jueves, 10 de octubre de 2013

Tene (Quirós) - L'Airúa

22 de Setiembre de 2013

Track: Tene (Quirós) - L'Airúa


Primer ruta de la temporada 2013-2014 del GM Xuan de la Borrina, y como les que teníemos dientro del calendariu pa esti añu, al final nun podíen facese, por faltar dellos miembros del grupu, hubo qu'echar un vistazu a la bloguería montañera astur.

Y como non, ún de los referentes, ye'l collaciu Cienfuegos, que púsome a güevu una rutina, lo xusto pa dempués dir a xintar per ehí... L'Airúa nel cordal de Tene. Pa ello, vamos xuntanos esta vegada un grupu raro polo nuevo, ya que de los miembros del Xuan de la Borrina, tan sólo tamos Pau y yo.

Salimos de Tene (659 ms)

D'esta miente, fadremos el total, Berto y Natalia, que dempués d'entamar a esguilar con nós, tamién quieren prebar cola montaña, Ana collacia de Natalia, Zori y Richar, que ya ficieren con nós, un par de rutes l'añu pasáu y esti añu, entren nel grupu y Marcos, un rapaz de Zamora al que-y presta la montaña y contautó con nós pela web.

Colo que cuéstame a mí, la socialización, ehí tamos, toos nuevos menos Paulina, yo y Kíla, que ta de cumpleaños o cumpleañu o como dígase. Así que, como meyorar un cumpleaños, que llevándola al monte a correr... y paez que lu sabía, porque foi ablucante vela esfrutar pel monte... vaya enerxía.

Caleyando peles pindies pistes hacia la Mortera Tene

 P'aportar a Tene, tendremos que facer el camín davezu hacia'l valle'l Trubia, pela Y griega primeru y llueu la A-63 a Grau, hasta'l desvíu pa Trubia. Llueu siguimos camín parando en Proaza a almorzar, pa siguir hacia Quirós, por Caranga Baxo, pa xubir hasta Aciera, onde siguiremos unos kms hasta Tene.

A les 9 y media la mañana, taremos preparaos pa entamar a caleyar, y viendo'l día y les temperatures que tendremos qu'aguantar, escoyemos facer la ruta nel sen contrariu al que la fizo Cienfuegos. Asína, diremos a la solombra de la mole del cordal de Tene, durante gran parte de la mañana.

Siguimos xubiendo de la Mortera d'Abaxu a la d'Arriba

Caleyaremos peles cais de Tene, hasta aportar a una pista que tien de llevanos hacia las Morteras de Tene. En realidá, hai delles posibilidaes de pista y camín, p'aportar a elles, pero nós, siguimos hacia'l colláu col Picu Castiellu, aportando a la Mortera d'Abaxu.

Llueu, siguiremos, más pegaos a les parés de l'Airúa, xubiendo tamién ensín descansu hacia'l colláu Meanes, onde entraremos na guapa Mortera d'Arriba, la cual travesaremos penmediu'l valle, col envís de nun meténos na fastera de felechos y cotolles hasta lo más arriba posible.

Salimos hacia la panda final de L'Airúa

Anque esto será inevitable y finalmente, restolando pente los felechos diremos alcontrando senderos, que tienen d'empobinanos a unes peñes, pente les que pasaremos en mou escaleru, pa upanos a la panda final que tien de llevanos hacia'l cumal de l'Airúa.

Les vistes nesti puntu del día, son ablucantes, con tola fastera centru-occidental d'Asturies a los nuesos pies, y tolos cumales de L'Aramo enfrente nuesa. Tamién somos albidrar, baxo una ñeblina, munchísimos cumales dende'l macizu de Penaubina, hasta picos más llonxanos como'l Cornón en Somiedu.

Aportamos al cumal de L'Airúa (1421 ms)

Finalmente, dempués de 2 hores y media de camín, encumamos los 1421 ms de l'Airúa, el cual dexónos tar bien pocu enriba d'ella, por mor de milenta mosquines, que facíen imposible tar enriba d'él. Tamién, una mastina al cargu de delles cabres, ficiéronmos colar a un cumal oriental pelín más baxo, onde pudimos picar daqué y descansar.

Semeya de grupu con parte de L'Aramo detrás

Magar del descansu, que xente menos avezada al monte, necesitaba, siguimos camín, ya que la intención de xintar en dalgún llau, facíenos entainar un pelín na baxada, anque col día que facía, daba casi pena, nun tener un bocata y tar más relaxaos nel monte.

