente obligaos y eso préstame muncho nes víes.

Tamién salió, en tres pegues, namás que saqué-y el métodu más curiosu pa min. Anque lo dicho tien varies alternatives a distintes preses con un llance de fe y agarrase a lo que se pueda y tirar p'arriba como un burrín.

Lo demás ya ye rizar el rizu, con que si nun pilles esa o la otra sal más duru. La peña ya nun da pa más y ta cosida a bolts pa sacar víes y movimientos, asina qu'a disfrutala pero pa mi idega qu'hai que dexar les coses como tan con estes víes y que la xente xuegue y aprete enforma.

Apretando nel Retacu

La sorpresa fué la salida direuta del Reto, que de ser 6c+ saliendo de frente pudiera metese nel 7a y que costóme más de lo camentáu, cayendo nel últimu movimiento lo menos en 3 pegues distintos, sale durina, mala de pies y hai qu'apretar como un chifláu.

Polo demás, la única nota negativa quiciás al enfotu por sacar movimientos y llinees nesti pedazu de roca, ye la estrallimpieza de preses p'algamar el Retón (7a+) que queda desvirtuáu de los sos movimientos iniciales y que tanto costó sacar, afinando los llances, pegándose a la paré d'unes ñapes insufribles y garrando la calidá suficiente pa llanzar y quedase d'una pinza malísima.

Fueron munchos pegues, sacando los movimientos y afinándolos pa cotala de 7a+ pero bien pudiera ser 7b, pa dir vela agora y comprobar qu'hai preses cepillaes hasta la fartura, que nunca lo fueron y ye que la roca na Peñona ye mui blandina y suel tar mui puerca jeje.

Hasta más ver... escuelina xixonesa

La Peñona (Sectores visitaos)
 
Croquis modificaos por mi de la escuela d'escalada de La Peñona, por mor del blogue Pura Escalada Asturias y Piratas Free. Gracies y col so permisu.


-------------------------------------------------------------------  



7 de Xunu de 2015

Otra visitina a la escuela de la Peñona... otra visita que faigo sin Kíla... y otra visita na que nun tengo proyeutos por facer. Nesti día, namái fuí de compaña a montar víes pal mió hermanu y la mió cuñada, pa que sigan entrenando demientres el mió sobrín sigue medrando hasta que pueda montar les víes a él jeje.

Asína que... supongo qu'a falta de víes con cuerda que facer, tendré que volver les próximes visites a poneme fuerte col bloque, porque siendo sinceros sigo sin espoxigar esta temporada, sigo sin algamar resultaos y sobretou sigo sin salir de la comodidá de ciertos graos que saco a vista (6b o 6b+) ya inclusu dalgún 6c, pero nun soi a apretar como otres temporaes en cuanto a gráu máximu entrenáu.

-------------------------------------------------------------------
2 de Xineru de 2015

Más de mediu añu ensín garrar la cuerda na Peñona y escribo estes llinees magar de lleer l'anterior actualización de la entrada. Nes miós visites a la Peñona, dediquéme a facer bloque y tamién a un nivel mui baxo pa lo que taba faciendo nel branu del añu anterior.

Esti día de Xineru, un vienres tarde averéme con Diego hasta ellí y tuviemos esguilando un pelín cola cuerda neses víes estrañes nel paré del pequeño Rodellar que nomen. Les sensaciones nun pudieron ser piores y eso que toi fartucu d'encadenales, nun siendo a aportar a la cadena del tirón d'unu de los 6a+/b.

Los miós intentos por recuperar dalgo de nivel tan siendo pocu afayaizos ya que namái qu'esguilo un día curioso, el tiempu fai que tarde una xabazada en tornar a tocar roca y ye un querer y non poder, que lloñe de ser mui perxudicial pal cuerpu, sí que lo ye enforma pa la mente.

Esti día, acabamos faciendo otres pequeñes víes na propia peñona, sacando bastante bien un par de víes curties, que más tienen que ver col bloque que con una vía de cuerda n'altura. Preséntase un iviernu complicáu a la hora de ganar hores esguilando y eso va facer que seya difícil tornar al nivel del branu pasáu. 
-------------------------------------------------------------------

15 de Mayu de 2014

Si ayeri cuntaba los munchos díes de trabayos na Peñona, pa siguir resolviendo proyeutos, esa mesma tarde daba fín a ún de los más naguaos: xubir de grau entrenáu col encadene del Retón de la Peñona (7a+).

El branu pasáu entamé a probalu, nun siendo capaz de ve-y manera, hasta que vimos a un rapaz que trepaba de coyones, sacándolu con un métodu dafechu distintu a lo que yo intentaba. Aún así, albidraba'l movimientu perduru y llargu pa la mió estatura.

Esti añu tornamos al ataque, primeru cola versión piquiñina, el Retín (7a), con salida pela manzorga y llueu con munchísimos pegues pela salida direuta (El Retón). Nin siquiera se dicir cuantos pegues y llances-y metí en total... quiciás más de 30.... desfaciendo les yemes de los deos en varios díes.

Pero como suel pasar, día a día, taba averándome, pasando de nun ser a llegar a la pinza, a garrala de xemes en cuando ya inclusu a tener bonos porcentaxes d'aciertu nel llance. Aún así, al apretón de la pinza, había que sumá-y moverse de pies bien pa poder xuntar manes na mesma pinza.

El 13 de mayu, sacaba la secuencia de pies y ya sólo tocaba tener suerte y meté-y bonos intentos. Asína fué ayeri y con dos pegues fallando'l primeru al xuntar manes, ya tuve la oportunidá pa salir p'arriba apretando a muerte.

En resume, la Peñona sigue dando xuegu y de xuru que vamos alcontrar dalgún requexu onde siguir equipando y sacando proyeutinos tan prestosos como estos retos (Reto, Retín y Retón).

