lunes, 15 de julio de 2013

Travesera Picos 2012 - 2013

Del 6 al 9 de Xunetu de 2013

Track: Travesera Picos 2012 -2013


Cuarta travesera integral de Picos del GM Xuan de la Borrina y una vegada más, vamos conociendo un pelín meyor esta brutalidá de sistema montañosu y tamién vamos conociéndonos a nós mesmos, como montañeros, coles coses bones y males.

Y ye que cuando estudiamos un percorríu pa la Travesera, hai qu'albidrar per adelantáu lo que vamos sofrir, onde vamos meténos y en qué condiciones vamos tar pa cual o tal día. El nuesu maxín, camiento que diseñó pa esta Travesera unos oxetivos enforma ambiciosos y la propia montaña foi la que púsonos nel nuesu llugar.

Sicasi, nun too va ser coses males, por nun cumplir lo que teníemos na tiesta. Les meyores noticies, vinieron de la capacidá d'adautase a planes B ya inclusu C, y sobromanera a la capacidá de sofrimientu, nunes condiciones perdifíciles con munchísimu calor y munchísima ñeve, muncha más de lo camentáu.

Tolos participantes de la Travesera 2012-2013 con Monchu, Esther y Luis

Otres grandísimes coses positives, foi la cantidá de xente que fuimos axuntanos, animándose la nuesa estaya muyeriega, a conocer Picos un puquiñín, faciendo los dos primeros díes, dos rutes alternatives con Pangua
como guía.

Rebe y Pau, ficieron dos díes de perbona montaña, saliendo el primeru dende los Llagos pa xuntase con nós nel refuxu de Vega d'Ariu, pal siguiente día, ascender a la Peña'l H.ultayu y baxar pela canal de Trea amosando una fuercia pergrande.

Nin que dicir, que llueu d'esta llarguísima baxada, tuvieron que caleyar los 13 kms del Cares hasta'l coche, lo que amiesta a lo anterior una dureza descomanada. Aún así, camiento qu'escaeciendo los momentos duros quedáronse colos meyores y esfrutaron de lo guapo y de lo duro de Picos.

Rebe y Pau, descansando en Caín col Cares

El restu'l grupu, foi modificándose col avance de los díes. Los dos primeros díes, axuntámonos un bon garrapiellu, viniendo d'Euzkadi: Fernan, Bittor, Tito, Carlos y Ainara y per Asturies aportamos: Simón, Haritz y yo.

Unos tuvieron que retirase por lesión como Haritz, otros porque tocaba currar el Llunes y otros dempués de facer de guía na Travesera "B", amestáronse al restu'l grupu como Pangua... el casu ye qu'esti añu, fuimos a dar fin a esta Travesera, 5 persones, faciendo'l record de tolos años: Fernan, Bittor, Tito, Pangua y yo.

Cellebrando'l final de la Travesera 2012-2013 en Bulnes

Ensín más... dar les gracies a los participantes: Rebe, Pau, Haritz, Carlos, Ainara, Pangua, Bittor y Tito y a los entamadores, Fernan y yo, pues na... que ya tenemos la próxima na tiesta y qu'esperamos tener a xente qu'acompáñenos pelos distintos macizos de Picos.

Como siempre, vamos dexar unos datos a mou resumen y les correspondientes entraes del blog:

Estaya 1:
La Molina (Cabrales) - Casañu - Cantón del Texéu - Vega d'Ariu (Onís)

Duración: 10 h y 20 min
Llonxitú: 15 kms
Ascensu: 1710 ms
Descensu: 475 ms



Estaya 2:
Vega d'Ariu (Onís) - Torres de los Cabrones - H.errera - Caín (Valdión - Llión)

Duración: 10 h y 55 min
Llonxitú: 12,5 kms
 
Ascensu: 910 ms
Descensu: 2040 ms

Estaya 3:
Caín (Valdión - Llión) - Cares - Ría - Piedra Bellida - Cerredu - H.ou de los Cabrones (Cabrales)

Duración: 10 h y 30 min
Llonxitú: 12 kms
Ascensu: 2245 ms
Descensu: 645 ms


Estaya 4:
H.ou de los Cabrones (Cabrales) - Cuetos del Trabe - Amuesa - Bulnes - Texu - Poncebos (Cabrales)

Duración: 9 h y 30 min
Llonxitú: 14 kms
Ascensu: 450 ms
Descensu: 2245 ms


Totales:

Duración: 40 h y 25 min
Llonxitú: 53.5 kms
Ascensu: 5315 ms
Descensu: 5805 ms


Más nada, pal añu que vien siguiremos inventando percorríos per Picos...

8 comentarios:

  1. El año que viene un seismil. Por lo menos.

    Saludos y agradecimiento a todos los participantes.

    ResponderEliminar
    Respuestas
    1. Comparáu con otros años, al final el desnivel acumuláu nun foi tantu... pero les condiciones... ficieron lo que pasasemos pior que los otros años quiciás.

      Travesera rara, rara

      Eliminar
  2. Respuestas
    1. Gracies... diremos amosándola poquín a pocu

      Eliminar
  3. Tito:Dar las gracias a todo/as por estar y disfrutar de picos.Espero que Aritz este bien.Nos vemos pronto en otra.Saludos

    ResponderEliminar
    Respuestas
    1. Espero vete na del añu que vien Tito. A ver si hai suerte y hai un pocu menos de calor... vaya travesera

      Eliminar
  4. Solo decir que fue de las 3 que hice (parciales) en la que más sufrí. pero ya espero por la del año que viene. Eso sí, estoy sancionao en casa hasta ochobre.

    ResponderEliminar
    Respuestas
    1. Tuve que ser el calor... nun foi nin de percorríu más duru, nin de desniveles más duros que les otres. Esto téngolo claro.

      Aún así... l'añu que vien más, jeje

      Un abrazu

      Eliminar