jueves, 4 de abril de 2013

Santibanes de Murias (Ayer) - Picu La Boya

3 de Marzu de 2013

Track: Santibanes de Murias (Ayer) - Picu La Boya


Son les 10 y venti de la mañana, cuando tamos charrando con un guah.e xixonés de nacencia pero con alma ayerana. Ye ceo pa tar espiertu y más pa tar tirando boles de ñeve a unos montañeros ya intentando que Kíla nun-y lladre por tirales.

Pero al que-y presta'l pueblu, présta-y. Esti rapaz aparte d'amenizanos un pelín los preparativos, acompáñanos nos primeros pasos pel pueblu de Santibanes de Murias, en direición al entamu d'esti pol qu'aportamos pela AE-3.

Salimos de Santibanes (706 ms) dempués de charrar col nuesu guía llocal

Atrás quedaron los kilómetros dende Xixón. L'Autovía minera dió pasu en Mieres del Camín a la A-66, pa salinos na As-112, siguiendo'l ríu Ayer, hasta entrar nel conceyu del mesmu nome na Estrada, pasando dempués por al llau de Caborana y metíendonos a almorzar en Morea.

Magar de los cafetinos, tomaríemos la AE-3 pa conocer el val.le del ríu Nigru, pasando por Güeria, La Polea, La Maravilla, Samiguel, Pumardongo, La Corralá, La Fistiel.la, Murias y a la fín, Santibanes de Murias. 

Baxamos pela carretera pa garrar un camín hacia'l ríu Nigru

Como dixi enantes, despedirémonos del guah.e y pasaremos dende la ermita, pol barríu del Conchéu, hasta topanos cola pista que pol Arganón, baxa a cruciar el ríu Nigru, al llau d'una destartalada caravana, con milenta caballos na rodiada.

El mal rollu ye evidente, poro, cruciamos la ponte a toa mecha y entamamos a pisar la ñeve peles envueltes del camín, que fadránmos xubir con un bon desnivel hacia la fastera de Sesetas, onde hai delles cabanes, a les que paecen dir otros montañeros a los qu'alcontramos.

 Munches envueltes poles Sesetes hacia'l L.lano

Poquín a pocu, l'altor de la ñeve faíse más importante y al rápidu avance (nuna hora llevamos 3,4 kms y casi 300 de desnivel, dempués de baxar casi 150 ms) col esfuerzu que conlleva, tenemos qu'amestá-y agora lo duro d'abrir buelga.

Na rodiada los 1000 ms, la ñeve ye profunda y Pangua, que vien equipáu con marañones (acoyonante la llingua asturiana con nome pa les raquetes de ñeve, ver diccionariu l'Alla) ponse a la tiesta'l grupu pa facer menos penosu'l caleyar con tala cantidá de ñeve.

Con tal cantidá de ñeve unos xueguen, otros avancen y otros sufren, jeje

Onde vemos a les clares, la xabazada de ñeve qu'hai ye al aportar al L.lano, onde atopámonos con praos y cabañes, onde esta ye práuticamente a tapeceles, dándonos unes vistes blanquecines dafechu col picu Tres Conceyos a lo fonderu.

Demientres sofrimos, Kíla ta pasándoselo en grande cola ñeve, y nun pierde res de tiempu en fozar na ñeve virxe y abrir la so propia buelga. Vela esfrutar na ñeve, ensín pasar fríu por mor d'un día soleyeru ye una maraviya pa mi, ya que suelo tener que metela na mochila cuando véola pasando fríu.

L'avance ye cada vegada más difícil por mor de la cantidá de ñeve

Nós nun desanimámonos y siguimos ascendiendo siempre turnándonos p'ampliar la buelga de Pangua teniendo que descansar un pocu cada doscientos metros d'altitú ganada. El penúltimu descansu empobínanos penriba del Mayeu Carnusu, onde topamos otres buelgues que vienen d'otru camín dende Santibanes.

Quedamos ablucaos coles vistes dende'l Mayéu Carnusu

Ainda, nun somos a ver el nuesu oxetivu, pero nun podemos más que quedar ablucaos cola perfección y guapura de los montes d'Asturies baxo tal capa ñeve. De L'Esturbín, pasando pol Robequeras y Camperón, afitamos la vista nel Tres Conceyos, al cual aporta la xerra del nuesu destín, el Picu La Boya.

