martes, 13 de noviembre de 2012

Collada Moandi (Piloña) - Pica Cetín

23 de Setiembre de 2012

Track: Collada Moandi (Piloña) - Pica Cetín


Entamu de nueva temporada montañera del GM Xuan de la Borrina y como l'añu pasáu, nel Cuitu Arbás, prestáranos tener xinta al final de la ruta, esti añu, a pesar de nun tener una ruta afayaiza nel calendariu pa tal xera, sacamos del caxón de pendientes a la Pica Cetín.

Por qué? Pues porque ye la perfeuta ruta mañanera pa xintes, díes nos que vien mal tiempu pela tarde y demás necesidaes de ruta curtia y prestosa. Poro, vamos averanos de bona gana hasta la llende de cuatru conceyos: Piloña, Parres, Amieva y Ponga.


Semeya de grupu na collada Moandi (660 ms)

P'aportar a ella, vamos salir de Xixón pela As-I (la minera) pa garrar el nuevu enllaz de l'autovía del Cantábricu que vien d'Uviéu, pa salinos garrando la N-634 hacia Nava. Llueu, siguiremos tola N-634 hasta meténos nel conceyu de Piloña, pasando per L'Infiestu, Villamayor y Sevares, onde magar del desayunu garraremos la As-339.

Esta carretera ye una maraviya y pegada al ríu Tendi, fadrános conocer una Asturies verde a más non poder, a pesar de tar nuna dómina de seca perfuerte. Aún así, al travíes d'ella, veremos como la humedá nesta fastera nun se pierde en casi nengún momentu l'añu y dempués de xubir desnivel un bon ratu aportaremos a la Collada Moandi a 660 ms, llende de Piloña y Ponga.

Xubiendo al Cabezón de Fontecha

Llueu de preparanos, a les diez menos cuartu la mañana, vamos partir per una pista en direición al Cabezón de Fontecha. Malpenes, sedrán un par d'envueltes y una recta n'ascensu pa tener a la vista'l nuesu oxetivu, la pica Cetín.


Ye un día feu, coles ñubes prietes amenazantes al sur poro centrámonos en mirar pa la paré occidental de la Pica, la cual dende lloñe paez dafechu pocu amable pa poder facese con ella.

Baxamos del Cabezón de Fontecha hacia la viesca de Cea y Cetín

Baxaremos de Fontecha per un prau y veremos claramente que tenemos qu'internanos na parte más alta de la viesca de Cea y Cetín, xustu pembaxu de les parés de la peña y picu Corazales. Dicir, qu'escoyimos esta ruta, porque la propia seca que tábemos careciendo diba aidanos a superar el tramu de viesca.

Aún así, nun se nin como, la travesía pelos senderos d'esti guapu fayéu, tuvo una bona cantidá de tramos de pura llamarga. Nun queríemos nin saber, como pue pasase per equí en primavera por exemplu y nun queremos sabelu defechu, jeje.

Salimos a la fín de la viesca cola Pica Cetín a la vista

Caleyamos sele y nuna hora salimos del barrizal que ye'l fayéu, dando pasu a una campa que n'ascensu dexarános nel colláu Berroña (930 ms). Esti guapu colláu sedría un mirador perfeutu del Picu Pierzu pero nesti casu solo vemos un negrén de ñubes.

Pica Cetín dende'l Colláu Berroña (930 ms)

Ya tamos a tiru, d'entamar l'ascensu a la Cetín y nun paez que nos amuese los sos puntos febles, así que miramos el gps y siguimos unos senderinos que llévenmos a la cara oeste que llevamos mirando tola ruta. 

Sin danos cuenta, tamos metíendonos hacia'l centru d'esa cara que tan vertical nos paecía y en delles envueltes per tarrén herbosu, vamos averándonos a los paredones calizos d'esta guapa montaña.

Averamientu pela base de la Pica Cetín

Siguimos xubiendo ensín descansu, hasta que tenemos que dar una envuelta y garrar el sen contrariu, metíéndonos de llenu nun ampliu canalizu pente un paredón calizu enorme a la manzorga y una afilada crestina a la mandrecha.

El senderu retuércese pente les peñes

A pesar del día, l'ascensu ye una gozada y tar arrodiáu d'estes verticales peñes, fainos esfrutar a cada pasu, hasta qu'aportamos a un colláin, onde ganamos de nuevu la cara sur de la pica, faciendo una llarga travesía y sufriendo unes ventaes pelín molestes.  

Aportamos al tramu de yerba llarga y garramos el trepe hasta l'arista sur

La travesía finará, nuna fastera de llarga yerba y felechos onde siguiremos un pelín pior el senderu, hasta ganar les primeres peñes afilaes de caliza. La vía más cenciella, va per un pequeñu trepe al llau d'un árbol y con pocu más qu'esfrutar d'usar les manes auparémonos a l'arista sur que tien de llevanos a la cume.