----------------------------------------------------------------------------

1, 23, 29 y 30 d'Abril  y 12 y 13 de Mayu de 2014

Munchos, munchísimos díes d'esguilada na Peñona, amestando'l bloque cola cuerda y garrando fuercia blocando pa poder da-y a proyeutos o más bien retos, que quedaben nel tinteru. Ciertu ye, que mui bien vínome'l bloque pa tener los deos preparaos pa los retos.

El branu pasáu, yera a sacar el Reto, que quedara cotáu de 6c+ y esti añu, magar de facer muncho bloque, decidimos Abel y yo, intentar un día, el Retín y el Retón, que taben ehí, esperando a que viésemos-yos un pocu de color pa encadenalos.

Diego apretando en Haze (6a+)

Aparte, pa tomar contautu cola cuerda, más d'un día, tuviemos "inaugurando" la guapísima Rivendel nel seutor Mordor, que quedó como IV+. Perguapa vía d'iniciación, fuera de lo común nesta escuela, onde hai qu'apretar más de lo que nos prestara en tolos graos.
Como siempre, el trabayu d'Abel y Fredo, equipando y llimpiando ye una pasada dafechu, y tener un seutor enteru nuevu, col que poder restolar nueves rutes ye mui d'agradecer. Así ye esta escuela, cada requexu y posibilidá llimpiase pa siguir dando xuegu tanto colos bloques como cola cuerda.

Abel probando duro El Retín (7a)

Rivendel vió los encadenes de Alberto y Paulina que ta volviendo a da-y con ganes y los entrenos de Charly nesto de trepar. Así que, la vía nun puede ser más prestosa la verdá, anque de xuru que va quedar bien acompañada en tiempos cercanos por otres víes nel seutor.

Nun sólo equipose en Mordor, tamién na Peñona añadiéronse delles chapes p'asegurar pasos y dalguna reunión. Probáronse les víes reequipaes y quedaron como El Esguilu (V), Pación pal Pulmón (6a), Haze (6a+) y el mayor cambiu ye pa la de Colás, que pola rotura de dalgún cantu pasa de V+ a 6a+.

Alberto, Charly y yo... nos seutores de Mordor y Jerjes

Y falando de los retos.... hai que dicir que dempués de matizar per onde diben les víes (Retin y Retón), al día siguiente magar d'un calentamientu nel Reto (6c+), salió al primer pegue el Retín de 7a... mi quintu séptimu pel momentu.

El Retón, que tien un llance espectacular dende dos ñapes a una pinza malísima, camiento que rondará'l 7a+, compartiendo la parte final col Retín. Ye mui dura pa mi estatura, pero día a día, entrenando va tando más cerca y albidro qu'apocayá sedré a encadenala y la mió perilla pasará a meyor vida al algamar xubir de grau, jejeje.


----------------------------------------------------------------------------

9 y 17 d'Avientu de 2013

Dos díes sueltos así a lo llocu, tuvi la oportunidá, d'escapame hasta la Peñona, pa intentar encadenar Navegando en Monodedos (6c+/7a). La verdá ye que llevo teníendola a tiru varios díes, pero sigo sin ser capaz de facer les coses bien del tou, y escápase per un pelín.

El primer día, tuvimos Sonia, Gus y yo, nun día festivu pela mañana, y col solín qu'allumaba pente los árboles, cayeron mui, pero que mui bonos pegues, pero nel que paecía ser, apreté con tantes ganes la presa, que quedéme con parte d'ella na mandrecha, y nun fui a salir penriba'l techu.

Kíla siempre presente nos encadenes

Demientres, los mios pegues, Gus encadenó a vista la variante de Bombardeo golfístico y probó tamién esta mesma (6a), quedando a un pelín d'algamar salir del pasu clave, pero frayó les manes, colos agarres cortantes y nun pudo ser.

Unos pocos díes dempués, Paulina, animóse a acompañame a mediudía, nun de los sos díes de vacaciones,  y a la fín, dexó de resistise al segundu pegue. Nel primeru, nun m'alcuerdo bien por qué, fallé y nun pude encadenala.

Gus faciendo a vista la variante de Bombardeo golfístico (V)

Magar del descansu, mientres Diego y Pau, apretaben un ratín en Pared de Chicle, volví a la carga y lo que suel pasar, cuando se faen tolos movimientos bien y con calma, suel llograse facer la vía, hasta con ciertu aire de suficiencia.

Tanto fue así, que dempués del llance, de xubir pie y xuntar manes, taba tan cómodu, qu'enantes d'apretar y camudar el pie pa salir pa riba, pude descansar, garrar magnesiu... coses que nun crees que podrás facer y salen soles.

Yo nuno de los múltiples pegues a Navegando en Monodeos (6c+/7a)

Al bolsiellu... mi cuarta vía de séptimu grau, anque tea na llende.... na Peñona, namái quédenme los Retos (retín y retón), pero paezme que perpásame de grau nel intre.


 ---------------------------------------------------------------------------------------------------------
 
7 Payares de 2013 

Visita rellámpagu a la Peñona, apurando les caberes tardes nes que poder esguilar daqué, col envís d'intentar encadenar d'una vegada, Navegando en monodedos (6c+/7a). La verdá ye que ya nun paga la pena, dir poles tardes ya qu'escurez práuticamente cuando tas ya caliente pa intentalo dúramente.

Esta vegada fue Berto'l que vino conmigo a asegurame, y tuvo dándo-y unos pegues al Regato (6a+) que comparte reunión col mió proyeutu, anque magar de sacar bien el primer pasu de techu, el segundu resistióse-y pa otra vegada.

Techos del Navegando en monodedos

Nun fue l'únicu que marchó ensín recompensa, ya que tuve en varies ocasiones mui cerquino, d'encadenar la vía, pero unes vegaes por camudar la secuencia de piés y otres por garrame mal, nel llance de dreches nun fuí a salir p'arriba.

Ye una pena, pero la nueche aportó, dexándome ensín más oportunidaes nesti día, y a saber hasta cuando, ya que nun llugar tan húmedu como la Peñona, en cuantes qu'entame a llover n'Asturies, aquello nun ye a secar tan fácilmente.