A la fín avanzamos hacia la xerra que tien de llevanos a la Boya col Aramo a la vista

Tenemos bien de ganes de metenos en plenu cordal de Carrocéu, y tiramos con fuercia hasta ganar la primer cumera. A partir d'equí, pa la nuesa desgracia, tenemos per delantre una bona tirada inda, anque la buelga del nuesu predecesor al que vemos aportar a la Boya anímanos a siguir alantre.

Lo malo, ye'l vientu qu'azota nel cordal, faciéndonos poner más capes de ropa y les pequeñes llombes que tenemos que superar, allugándonos un ratu nun colláu nel que protexíos del vientu, picamos dalgo en condiciones a unos 1490 ms d'altor.

Les vistes de L'Esturbín y compañía son ablucantes pero l'esfuerzu tamién

Llevamos 3 hores y cuartu de ruta pela ñeve y vemos un pelín más cerca l'ésitu. Poro, nun dexámonos vencer pol cansanciu y tiramos con xeitu, a pola cabera pala ñeve hacia'l cumal. Kíla, con sus 15 kilinos, esnala pela ñeve y viéndonos cansaos acércase a caún p'animanos unes vegaes y otres pégase una carrerina no más virxe qu'alcuentra.

Siguimos lluchando pela fonda ñeve ensín descansu

Asturies ta ñevada enforma y la visión de los altos d'Ayer y Casu, cola forcada que formen el Torres y el Valverde destacáu sobromanera, animen a siguir abriendo buelga. Por suerte, na pala final, paez que ventéo lo xustu pa nun necesitar crampones y nun fondase nella, poro facémosla aína, algamando el picu La Boya y otra gran semeya hacia'l macizu d'Ubina.

Apuramos los últimos metros hacia'l vértice y apaez el macizu d'Ubina

Poques vegaes esfrutamos tanto d'una ascensión, que sin nenguna dificultá, sacante del cansanciu del espesor de la ñeve, va danos tola guapura d'Asturies a acolumbrar. Nun mos vien otra cosa a la mente, que'l desatinu de los políticos asturianos, queriendo estrozar tol paisaxe astur con una rede llétrica per esta fastera.

Nótase, que nin la respeten, nin la conocen, nin siquiera son a esfrutala, ya que los modestos 1724 ms d'esti cumal, ufrecen una semeya de 360 graos, increyible de l'Asturies central y nós tenemos la suerte de conocela poquín a pocu, esti añu, metíendonos nestos requexos ayeranos.

Cellebramos el cumal del picu La Boya (1724 ms)

El fríu vientín que tira, fáinos escapar del cumal pa poder xintar con tranquilidá. Pero enantes sacámonos delles semeyes col mantu blancu, demientres echamos una güeyada Haritz y yo, hacia'l Cel.lón, el cual foi puntu d'aniciu na so amestadura al GM Xuan de la Borrina.

Les vistes de la cantidá de ñeve n'Asturies son una pasada

Magar, de votar si la baxada tien de facese pela mesma ruta o intentamos una circular, decidimos nuna votación axustada (ye lo que tien ser cuatru) baxar hacia'l colláu de la Cruz de Fuentes, onde a l'abrigu de los trabes de ñeve, xintaríemos dalgo.

Baxada hacia la Cruz de Fuentes

Asína lo facemos y en pocu más de media hora, tamos sentaos na ñeve xintando'l bocata y tolo que pillamos. Los díes ya crecieron y descansamos con tranquilidá a pesar de ser casi les 4 la tarde, poro venti minutinos ensín lluchar escontra la ñeve fainse d'agradecer.

Descansu merecíu tiraos na ñeve pa xintar

Magar de la xinta, siguimos baxando desnivel col envís, de dexar de pisar ñeve cuanto antes, pero tolo contrariu. La fastera pela que queremos baxar, ye un conxuntu de mayaos y cabañes, na que la ñeve afondó y l'espesor raspia'l metru dafechu.

Baxando penriba los mayaos de Fuentes

Nel intre, Simón alcuérdanos la decisión de baxar pel llau contrariu. Aún así, pasaremos al llau de la L.laguneta, de la cual intúyese namái la oriella y baxaremos a llargues zancaes pela ñeve hacia'l Sobatín, onde entamaremos a caleyar al altor de les muries que piesllen los praos y les cabañes.

Asina taba Asturies de ñevao

 Faíse perdifícil, decidir per un camín u otru, ya que les cabañes y mayaos del Sobatín y de la Escosura, tan separaes per caleyos pente les muries y escoyer el más afayaizu pa baxar lo más aína posible nun ye una xera cenciella.

