viernes, 25 de mayo de 2018

El L.lamosu (Miranda) - Picu Porcabeza

10 de Febreru de 2018

Track: El L.lamosu (Miranda) - Picu Porcabeza


Otru día más de ruta y otru día que malpenes somos tres persones del GM Xuan de la Borrina pa dir de monte, pa enriba, como non, lióme un pelín tomando dalgo con collacios y duérmome. Resultáu, otra presona que causa baxa al non poder contautar conmigo y Benjamín esperando en Balmonte.

Llamadina a Benjamín, dos minutinos de que facemos, esperes a que llegue y a toa hostia cola furgo pa Balmonte, echando de menos mi Subaru pa nun dir xugándomela a cada curva jeje. Finalmente, facemos el trayeutu dende Xixón per Uviéu, hasta'l desvíu a la A-63 onde salimos hacia Cangas del Narcea.

Vista del L.lamosu (475 m) nuna de les ñevadones d'esi añu

Como siempre, conduciremos pela As-15, travesando el conceyu de Salas pa entrar a la fín nel conceyu de Miranda, travesando los pueblos de Cutiellos, Pumarada, San Bartolomé, L'Hospital, Llaureiru y Llongoria onde empobinarémonos pela As-227, travesando Samartín de Llodón, San Cristóbal, Fontouria, Silviella, Courias y a la fin, Balmonte, onde Benjamín déxame tomar un café y un pinchín.

Dende Balmonte, tiraremos carretera alantre hasta aportar a la puente L.lamosu, onde saldrá'l desvíu pa los pueblos d'El L.lamosu y Montoubu, quedando nós nesti primeru, aparcando'l coche ya penriba la ñeve recién cayida na nueche anterior.

Con dellos metros andaos ya garramos ñeve de continuu pela pista

Magar d'equivocanos un pelín de camín, tirando hacia L'Abeséu que tamién tendría de llevanos al cordal de Porcabeza, tornamos solos nuesos pasos y garramos el camín deseyáu que tien de llevanos a envueltes al llau de la riega la Furcada.

Nun tien mayor perda que siguir camín alantre y nel nuesu casu, nun tenemos nin que dar un par d'envueltes pa parar y poner los marañones, ya que la ñevada ye brutal. Contando qu'El L.lamosu ronda los 475 m d'altor, dicir qu'a los 600 metros ya tenemos ñeve de continuu diz muncho de la ñevadona.

Bregamos fino per pista y fuera pista hacia l'altu Piedrasnegras

El día tenémoslo amurniáu del too, sicasí dacuando tenemos dalgún clarín qu'anima, al menos pa ver les precioses vistes d'esta Asturies blanca. Avanzo penósamente, abriendo buelga colos marañones a los que nun toi mui avezáu, cargando cola mochila y sudando la resaca correspondiente.

Tenemos tramos de calor pol esfuerzu y otros onde'l vientu xela enforma, asina qu'andamos pon ropa, quita ropa y siempre p'alantre pasu ente pasu. Ye un placer venir de monte con Benjamín, ya que siempre ye positivu y con ganes de siguir.

Esfuerzu final pa bordiar Piedrasnegras y el picu Porcabezas a tiru

Llega un momentu, nel que fartuco d'abrir buelga pela pista que va hasta Entecuetos, axuntándose al camín real, decidiendo tirar a pinchu hacia l'Altu de Piedrasnegras, faciendo un ascensu pelín más alpinu y prestosín.

Con muncho esfuerzu y vientu fríu na parte final ascendemos hasta Piedrasnegras, bordíandoles pel oriente y empobinándonos direutamente hacia'l Picu Porcabeza (1209 m), con un tramu final per una enorma campa xelada que fainos sintir que tamos pela Antártida lo menos y non nel conceyu de Miranda.

Cume nel picu Porcabezas (1209 m)

El vientu azota con ganes, poro magar de sacar la semeya de rigor optamos por descender hacia'l Campu Las Cruces, echando munchísimu de menos unos esquís y saber esquiar tamién. Vaya palísima de ñeve virxe pa pegar una esquiada increyible.

Son estes coses que te prestaría probar, pero que mentalmente dices que non, porque n'abondos xardinos andes metíu. Ensin esquís, pero baxando rapídisimu marañoniando aportaremos al L.lanón, onde entamará'l nuesu particular infiernu.

Primer parte de descensu petada de ñeve hacia Buspilde

Lo que tendría de ser un cómodu paseu per guapos caminos dende'l L.lanón a Buspilde, convirtióse nuna llucha a muerte cola ñeve y les milenta blimes de los ablanos y de dellos árboles más. Lo fondo de la ñeve y les rames cruciaes pel camín, ficieron que tardásemos una eternidá en abrinos pasu pelos caminos.

A la fín, aportaremos a la Buspilde, onde pocu más y azotamos los marañones a tomar vientos, por mor de la llucha que tuvimos con ellos, coles blimes y con tola vexetación enterrada del mundiu. Cansaos, nun quedaba otra que parar a picar dalgo, porque llevábamos más de 5 hores ensin parar un segundu siquiera.

Averámonos pali pali hacia'l L.lamosu que caltien ñeve enforma

Magar de xintar dalgo, ya teníemos tarrén más cenciellu, anque'l camín nun ye que tuviera nes meyores condiciones, ya que convirtiérase nuna riega dafechu. Pali, pali diremos perdiendo desnivel y acolumbraremos los teyaos ñevaos d'El L.lamosu ca vegada más cerquino.

Abriendo buelga casi hasta'l mesmu pueblu o penmediu de los caleyos que yeren riegues, aportamos al L.lamosu, contentos, porque aprovechamos el día, pero cansadinos porque lo que diba ser un paseín de 7 km y 750 de desnivel acumuláu, convirtióse nuna xatada abriendo buelga y nun llucha infame contra la vexetación enterrada, que fice que tuvieramos nel monte casi 6 hores... tela.

Camudando'l Camín na ivernada de Miranda

No hay comentarios:

Publicar un comentario