 ---------------------------------------------------------------------------------------------------------


24 Setiembre de 2013

Ya llovió dende que tuviemos la última vegada na Peñona en Xixón. Aquel día, metíera-y un bon repasu al seutor de la Matona, finando l'encadene de toles víes esistentes y agora tornamos una tarde de calorón a los bloques de la Peñona.



Berto encadenando Pared de Chicle (V+)
Nellos, quedábame por encadenar Navegando en monodedos (6c+/7a), aparte del Retín y el Retón na propia Peñona pero pol momentu, nun-y veo nengún color, cosa que Navegando en monodedos, magar dos dos pegues curiosos ya va teniendo.
 
Sonia más de lo mesmu nesa guapa vía

Primero, tanto Berto como Sonia, tuvieron apretando en Pared de Chicle (V+), guapa vía que primeru foi a algamar Berto y dempués Sonia, anque necesitaron un par de pegues caún. La verdá ye qu'esta vía, ye ún de les más guapes de tola Peñona.

A la preba de Navegando en monodedos... 6c+/7a

Dempués metí-y yo un primer pegue al 6c+/7a y por sorpresa, llueu de comprobar y comprobar los movimientos fui a salir del techu, cosa que la cabera vegada, nin siquiera fuera a ello, teniendo que llibrar la vía, pola de la manzorga.

Saliendo a la fín p'arriba... ya ta pa ello

Nel segundu pegue, yendo en condiciones y con ganes, nun alcontré l'agarre d'esquierdes pal llance al cantu malu de dreches y ya con eso, nun pude nin siquiera suxetame una migaya del dreches y p'abaxo. Dende ellí, a la siguiente preba, tamién salí del techu con ésitu, quedándome un tastu un pelín amargu del día.

Dos bonos pegues y la secuencia nel bolsiellu pa un próximu encadene

Demientres mis pegues en Navegando en Monodedos, Sonia y Berto, fueron a encadenar la Variante (V) d'esti mesmu bloque. Esta vía cenciella, garra l'entamu de Navegando en Monodedos pa empatar col Regato y finar nel centru del bloque.

Berto y Sonia encadenando la Variante (V)

A la fín, bon día pa toos, ya que dos encadenes na Peñona pa Berto y pa Sonia, y yo pintá-y un colorín menos prietu y más blancu a Navegando en Monodedos, ya ye pa colar satisfechos. Kíla como siempre, nesti llugar esfruta como lloca, así que siempre ye una felicidá pa ella, tar corriendo pente los bloques de la Peñona.

Kíla encantada como siempre nesta escuela xixonesa
 ---------------------------------------------------------------------------------------------------------

14 d'Agostu de 2013

Vuelta dende Soria, y como quedeme coles ganes d'esguilar dalgo más, enseguida contacté con Berto, pa dir un ratín de tarde, hasta la Peñona. Esta escuela, ta quedándoseme erma de víes a resolver, pero aún quedábame'l seutor de la Matona pa da-y duru un ratín.

P'allá que xubimos y buff... como tan les víes... enllenes de vexetación. Equí los ablanos y lloreos espoxiguen como si nun costase. Tenemos decidíu, qu'hai que tomar cartes nel asuntu y aidar a la xente que fai los trabayos de llimpieza y reequipación, asína que tenemos que facenos con dalgo de material de xardinería y echar un gabitu a xente como Abel o Jorge.

No deportivu, Berto tuvo conociendo un pocu más esti seutor faciendo Melandro (IV) y pegándose cola so variante de V. Tamién al tar la cuerda penriba, tuvo divirtiéndose nel techu La Matona (6b+/6c), ya que tamién les víes que fice yo, compartíen reunión, anque nun sería lo más adecuáu pol rozamientu de la cuerda dende la reunión al pie de vía.

Berto mirando pal montaxe que tenemos

Pela parte que tócame, tuve faciendo un V+ (Negra y Blanca) pelín suciu polos lloreos y la variante más dura, Nunca acierto (6b+/c), de la cual... voi dexala como encadenada porque nun tengo claro si hai que salir mediu sentáu o que...
Salí de pié, como debiera ser nuna vía de deportiva y cola ñapa y el invertíu, taloné y tiré p'arriba apretando abondo. Llueu ya tocó salir al descansu y facer el segundu paré, pa encadenala. Si torno per equí, pues supongo que la intentaré más vegaes como si fuera un problema de bloque casi dende'l suelu, anque ya xube'l grau de xuru.

Aparte, cayó Brother (6a) la cual ta estrada de tierra na parte superior y cuesta salir de la fisura hacia la parte superior, pero como ya la conocía de facela en toprope, nun quise dexar la oportunidá d'encadenala y apreté como un burrín, p'algamala.

Kíla descansando tranquilamente nuna cuevina

Con cierta tranquilidá, al nun quedame nenguna vía d'esti seutor, en tola escuela, réstenme namái que Navegando en monodeos (6c+/7a) la cual va dame munchos problemes y el Retín y el Retón, que rondarán el 7a.

A ellos fuime y tuve dándo-y un par de pegues o tres, ensín ver mui inda mui cercanu l'encadene. Eso sí, demientres decía qu'a ver si veo a dalguien encadenala o prebala siquiera... apaez un mozu foriatu más fuerte que'l vinagre, que dempués de delles indicaciones míes preba y tampocu ye a sacala.

Pero llueu, albidra un métodu nuevu y p'alantre, colo que ya marché llorando pa casa jajaja. Ye broma, presta ver a xente más fuerte que tú, esguilar y ver que métodos usen pa sacar problemes que nun yes a ello.

Agora tócame prebar los sos movimientos pa ver si llego a la regleta mediu bona, porque yo soi más baxo... y nun lo acabo de ver. El retín y el retón... son dos auténticos problemes.

La Peñona (Sectores visitaos)
 
Croquis modificaos por mi de la escuela d'escalada de La Peñona, por mor del blogue Pura Escalada Asturias y Piratas Free. Gracies y col so permisu.


