viernes, 29 de diciembre de 2017

L'Altu la Farrapona (Somiedu) - Picu Blancu

26 de Payares de 2017

Track: L'Altu la Farrapona (Somiedu) - Picu Blancu


En toles rutes, siempre comento cual ye'l nuesu puntu de partida y como se llega hasta'l llugar, pero nesti día nun pudimos llegar hasta la Farrapona pola xelada na ñeve, jeje. De toes formes, ya sabéis que dende Xixón tenéis que garrar l'autovía "Y" en direición Uviéu pa siguir dempués pela As-63, hasta la salida de Cangas del Narcea. Equí tomaremos la As-15, travesando parte del conceyu de Salas y entraremos nel conceyu de Miranda, siguiendo pola As-227 hasta l'entamu del conceyu de Somiedu, Aguamestas.

Dende Auguasmestas pasaremos pelos pueblos de Xadriz, La Riera, Recueva y Castru, onde nel banzáu de la Malva, salimos pela SD-1, entamando camín pel val.le Saliencia, pasando per Veigas, Vil.larín, Arbeyales, Éndriga y Saliencia, onde facemos los restantes kilómetros hasta L'Altu La Farrapona o dellos cientos metros enantes, jeje.

Partimos del Altu La Farrapona (1707 m)


Magar de sacar tolos coches d'enmediu la carretera, dexándolos lo meyor posible, calzaos con piedres. Preparámonos pa caleyar nun día increyíblemente guapu, anque con ciertu esmolecimientu, por como vamos a algamar a sacalos d'ellí, si'l sol nun actúa como debería.

Arrodiaremos el L.lau la Cueva averándonos al val.le Calabazosa

Coles mesmes entamamos a caleyar pela pista qu'avérase hacia los l.lagos de Saliencia hasta que nel Altu'l Col.ladín daremos vista al l.lau La Cueva. Equí, desvíamonos pel senderu qu'empobínase pente les cabañes del Col.ladín y va sirvinos p'arrodiar el l.lau pela so manzorga. 

Les vistes son increyibles a los l.lagos de Calabazosa y Cerveriz

Les vistes, con un día tan claru, son ablucantes, poro vamos tomándolo con calma, aprovechando que pel momentu nun tamos garrando muncha ñeve y ábrese la buelga cenciello. Dexaremos atrás la Cueva y pasaremos a arrodiar tamién pela so manzorga'l l.lau Calabazosa.

Siguimos avanzando y ganando desnivel pela ñeve somedana

Perpasaremos la forcada Calabazosa que dános unes vistes de restallu sobre los dosmiles somedanos y siguiremos ganando desnivel empobinándonos hacia la mayada Calabazosa. Equí alcontrámonos coles l.lagunes xelaes y averámonos hasta la forcada'l Canalizu primeru y más tarde hacia la collada Cualmarce onde tendremos visión direuta de los nuesos oxetivos.

Nun tenemos muncho tiempu pa facer grandes xestes asina que tirámonos a pol Blancu

Pente pitos y flautes, bregando colos coches, salimos a caleyar tardísimu, poro llevo mirando la hora con cierto ruxerux na tiesta. Tenemos que sacar los coches del xelu y nun ta'l día d'esos que calienta enforma precisamente, poro pesie a tener en mente al menos facer dos montes, quédome col más cenciellu y decido ascender cola calma al Picu Blancu.

Ascensión al Picu Blancu con una ñeve nun estáu perfeutu

La xente va esfrutando con estes vistes y cola ñeve ensin bregar de más, poro facé-yos ascender a un picu tranquilu ensin poner nin tan siquiera crampones va ser perfeutu pa esti día. Asína lo facemos, abriendo buelga per una palina bien prestosa y buscamos la forma d'engolase n'arista cimera que ye finina y como en tolos montes d'esta fastera tien una cayida al sur que quita l'aliendu.

Picu Blancu (2063 m)

Entramos a la semeya grupal como podemos y ensin más, decidimos descender cola calma pela mesma buelga que tenemos fecha. Ensin problemes, facemos la pala apriesa y cuando alcontramos un requexu calentín decidimos parar a xintar.

Desfacemos camín pente la ñeve somedana

Demientres xinto asoleyando, tengo l'esmolecimientu de la furgo y del coche de Benjamín los cuales tenemos que sacar, pero tamién, nun tengo ganes de colar... toi mirando con calma pal picu Calabazosa, pa la peña Orniz que tan bones alcordances de gran actividá traeme a la memoria.

Adelantámonos los dueños de los coches implicaos nel marrón de xelu

Acabo de xintar y ante la finalización de l'actividá montañera, garramos Benjamín, Carlos y yo y adelantámonos col envís d'aportar lo antes posible por si tenemos que bregar col xelu pa intentar sacar los coches.

Por suerte, dempués de tornar so los nuesos pasos hasta L'Altu la Farrapona y descender carretera abaxo hasta los coches, el sol ficiera'l so efeutu, llimpiando la carretera. Aún así, tovía tuvimos que picar dalgo de xelu colos piolés pa sacar el coche de Benjamín de la cuneta, jeje.

Brutales vistes en la Farrapona

Cola carretera casi llimpia, xubimos a buscar al restu del grupu hasta L'Altu La Farrapona onde dimos por terminada esta primer, curtia pero mui guapa ivernal del añu. Los datos falen por si solos, namái que 4 hores y cuartu de ruta, superando un desnivel de 555 m y faciendo unos 10.4 km, pero non por ello prestónos menos qu'una muncho más llarga.

Camudando'l Camín no alto de Somiedu

No hay comentarios:

Publicar un comentario