jueves, 30 de noviembre de 2017

El Fielato (Ayer) - Fuentes - Cuerda L'Eyu - Tonéu

28 d'Ochobre de 2017

Track: El Fielato (Ayer) - Fuentes - Cuerda L'Ayu - Tonéu


Ruta del GM Xuan de la Borrina propuesta por Haritz, al que-y llegó un pelín d'oyíes que ya la tenía na tiesta dende cuantayá. Ye dicir, teníala pendiente en mou ivernal, pudiendo atalantar nel intre, que yera un auténtica xatada pero con un calter imporante d'esfuerzu y dependiendo les condiciones casi d'aventura.

El casu ye que pal grupu, ye una auténtica barbaridá facer esti cordal del Ayu (Eyu) n'ivernal, pero sí que ye una bona ruta ensin ñeve pa conocer unos cuantos dosmiles ayeranos. Poro, empobinámonos hasta'l Fielato, al entamu del Puirtu Braña, pa intentar percorrer dende'l Picu Fuentes hasta'l Tonéu tola cuerda L'Ayu.

Partimos d'El Fielato (1268 m)

Como siempre aportaremos al Puirtu Braña dende Xixón, tirando pela Minera hasta Mieres del Camín pa siguir hacia L.lena, desviándonos pel corredor del Ayer. Nesta carretera pasaremos pelos pueblos ayeranos de Morea, L'Escuyu, Los Estrul.lones, Cabanaquinta onde garraremos la AS-253 pasando per L.levinco, Entepenes, Col.lanzo, Yanos, La Pola Vieya, el Pino y Felechosa onde almorzamos, siguiendo camín pasando per Cuevas, Roseco, Rufríu y El Fielato.

Equí, de llau, d'unes guapes cabañes, garraremos agua na fonte, qu'entá dánoslo ensin problemes pesie a la seca d'esti añu y preparámonos pa salir caleyando hacia la Brañarreonda, travesando ún d'eses mítiques pontes-quitamieos. La verdá ye qu'a la xente'l campu nun-y falta imaxinación pa estes xeres, agrandando la lleenda de la portiella-somier y el bebederu-bañera cola ponte-quitamieos.

Pasaremos per Brañarreonda pa siguir ascensión hacia'l Fuentes

Ensin más, siguimos camín aportando a la campera perguapa de Brañarreonda (1370 m) con delles cabañes y tamién fonte. Dende equí, tenemos bien claru cual ye'l nuesu camín, que tien de llevanos hacia la amplia canal que xurde pembaxo del contrefuerte NE del Picu Fuentes.

Pa ello, averámonos primeru hacia l'Occidente hasta aportar a la Campa Reonda (1605 m). Equí, aparte d'algamar unes prestoses vistes de cumales ayeranos como'l Retriñón, Penamea y sobretou'l cercanu Picu Torres, tendremos dos posibilidaes d'ascensión.

Ganamos tarrén al monte al traviés del Val.lenchu

Podríemos dar la vuelta al espolón norte del Fuentes y ascender pela canal pente los Castil.lones y el Fuentes o facer la nuesa opción, que ye garrar la amplia y pindia canal del Val.lenchu. Esta canal, que cláramente vemos dende'l Fielato, fadrános ñavegar intentando llibrar les incómodes lleres y tol baxu brezu que dificulta'l caminar.

Aún así, siguiendo dellos fitos y un claru senderu que nun debemos perder, nun tendremos problemes pa dir ganándo-y altor a la canal y averanos al so final. Final, que monta un entepechu que da pa entender que con ñeve puede llegar a ser pelín delicada, poro l'últimu canalizu que va direutu al cumal puede nun ser bona opción y quiciás dir a la manzorga hacia'l col.láu la Verde seya más cenciello.

Tramu final pindísimu hasta los 2021 m del Picu Fuentes

Taremos unos minutinos nos 2021 m del Picu Fuentes y cola sensación de tener fecho gran parte del esfuerzu del día y ye que dende'l Fielato salvamos casi 800 m direutos y darréu tócanos caltenelos per tola cuerda L'Ayu.

Lo primeru, sedrá baxar hacia'l col.láu la Verde de nuevu, p'ascender a posteriori, pente trincheres de la guerra civil, al puntu más altu del Xerru Blancu (1952 m). Aparte de camentar la dureza d'esos tiempos, onde lo que pa nós ye tarrén d'entretenimientu pa ellos yera de supervivencia ,voi echando un vistazu a tolos correores que xuben hacia'l Xerru Blancu.