 ---------------------------------------------------------------------------------------------------------

31 de Xunetu de 2013

Otru día d'esos de calor a fueu, bochornu y sudaes gratuites había que tirar pa una escuela onde al menos hubiese dalgo de solombra. Como facía un tiempín que nun díbemos a la Peñona, p'allá que tiramos col envís de mirar unes cuantes víes que quedáranme nel tinteru nel seutor d'enriba la Peñona.

Nesta ocasión vamos Berto y yo, así que dos persones tiénenlo difícil pa sacar dalguna semeya, jeje. Como llevábemos dos cuerdes, aprovechamos pa usar una na placa de Leónidas y demás víes y la otra pa los mios proyeutos.

Berto anduvo pegándose nesa placa, en tres de les 5 víes esistentes, entamó por Leónidas (V+), pero la falta d'una chapa más pa la parte de la grieta y que diba petáu, fizo que nun saliese y acabase tirando pa la última equipada... 300 (6a).

Ye raro, pero al final esta vía, col so particular lance al monodeu, al ser alto, fue la que llevóse al bolsiellu, dempués d'un descansu, poniendo na so particular llibreta, su primer 6a. Dempués, más cansáu, tuvo dándo-y a la vía más guapa d'esti bloque, Jerjes (V+), pero la adherencia y l'equilibriu que requier fizo dexala pal encadene pa otra ocasión.

Pela mio parte, entamé sacando a vista La Rana Saltarina (6b) que tien un estilu mui de la Peñona, entrada a vía nun techu desplomáu, pa salir a fueu a una placa de furaquinos mancantes pa los deos. Al igual que la hermana mayor de la drecha, el Dobidedo (6c/+), tien un descansu en mediu pa metese n'otra placa hasta la cadena.

El Dobidedo fue la siguiente a la que-y metí caña... y caña foi la que me devolvió. El chapaxe a la primer chapa, ye duru y ta altu, poro perdemos fuercia ya nos tres primeros metros. Llueu tocóme meter una bici, agarrar d'una pinza vertical de manzorga pa cruciar cola mandrecha a unos furaquín de tres deos dende'l cual chápase la segunda.

Esti movimientu ye perduro, pasando a la parte de placa fácil por furacos hasta'l descansu, onde al contrariu que na Rana Saltarina, entrar na segunda placa faise complexu, teniendo que tirar de dos ñapines hasta un agarre llateral alto, pa salir fácil dempués hasta'l descuelgue.

Magar de los 3 pegues que-y tuve que dar, y pa nun quedar cola cosa de dexar una vía ensín probar, metime picáu por Berto en Navegando en monodeos (6c+/7a), a la cual llegué dalgo cansáu y nin siquiera fui a salir de los pasos de monodeos... quedará na carpetina de pendientes... por una bona temporada camiento, jeje.


4 de Xunetu de 2013
  
Dempués del encadene de Gatos Kamet (6b+) na Manzanea, al día siguiente, tenía un ratín pa visitar la Peñona y el mió últimu proyeutu: El Reto (6c+). Vinieron conmigo Sonia, Berto y Kíla, como siempre.

Así ensín calecer, metíme con ella, faciendo los primeros pasos y chapando los dos primeres chapes cenciello. Llueu la cagué, na colocación de pies y nun algamé'l llance al cantu, pero vime fuerte de yemes, así que foi un pegue positivu.

El Reto (6c+) encadenáu al tercer pegue del día

El siguiente pegue, ya fue con tou y algamé'l cantu dende les ñapes y sorprendentemente, liéme na parte superior y más fácil, petando por xubir los pies de más. Conclusión: vuelacu y duldes mentales, ya qu'esta vía nun dexa munches oportunidaes a los deos pa encadenala.

Así que, tocaba descansar y que'l tercer pegue fora definitivu. Pa ello, Sonia y Berto, tuvieron esguilando nos quintos de la mandrecha la Peñona. Berto xubió de primeru, El Esguilu (V) pa dexar la cuerda na reunión y que Sonia la prebase en toprope, xubiéndo ésta y Pación pal Pulmón (V+) ambos.

Sonia y Berto apretando na Pación pal pulmón (V+)


Magar d'apretar ellos, tocóme de nuevu a mí, y esta vegada si salió ensín problemes hasta riba. Sinceramente, nun tengo más qu'un 7a na llibreta, como pa ponela de tal grau, asína que siguiendo cotes de víes cercanes como Meteorito (6c), vamos dexala en 6c+ y que la xente siga opinando.

Pero ensín garrar aliendu, un proyeutu siempre da continuidá a otru. Así que del Reto, pasamos al Retín y al Retón, los cuales comparten la entrada na vía, onde tan les mayores y pel momentu inaccesibles dificultaes. Les salides a reunión, tarán mui a la par, pero hasta que nun resuelva la entrada, pocu importa.

Eso sí, estes dos son de 7a afitáu dafechu.... y saber cuanto pa riba.

 ---------------------------------------------------------------------------------------------------------

25 de Xunu de 2013

Esti branu, ta siendo con muncho'l que más toi yendo a esguilar. Débese en parte, a que ca día que pasa, van sumándose ún tres d'otru a esti mundín collacios y ficimos un grupín curiosu enfotáu n'esfrutar con esti deporte. Poro, col horariu branu, casi tolos díes toi yendo pa una escuela u otra, ya qu'anque Pau te currando, siempre tengo a dalguien con quien dir y apretar un puquiñín.

Sicasi, nel día de güei foi casi un puquiñón lo qu'apreté, ya qu'anque quería dir a facer dalguna vía y pa casa prontín, acabé metíu nun viote, que llevóme a acabar dafechu reventáu de yemes.

Infinitos pegues al Reto.... 6b+?? ó 6c+/7a?

Nun tenía mui claro, pa onde tirar, ya que nun tenía nenguna vía nel tinteru, en dengún de los tres seutores de la Peñona. Aún así, un mensaxe d'Abel, equipador d'esta escuela, diciéndome que ya resolviera una de les tres víes a la manzorga de la Peñona, así que tenía que prebarla.

