viernes, 4 de agosto de 2017

Colláu Angón (Amieva) - Cantu Cabroneru

11 de Xunu de 2017

Track: Colláu Angón (Amieva) - Cantu Cabroneru


Seguimos con niveles de suerte ablucantes pal final de temporada del GM Xuan de la Borrina. Nesti casu, les nueses intenciones diben por conocer el nomáu traveséu de Peña Beza más l'ascensión al Cantu Cabroneru, pero como ya nos pasara na Travesera del añu pasáu, tuviemos qu'abortar la xera por mor del borrín.

Aún así, axuntáramonos un bon garrapiellu xente del grupu y con bon ánimu, entamamos a caleyar dende'l colláu Angón, onde ya tuviéramos va unos añinos p'ascender la guapa Porra Valdepinu. N'aquella ocasión tamien percorriéramos la trillada sienda del Arcedianu que si nun la conoces y ties bon día, ye agradable de patiar.

Cartelu del conceyu d'Amieva n'Angón (823 m)

P'aportar al aparcaderu d'Angón tenemos qu'aportar a Cangues d'Onís pel camín davezu dende Xixón y siguir pela N-625, pasando pelos pueblos de Cañu y Tornín, cruciando la ponte Dobra, pa entrar nel conceyu d'Amieva. Nesti conceyu travesaremos los pueblos de Miyares, Corigos, Pervís, La Vega Pervís onde topámonos col ríu Ponga nesti casu, y siguimos camín pasando per Santiyán, Precendi, Les Vegues, Campurriondi y Ceneya d'au saldrá a la manzorga la carreterina que xube hasta Amieva.

Al entamu del pueblu, sal una pista a la mandrecha, qu'empobinarános durante un llargu tramu hasta'l colláu Angón a 823 ms d'altor. Ellí como ya dixe, saldrá la sienda l'Arcedianu qu'aporta hasta Oseya de Sayambre.

Averándonos pel Arcedianu a Saubu

Na anterior ocasión tuviéramos un día perbono, poro encamiéntovos a ver les semeyes porque paguen la pena, poles vistes hacia la fastera más occidental del Cornión. Güei, caleyamos ensin ver gran cosa, pasando pelos collaos de Pandiella (1122 m) primeru y la Cantal (1138 m) dempués, pa baxar hacia'l mayáu de Saubu onde'l borrín metióse dafechu.



Ascendemos hacia'l Cantu Cabroneru per Valdeleslliñes

Dende equí, ya metíos nun eternu borrín, vamos empobinanos hacia la reiga de Valdeleslliñes, pela qu'ascenderemos con tranquilidá, siguiendo un marcáu senderu. Xusto nel intre de salir de la riega, perpasaremos les ñubes y tendremos uno d'esos momentos máxicos nel monte... el mar de ñubes.

Siguimos penriba'l borrín y del mar de ñubes hacia'l Cabroneru

Penriba les ñubes salen montes, como si fueran barcos, destacando'l cercanu Valdepinu, Ten y Pileñes y dellos otros. Demientres, damos la vuelta pa les semeyes y dar aliendu a los más retrasaos, siguimos xubiendo hacia'l senderu que vien de l'ascensión normal dende Peña Beza.

Facemos el tramu final hacia l'aerea arista pa ganar les meyores vistes

Una vegada que lu garramos, ya nun lo perderemos faciendo la canal final hacia l'arista, onde tendremos esi vacíu hermosu sobre'l Dobra y ganando les increyibles vistes de tol macizu del Cornión.

Semeya de grupu nel Cantu Cabroneru (2001 m)

Dende los 2001 m del Cantu Cabroneru, paramos un bon ratín a sacar semeyes y xintar cola calma, ya que teníemos mediu decidíu que con esti borrín afitáu solos 1700 m, yera imposible metese nel traveséu de Beza.

Descendemos esta vegada pel monte Berezosu

Coles mesmes, miro un pocu'l mapa y busco una baxada pelín distinta pa que la ruta nun seya tan coxa. Pa ello, vamos descender per un par de montes que préstanos conocer como ye'l Cadapozu primeru y más tarde'l de Berezosu, onde tendremos dalgún destrepe pente les fayes, pero sin mayores problemes.

Hasta xuntanos penriba Saubu a la sienda l'Arcedianu

Coles mesmes, aportamos a la fonte la Batuda onde enllazamos cola sienda l'Arcedianu y ya dende equí, caún al so ritmu y dependiendo del nivel d'aburrición de caleyar per un senderu empredáu nidiu y moyáu, dirá más apriesa o más despaciu.


Nel mió casu, aporté al colláu Angón de vuelta, dempués de 16 km de percorríu y unos 1200 m de desnivel acumuláu positivu, lo que me llevó casi 9 hores y media, lo que diz que nun mos matamos colos ritmos precisamente.

Aportamos a Angón enllenos de barru

Con esta ruta zarrábemos el calendariu oficial y anque'l final de temporada fué un pelín descafeináu poles condiciones meteorolóxiques, siempre que vayamos pente collacios y de bon rollu, paga la pena y eso ye lo más importante.

Ta la próxima...

Camudando'l Camín con vistes al Cornión

No hay comentarios:

Publicar un comentario