viernes, 28 de noviembre de 2014

Tuíza Riba (L.lena) - Picu'l Siete

15 de Xunu de 2014

Track: Tuíza Riba (L.lena) - Picu'l Siete


Finamos la temporada montañera 2013-2014 con una ruta curtia, pero con ambiente alpinu y como non, pa estes caxigalines siempre ta presente'l macizu de Penubina, Asina que tenemos qu'averanos hasta'l pueblu de Tuíza Riba y fadrémoslo como ye davezu saliendo de Xixón y garrando l'autovía minera hasta Mieres del Camín, onde siguiremos hasta'l pueblu de Campumanes en L.lena, onde la verdá, nun m'alcuerdo si d'esta vegada almorzamos daqué o non.


Darréu tiramos pela carretera 8 de L.lena, pasando pelos pueblos de Sotiel.lo, Espineo, Los Pontones, Teyeo, Rospaso, Tuíza Baxo y a la fin entramos en Tuíza Riba, onde aparcamos el coche con vistes a la Penubina (1), el Cuetu les Cabres (2), Puerta d'Arcu (3), los tres Castil.linos (4, 5 y 6) y el Portil.lín Fonderu (7)...

Una vegada más salimos de Tuíza Riba (1200 m)

Dicen qu'esta mesma vista dende la parte llionesa o les formes de la so parea pudiera da-y'l nome al picu'l Siete. El casu ye que nel intre, nun somos a ver res de la so presencia, asina que toca xubir hacia'l Meicín pel camín davezu pa estes xeres.

Dexaremos el refuxu a la manzorga y siguiremos hacia'l val.le de Covarrubia, como lo ficiéramos na intentona anterior al Siete qu'acabó cola prestosa ascensión al Práu Capón conociendo'l Fuechu la Cabra y picándome enforma'l Cuetu les Cabres que dalgún día cayerá.

Los nuesos pasos pasarán pel Meicín pa siguir hacia'l val.le Covarrubia

Mentanto, siguimos ascendiendo per Covarrubia, poniendo'l güeyu nel nuesu oxetivu, el cual poquín a pocu déxase ver apaeciendo a la mandrecha de los tres Castil.linos. Aportaremos al colláu que da entrada al Fuechu la Cabra y ellí acolumbraremos la canal d'accesu a la base del picu'l Siete.

Ensin mayores problemes, xubiremos pel tarrén mestáu de peña y yerba, hasta alluganos xusto enantes de qu'entama un ñeveru curiosu. Si siguiéremos canal alantre aportaríemos a la nomada Pasada'l Siete, per onde paez ser que la sienda Les Merines llevaba'l ganáu hacia los Fuechos de Cuapalacios.

La mió primer intención yera conocer esta pasada a la baxada y tornar pela Forqueta'l Portil.lín, pero col ascensu al Siete, ya tuvieren abondo los collacios. El casu ye que topámonos con un espolón que baxa direutu dende la cumera del Siete y que va servinos pa trepar a la primer terraza del ascensu.

Ascendemos ensín pausa hacia'l col.láu d'entrada al Fuechu la Cabra


Tamos no que nómase como Les Cinches del Planón, que restolando toponímicamente y entrugando al collaciu Xose Lluis del Río, trataríase d'un términu que pudiera espeyar un sistema de terraces estreches, como ye nel casu... asemeyándose quiciás a les faixes aragoneses.

Ye curiosu, qu'una cincha aparte de p'amarrar caballeríes, ye la capa que queda apegada nel molín magar de la molición. Poro, al igual que la cincha de farina, la peña tamién suel escalonase en terraces hacia les cumeres de los montes.

De secute cola primer trepada, caleyaremos un ratín hasta una segunda terraza, la cual llibramos d'igualmente ensín mayores dificultaes, hasta qu'aportamos a unes llambries onde ponse'l tema pelín complexu.

Trepando les primeres terraces demientres quedo con Kíla


Equí, decido quedame con Kíla y dexar xubir al restu del grupu. Ye un tarrén podre y Kíla ye una perra mui nerviosa pa movese nuna fastera tan peligrosa de tirar piedres al restu'l grupu. Así que decido esperar a que xuban y baxen, hasta poder tener el turnu yo d'algamar el naguáu cumal del Siete.

Camiento que tien d'haber una ascensión más cenciella y tien de ser averándose a la forcada pente'l Siete y el tercer Castil.lín. Esto tendría de llevanos pente la primer y segunda terraza o pente la segunda y les llambries a desplazanos a la manzorga a la gueta d'un canalizu que xuba hasta la forcada en cuestión.

Esta ye la teoría, pero na práutica, el camín paez claro y la propia ascensión llévate a decidir xubir pela nuesa vía. Dende baxo, Kíla nerviosísima y yo, siguimos les distintes trepaes de los collacios hasta que dexamos de velos.

Con vistes a los Portil.linos y a los Castil.linos acudo al rescate


Separtaos per un tramu d'ascensión llargu, decido encordar a Kíla y facer un trepe controláu con ella hasta'l cumal, pero'l fracasu ye total... ye puru nerviu y eso de que la dexen atrás nun lo lleva, asína que decido restolar una ponte roca y atala pa dir ver que tal-yos va a los demás, ya que güelme esixente de más esta ascensión.