Allá que fuimos a por Vía Lactea, demientres Kíla corría pol prau a lo suyu, y nun salió a vista por un mal movimientu. Aún así, al segundu pegue ya cayó pa la carpeta de les encadenaes. Tien unos pasinos mui guapos, entrando de la manzorga a la mandrecha, talonando d'esquierdes y aguantando un par de pequeños lances a bonos agarres, pa salir a una ñapa de dreches, xubir un pie n'equilibriu y p'arriba. Lo dicho guapísima

Abel faciendo la vía al so xeitu...

Y dempués, nel mesmu mesaxe, llegábame a la oreya, qu'Abel anduviera prebando'l Reto, que nos croquis pon 6b+, pero que ta seguru que tien que rondar el 6c+ o 7a. Ensín, pensar muncho nello y dempués de que Berto prebase tamién Vía Lactea, metíme a pol Reto, llegando a chapar nun se nin como, la segunda chapa y cayendo nel pasu clave.

D'equí, mirando agarres y prebando llegué cenciello, hasta'l descuelgue, camentando que diba ser una xera  pocu abegosa, encadenar esta vía. Y eso paecióme, hasta que foron pasando los pegues y seguía cayendo nel mesmu pasu, aguantándome pior de les ñapes a un llance d'un cantu y moviendo los pies d'un xeitu diferente en cada pegue y cayéndome igualmente.

y resolviéndola dafechu... norabona

Y nestos pegues a fueu andaba, cuando llegó Abel y ya si que la cagamos, porque enfotámonos los dos en da-y solución, él a la so manera y yo a la mía, sacándola nel primer pegue Abel, dempués d'un apretón increyible.

Ye lo guapu de la escalada, una mesma vía, pues tener varies formes d'algamar un pasu y Abel a la so manera sacólu y yo, téngola a güevu, pero necesito yemes nos deos, cosa que nun tenía nos últimos pegues y qu'al día siguiente taba claro que tampoco diba tener.

Voi tener que parar un pocu... o baxar la esixencia de les víes... ver veremos.

 ---------------------------------------------------------------------------------------------------------

15 de Xunu de 2013

Una vegada más y con un día pelín raru, ñubláu y amenazante d'orbayu, tiramos pa la Peñona. El día de güei, ye dafechu d'ambiente esguilador, ya qu'aparte de les nueses andances pela tarde diremos ver el campionatu de dificultá que cellébrase na plaza mayor de Xixón.

Que más puédese pedir??? Pues dir a xintar a la Carbayera, pente medies y ya tenemos el día completu, pa empatar el nuesu deporte col d'otra xente, a la que presta almirar. Aparte, estos eventos en llugares públicos dan a conocer un deporte mui espeutacular como ye la escalada deportiva a tol restu la xente.

Primeros pasos del Ombligo de Venus (6b+)

Pero lo primeru ye lo primeru (n'otra entrada pondré delles semeyes que sacamos) y foi aportar a la Peñona y ver les condiciones de la roca. Yo personalmente, ya diba coles mios intenciones bien clares, meté-y caña al Ombligo de Venus (6b+), el cual nun tocaba dende antes de fin d'añu.

Poro, magar de mirar l'estáu dalgo húmedu de la roca, y ensín calecer con otra vía, metíme de cualquiera manera, ya que sinon nun diba marchar mui contentu. Tenía ganes de probala y llevaba entrenando los talonamientos nel bulder de Llugones tol iviernu, así qu'había que probar si valía pa dalgo tanto entrenu.

Saliendo p'arriba a la fín... vaya tranquilidá quitame esta vía de la tiesta

Y valió? Pues sí que valió, ya que nel primer pegue, cola mente más bien puesta en intentar poner les cintes, fui algamala. La verdá, ye que sorprendióme lo fuerte que m'alcontré, y lo bien que fui camudando los talonamientos, faciéndoseme hasta cenciello, chapar la segunda cinta y tirar p'arriba.

Aparte, per primer vegada nun baxaba sangrando de la vía y eso que ya taba preparáu, deu a deu, d'esparadrapu, jeje. Facía tiempu, que nun me prestaba tanto algamar un oxetivu, ya qu'esta vía taba atragantándoseme y yera claru que l'estilu bloqueru, nun yera lo que meyor dábaseme, poro dalgo ameyoramos durante l'iviernu paez ser.

Na escalada hai dos formes de descansu: el pasivu de Kíla y el activu del asegurador, jeje

Col primer y únicu oxetivu encadenáu, tocaba pasalo bien y esfrutar de la mañana, asegurando a Pau, Sonia, Natalia, Berto y Gus, que tuvieron atentos al mio encadene. Como tábemos na parte drecha de los bloques de la Peñona, fuimos hasta les víes d'esa fastera, entreteníendonos con Hulk (V) y Pared de chicle (V+).

Pared de chicle, ficela pa poner la cuerda penriba en caliente y Gus, metióse con Hulk, p'a posteriori dir pasando unu a unu per elles. El día, pel momentu seguía aguantando, así que tuviemos con calma nestes dos víes dándo-y hasta varios pegues caún a la que más-y interesaba.

Les víes protagonistes del día: Hulk (V) y Pared de chicle (V+)

Pau, dempués de calecer en Hulk y Pared de chicle cola cuerda penriba, animóse a da-y a Hulk de primera, col envís de dir ganando esa confianza que ta costándo-y algamar de primera. El resultáu, nun pudo ser más beneficiosu, ya que foi a encadenala pesie a rompése-y una presa na manzorga, quiciás nel pasu más difícil de la vía.

Nun hai que dicir, lo prestosu y meritoriu del encadene, ya que dempués de quedar colgando d'una man, foi tranquilizase, chapar la siguiente y magar de dellos encamientos por mi parte, siguir p'arriba, relaxase y encadenar la vía. 

