lunes, 6 de febrero de 2017

Suarías Blincapeñas (Valle Baxu de Peñamellera)

4 d'Avientu de 2016

Track: Suarias Blincapeñas  (Valle Baxu de Peñamellera)


Web del Trail: Suarias Blincapeñas

Clasificaciones: Clasificaciones 2016  


Una carrera más llévanos hasta'l Valle Baxu de Peñamellera y más en concreto al guapu pueblín de Suarías. Tamos a Domingu 4 d'Avientu y esta nueche durmí en Colombres, con Fernan, Amaia y Juanan, dempués de facer una increyible ruta per Cabrales nel cordal de Portudera.

D'esti xeitu, magar de una bona ruta nel día anterior, con un kilómetru vertical como ye la canal de Somas pa xubir y otru kilómetru vertical pa baxar per Calluenga, preséntome en Suarías a la que pueu dicir que ye la media maratón de montaña más téunica y posíblemente dura que fice pel momentu.

Salida dende Suarías

Saldremos los primeros kilómetros per pista, a unos ritmos mui potentes y cuando me doi cuenta voi a la par de Juan José Mier Mier, pastor de Picos y grandísimu corredor. Ehí, ye onde digo onde vas paisanu que más morrer.

Con camientos de lo muncho que se corrió al entamu, pasamos dempués a la primer xubida y mui llarga hasta'l Gamonal, qu'aparte de dureza tien un crestéu mui, mui complicáu. Asína que tolos sentíos puestos no que tamos faciendo y caltenemos el ritmu como meyor podemos.

Crestiando pela Gamonal
Fadré la primer baxada alcontrándome per bien, con bonos ritmos y según dixérenme en dalgún puntu, que diba na posición 25. Ésto dióme aliendu y siguí tirando, camentando que xubiera a lo más alto y que tendría que ser más relaxada la parte restante de la carrera.

Lloñe de ser así, tovía quedaben tres ascensiones más, qu'anque nun fueren mui llargues, pago con creces los altos ritmos de la primer parte de la carrera y les paso más putes que Caín, pero nun soi l'únicu ya qu'anque pierdo posiciones tamién soi a pillar xente, poro vamos toos bastante madurinos.

Bertín en llama tamién pela Gamonal

Si amestamos a los duros entepechos, unes baxaes gafes, pente praos de yerba llargo o de tramos con caliza onde nun se ve onde pisar, faise imposible recuperar sensaciones y coles pates cargaes, cometer erros y mancáse ye cenciello.

Durísimos entepechos finales que machucaben al más pintáu

Alcuérdome bien de la fotógrafa (Leonor Sanchez) de la última semeya que fué la que me comentó qu'entá quedaben tres xubides más y madre mía, que mal que lo pasé y que cansadísimu aporté a esta IV Blincapeñas de Suarías.

Últimu esfuerzu hacia la meta


Al final, puestu 50 en 3 hores y 19 min y ye que tovía nun soi a regulame bien nes carreres y alterno momentos de muncha soltura corriendo con tramos de pasalo mal. Eso sí, la comidina de dempués fué gloria y en xeneral l'ambiente que vivíase en Suarías dan ganes de repetir.

Como siempre dar les gracies a tolos fotógrafos de les carreres: (Jose Luis Lastra, Jose Manuel Menendez Suarez, Antonio Alvarez Moradiellos.

Camudando'l Camín nel Blincapeñas

2 comentarios:

  1. Coime, ¿yeres el 1?. Por esta fasteru nun conzco na. Voy pillar el track la carrera y echa-y un güeyu por si presta pa facer una ruta por allí. Por ciertu, Luis Lastra ye del pueblu la mi muyer. Va a toes les carreres y ye el que fae, entre otres coses, les semeyes de los escolinos nel pueblu, entre ellos a la fía.
    Un saludu

    ResponderEliminar
  2. Pa dir de monte tranquilamente ye guapu aquello, como cualesquier cordalín de la parte baxa de Picos o costeru tipu Cuera. Difícil d'andar pero con llugares guapos, guapos. Pasa que pa correr hubo tramos que tela jaja. Lastra ye un crack... toles carreres animando y sacando unes semeyes brutales. Lo del númberu 1 fué aneudóticu, paezme que pol apellíu jeje.

    Un saludu

    ResponderEliminar