lunes, 23 de septiembre de 2013

H.ou Los Cabrones (Cabrales) - Cumales del H.ou Cerredu

11 de Setiembre de 2013

Track: H.ou Los Cabrones (Cabrales) - Cumales del H.ou Cerredu


Pues equí tamos, nel refuxu del H.ou los Cabrones, y dempués d'una llarga xornada no montañeru, cola Canal del Agua y no cautivu, por mor del mal tiempu nel refuxu, tamos en dimposición de salir a patiar dalgo nuevu nesti requexu de Picos.

Partimos dende'l H.ou los Cabrones (2042 ms) nun día mui fresquín


De lo primeru que dámonos cuenta, ye que fai un día espeyáu pero mui fríu y tenemos un vientu, que nun presta res, pa les nueses intenciones. Poro, anque ya lu teníemos casi decidíu, camudamos los planes y vamos facer una xornada de colección de cumales,... los del H.ou Cerredu.

Xubida al colláu del H.ou los Cabrones (2753 ms)

Pa ello, xubimos hasta'l colláu del H.ou de los Cabrones, camín que conocémoslo del ascensu al Torrecerredu, y la verdá ye que col tiempu nun meyoró, jeje. Asína que toca, xubir pel mediu pedreru, mediu areneru hasta'l colláu de 2753 ms que domina'l guapu h.ou de los Cabrones.

Del colláu de Cabrones pasamos al de H.ou Cerredu con vistes a los oxetivos

Nesti colláu, despedirémonos del perguapu paré d'una de les Aguh.es de Cabrones y saludaremos al enorme tamién, H.ou Cerredu y los cumales que lu formen: Torre Cerredu, colos sos acompañantes (Labrouche, Saint Saud y Peña Bermeh.a), la Torre Coello, el Tiru L'Osu, el Picu Boada y el Cuetu la Párdida.

Averámonos a la base del Torrecerredu travesando dalgún xeleru

De toos estos, sacante les aguh.es de Saint Saud y Labrouche, fáltenmos Coello, L'Osu y Boada, asína que travesaremos el xeleru que da pasu a los canalizos de xubida a la base del Torrecerredu. Digo xeleru y non ñeveru, porque yera increyible lo peligrosu y duru que taba a esta hora de la mañana.

Faldiamos el Torrecerredu y la Peña Bermeh.a

Como dixe, xubiremos pel mesmu camín del Torrecerredu, pero aína desviarémonos pembaxo de la Peña Bermeh.a, empobinándonos pel graderiu hacia la Collada Bermeh.a. Nesta collada, que nun conocíemos vamos tener grates sorpreses, como ye ver un senderu que xube dende Dobresengros y tamién les vistes de la fastera'l Llambrión y de la Peñasanta Castiella, lluchando coles ñubes.

Aportamos a la collada Bermeh.a (2475 ms) con vistes al Llambrión y la Peñasanta Castiella

Con dos hores y media de camín, entamamos a la fín, col nuesu primer ascensu, a la escombrera de la Torre Coello. El nome de Coello, viene-y del cartógrafu Francisco Coello, no que nos toca, nun voi un picu mui agradable de xubir, por mor de la inmensidá de piedra suelto.

Dende la collada, nun queda otra que xubir pel pedreru que ye la Torre Coello

Aún así, a una cota de 2583 ms, nun se-y puede quitar importancia, y fuimos xubiéndola pela fastera norte, metiéndonos un pelín hacia'l Este, pa salvar otra pequeña cume, enantes de ganar la más alta y aérea, na que nun podíemos meneanos de más, porque toles piedres del cumal nun yeren a tar quietes.

Cumal de la Torre Coello (2583 ms)

Nun tamos muncho nel cumal, ya que tamos xelaos, y baxamos pela cresta hacia'l siguiente y más guapu oxetivu, el Tiru L'Osu. Hasta'l nome del picu ye munchu más guapu que'l Coello, asína qu'albidrando una ascensión más difícil, dexamos les mochiles onde nun tirase l'aire y ponémonos a ello.

De primeres, trepamos y destrepamos pela cresta, hasta que tenemos que llibrar un espolón, pela fastera'l H.ou Cerredu, pa siguir dempués una vira h.itada, que va dir faciéndonos llibrar l'aérea cresta hasta la mesma cara Este que cae a pinchu a la h.orcada d'Arenizas Altas.

Preciosa ascensión al Tiru L'Osu... con increyibles vistes

Dempués del vistazu al vacíu, tan solo tendremos que trepar unos metrinos hasta'l cumal del Tiru L'Osu de 2569 ms. Esti picu, si que nos prestó pola vida, tolos trepes pembaxo l'arista foron con bona roca y esfrutamos de cada pasu que ficimos.

Les vistes, nun yeren nin meyores nin piores que les de Coello. Equí ganábemos hacia la Vega Urriellu y Peña Vieh.a, pero perdíemos la enormidá del Hoyu Grande y de la canal de Dobresengros, anque como dixe, por otres cuestiones ganaba'l Tiru L'Osu a Coello.

Tiru L'Osu (2569 ms) con fríu y vientu

Encamentando que ya nun díbemos facer namás, ya que baxar hasta'l h.ou y xubir a Arenizas Altas pa dir pol Picu Boada, diba ser una paliza, decidimos dir hasta les mochiles y picar daqué. Pero de la que baxamos del Tiru L'Osu, alcontrámonos con una sienda que penriba d'una de les terraces que forman esti picu, diba casi ensín perder altor hasta la h.orcada.