Munchísima ñeve pel Sobatín y La Escosura

Facemos lo que podemos y con más o menos aciertu, descendemos desnivel, hacia la fastera de Cafornu y el Bundu, dexando siempre la riega y vallina de Queméu a la nuesa mandrecha, hasta qu'a la fín, vemos desaniciase l'espesor de ñeve y topámonos con una pista qu'a lo lloñe vemos que dará nes pontes del Beyu.

A la fín escapámonos un pelín de la ñeve viendo'l puente sola riu La Mortera

En tola baxada, casi nun falamos y caún al so ritmu va dando pasín tres pasu, hasta aportar a les pistes mineres que crucien la riega la Mortera. En L'Escalar travesamos el ríu y empobinámonos hacia Santibanes per una llarguísima pista qu'anque va facese pesada, el so percorríu casi llanu pol valle alantre, relaxará una migaya les pates de tanta baxada.

Llarguísima pista hacia Santibanes de Murias

Realmente si que ye pesada la pista, magar de 7 hores de ruta, poro ye dafechu prestosu poder acolumbrar un tabayón que con tres saltos baxa con fuercia dende'l Quentu los Cuayos. Aún así, el cansanciu fainos nun parar de más y en mou muñecu avanzamos sele pelos 4 kms de pista que tenemos per delantre.

Kíla, cansadina va tamién al pasu, hasta qu'alcuentra un güesu que-y sirve pa entretense durante'l restu del camín. Toi contentu por ella, sé que pasolu de luxu, ensín fríu, esfrutando pela ñeve y con pocu más de 5 meses, ye capaz de metese una ruta de 8 hores con una ñevada espeutacular. 

Últimu esfuerzu y topámonos cola guapa vista sol pueblu de Santibanes de Murias

Y ye qu'al final, dempués de pasar pol puente'l Beyu onde xúntense la Mortera y la Fresnosa pa formar el ríu Nigru, xubimos un pelín de desnivel p'aportar a Santibanes y finiquitar una ruta de 19.9 kms, 8 hores de duración y un desnivel acumuláu de 1356 ms. En resume, una bona paliza pero mui recomendable.

Al igual que n'arribada a Santibanes de Murias, ellí taba'l guah.e que diónos otru ratín más de conversación, entretuvo un pocu a Kíla mientres nos mudábemos de ropa y llevónos hasta'l hotel rural-spa La Estrella de Cuaña (bon nome montañeru), onde pudimos echar unes cerveces y convidar al rapacín a un refrescu.

 Camudando'l Camín nel Picu La Boya


Nesta ñevadísima ruta ficimos un vértice xeodésicu d'Ayer: el picu La Boya (1724 ms)

Ver progresos en: Retos montañeros

5 comentarios:

  1. Menuda bayura ñeve se ve en alguna semeya. Ties que mercar unos paraxones pa dir per ehí, que ensin ellos revientes. Nun conzoco l´altu el cordal pero vense unes vistes perguapes. A tenelu en cuenta pal iviernu que vien (o esti que nun acaba colar).
    Un saludu

    ResponderEliminar
    Respuestas
    1. Pues tien unes vistes bien curioses. Esti iviernu nun s'acaba nunca, entama a ser casi desesperante.

      Lo mesmu ties una bona oportunidá pa marañonear inda, jeje

      Un abrazu

      Eliminar
  2. Impresionante nevada, lo de este año ha sido una pasada, grandes nevadas y este último mes grandes lluvias que han dejado los ríos como nunca había visto yo, sobretodo los de Castilla y Extremadura.

    Y buena pañiza.

    Un abrazu

    ResponderEliminar
    Respuestas
    1. Esti añu ye increyible, pero tengo ganes de roca seca ya eh!! jeje.

      Un abrazu Fernan

      Eliminar
  3. Marañones, eh? Mola, apúntolo. Madre mía, qué nevadón.

    Por cierto, parez que la cosa ta parada pola crisis, pero por si acasu:

    SAMA VELILLA NON! NON! NON! NON!

    Tanto decían los cabrones de siempre que facía falta esa mierda infraestructura (acuérdeste del banzáu de Caliao, que yera "imprescindible"?)y afortunadamente volvió a vese la mentira. Pero ehí tan, dimitir nun dimiten... ¿pa qué?

    ResponderEliminar