martes, 7 de abril de 2015

Arenas (Cabrales) - Forcáu'l Cuernu - Cáraves (Valle Altu de Peñamellera)

22 de Payares de 2014

Track: Arenas (Cabrales) - Forcáu'l Cuernu - Cáraves (Valle Altu de Peñamellera)


Una vegada más, tornamos pal oriente y nesta ocasión vamos facer una travesía pente los conceyos de Cabrales y el Valle Altu de Peñamellera. El nuesu puntu de partida va ser n'Arenas y percorreremos el cordal de H.uanrobre hasta'l pueblu de Cáraves nel Valle Altu, ascendiendo al picu'l Forcáu'l Cuernu.

Como siempre que vamos pa Cabrales, garraremos l'autovía del Cantábricu hasta Posada de Llanes onde tomamos direición a Cabrales al traviés del Altu d'Ortigueru, pa llueu baxar a los pueblos de Canales, Carreña, Poo y a la fin Arenas, onde magar del trasiegu de coches ente pueblos, almorzamos nel café Cares.

Semeya de "semi grupu" caleyando col cordal de H.uanrobre detrás

Namái que tamos preparaos, salimos carretera alantre pel pueblu, hasta la ponte que crucia'l Cares, onde unos metros enantes desviámonos a la manzorga per una pista que xube hacia la escuela d'escalada de las Cábadas o como ye nel nuesu casu ensin xubir tanto, siguiendo paralela penriba la carretera hacia'l cordal de H.uanrobre.

Avanzaremos cómodamente cola vista puesta nes primeres cabeces: Cerréu y H.uanrobre, les cuales nun serán oxetivu nel día de güei, poro siguiremos cruciando'l Vau Ranu, pasándonos hacia la fastera sur d'esti cordal xubiendo desnivel penriba'l Cares y de la carretera que va al so llau.

Xubimos hacia la faldera sur del cordal pel Costazu

Xubiremos hasta les cabañes del Costazu, onde pocu dempués entamará un camín empedráu, que gana en guapura pali pali, dándonos vistes a un camín colgáu preciosu al que paez querer sumase'l día, qu'entamó murniu pero va tornándose soleyeru nel intre.

Caún al so ritmu, vamos ganando tarrén al monte, faciendo esta primer parte de la ruta, pelín lenta por mor de los continos parones a quitar capes y capes de ropa. Al prestosu camín colgáu sol Cares, vamos amestá-y travesar barrancos como'l de Bazones, del que tenemos noticies que ye descendíu pelos amantes del barranquismu y pel qu'atravesamos pel vau Bazones.

Travesamos dellos barrancos hasta l'ascensu final hacia Nava

Magar d'una nueva parada pa reagrupase nel vau del barrancu, siguimos agora hacia los ivernales de Nava, per un par d'amplies envueltes baxo'l Cantu La Cabreriza, pasando pel Rescañu y les cabañes de Prida.

Adientrámonos nes praderíes de Nava pel colláu Fresnéu (680 m), pa travesar per amplies y pindies praderes pente bones cabañes, munches d'elles en mui bon estáu, tanto que dan ganes de tener dalguna en propiedá y aprovechar los parés que cayen dende la Cabeza Turuecu, la Peña la Cuerzona y el nuesu oxetivu: el Forcáu'l Cuernu, pa una escuela d'escalada ablucante.

Xubimos pelos praos de Nava hasta'l colláu...

Siguiremos con calma, quiciás con calma fonda, ya que tenemos que baxar a xintar a Cáraves onde tenemos mesa acutada dende va unes hores, pero vamos pendiente de la madre d'Alberto, que pagó n'escesu un afoguín d'entamu de ruta.

Aportaremos al colláu Arnías a 809 m, onde parte del grupu baxará direutamente hacia Cáraves acompañando a Oliva, que nun taba pa más ascensos y los demás acometeremos la canal de la Colgaiza, curtia, pero tan pindia como guapa que tien de dexanos n'arista al Forcáu'l Cuernu.

Garramos la pindia canal de ... hasta l'arista final al picu'l Forcáu'l Cuernu

Con pocu más qu'esfrutar d'esta canalina, na que visitamos la guapa cueva que tien nel paré de la Peña Cuarzona, tirámanos dende'l Forcáu hasta'l cumal del Picu'l Forcáu'l Cuernu, coles solombriegues vistes de los tres macizos... que nun dieron munchu xuegu pa les semeyes.

Nel cumal de 973 m del Forcáu'l Cuernu

Nos 973 m d'esti picu y con casi 3 hores y media de ruta, dalgo más de lo camentáu, decidimos que nun podemos siguir caleyando cordal de H.uanrobre alantre, así que tenemos claru que tenemos que baxar lo más aina posible al senderu que vien del colláu La Robellá y más atrás del d'Arnías onde separámonos enantes.

Con vistes hacia la Pica Peñamellera, descendemos hacia la canal que baxa pente'l Forcáu'l Cuernu y la siguiente cota, la cabeza Navariega, col envís d'atopar una baxada afayaiza pa tol grupu. Por suerte, esta canalina de Camoreni sedrá perfeuta pa tal xera y enantes de danos cuenta del calor que tamos pasando ya tamos na fonte d'Artah.u, anque sólo sal refrescada Kíla o más bien entafarrada de barru prietu.

Atopamos una baxada afayaiza pela canal de ....

Casi finando tol agua que llevanos enriba, pasaremos baxo les cabañes de Casacá y per un senderu baxo unos paredones impresionantes, aportaremos al mayaín del Pandiu, xustu enfrente del pueblu d'Oceño.

Dende equí, descenderemos hacia Cáraves lo más apriesa posible, pasando penriba de la mah.ada la Poza y tirándonos hacia'l pueblu pel barriu de H.igares, aportando al coche magar de 5 hores clavaes de ruta.

Baxamos hacia Cáraves cola compaña de la Pica Peñamellera

En resume, cordal bien guapu que tendría de dar pa munches más rutes conociendo cumal tres cumal y cada requexu de H.uanrobre, pero que nesti día tuviemos qu'acortar p'algamar l'oxetivu cimeru, el Forcáu'lCuernu y tamién como non, metenos una farturina na Central nel pueblu de Niserias.

Xintando nel míticu chigre de la Central en Niserias

Como datos de la ruta, aparte de xintar perbien y tener mui bones vistes de Picos, tuviemos que caleyar 10.5 km neses 5 hores de ruta, superando un total de 950 ms d'ascensión acumulada, pente los conceyos de Cabrales y el Valle Altu de Peñamellera.

Camudando'l Camín pente Cabrales y el Valle Altu de Peñamellera

No hay comentarios:

Publicar un comentario en la entrada