Nun será la meyor, nin la más guapa vía que fizo Pau nunca, pero de xuru, que darréu alcordaráse d'ella cuando-y entren eses duldes y mieos, y va saber que si tiró per esa roca mediocre ensín problemes, pue esguilar cualquier otra cosa.

Mui bonos pegues con Gus encadenándola de primeru

Si esta vía puso la emoción, Pared de chicle, puso los pegues a fueu. Los movimientos llargos, teniendo que facer casi mano-pies, como si tuviésemos nun rocódromu, dan-y una prestanza a la vía fuera de lo normal. Al final, tol mundiu foi a tocar la cadena cola cuerda penriba, pero Gus atrevióse a dir de primeru y con ello, llevóse'l premiu del encadene.

Como ya yera un pelín tarde, decidimos baxar hasta la Peñona, onde Abel, equipó dalgunes víes, que ya probara fai un par de meses. Los nomes de les víes, son Puxa, Vía Lactea y Meteorito y alcuéntrense onde ta la cuerda pa xubir a la Peñona.

Pau nun accidentáu y meritoriu encadene a Hulk (V)

La primera que probé, foi Puxa, que xubiera hasta riba l'anterior vegada cola cuerda penriba. Güei, dempués de restolar los agarres buenos: un monodeu de dreches y una ñapa piquiñísima, salí p'arriba col pie esquierdu y llueu sálese per una chapa hacia la esquierda tamién, pudiendo poner un mosquetón de seguridá pa posteriores pegues en toprope, nel parabolt de la cuerda.

Cola mió estatura, la vía resúltame de 6a+, anque siendo más llargu lo mesmu, alcuéntrase dalgo más arriba colo que salir. A mí, tócame facelo así, poro vamos dexalo nun 6a/+, por poner daqué, anque esto de los graos ya se sabe... caún ye caún y K2 una piragua.

Berto y Pau, hasta la cadena tamién

Como taba fuerte, demientres los demás, taben nos V's de la mandrecha la Peñona, pidí-y a Pau, que viniese a prebar conmigo Meteorito, que ya la xubiera tamién hasta riba en toprope, l'anterior vegada.

Esta vía, motivábame munchísimu más, así que metíme con too nella y la lluché ñapa a ñapa. Ye mui guapa y durina, ya que chapar la segunda resulta complicáu, y salir d'ella, per ñapes n'equilibriu fízome sudar tolo que nun me fizo sudar esta vegada L'Ombligu de Venus.

Nun me pudo quedar meyor tastu d'esta cabera visita a la Peñona, ya qu'esta otra vía, rondará'l 6b+/6c y asína anótolu nos mios croquis. Anque pa bon tastu, el de les costielles de la Carbayera que metímonos pal cuerpu, dempués de recoyer los trastos y colar d'esta guapa escuelina xixonesa.


---------------------------------------------------------------------------------------------------------


13 d'Abril de 2013

Sí, otra vegada tamos na Peñona esguilando, pero ye que ta tan cerquina y daben un día tan calurosu, que lo meyor diba ser metése pente la solombra de la viesca, pa tar un pelín protexios del sol. Aún así, pegó tol día con fuercia y tuviemos la oportunidá de ponenos un pocu morenos.

Esta vegada fuimos al propiu seutor de la Peñona, pa que la xente apretase nes plaques tumbaes d'Esparta. Pongo Esparta, porque nómense toles víes rollu peli de 300 (Jerjes, Leonidas, 300,..) y precísamente foi 300 la única vía nueva que fice.

Gus y yo, probando 300 (6a) y Jerjes (V+)


La vía comparte la primeres dos chapes con Jerjes, sobre placa tumbada y monodeos hasta una fisura horizontal con varios cazos. Equí toca colocase y alcontrar un monodeu, na parte de la peña y llueu dos cazos pa pesllar na cadena.

El problema ye alcontar esi monodeu y tuve que meté-y 3 pegues, aún así, camiento que ye un 6a, ya que la parte difícil de Jerjes ye xusto l'entamu y ye V+, si-y amestamos esi pasín que fai difícil facela a vista y obliga a colocase bien, ya tenemos el 6a. Mui guapina la vía.

Berto probando Jerjes y Sonia apretando nun 6a+ (Huella del Perro)

Mis pendientes nesti seutor, taben dafechu moyaes, sinon la vía, el suelu p'asegurar taba mui embarráu y nun pude pegame con nenguna. Pa otra vegada será. Eso sí, tiempu tuvimos toos esguilando vía tres vía y pasando'l día de luxu.

Aparte, tamién vino Vicen, a conocer esta pequeña ayalga de Xixón, y tuvo tiempu a probar les víes más factibles y disfrutones (La Fisurina (6a+/b) y Antinatural (6b)), amosando que sigue tando tan fuerte como siempre.

Vicen y Gus aprentando en La Fisurina (6a+/6b) y Antinatural (6b)

Tol restu'l grupu, siguen avanzando de coyones y si nun lo ven claro de primeru, cola cuerda penriba tiren a fueu. Presta muncho xuntase tanta xente, pa prauticar esti deporte, pasando un día al aire llibre, xintando empanada, chorizu.... etc y llueu como non, a tomar unes botelles na Carbayera.

Si al final va ser la escuela perfeuta, jeje... y Kíla si cansa de correr pues... echa un pigacín

Kíla a lo suyo mientres los demás esguilen

---------------------------------------------------------------------------------------------------------


16 de Marzu de 2013

Sábadu pela mañana, madrugamos un pelín fiándonos d'un vienres ensín lluvia y d'unos pronósticos de tranquilidá hasta mediudía como mínimu. Pero... Maldotado y su páxina, déxenmos col culu al aire y enantes de les diez de la mañana ya ta orbayando un pelín.

Probando un V+ nel seutor de la Matona

Aún así, tiramos hasta la Peñona, pa qu'al menos, unos cuantos collacios más, conociesen el seutor de la Matona y probasen unes cuantes víes, que tuviesen nun estáu decente cuantos menos. Asína fue, dándo-y a un cuartu y otru quintu, hasta que l'orbayu foi ganando fuercia y tuviemos qu'abandonar.