Magar de comprobalu nun llibru y xintar dalgo nes mochiles, tornamos hasta la vira d'ascensu al Tiru L'Osu y baxamos pel pedreru anterior a esta, pa ganar esa sienda que viéramos fai unos minutinos. Más menos, nun tuviemos nengún problema, pa movenos al traviés d'estes terraces, anque tuviemos que baxar demás pa llibrar un ñeveru vertical.

Facemos una preciosa travesía pembaxo les muries del Tiru L'Osu

Con cincu hores y cuartu de ruta, dexamos les mochiles al solín na h.orcada d'Arenizas Altas. Tamos más fartucos del vientu que cansaos, y tenemos ganes esta vegada de llegar ceo al refuxu, pa poder xubir hasta la collada L'Agua y contautar cola xente, ya que l'orbayu de la nueche anterior nun mos dexó nin salir un segundu.

Aún así, echámos-y un vistazu al Picu Boada, y vamos dir a por él, ya qu'inda tenemos tiempu de sobra. Dende la nuesa posición, despedímonos tamién de la Torre Labrouche, que tuviera durante'l día munches papeletes pa ser de la partida inicial.

El Torrecerredu y el Picu Boada dende la H.orcada d'Arenizas Altas

Nesti casu, afitamos la mirada, nel Boada y nel guapu hombru que sal hasta una cota inferior d'esti. El nome de Boada vien d'otru cartógrafu, el que fizo'l primer mapa del macizu Central y como siempre, paez ser que presta más poné-y nomes de persones a los Picos que'l que fuese'l tradicional.

Xubimos al pedreru que ye'l Picu Boada

El casu ye que, tirámonos ensín mochila a pol picu Boada, y de primeres trepamos un pelín a una pequeña morra, pa llueu siguir tola cresta hasta una especie de canal o pedrera, que llibrándonos de los desbentíos hacia'l H.ugu Sin Tierra, llevarános hasta la trepada final al Picu.

Esta trepada faise meyor pol centru, que pola mandrecha ya que nel segundu casu, ye peligrosu averáse hacia'l vacíu, al tar munches de les peñes mui inestables. Asína qu'anque paeza más importante'l pasu pol centru, ye munchísimu más seguru.

Nel Picu Boada de 2518 ms


D'esta miente, upámonos a la cabera cume del día y a los sos 2518 ms, los cuales dánmos la meyor de les vistes al oxetivu del día siguiente, que nun ye otru que'l picu Los Cabrones. Les dos y cuartu la tarde, paeznos perbona hora pa xintar daqué más curiosu y baxamos hasta las Arenizas Altas pa descansar un ratín.

Intentamos nun miralu demásiu.... Cabrones

Dende equí, namás que quedábanos baxar con tranquilidá pela pedrera que ye l'accesu a esta h.orcada dende'l H.ou Cerredu y travesalu con calma, pa tornar a xubir hasta'l colláu Cerredu y d'ehí empobinanos dende'l de Cabrones hacia'l refuxu del H.ou de Cabrones.

Nesti casu, les miraes aparte de pa Cabrones, desviáronseme claramente hacia toles cumes de los Picos de Dobresengros y tamién hacia la enorme covacha qu'hai na so base. Dalgún día tocará visitar dalgunes d'elles, pero pel momentu, paez que van resistiéndose.

Baxada dende Arenizas Altas (2416 ms) hasta'l refuxu de Cabrones colos Dobresengros

Finalmente, aportaremos de nuevu al refuxu de Cabrones, a les 5 la tarde, faciendo en total casi 8 hores y media d'actividá, na que percorrimos sele 8 kms y superamos 1000 metros de desnivel, que visto asína, paez que tan sólo tuviemos pocu más qu'un dia de descansu activu, jeje.

Llueu de nueche, tocaríanos sofrir un refuxu enllenu xente y con ciertu aire de xaréu finu, por apaecer per ellí, tol grupu d'integrantes del programa Mochileros. Yera tal el barullu que nin siquiera hubo oportunidá de falar con Camilo... al día siguiente xubien al Torre Cerredu y paez ser que teníen que preparar la hostia de coses...

Nós ya teníemos abondo con tar tranquilos y descansaos pa lo nueso....

Camudando'l Camín col Torrecerredu
Nesta ruta ficímonos con 3 dosmiles cabraliegos, pertenecientes al club 111: Torre Coello (2583 ms), Tiru L'Osu (2569 ms) y el Picu Boada (2518 ms)

Ver progresos en: Retos montañeros

4 comentarios:

  1. Va munchos años, cuando ficimos el Torrecerru por primera vegada, ficimos tamien la Bermella y el Coello. Quedamos con ganes del´Osu, empero nun sabiemos muncho de´l. Sigo con ganes de facelu. ¿Cómo ye?. Pa un caleyeru como yo, que esguilo lo xusto para engolame en picucos nun muy jodios.
    Un saludu.

    ResponderEliminar
  2. Pues realmente paecióme fácil, vimos h.itos na vira que comento y llueu úsense les manes pa dir avanzando pero ensín pasos nin de II grau.

    Supongo que viniendo dende'l H.ou directamente, será una taréa pelín abegosa polos pedreros hasta la vira, pero dende'l colláu col Coello, ye cenciello.

    Y mui guapu'l picu, de los 3 el más guapu d'esi día

    ResponderEliminar
  3. Todas las cimas del H.ou Cerredo hechas, solo queda Labrouche, bueno y Saint Saud también, Claro¡¡
    Ya las haremos¡¡¡

    Un abrazu.

    ResponderEliminar
    Respuestas
    1. Eses dos cimes, a facer en un día llevando dalgun trastu y tal, taría xenial. Queda pa otra... anque la próxima creo que tendrá que ser facer dalgo potente nel Cornión o que?

      Eliminar