Fadremos cumal nel Xerru Blancu (1952 m)

L'Iviernu ta al cayer y esti añu tengo munches ganes de tirar de piolé y voi dando güeyaes a caún d'ellos viendo un desnivel perfeutu pa tala xera. Asigún salimos del Xerru Blancu, averarémonos Haritz y yo hasta la Campa La Verde (1956 m) onde tamién ta estráu de trincheres.

Siguimos camín hacia la Campa La Verde (1956 m)

Al tornar al abellugu'l grupu voi repasando nomes d'estos llugares pelos qu'andamos y vienme a la memoria, como non, el Cantar del Ayerán que perdió la guerra de Llan de Cubel y como non, voi tarariando tol camín alcordándome de la lletra y quedándome con esi "Al baxar el Puirtu Braña, tan escritas estas l.letras, Asturies llevanta'l puñu, pa baltar al que t'afuega".

Siguimos percorriendo la cuerda L'Eyu con vista hacia'l Tonéu

Ensin más... siguiremos avanzando aína, per tarrén cómodu, tola cuerda L'Eyu alantre entamando a ver más cerquino'l nuesu puntu final, el Picu Tonéu. Pero entá, tenemos un bon trechu y vamos empobinándonos hacia una fastera rocosa que fainos albidrar dalguna dificultá nel camín.

Perpasamos la fastera más entretenida de tol cordalín de L'Eyu

Enantes, pasaremos pel picu L'Eyu (1950 m) que da nome a tol cordal y pela col.lá'l Sendón que da aniciu a esi senderín tan prestosu, que dirá de forcadina en forcadina pela fastera norte, llibrando tolos torruxones d'esta fastera d'Entrexerras.

Salimos d'Entrexerras hacia'l picu Tonéu

Dende Entrexerras saldremos a senderu más amigable y cola gafienta visión de les pistes d'esquí, ascenderemos a la penúltima cume, la L.lomba de 1974 m, que ya fainos entrar dafechu na estación, pa facer l'ascensión final al picu Tonéu.

Cume nel Picu Tonéu (2093 m)

Lloñe de facese un trámite, tendremos un entepechu final pela arista SO del Tonéu que faise hasta un pelín pesada, cosa qu'escaezse namái aportar a los sos 2093 m y acolumbrar, nun de los díes más claros de vistes, tolos picos d'Europa y tolos montes del parque de Reres y Ponga... una auténtica pasada.

Descendemos del Tonéu hacia la Foya del Tubo

Pena del airín frescu, que lleva acompañándonos tol día, sinon yera pa tar tiraos mirando a lo llonxano durante hores... vaya día. Coles mesmes y con ganes de dir finando la ruta, descenderemos pel Tubo del Tonéu hacia la foya pa siguir per pista hasta'l mayéu Entrexerras.

Garramos una prestosa sienda baxo'l cordal de L'Eyu

Si siguiésemos per pista daríemos final en la Raya, pero nós queremos volver hacia'l Fielato y pa ello, alcontramos un senderu que dirá pembaxo de les muries de la Pena Blanca (1818) y siempre faldiando tol tiempu a mediu altor, ensin descender a les brañes del puirtu, empobinarános hasta la L.lana'l Fitu, onde sí qu'entamaremos a descender.

Facemos el tramu final pente los mozos fayeos de vuelta al Fielato

A partir d'entós, caleyaremos primeru pela campera de la L.lana, pa llueu restolar pente los gorbizos el meyor senderu que ya nun descensu más direutu dirá dexándonos nes camperes de la Fondona primeru y más tarde nes de Brañarreonda y el Fielato a la fín.

En resume... ruta mui a encomendar pa los aficionaos a los altos ayeranos, pudiendo facer d'una tiradina tola cuerda L'Eyu colos sos picos más nomaos, El Fuentes y el Tonéu nun percorríu de 15,5 km y 8 hores de camín, con un desnivel acumuláu positivu de 1180 m.

Camudando'l Camín pente brañes ayeranes

2 comentarios:

  1. Guapa ruta, Berto. La Cuerda l´Eyu fícela entera va milenta d´años desde el puertu Vegará. Güei tará eso ya con una bona capa ñeve.
    Un saludu

    ResponderEliminar
    Respuestas
    1. Tien que tar curiosu si... y como diba prestar nun día d'estos fríos y secos... crampones y piolé y a p'alantre.

      Berto Xuan

      Eliminar