viernes, 18 de enero de 2013

Xuntanza Asturvasca 2012-2013 (Euzkadi)

15 y 16 d'Avientu de 2012

Mes d'Avientu y por tercer añu consecutivu toca facer la Xuntanza Asturvasca (Eusko-Astur Biltzarra) 2012-2013, la cual diba llevanos a Euzkadi nun fin de selmana, del que como siempre, van quedanos na memoria mui bones alcordances.

Ya son 3 años, los que llevamos d'axuntances y l'anterior ficímosla n'Asturies: Xuntanza Asturvasca 2011-2012 na fastera central d'Asturies y más en concretu nos conceyos de Nava y Bimenes como campu base.

Semeya del caseriu

Los collacios vascos, teníenmos pa esti añu preparáu conocer un pocu la provincia de Gipuzkoa, saliéndose de la so querida Bizkaia. Anque, tampoco ye qu'afondásemos muncho na otra provincia ya que'l campu base nesti casu taría nel pueblu d'Elorrio en Bizkaia.

Sábadu 15 d'Avientu de 2012:

Espeutacular madrugón el que vamos metenos los astures, saliendo de Xixón a les 6 de la mañana col envís de tar pa les 9 en Basauri, pero enantes díbemos parar a tomar un cafetín a metá de camín más menos en Cantabria.

Colos más y los menos, que siempre tengo al entrar a Bilbo, somos a llegar a tomar otru café nes instalaciones polideportives de Basauri, onde recíbenos Fernan, Tito, Amaia, Juanan, Bittor, Oscar, Ibán y David.

Semeya de grupu n'Arantzatzu


Magar de delles vueltes y envueltes peles carreteres de Bizkaia, pasaremos per Elorrio y llueu Kanpazar, pa meténos n'Oñati y averanos al santuariu d'Arantzatzu, onde tienen una montada más gorda que la de Cuadonga. Mete mieu l'asuntu eclesiásticu...

Menos mal que lo nuesu ye la montaña y a ello fuímos...

Arantzatzu (Gipuzkoa) - Aizkorri

A pesar del mal tiempu que tuviemos na ruta, nun pueu personalmente más que tener ganes de volver, porque paecióme una ruta guapísima y encantaríame conocela de nuevu con bon tiempu y sin prieses pa esfrutar de les vistes y del cordal del Aizkorri.
Llueu de la ruta, mudámonos de ropa y diremos hasta'l pueblu d'Elorrio, onde taremos pasiando poles sos cais y tomando unes cañes demientres echamos un vistazu al Athletic. Nótase enforma, que l'Sporting ta en segunda ya que pasamos esti añu del futbol ya interesónos más bien pocu'l partíu.

Lo que si nos prestó pola vida foi'l pueblu, l'ambiente qu'ellí alendábase, con una plaza enllena xente, de neños xugando nel frontón a pelota, d'un magüestu popular... y de cais engalanaes con olentzeros y lluces per cualisquier llau que-y daba un toque especial al pueblu.

Semeyes de la cena

Dempués de conocer Elorrio, xubimos hacia'l puertu d'Elgeta onde en Berrio tendremos una casería rural, na qu'escoyeremos les nueses habitaciones casi a la carrera, anque toes yeren enormes y teníen bañu propiu onde les duches foron una parte perimportante pal relaxu xeneral.

Tan sólo quedaba ya, esfrutar de la cena a base de pinchoteu, un pocu de pasta pa recuperar y pollu rellenu, que fartucónos dando oportunidá a la bébora (sídra, vinu del centenariu del Baskonia, cerveza...) de dexanos amatagaos pa durmir como bardiones hasta'l día siguiente.

Domingu 16 d'Avientu de 2011:

Una de les coses más guapes de durmir nuna casona como la que tamos, ye duchase pela mañana. Asína qu'espertamos a una hora prudente y voi pegame un d'eses duches que tanto presten y que dante fuercies pa tol día.



Llueu, baxaremos a almorzar toos xuntos a base de bizcochos y demás guarreríes, pa recoyer tolos trastos y dimponenos a caleyar, nesti segundu día de Xuntanza que tien de llevanos a conocer otru picu bien guapu, el Udalaitz.


Iguria (Bizkaia) - Udalatx

Dempués d'esta ruta tan prestosa, na que'l tiempu volvió a torcese al final, tocó movese de nuevu en coche, hasta Basauri, onde teníemos preparada una fartura nel bar del polideportivu, a base de sacramentos. Los sacramentos son fabes pintes con compangu y repollu, sinun escaezu namás.Mui riques y la pena personal ye nun poder prebar el vinu un pocu más, porque taba rico, ye lo que tien conducir.

Como siempre, foi un placer saludar a delles persones que nun pudieron venir al monte, pero si qu'averáronse a xintar y facenos una visita: Paco, Mariano, Iker y Mari Jose, pareya de Bittor, foron les sorpreses de tarde.



Col estómagu enllenu, ficimos una visitina al rocódromu de les instalaciones, pero'l pesu facía que la llei de la gravedá fora más fuerte de lo normal, dexando pa meyor ocasión xugar nel bulder y nel roco.

Magar de les despedíes, tocó garrar los coches y facer como casi siempre, baxo la lluvia, el viaxe de vuelta hacia la nuesa Asturies, que tantes rutes tien de danos nesti añu próximu 2013.

Ensín más, agradecer la participación, l'esfuerzu y el trabayu de toes y toos pa esta Xuntanza Asturvasca de 2012-2013 y naguamos pa que la siguiente pueda tamién salir alantre n'Asturies:

Xente astur: Carlos, Pangua, Rebe, César, Paula y Berto.
Xente vasco: Amaia, Juanan, Oscar, Bittor, Ibán, Iñaki, David, Paco, Mariano, Iker y Fernan.

6 comentarios:

  1. Respuestas
    1. Unes botelles nunca pue faltar... sinon perdemos la identidá, jeje

      Eliminar
  2. Mui buenes:

    Recuerdos y saludos para todos los participantes.Tuvimos que sufrir las inclemencias del tiempo pero eso le da más épica, sobretodo al descenso del Udalaitz con lluvia y patinazos. Por suerte todos sanos y salvos.

    Un abrazu para todos.

    ResponderEliminar
    Respuestas
    1. Ta claru, que quedamos con ganes de conocer el Aizkorri con bon tiempu... pa otra sedrá.

      Un abrazu Fernan

      Eliminar
  3. Que buen rollu se os ve!
    Lleváis tres años ya, pero yo augurovos munchos mas.
    El únicu pero -ye un decir- la fecha, nun ye pa muchu monte, aunque, igual ye lo que buscáis disimulamente, jajajajajaaaaa
    Un saludo amigo

    ResponderEliminar
    Respuestas
    1. Home, la verdá ye que la fecha, ye más col envís, de xuntanos a final d'añu y claro, otra cosa ye que'l tiempu acompañe, jeje.

      Un abrazu Monchu

      Eliminar