Baxamos hacia Les Piedres col envís d'aportar a la Xanzana

Así que, dexaremos esti cumal, y baxaremos direutamente hacia'l colláu Les Piedres, onde decidiremos baxar a una especie de canal amplia, La Xanzana, envede hacia'l Pandu La Mortera. La razón nun foi otra, qu'intentar ganar tiempu al dir más direutos.

Anque como yera d'esperar, tanta xente y un tarrén un pelín más esixente na baxada, fai que perdamos munchu tiempu, lo que sumáu al calor col que golpiaba'l sol, fízose qu'esta baxada hasta la riega la Remedina, fuera llarga, llarga. 

Facemos una llarga baxada hacia Bramonte

Algamaremos la riega finalmente, por Bramonte y dempués de pasar pola Paraxina, xubiremos ya per pista, poles cabañes de la Llinariega, hasta topános con una amplia pista, que vien dende'l Pandu la Mortera. Taremos pocu tiempu por ella, ya que al llau d'una cabaña, baxaremos per un camín, que va meténos nuna viesca bien guapa.

Siguimos un ratín per pista dexando atrás tola baxada pola Xanzana


Por suerte, la viesca va danos la solombra que necesitábemos y paez qu'aguántase meyor, ya que tamos a más de 30 graos. Paez mentira, qu'en Setiembre soportemos estos calores, pero como'l tiempu anda un pelín a la so manera, pues toca aguantáse.

Travesaremos en baxada una guapísima viesca na Llinariega

Del senderu pente la viesca, baxaremos hasta cruciar la riega la Remedina. Hai que dicir, qu'en dalgún puntu, toca trepar penriba d'unos cierres, que paecen más bien, barricaes qu'otra cosa, pero bono, ye lo qu'hai munches vegaes nos pueblos... piésllense caminos comunales envede caltenelos en condiciones.

Garraremos la guapa sienda Las Bobias que faldea la mole de L'Airúa hacia Tene

A la fín, algamaremos la sienda Las Bobias, dexándonos pesie'l calor, con un tasto perbonu. Durante tol percorríu d'esta sienda, les vistes hacia L'Aramo, la Peña L'Alba, Bermiego, y más tarde la xerra'l Gurrión y el cordal de Caranga, son una maraviya.

Preciosa vista de Tene col cordal de Caranga detrás

Con munchísimu calor, acabaremos de da-y la vuelta a la cuchiella que ye'l cordal de Tene pal sur, y con delles duldes, siguiremos sienda alantre hasta topános con una pista que ya baxa a empatar cola mesma qu'usamos pa xubir hacia la Mortera d'Abaxu.

Baxamos hacia Tene per pistes con un calor agobiante

Pel camín, Kíla que llevaba un día increyible de carreres ensín xacíu pel monte, decidió dase un bañín nuna fonte, lo cual dexónos pelín envidiosos de ser perru. Pocu más, quedaba qu'acabar la mesma baxada hasta'l coche, aportando a Tene magar de 5 hores y media de ruta.

Nesti casu despedímonos de Tene hasta otra

Al final, aportamos a los coches a les 3 de la tarde, con 11,3 kms nel cuerpu y un desnivel acumuláu positivu de 910 ms, lo cual nun ta nada mal, siendo gran parte del grupu nuevu en Xuan de la Borrina y dalgunu na montaña en xeneral.

Y lo que nun tuvo nada mal, foi qu'en San Andrés de Trubia, a les 4 la tarde, ensín alcontrar dengún llugar onde xintar, casi por casualidá diéronmos y tratáronmos estupendamente, pudiendo fartucanos na terraza de Casa Santi.

Bon entamu temporada....

Kíla faciendo un añín... Camudando'l Camín

4 comentarios:

  1. Xuan de la Borrina revitalizándose y ampliándose. Dentro de poco habrá que alquilar autobús para hacer las salidas.
    Ese monte tengo que apuntarlo para los centenarios astures que lo tenía desconocido.
    Buen empiece del año, por poco sin comida que era lo principal.


    Saludos a todos los nuevos.

    Un abrazu.

    ResponderEliminar
  2. Xusto eso, ye lo que quiero que nun pase, jajaja. Vémonos Fernan, a ver si acabáis el centenariu y tenémoste per equí más a menudu.

    Un abrazu

    ResponderEliminar
  3. Gracies po lo que me toca, je, je. Cume piquiñina, pero muy guapa y afayaiza pa un viaxe curtiu y prestosu, ¿o non?. El tramu la sienda les Bobies a mi parecime guapu abondo.
    Un saludu

    ResponderEliminar
  4. Home Javi... la cume nun destacará polo que tien al llau pero por vistes y pola sienda las bobias bien paga la pena... mui guapu too la verdá

    ResponderEliminar