Encadenando un 6b variante d'un 6a+ con un movimientu guapísimu

A pesar de les ganes de Pau, de siguir sacando víes nesta escuela, lo moyao de la roca nun-y dió nenguna confianza pa ello. Por mi parte, quitéme d'enriba la única vía que me quedaba na parte más a la manzorga de la Matona, col 6b de la Diagonal.

Mira que ya ficiera'l 6a+ (La Tallá), que comparte'l pasu más difícil de la vía, pero nun fui a sacar la secuencia hasta'l n-enésimu pegue. Coses que pasen y que cuando yes a ello, fáigante sufrir el restu la vía con un petazu de tres pares de coyones.

Saliendo hacia la parte de placa

Pa cellebrar, que'l tiempu nun diera pa más... fuímonos de vermutéu, cayendo una sidrada d'epiques hestóriques, con enllaz col partíu l'Sporting, el del Mandril... y dalgunos llegaron a casa a les 6 de la mañana... lo que vien siendo un vermú llocu.

Como'l día nun dió pa más... vermú infernal sidreru


---------------------------------------------------------------------------------------------------------

 9 de Marzu de 2013


Esti sábadu, tamos asína como indecisos. Tenía preparáu un paséu pela costa carreña, pero llevantámonos con más ganes d'esguilar y ye que viendo la qu'avecínase pa la selmana, teníemos qu'aprovechar el día fuera como fuera.

Tampoco tenemos munches ganes de conducir, asína que lo meyor yera dir pa la Peñona, col envís de que Pau, garráse-y un puquiñín de cariñu a esta escuela, sacando la so primer vía de primera y yo con ganes de probar una vegada más, mi ombligu de Venus.


Echando un nuevu vistazu al seutor de la Matona

De Kíla, meyor nun falar porque pásalo teta, corriendo peles mil siendes qu'hai pente los bloques y nos pies de vía, anque por dalgún motivu tenemos que tar tol día riñéndola por tumbase enriba'l marabayu cuerdes.

A la escontra de lo normal, fuimos esta vegada hasta'l seutor de la Matona, onde tan solo tuviéramos una vegada y quedáranmos munches víes ensín prebar y a sabiendes de la existencia d'unos IV´s yera la cuenta, pa que Pau, apretase fuerte.

Como siempre víes con salida bloquera pa finar más seliquino

Y asína que lo fizo, teniendo qu'apretar en dos víes (El Corner y Melandro), ya que son tolo contrariu a lo que tamos avezaos a esguilar. Agarres más romos y grandes con movimientos más de bloque, con entamos de vía durinos.

Nun alcontró meyor llugar onde echase a durmir

Nel mio casu, calenté con un V+ (Espolón), fice otra vegada la placa Matona (6a), taché Melandro tamién y como vime bien, intenté sacar a vista'l Techu La Matona (6b+/c), pero dempués de lluchar como un ñu, nun fui a salir penriba dempués de sacar cenciello los pasos del techu.

La verdá ye que la dificultá de la vía, ta na salida ensin pies a la placa superior. Nun fue hasta'l segundu pegue cuando vi la secuencia buena, con una manzorga pelín más alta, que permitíame xubir el pie esquierdo a los últimos cazos y salir penriba hasta la reunión.

Preciosu'l techu La Matona... guapu 6b+/c

A la tercera foi la vencida y dempués de sacar tola parte del techu bien fácil, apreté con too d'esa manzorga y del cortante agarre de dreches, pero como nun pude xubir el pie esquierdo, tuve qu'afitar la rodiella nel borde, p'algamar con un par de rebotes más arriba, la vía del Techu la Matona. Feu pero efeutivu, jeje.

A la fín, col tastu a bon trabayu, fuímonos de la Peñona (güei La Matona), encantaos y deseando volver, pa facer munches más víes Pau y yo completar al menos, El Ombligu de Venus, qu'inda sigue na llista de pendientes, y nun pude meté-y nin nun pegue nesti día, al igual qu'otres tres víes nueves na propia Peñona, equipaes por Abel.

Que meyor qu'acabar con una costillada na Carbayera Granda


Pero nun too va ser esguilar nesta vida, poro, fuimonos magar de les 4 hasta la Carbayera Granda, onde descubrimos la perfección pa una mañana d'escalada. Metese una ración de costielles y un pastelín de tiñosu, con unes cerveces pa recuperar líquidos.

Kíla da fe, de que los güesos taben bien coyonudos... 


---------------------------------------------------------------------------------------------------------

Actualización 2012

Nun yeremos mui fans al entamu de la Peñona, pero poquín a pocu, fui garrándo-y gustu a la so roca y a les sos víes, en dalgunos casos más bloqueres. Realmente, toi bastante engancháu a esta pequeña escuela xixonesa, que pa una mañana o una tarde ye más que satisfactoria.

Sacando un 6a+/b a vista preciosu

Amás, la xente que ta currándose esta escuela, abrieron un seutor nuevu, La Matona, con más peña d'estes característiques y víes bloqueres, pa tolos gustos y graos. Eso sí, paez ser que ta teniendo éxitu esta escuelina, asína que por favor: Caltener les formes, ser llimpios y curiar el material y el llugar que ye priváu que podemos quedanos ensín esguilar toos, por mor d'unos pocos.

A ver lo que facéis, que vos echo a Kíla, jeje

Na cabera visita, ún de les coses que más me prestó, foi volver a prebar unes víes a la drecha del too, nel sector superior de la Peñona. La vía Hulk, ya la conocía, pero los 6a+/b d'al llau: Soplapolvos y La colmena non.

Pangua probando en toprope soplapolvos

Daquella, esta paré taba persucia y yera pelín infiernu metese. Pero esta vegada, foi una maraviya, alcontrar los distintos pasos y agarres, sacando les dos víes a vista. Tanto Pepín, fotógrafu aquel día como Pangua, diéron-y dellos pegues en toprope y a toos prestónos, la raro de la roca y lo raro d'esos agarres caún distintu del otru.


