miércoles, 18 de febrero de 2015

Vega Urriellu (Cabrales) - Torres Areneras - Frailón

9 de Setiembre de 2014

Track: Vega Urriellu (Cabrales) - Torres Areneras - Frailón


Munchos diríen que los años nun pasen de baldre... yo diría qu'hai que ser un montañeru xabaz, pa metese 5 díes de grandes ascensiones. Fernan, con los sesenta bien cumplios, aporta n'Arenas con dos díes d'ascensiones tremendes al Curavacas y Espigüete.

Yo, llevo sin catar alta montaña dende la Travesera, poro toi descansáu, pero pocu avezáu a caleyar per aéreos, a trepar ensín dengún mieu, a sentir les pates na llende de les fuercies y con esa musculatura fina que te dexen varios díes siguíos de monte.

Un día más salimos de los 1943 m del refuxu d'Urriellu

Con tal soba de monte, lo más normal ye tener un día más floxu de lo normal y nel primer día xubiendo hasta la Vega Urriellu dende Pandébano, ya tenía dalgún problema muscular, qu'anque'l día anterior na Torre L'Osu nun apaeció, nel día de güei tornaron les molesties casi dende l'entamu.

Ensin más, saldremos del refuxu d'Urriellu (1943 m) garrando'l camín davezu hacia la H.orcada Arenera (2280 m). Durante'l nuesu paséu tendremos la oportunidá de falar sele demientres acolumbramos tolos nuesos oxetivos, que nel intre paecen afayaizos anque con munchu respetu.

Ensín perder tiempu averámonos a la h.orcada Arenera (2280 m)

Restolando pela rede, la xente qu'intentó tola travesía, siempre venía dende Cabrones y facíalo garrando tol espolón qu'avanza dende'l h.ou del Agua hacia las Areneras. Nós, baxaremos al alcuentru d'esti espolón en direición al h.ou los Cabrones, pero ceo tirámonos per una rampla a garralu, anque se puede dir direutos dende la propia h.orcada Arenera.

Xubiremos peles pedreres hasta la parte más vertical del espolón, nel que dubiamos si xubir a la parte cimera per un canalizu a la mandrecha d'una morra o bordiala pela manzorga. Al final decidimos arrodiala pela manzorga, alcontrándonos coles ablucantes muries que cayen de los Albos.

Baxamos pel camín hacia Cabrones empobinándonos ceo hacia las Areneras

Nesti puntu, ye cuando a Fernan entren-y tolos temores. Nun s'alcuentra bien de la pierna, lleva molestándo-y tol día y la cabeza ta faciendo más dañu que'l pinchazu la pata inda. Poro, nun son les condiciones ideales pa llevar alantre una xera como la que teníemos pensáu.

Decidimos dir pasín a pasu, anque Fernan ya decidió que diba acompañame lo xusto y yo, ensín aida nun quería facer sólu un proyeutu conxunto de los dos. Asína que lo importante nel día, yera conocer bien too esti grupu d'Areneras-Albos. 

Delles vistes hacia grandes cumales de los Urrieles y el Cornión

Con otros oxetivos na tiesta, caún los suyos, ascendemos pel espolón nun tramu de trepe cenciellu hasta la segunda Arenera (2404 m), onde dexamos les mochiles y echamos un ratín tomando aliendu y acolumbrando cumales que tan cercanos nel tiempu y na distancia como'l Neverón d'Urriellu, Cabrones, Torre Cerredu, Dobresengros....

Dende los 2400 ms de la plana que ye la segunda arenera, restolamos como chiflaos p'alcontrar un accesu a la primer Arenera, la cual ye una torre preciosa dende la h.orcada, pero que dempués de dellos xubes-baxes ensín ver pasu... acaba tornándose como una espina d'eses que queda pa un bon tiempu.

Trabayamos l'ascensu a la segunda Arenera (2404 m) restolando'l posible de la primera

Y ye que si ya dixi que caún tenía los sos oxetivos nesti puntu de la ruta, Fernan yera facer compaña na ruta y yo faceme al menos coles piques Areneres. Pero, ensín la primera, ya dexó de tener sentíu facer les demás, asína que siguimos a la h.orcadina de pasu hacia les demás Areneras.

Ellí, dexo la mochila, magar de ver pasu bonu hacia la fastera oriental pal descensu d'esti pequeñu macizu y póngome a trepar a la tercera Arenera (2408 m) pal menos quitar un pelín el mal tastu a "fracasu" anque tar nel monte con un día asemeyáu ye siempre una tremenda victoria.

