miércoles, 10 de diciembre de 2014

Travesera Picos 2013 - 2014

Del 5 al 8 de Xunetu de 2014

Track: Travesera Picos 2013 - 2014



Quinta Travesera Integral de Picos del GM Xuan de la Borrina y esti añu, nin el percorríu, nin les ascensiones, nin el calor fue'l mayor de los nuesos enemigos... el mal tiempu que sofrimos llevóse la palma.

Magar de cinco años faciendo traveseres, descubriendo nuevos caminos, albidrando posibles futures traveseres,... tenía que venir el mal tiempu pa fadiar un pelín les nueses andances montunes y aún así, como cada añu, fuimos a sacar alantre estaya tres estaya hasta completar de la meyor manera posible la nuesa Travesera 2013 - 2014.

La totalidá del grupu na Quinta Travesera

Esti añu salíemos de Sotres, col envís de facer un duru percorríu hasta aportar al refuxu d'Áliva, pero ya dende'l primer día, tuviemos que camudar los planes poles previsiones y meténos muncha pista hasta Piedra Llé, onde entamar les ascensiones del día.

Nel refuxu esperábanos, aparte de Fernan que renquiante d'una bronquitis fizo de mochileru, una de les mayores llocures cerveciegues que diónos llueu de dir de monte enxamás. Les rises nel refuxu y la cena quedará na memoria durante munchos años.

La cena del primer día nel refuxu d'Áliva

Al día siguiente la meteoroloxía ye más gafa inda y quedamos tan sólo Alberto y yo, mientres que Fernan y Bittor acompaña al restu del grupu hasta Sotres de nuevu, onde tuvieron tiempu pa vermús y dir xintar a la Central en Niserias (Valle Altu de Peñamellera).

Despidiéndonos tolos collacios a los valientes

Delles hores dempués, aportaríemos los dos Bertos a Cordiñanes, magar de muncha lluvia durante una primer parte de ruta y de topános col solín que caleciónos dándonos un final de ruta bien prestosu hasta la terraza del nuesu hostal en Cordiñanes onde dimos bona cuenta de frutos secos y cerveces hasta la llegada de Fernan y Bittor pa la cena.

En Cordiñanes faciendo'l robezu...

Al día siguiente, cola suma de Bittor a la Travesera, ficimos l'ascensión pela canal de Capozu, perguapa y dura canal, que por mor del día de lluvias anterior sumó-y una moyadura al nuesu cuerpu que'l fríu de Vegagüerta remataría, faciéndonoslo pasar pelín mal.

Fernan diría con nós hasta casi la H.uente la Farfada col envís de conocer Capozu, pero nun diba da-y tiempu a tantu viaxe en furgo, polo que retirose hasta Cordiñanes y munches hores dempués na Llampa Cimera alcontraríanos pa facenos compaña hasta'l refuxu de Vegarrionda, onde cenaríemos de luxu na más absoluta soledá.

Tercer día con Fernan despidiéndonos y dándonos la bienvenía nel nuesu fríu camín

L'úlitmu día, como non, tuviemos que camudar los planes y dexar les mios ganes de conocer llugares nuevos del occidental pa prau. El día alboreció borrinosu y ficimos tol camín hacia la Vega Enol baxo un orpín continuu, onde Fernan tenía la furgo.

El restu'l camín, fadríemoslo Bittor, Alberto y yo, con un tiempu más afayaizu, muncho más amable, pa nun acabar la Travesera de tanta mala llechi pa col Nuberu, el nuesu Xuan de la Borrina y tolos seres mitolóxicos que tienen que ver cola meteoroloxía n'Asturies.

De Vegarrionda a Cuadonga... final de Travesera

Una vegada más... dar les gracies a los collacios que participaron esti añu: Fernan, Bittor y Tito dende Euzkadi y Alberto, Natalia, Zori, Richar, Carlos, Cantarero, Haritz y Paulina dende Asturies. Espero que l'añu que vien volváis a animaros.

Como siempre, vamos dexar unos datos a mou resumen y les correspondientes entraes del blog (que diré escribiendo lo más ceo posible):

Estaya 1:
Sotres (Cabrales) - Áliva (Camaleñu - Cantabria)

Duración: 9 h
Llonxitú: 18.5 kms
Ascensu: 1500 ms
Descensu: 1025 ms



Estaya 2: Áliva (Camaleñu - Cantabria) - Cordiñanes (Valdión - Llión)

Duración: 7 h  y 40 min
Llonxitú: 15.5 kms 
Ascensu: 1040 ms
Descensu: 1895 ms

Estaya 3:
Cordiñanes (Valdión - Llión) - Vegarrionda (Cangues d'Onís)

Duración: 10 h y 30 min 
Llonxitú: 18.5 kms
Ascensu: 1990 ms
Descensu: 1440 ms


Estaya 4:
Vegarrionda (Cangues d'Onís) - ... - Cuadonga(Cangues d'Onís)

Duración: 5 h y 50 min
Llonxitú: 20. 8 kms
Ascensu: 520 ms
Descensu: 1745 ms


Totales:
 
Duración: 33 h
Llonxitú: 73.3 kms
Ascensu: 5050 ms
Descensu: 6105 ms


L'añu que vien tornaremos a Picos a la gueta d'otru percorríu enllenu de nueves esperiencies...

No hay comentarios:

Publicar un comentario en la entrada