Asegurando a Pangua nel Soplapolvos

Personalmente, sigo enfotáu en sacar una vía mui bloquera, quiciás demasiáu pa mi, ya que nun toi mui avezáu a estes víes tan a bloque. Nómase, l'Ombligo de Venus y ye un 6b+, pero ta costándome como si fuera un ... nin lo se.

Apretando de coyones nel Ombligo de Venus

Ye una ruta dura en tolos sentíos y nun solo polo físicu del techu. El tactu la roca, como falles, marches con tola piel de los deos, porque arranca cachos enteros, poro tas pendiente, de nun fallar o al menos, saber sacar les manes de les preses, si ves que fallen los pies o les fuercies.

Perguapa semeya cola salida a pulsu dafechu

La salida, tira penriba un techu, quedando colos pies al aire, de dos agarres que manquen la hostia. Llueu toca talonar como meyor se pueda, pa dempués, llanzar la manzorga a un cazu decente. Otra vuelta, talonamos más cerquino y xubimos la mandrecha a una grieta vertical qu'abrasa.

Secuencia de movimientos al fracasu, jaja

Agora vien el llance clave, d'esquierdes a un agarre, onde entren la metá los deos. Per primer vegada, foi a agarrame, pero hai que llegar bien fuerte equí, pa sacar la cinta, chapar el segundu seguru y garrar cuerda, quedándote tumbáu del too, y pasala pela cinta espress. Bufff....

Rendida fina, nel llance clave

En definitiva, vamos avanzando con esta vía y colo testerón que soi, hasta que nun la saque, casi nun prebo otres coses de grau superior, que tengo munchísimes ganes de prebar. Al menos, nos siguientes pegues, algame a poner el segundu seguru y aportar hasta la cadena, pero inda falta l'encadene. Pa la prósima será...

Últimu pegue del día, aportando hasta riba, pero ensín encadenar

Si vais a da-y a esta... o tais mui curtíos de manes, o vais mui sobraos... o lo meyor enfundase bien tolos deos d'esparadrapu, porque nun hai falanxe que resista los picos de la peña y los posibles enganches al volar.

Manca y non la maera... precisamente.

---------------------------------------------------------------------------------------------------------

Hestoria na escuela de la Peñona (Xixón)

Ye raru falar d'escalada nel conceyu de Xixón, fuera del míticu roco de la Calzada o les parés del muru del Piles, pero por suerte tenemos un par d'ayalgues pa nun tener que desplazános fuera del nuesu conceyu, si nun tenemos munchu tiempu.

Una d'ellas ye la Peñona na parroquia de Vega y la otra sería na playa de la Ñora, a la cual fuimos un par de vegaes, pero la roca conglomeráu nun mos presta res, jeje.

Abriendo una vía nuna especie de caliza-arenisca

Nesti casu, voi falavos de la Peñona, a la cual aportaremos dende Xixón, empobinándonos hacia La Pola (Siero) pela As-248 y dempués del desvíu a La Camocha, nuna curva hacia la recta de Vega Baxu, vamos salinos a la manzorga nel crucie hacia un viveru.

Enfrente d'esti podremos dexar el coche al llau de la riega del Meredal y caleyaremos pela carretera hasta la pista de formigón que nos fadrá xubir per detrás de la casa La Peñona, hasta meténos nun camín, que dempués de delles portielles dexarános na Peñona.


Pau apretando nun V+ guapísimu

Lo primeru qu'alcontraremos sedrá la propia Peñona, que dependiendo del llau pel que l'atacamos podremos facer búlder o tirar de cuerda en víes d'un par de chapes. Si l'arrodiamos pela esquierda pa siguir el camín, ya que de frente siempre ta embarráu, aportaremos per dellos senderos hasta peñes del mesmu estilu nos que allúguense toles demás víes.

La roca ye raruca, un amiestu de caliza y arenisca y en dalgunes muries paez que tuviéramos esguilando agarrándonos a rames fosilizaes y corteces de tueros... pero pa pasar un ratu y prauticar otru estilu d'escalada bien paga la pena, sobretou porque en díes soleyeros taremos al frescu de la solombra de continu.


Otru pegue de Gus al V+ potente

Dicir que si tamos avezaos a la caliza y a les víes llargues, va resultanos pelín raru esguilar, ya qu'inclusu la graduación t'aportada dende un güeyu d'escalada bloquera, lo cual si nun tas muncho d'ello, ye un bon entrenamientu p'apretar con xeitu.

A esti llugar, solo-y falta qu'anímese un pocu más de xente a dir, pa que les víes vayan llimpíandose, pero pa una tarde o una mañana y llueu tomar dalgo nun merenderu o dase un bañín en branu... ye la cuenta pa los xixoneses.

7 comentarios:

  1. NO conocía para nada esa peñona... muy interesante Berto

    ResponderEliminar
  2. jejeje, buena Berto, esa la tengo pendiente. Un saludo.

    ResponderEliminar
  3. Nun ta na mal pa pasar una tarde o mañana al frescu de la solombra, jeje.

    Espero que la visitéis...

    ResponderEliminar
  4. Y ye que tenemos de too. ¡Ai Xixonín de los mios amores!

    ResponderEliminar
  5. Paselo pipa, y cunde muncho tenelo tan cerquina casa. Eso sí, vaya rarísimo que ye too... esos agarres, eses raíces fosilizaes, esi look xurásicu que parez que va salir un velociraptor pente los felechos a comer al asegurador...

    ResponderEliminar
    Respuestas
    1. Ya te digo, pero vaya si da xuegu, tener esa ayalga a diez minutinos de casa.

      A ver si estabiliza'l tiempu y podemos da-y más a la escalada.

      Eliminar
    2. Igual pue tirase de roco un poco, hom. Porque parez qu'estabiliza pero pa mal.

      Eliminar