Perguapa parte final del ascensu a la Pica Cetín

L'arista final, sedrá un tramu mixtu de caliza y yerba, que con dalgún sofitu de manes, llevarános hasta los 1137 ms de la Pica Cetín, pero siempre siendo muncho más tumbáu que'l tramu d'accesu a la propia arista.

Cumal de la Pica Cetín (1137 ms)

 Son casi les 11 y media de la mañana y tamos nesta segunda cota de Parres, almirando les ñubes que tapen cumales tan impresionantes como'l Tiatordos o la Llambria y otros menos queríos por nós como'l Vizcares y por dalgún motivu, nun acabamos de tener priesa por baxar a pesar de l'amenaza de moyanos.

Vizcares, Tiatordos, Llambria y Pierzu

Dempués de venti minutinos, nós que picamos un pocu de chocolate y frutos secos, garramos pa la mochila unes banderes tibetanes d'eses qu'habia nel cumal y tiramos p'abaxo de nuevu, destrepando tol tramu hasta'l pasu del árbol, onde echamos unes rises colos "calcetos caponatiles" de Pau y aportamos a la fastera herbosa ensín mayor novedá.

Tramu de baxada hasta'l colláu Berroña

Dende equí, tiramos en travesía de nuevu hasta'l collaín onde garramos de nuevu'l canalizu pel que baxamos encaxonaos hasta dar la envuelta hacia'l colláu Berroña. Durante esta baxada, vamos tener un pocu suerte y podremos acolumbrar el Sueve baxo'l sol, anque la fastera sur sigue fondamente escura.

Dellos vistazos pa toles direiciones

Namái, quedábanos despedínos de la perguapa Pica Cetín y dir al alcuentru d'esa viesca embarrada, na cual hai qu'empobinase correutamente, ya que tien dellos senderos que van más arriba o más abaxo y sigún la riega que-yos trespase, podemos ponenos hasta la rodiella de barru.


La Pica Cetín

Salimos de la viesca, col tastu llonxanu a fartura na bocona y aína taremos nel Cabezón de Fontecha, p'agora sí, despedínos finalmente de la pica y garrar la pista que dexarános sele na collada Moandi.

Caberos pasos hacia la collada Moandi

Finalmente, esta ruta mañanera llevónos 3 hores y 40 minutos, pa percorrer los 6,1 kms, superando un desnivel positivu de 525 ms y completando una ascensión perguapa, con fayéu, campes, amiestu de yerba y caliza y trepe pela caliza.... percompleta y guapa, la Pica Cetín.

 Agora sí... tocaba'l premiu al entamu de temporada 2012-2013, poro garramos los coches y siguimos As-339 metíendonos en Ponga, baxando hacia Cazu y posteriormente Sellañu, onde pudimos esfrutar d'un menú increyible en casa Ricardo.

Camudando'l Camín de xinta en Sellañu (Ponga)

Nesta guapina y corta ruta ficimos: Pica Cetín (1137 ms) segunda cota de Parres y monte prestosu astur

Ver progresos en: Retos montañeros

8 comentarios:

  1. Está visto que ese barrizal no se seca nunca, Salimos hasta las cejas de barro, menos mal que luego llovió y nos limpió un poco la lluvia.
    Por lo demás del collado a la cima bastante bien.

    Pero lo mejor la comida. Seguro!!!

    Un abrazu.

    ResponderEliminar
    Respuestas
    1. La comida mui bien Fernan... ties que llevar a la xente a Sellañu dempués d'una rutina por Ponga

      Vémonos pronto!!

      Eliminar
  2. Amiguín del alma, vaya programones que nos faerías na TPA. Claro, como yes buenu meyor contratar a otros. Veo que lleves tamién la música al llau.
    La fabada ye p'acompañar, ¿no?.

    ResponderEliminar
    Respuestas
    1. La fabada foi la meyor recuperación qu'había jeje, anque tampoco ye que cansásemos muncho.

      Yera día d'entamu temporada, había que llevalu a dalgo más folixeru.

      Un abrazu

      Eliminar
  3. Una cima muy guapa, aunque ya veo que no tuvisteis muy buen tiempo. Lo mejor de la ruta es ese gran final con una buena fartura.
    Un saludo

    ResponderEliminar
    Respuestas
    1. Ya te digo... pena de vistes... pero bono, escoyimos esti monte, porque pal sur sabíemos que taba así de malu, jeje

      La fartura superior...

      Un saludu

      Eliminar
  4. Una buen peñón, la Pica Cetín, reconozco que no tenía ni idea de ella.

    He estado alucinando con tu periplo por Pirineos, las fotos espectaculares. Enhorabuena, Berto.

    ResponderEliminar
    Respuestas
    1. La Cetín anque ye una ruta corta ye mui prestosa y lo de Pireneus, pues como siempre conociendo llugares nuevos y disfrutando a tope.

      Vaya sobes bicicleteres que vos metísteis por Portugal, eso sí que ye facer turismu de calidá.

      Un abrazu

      Eliminar