Cola pena enriba polos continos lloros de Kíla, qu'oyense en tol val.le del Meicín hasta Tuíza, trepo corriendo pel sistema de llambries faciendo les envueltes que considero llibrando pasu tres pasu, hasta un evidente diedru.

Xubo como un tiru tol diedru, intentando nun tirar muncha piedra suelto, hasta'l so final onde alcuéntrome con Pau, Zori y Richar que tan enriscaos a unes decenes de metros del cumal, baxo una llambria tumbada, pela que xubió'l guía del grupu nel intre, Diego.

Salímonos magar d'aportar a l'arista final a la fastera sur pa xubir andando hasta'l cumal

Nesti puntu, alcuéntrome con una situación pocu deseyada... tengo a tres collacios ensín saber nin xubir nin baxar, porque'l que-yos daba les indicaciones tiró p'alantre y nun miró si dalguien necesitaba aida de dalgún tipu.

Intento non enfadame y mando a Zori baxar hasta onde toi yo y acabo de xubir lo que quedaba del final del diedro envede hacia la mandrecha al cumal, empobinándome al contrariu y como non... n'arista alcuéntrome con un fitu como un camión y cola vía que vien de la forcada.

Nel intre, apaez Diego y diz que tira p'abaxo que tien priesa... maraviyosu. Nun digo más y sigo guiyando a los demás, hacia una sele y prestosa xubida bordiando hacia la fastera oeste del Siete. Dende equí namái tenemos de siguir los fitos y la casi autopista qu'hai hacia esti cumal preciosu de 2363 m.

Grandiosu cumal del Picu'l Siete (2363 m)

Tamos nel cumal del Picu'l Siete, preciosu... con vistes a los Picos del Fontán al norte y cola mole de Penubina al Sur, ambos xuníos por dos increyibles crestes.... ablucante. Facemos les semeyes de rigor, esfrutando del momentu y tiramos p'abaxo que tengo los llamentos y lladríos de Kíla metíos na oreya y tengo una pena tremenda.

Aún así, nun pueu baxar tolo apriesa que diba prestame, porque la baxada ye tan delicada como la xubida, poro vamos pali pali, guetando los meyores pasos posibles pa que'l grupu nun tenga dengún problema.

Como amuesa de los tiempos de xubida y baxada, dende Kíla hasta'l puntu d'enrisque de los collacios tardé 6 minutos en xubir y dende esi puntu mesmu hasta Kíla tardamos casi 45 min en baxar. Con esto quiero dicir, qu'hai que tar sollertes a la hora de llevar a grupos grandes... caún tien que llevar el so ritmu tanto de xubida como de baxada y ún de les coses más prestoses ye saber llevalos cómodos y sin que pasen mieu... pero esto supón un aumentu de los tiempos d'actividá pergrandes.... y hai qu'asumilu así.

Semeyes na baxada que dan amuesa de lo vertical del destrepe

D'otra miente... ún de los alcuentros más guapos que tuve na mió vida con Kíla fué equí, cuando nos vió llegar tenía una especie d'enfadu por dexala ellí atada y allegría por venos... fue mui divertíu ver esi amiestu d'emociones, jeje.

Toos xuntinos... siguimos camín, colos dos destrepes de les cinches hasta aportar a la entrada del Fuechu la Cabra, onde abellugámonos tres d'una peñona a xintar con tola tranquilidá del mundiu, ya que'l día anque frescu pol vientu, diba aguantar de luxu hasta'l final de ruta.

Facemos el restu la baxada sanos y salvos coles vistes de compaña

Magar de la xinta... baxamos con munchísima calma, ya que Zori y Pau, taben tan contentes de l'ascensión al Siete, que baxaron charrando tol camín, parando cada 5 pasos y fízosenos a Richar y a mí la baxada eterna hasta la cerveza naguada nel refuxu del Meicín.

Dende equí, baxamos hasta'l pueblu de Tuíza Riba, hasta completar les casi 9 hores de ruta, anque hai que restá-y unes dos horines de xinta y cerveza y sería d'igual mena xubir con calma, pa percorrer los casi 9 km de camín y los 1240 ms de desnivel acumuláu.

Que vos preste!!

Camudando'l Camín nel Siete

2 comentarios:

  1. Pues pa finar la temporada escoyisti un cumal peciosu. El Siete ye un de los picos que más me presten d´Ubiña. Amás, esa trepaduca final pa algamalu, dai un plizcu más. Lo malo ye si esi plizcu ye la diferencia ente esfrutalu y sufrilu. Po lo menos nun pasó nada y quedó nun sustu que llueu tórnase en más emoción pol cumal conseguíu. ¿Que non?.
    Un saludu

    ResponderEliminar
  2. La verdá que paecióme un cumal ensín demasiada complicación... pero'l fechu de xubilu siempre da milenta posibilidaes... de que seya cenciellu de que complíquese enforma... como bien dices... eso ye lo guapo del monte.

    Un abrazu

    ResponderEliminar