viernes, 4 de mayo de 2012

Rimolín (Cangas del Narcea) - Caniel.las - Rogueiru

27 de Mayu de 2012

Track: Rimolín (Cangas del Narcea) - Caniel.las - Rogueiru



Equí tamos, en Rimolín (Cangas del Narcea), la mínima espresión de Xuan de la Borrina, Pangua y yo. Son les 9 y media de la mañana y llevo espiertu dende les 6 y media, que me duché y garré'l coche a fueu hasta Cangas del Narcea. Dacuando meté-y cera al Impreza ye mui prestosu, a pesar del preciu la gasolina...

Asína que, llántome en L.lumés, a les afueres de Cangas del Narcea, nuna hora dempués de salir de Xixón, en direición Uviéu, onde garré la As-63 en direición Grau hasta'l final, pa empobiname hacia la salida de Cangas del Narcea y equí tomé la As-15, travesando parte de los conceyos de Salas y Tinéu hasta entrar en Cangas del Narcea onde pasos pelos pueblos de L.lanteiru, Xavita, Portiel.la, Antráu, Tubongu, Vil.lar de Tubongu, Castrusín, San Pedru de Courias, Courias, la capital de Cangas del Narcea, Sienra y a la fín, L.lumés.


Partimos de Rimolín (969 ms)

Magar del almuerzu, vamos siguir carretera hacia'l Puertu pola As-213 pasando por Ponticiel.la, Bimeda, Vil.laicanes, Vil.lacibrán, San Pedru d'Arbás, La L.linde, Caldevil.la d'Arbás y en L'Outeiro, vamos perdenos pelos caleyos canguéses, pasando per Miraval.les, Vil.laxer, Veigaimiedru y Rimolín a la fín. Que conste, que perdímonos per Trescastru y Arbás, na gueta de la carretera correuta, jeje.

Agora sí, preparaos en Rimolín, vamos travesar les sos cais, alcontrándonos con una reciella de perrinos nos que destacaba un cachorru cola metá la tiesta prieta, asína como destaquen tamién los horros remocicaos con pegollos de formigón y los que calteníensen d'antaño con pegollos de pizarra. Perguapu.


Caleyando peles cais hacia'l val.le del Ríu Molín

Salimos de les cais de Rimolín y alcontrámonos con una pista qu'entama a ganar desnivel a la vera del ríu Molín y bien ceo, seremos a acolumbrar tol val.le de Rimolín y al fondu les primeres cotes montañeres con un guapu color morao de la beriza.


Val.le del Rimolín

La sensación ye rara, tamos caleyando nun día preciosu y tenemos una sensación de dir averándonos hacia lo más xabaz d'Asturies, onde la facilidá p'alcontrar un osu, pudiera ser bien posible. Quiciás tenemos na tiesta aquella ruta en Somiedu... y les viesques y falderes de los montes paecen tresmitinos daqué asemeyáu.


Ascendiendo pel Val.lín alantre hacia la Castañar

Ensín descansu xubiremos pel Val.lín cruciándonos con un regatu que baxa del Cuitu'l Fraile, pa dempués garrar la solombra na Castañar y topános con un desnivel muncho más fuerte en L'Agüera. Nesti puntu, tendremos la posibilidá de ver la cayía d'augua de la Ruxidoira enfrente nuesa, la cual bien con bon calce y ruxe a lo lloñe con fuercia.

La Ruxidoira col picu Rogueiru detrás

Dexaremos la xuntanza d'augues de la Ruxidoira col Molín en L'Agüera, y percorreremos camín n'envueltes, bien penriba del Molín, que pasa encaxonáu pente les parés del Cuernu y de la Pena Tuerta al otru llau del calce.

Siempre col ríu a la mandrecha, vamos entrar nel puntu más maxicu y guapu de la ruta, ya que tendremos la posibilidá de travesar la viesca más virxen y guapa na que Pangua y yo, pudiéramos tar nunca y amás, na metá d'ella tien un guapu mayáu que da ganes d'allugase ellí pa siempre.


Metémonos per guapes viesques hasta un mayáu d'ensueñu

Llevamos pocu más d'un hora camináu y tamos encantaos cola ruta, colo curiáu del camín, col día que tenemos... nun podemos más, que tar felices a pesar de la paliza de coche que ye aportar dende Xixón hasta'l parque del Narcea.