Apúntome pa la llibreta l'aéreu ascensu a la tercera Arenera (2408 m)

Como se vé nes semeyes que me fizo Fernan dende la h.orcadina... l'ascensión a esta tercer Arenera, ye dafechu una trepada continua, con un entamu d'arista estrechina, teniendo un final de terracéu, nel qu'abunda la peña pelín podre y tenemos qu'andar sollerte coles preses qu'usamos.

El tiempu que tuve nel ínfimu cumal, nun pasaría del minutu y coles mesme p'abaxo con más cuidáu si ye posible, ya que los destrepes siempre son piores que los trepes. Ensín más, baxé hasta Fernan, echamos comentamos un pelín la xugada y lo complexu casi de tar dos persones al empar nun cumal así y metémonos nuna fastera a la que-y teníemos munches ganes... la cara este del grupu Areneras-Albos.

Prestosu'l descensu pela fastera oriental d'Areneras-Albos... naide lu diría

Esta fastera que tantes y tantes vegaes vese dende los cumales de los Urrieles, caltien ñeveros colgaos y parez defechu intransitable, pero nun ye asína, teniendo una traviesa en baxada dende la h.orcadina pente las Areneras empobinándose hacia la base del Neverón d'Albu y d'ehí hacia'l llagu Rasu o hacia la Corona'l Rasu.

Tola traviesa faese ensín mayores problemes, teniendo un pasín con dalgo de patiu, pero sálvase perbien, siendo más la sensación que la dificultá... anque la cayida al Neverón del Rasu ye coyonuda, jeje.

Tirámonos al ataque del nuesu Frailón... delles vegaes miramos por conocelu

Al final, la traviesa pasa a ser un pedreru qu'ensin novedá, sacante echar una güeyada al ascensu a los Albos, pondranos na fastera del Rasu, onde diremos lo más direutos posibles al pequeñu-gran oxetivu del día... El Frailón.

Esti picu, anque nun llevanta demasiáu so les morres que poblen la Corona'l Rasu, sí que paezme importante pola so forma y el paré oeste que cuelga so'l Llagu'l Rasu, al que pa velu, tuviemos que baxar dende la cumera del Frailón hacia'l paré sacándo-y una semeya... borrosa pero semeya jeje.

Cume relaxada nel Frailón (2104 m)

Nesti cumal, nel que malpenes hai que trepar p'aportar a él y qu'anque paeza mentira ta nun llugar increyible, arrodiáu per grandes montes de los Urrieles, tuviemos media horina, xintando y falando de próximos proyeutos y de cuando tendríemos de tornar a pola integral de los Albos y Areneras.

Nun sabremos cuando tornar, pero sí que si lo facemos, tenemos de traer cuerpu y mente nes meyores de les condiciones posibles, asína como trastos p'asegurar al menos pa la primer arenera y pa la cuarta, la cual puede necesitar asegurar dalgún pasín nuna evidente chimenea.

Baxamos a la Vega Urriellu pela canal a la manzorga de la cresta'l Rasu

La baxada del Frailón, por non repetir pela brecha los Cazadores, decidimos facela descendiendo a la Vega Urriellu pela mesma canal pela que xubiéramos a la Cresta'l Rasu. Hai que dicir, que muncho meyor xubir que baxar per equí y que muncho güeyu ya que la pedrera ye mui inestable y la canal acaba en vuelu, sinon facemos travesía a la mandrecha cuando veamos que la cosa pónese mui pindia pa siguir baxando.

Con pocu más, aportamos al final del H.ou Lluengu, onde garramos delles siendes pela pedrera y travesamos dalgún h.ou qu'otru hasta'l camín que vien de la Corona'l Rasu hacia la Vega Urriellu, aportando al refuxu casi 6 hores dempués de que saliéramos pela mañana.

Escaecemos les penes con una cervecina nel refuxu de la Trenosa

Nesti tiempu de ruta ascendimos unos 775 m d'altor acumuláu y percorrimos 6,5 km anque tenéi en cuenta, que dende'l refuxu va quedaros más menos un hora y media hasta Pandébano y munchos más metros por baxar... que ya nin cuento de la cantidá de vegaes que lu ficimos jeje.

Con una cervecina de camín na Trenosa, despedíamos esti finde xenial de monte y tamién dicíamos hasta otra vegada collacios a esos numerables piquinos d'una mole tan guapa como xabaz y aérea, como ye las Torres Areneras y los Albos.

Hasta mui prontu....

Camudando'l Camín col retu pendiente... Travesía Areneras-Albos

No hay comentarios:

Publicar un comentario en la entrada