Atravesamos el mayáu pa meténos nuna viesca máxica

Los collores de la beriza nos montes, ta dando-y un toque espeutacular a les vistes y cuando adiéntreste otra vegada na viesca, tornamos a camudar el moráu pol verdi sele con toques blancos de la barba de vieyu qu'hai nos árboles. Esfrutando enforma.

Darréu tenemos un tramu, nel qu'escaeceremos les guapes viesques pa pasar a xubir per un pindiu tarrén pente la beriza, nel que casi nun somos a pescanciar el senderu, hasta que salimos a una altu más abiertu onde tenemos, agora sí, la braña de L.laul.lina delantre nuesa.


Aportamos a les l.lagunes de L.laul.lina (1610 ms)

Menos d'una hora y media y más de 600 ms de desnivel, será l'únicu esfuerzu pa tar nun llugar bien guapu onde l'augua de les l.lagunes amiéstense a los collores verde y moráu de tol día. Hasta esta braña de L.laul.lina, bien paga la pena facer la ruta, anque solo seya pa visitala. Perguapu camín dende Rimolín.

Los nomes de l.lagunes nun tan mui clares... pero la primera que vamos travesar ye la L.langreira que tien poca augua y pa ello, dende les cabañes, tendremos que baxar hasta ella, travesándola per un pasu al traviés d'una l.lamarga cerca d'onde sume hacia'l ríu Molín.


Guapes l.lagunes colos toques coloraos del berezu

Magar d'esti pasu, vamos alcontranos una pista que n'ascensión, va facenos dar un paséu cómodu y que llevarános a conocer delles llagunes más, que tomen los collores de la fastera na que nos alcontramos.



Tramu de cenciella pista hacia'l col.láu de Costapiedra

La más grande delles y que podemos ver embaxo nuesa con tonalidá verdosa será la d'El Reconco. Tendremos nel intre, grandes vistes al norte col val.le del Rimolín, al este col Cuitu Arbás asomando y al oeste, el nuesu destín, el col.láu de Costapiedra, pente la xerra'l Piornu y los Altos del Morteiru.


Vistes de la l.laguna d'El Reconco col Cuitu Arbás de fondu

Nos 1780 ms de Costapiedra, vamos algamar vistes del val.le de Xichón y de les sos brañes más altes como La Feltrosa, per onde tenemos intención de volver, del nuesu oxetivu, el Picu Caniel.las, al qu'inda nun-y vimos asomar el focicu.


A la fin damos vista al Picu Caniel.las

Esto sedrá, unos minutos más tarde, cuando metámonos a faldiar los Altos del Morteiru, hasta'l cumal occidental más altu, nel que ganamos un par de vistes increyibles, una ye'l fayéu de Monesteriu d'Ermu y otra ye'l colláu pel que tendremos que pasar pa xubir al Caniel.las, la Güerta'l Caniel.las.


Travesamos los Altos del Morteiru hacia la Güerta Caniel.las

La tradición osera del fayéu d'Ermu ye bien conocía, con dellos topónimos de Monte L'Osu, etc... pero de les dos visiones la que tien un mayor interés cultural ye la Güerta'l Caniel.las, onde na nueche de San Xuan podremos atopar la yerba Cabrera: Llenda de la Yerba Cabrera n'Asturies

La hestoria ye enforma interesante y anque seya llarga de lleer, encamiéntovos a la so llectura, porque podréis descubrir como d'una lleenda asturiana de llindes colos llioneses, podéis finar topándovos colos incas, el templu de Salomón... más allá de 3000 años a.C.


Ablucantes vistes a Monesteriu d'Ermu col cordal de Degaña y la so viesca osera

Falando d'estes hestories, liámonos un pocu y metémonos per un piornal finu, pero somos a garrar de nuevu bon camín y baxamos per senderu hasta la Güerta'l Caniel.las, onde tenemos enfrente una guapa y llarga ascensión al picu Caniel.las, ya que perdimos más de 200 ms d'altor dende los altos del Morteiru.

Lo de guapa, camentábemoslo d'aniciu, porque cuando metímonos de llenu, alcontrámonos cola mayor basoria d'ascensión posible. El senderu anda perdíu dafechu y la beriza y los piornos tienen un altor importante.


Pestosa ascensión al Caniel.las enllena de piornos y berezos

La llucha ye de continuu y durante más de 50 minutos taremos a hosties colos piornos y cola beriza que ye dalgo más sele, guetando lleres peles que poder avanzar o cualesquier calva de vexetación que pudiera servinos.

A posteriori, dicir qu'hai que tirase tolo posible y per onde seya posible hacia la vertiente de Monesteriu, ya que tien más peña y pue xubise muncho meyor, asína que pa l'ascensión garrar el track de baxada, porque'l de xubida ye infernal.


Picu Caniel.las (1923 ms)

Con más pelea de lo camentáu, encumamos los 1923 ms del Picu Caniel.las raspiando les 2 de la tarde y fadrémoslo dempués de casi 4 hores de camín y más de mil metros acumulaos. La fame como siempre taba más que xostificada y les vistes yeren un compangu perfeutu pa garrar el bocata de tortiella con bien de ganes.


Vistes hacia Muniel.los y Xichón

Dempués de media hora de descansu, nos que dedicámonos a intentar conocer meyor esta fastera d'Asturies, na que sobretou intentamos dar vista a cumales como'l Mosqueiru, Tesu Mular, Penas Rogueiras... que dan llende con Llión nos conceyos d'Ibias y Degaña, dedicímonos a baxar.

Baxando otra vegada pel infiernu anque paeza guapu

Esta vegada fuimos a llevar una ruta más curiosa pa baxar, garrando tola arista sureste, hasta'l puntu nel que vimos que yera necesariu camudar la direición hacia'l norte, p'alternando lleras y pasos más abiertos de vexetación aportar a la Güerta'l Caniel.las.

Darréu baxaremos a bon ritmu y per bon camín, hacia'l regueru de Rebollar, el cual cruciamos y pela pista que vien de Xichón, vamos xubir hasta las Brañas Altas, onde cruciamos la riega Carud, pasando al llau de les mui guapes y remocicaes cabañes d'esta braña.


Sele camín hacia Brañas Altas

Con bona envidia de los dueños de les cabañes (vaya llugar pa tar con collacios pasando'l finde), tornamos a ganar desnivel, empobinándonos hacia la braña de la Feltrosa, onde hai restos de corros bien antiguos.

Dende equí, vamos siguir xubiendo hasta'l colláu de Treita (1705 ms), onde podríemos fácilmente xuntános al camín de xubida al traviés de pista hasta Costapiedra o inclusu, garrar un senderu que pasaría pembaxo de la l.laguna de Reconco, tornando pel Monte L'Osu a la braña de L.laul.lina.


Empobinámos pela Braña Feltrosa hacia'l Picu Rogueiru

Pero... inda queríemos facer dalgo más de ruta circular y de pasu, de monte. Poro, metímonos na estensa beriza que da xubida al Picu Rogueiru, y bien dicho lo d'estensa pero tamién hai que dicir lo densa que yera lo abegosu de pegase con dalgo asína, y menos mal que nun taba mui alta, sinon imposible dafechu.


Vistes al val.le de Tabláu cola Pena Rogueiru nel puntu mira

Aún así, fuimos a dar cota nel Picu Rogueiru (1876 ms) y magar d'él, siguimos ya cenciello hasta la Pena Rogueiru de 1913 ms, que ye la másima cota d'esti monte onde decidimos parar un pelín a descansar y a sacar la semeya de rigor, nesti guapu monte.


Cumal de Pena Rogueiru (1912 ms) col Caniel.lás a lo lloñe

Nel intre, llevamos 6 hores y media de ruta y quedamos ablucaos mirando lo lloñe que ta'l Caniel.las de nós, anque sabemos que'l pueblu de Rimolín práuticamente ta embaxo nuesa y eso anima, ya que tamos dalgo cansaos ya.


Baxamos de la Pena Rogueiru hacia'l col.láu Trasdel.lobos

Darréu, entamamos la baxada al pueblu, garrando direición norte per tola cresta del Rogueiru, la cual fadráse rápidu, pasando pela Pena Tuerta y tomando llueu un senderu estrechu, que baxaranos hasta'l colláu de Trasdel.lobos (1625 ms)

Equí teniemos, marcáu nel gps, la entrada a delles siendes que deberíen dexános nel pueblu, pero d'una ruta que taba saliendo perfeuta (sacante lo estrau de les ascensiones a Caniel.las y Rogueiru), díbemos meténos nun infiernu de piornos y berezu.


El monte perdíu dafechu na Matona

Hai que dicir que toles siendes qu'alcontramos morríen en dalgún puntu, ensín algamar una continuidá visible. Foi dafechu desesperante y acabamos baxando más o menos de cualesquier manera hasta aportar a les siendes más averaes al pueblu, qu'anque taben en desusu, nun taben zarraes del tou.

Más menos, el camín siguíu foi'l siguiente: Baxamos a partir del colláu siguiente a Trasdel.lobos y más menos fuimos bien hasta la Matona onde perdióse tou rastru de sienda pela que baxar. Ehí dicidimos siguir alantre y sobrepasar una reiga penriba, pa llueu baxar a güevu per un tarrén perpindiu hasta'l Pandiel.lu, onde si alcontramos bon camín hasta'l pueblu.


A la fín, vemos el pueblu de Rimolín

El preciu de toda esta xera na baxada?? Pues, 3 kms infernales nun total de 1 hora y media, nes que pudimos facer una granxa de cabarres nos nuesos pantalones, col continuu picor, malestar y malrollu nel cuerpu pa tol día. Lo que daba nesa hora y media, por tener un soplete pa prendé-y fueu a tol monte... Horrible de verdá.


Aportamos enllenos de cabarres a Rimolín y con ciertu desencantu

Cuando aportamos al pueblu, dábanos igual el guapu molín pel que cruciamos el ríu, los perrinos que vinieron a saludanos otra vegada o l'agradable conversación d'una señora, que dixo que nun sabía que se podía baxar de Trasdel.lobos per ehí. Tastu final malu.

Un conseyu pa facer una ruta guapa y sin enguedeyos montunos: O escaecer el Rogueiru y tornar al enllaz a L.laul.lina o dende Trasdel.lobos siguir polas L.lanas, pela pista hasta'l pueblu de Vil.lar de Rogueiru y dende esti, baxar per carretera a Rimolín, ya que seríen un par de kilómetros estra namái.

La nuesa, finalmente foi una xatada de 8 hores y 55 minutos pa percorrer un total de 21,1 kms col esfuerzu de superar un desnivel positivu de 1760 ms, lo cual aseméyase a una ruta dura per Picos.... pue sobrar el Rogueiru, anque ye una pena perguapa.

Camudando'l Camín na fondura de Cangas del Narcea

Nesta ruta de contrastes positivos y negativos ficimos: Picu Caniel.las (1923 ms), monte prestosu astur y vértice xeodésicu de Cangas del Narcea

Ver progresos en: Retos montañeros

8 comentarios:

  1. Berto, menuda ruta guapa. Va tiempu que tengo ganes de perdeme per esos llares. Menudes biesques y brañes mas prestoses. Y eses llagunes, tengo que dir a veles, que ye parte del mio trabayu. Pero lo de les cabarres, la próxima vegada lo que ties que facer ye llevame a mi. Con lo que me quieren, gárroles yo toes darreu, ja, ja.
    Un saludu

    ResponderEliminar
    Respuestas
    1. Oye, si se que les lleves tu toes, tas convidáu, jaja. Nun dudes en facela, ye mui, mui guapa hasta'l Caniel.las

      Un abrazu

      Eliminar
  2. Hola Berto, muy guapa la ruta, si señor. Ya hice esa cumbre varies veces, dos desde Monasterio de Hermo y es horrible!!!! otra desde Gillón, y esa fue mejor, pero la opción que tu nos traes, me encantó, así que la tendré en cuenta para la próxima.
    Un saludo amigo

    ResponderEliminar
    Respuestas
    1. Alégrome que te prestase, a nós encantonos hasta que la cosa púsose pelín mala, pero volvería de xuru pa que más xente conociese'l camín hasta L.laul.lina... preciosu

      Un abrazu

      Eliminar
  3. por las tierras de corocota5 de junio de 2012, 22:45

    Saludos Berto:
    Muy guapa la ruta,da gusto ver los sitios tan encantadores que teneis por asturias,habra que organizar algo para ir para alla.
    No desesperes con la garrapatas,me parece que es algo que va con vosotros,sin ese punto de sufrimiento parece que no estamos contentos,te digo esto porque Tino y yo somos del mismo patron.
    Suerte para la proxima.
    Un abrazu.

    ResponderEliminar
    Respuestas
    1. Vémonos Juan... ya hai ganes de veros a Tino y a ti y facer dalgo xuntos

      Eliminar
  4. Solo faltaban los osos y la jornada completa.

    Un abrazu collaciu.

    ResponderEliminar
    Respuestas
    1. Ta claro, qu'esti ye un bon centenariu d'esa fastera.

      Va tocate facelu, jaja

      Eliminar