miércoles, 22 de febrero de 2017

Carcarosa (Mieres) - Picu Polio

14 de Xineru de 2017

Track: Carcarosa (Mieres) - Picu Polio


Un vienres cualesquiera a una hora cualesquiera, por exemplu a los dos de la mañana y con tres pintes de cerveza mínimu, decidimos Haritz y yo, salir a dar un paséu y pisar un pocu de ñeve, poro a eses hores de la madrugada póngome a buscar pa onde tirar.

Ya va tiempu que tenía pendiente xubir al Picu Polio en Mieres y sabiendo que pela fastera norte ye una mina a cielu abiertu, que meyor qu'aprovechar la ñevada pa ver esti monte estrozáu un pelín más guapu.

Partimos de Carcarosa (684 m) col día mediu orbayando

martes, 21 de febrero de 2017

Arnedillo (La Rioxa)

6 de Xineru de 2017

Segundu día de viaxe pela Rioxa, dempués del intensu primer día nel que conocimos Recuevas en Palenciay siguiéramos camín hasta Ezkarái, onde taríemos de vinos y dando una vueltina con unes temperatures realmente xélides.

Aportamos a Arnedillo onde'l Frontón llama con fuercia l'atención

Al día siguiente, madrugamos un pelín y metémonos una kilometrada fina, pa tar a primer hora n'Arnedo onde tenemos la maraviyosa idega d'entrar nel primer día de rebaxes nel Más por Menos, o lo que ye lo mesmu metese na boca'l llobu.

Averámonos al seutor del Colláu a facer dalguna viuca por pasar la tarde

Con tola mañana perdida pente mercar ropa montuna, playeros y demás, llegaremos a Arnedillo, col tiempu xustu de xubir a conocer la escuela enantes de que'l sol un día más escápese y les temperatures caigan pembaxo los 0 graos.

El sol cola ceo y nun queda otra qu'escapar d'ellí por mor del fríu

Xubiremos hasta'l Collado, onde malamente facemos unes 3 víes por dicir que tuviemos na escuela, baxando con abonda desgana a conocer les agües termales. Nun alarde de valentía, ponémonos el bañador y metémonos nes poces onde adormecemos nel calorín, espertando de sopitu namás que sacabes cualesquier parte del cuerpu del agua.

Camudando'l Camín caleciendo nes agües termales d'Arnedillo

Un día más, colamos con ganes de tar más tiempu nes escueles, pero bono ye lo qu'hai, los viaxes programaos de visites, dalgo de folixa y escalada dan pa lo que dan y en plenu iviernu, quédase un pelín curtiu.

Tiempu tendremos a preparar otru viaxe más calmao...

Arnedillo (Seutores visitaos)
Croquis modificaos por mi de la escuela d'escalada d'Arnedillo, por mor de Escalada en la Rioja II onde tan actualizaos seutores y croquis... les modificaciones va sobre'l primer llibru que podíase alcontrar pela rede. Munches gracies pol trabayu y col so permisu.

Recuevas (Palencia)

6 de Xineru de 2017

Con un tiempu fríu como casi nun m'alcuerdo, decidimos dir pasar el finde hasta Ezkarái. Ellí, tenemos agospiu por cuenta del collaciu Haritz, asina que día de reis, peros somos republicanos, día de fríu, pero esisten los plumes... tiramos p'alantre.

Pueblu de Gama... cola escuela homónima detrás y cola perguapa capiya

Como hai una tirada llarga hasta la Rioxa, ficimos una paradina en Palencia y más en concreto, en Gama, un pueblín, mui guapu hai que dicilo, cerquina de Aguilar de Campoó, onde faen les galletes y eses coses.

Caleyando hacia la foz col camín xeláu dafechu

Almorzaríemos con calma enantes en Reinosa, onde les cais taben dafechu xelaes y dempués ya tiramos hasta Gama. Esti pueblu, pequeñu pero con ciertu encantu y una capiya románica perinteresante, tien dos escueles d'escalada pegaes, Gama y Recuevas.

Hai llugares guapos pa esguilar y pasar el día y llueu ta esta foz

Nós, decidímonos por Recuevas y desficimos camín, un kilómetru hasta'l crucie onde sal la pista hacia la foz de Recuevas. El camín taba xeláu enforma, por mor de los -2 graos qu'habría a la solombra, menos mal qu'al solín tovía podía aguantase.

Toles orientaciones posibles... sol y solombra dependiendo la dómina del añu

Según vamos caleyando baxo los milenta seutores que tien esta escuela, vamos ablucando, ya que'l llugar ye guapísimu, tan sólo dar un paseín per esta foz ya paga la pena. Aún así, díbemos con ganes d'escalar un puquiñín, sin grandes pretensiones pero un puquiñín sí.

Zori y Richar dende riba... apretando un pocu

Al final, tiramos pal seutor Cuartos, onde efectivamente hai munchos cuartos, anque la roca como suel pasar nes foces formaes per ríos, ye un pocu pulída y pocu adherente y el grau ta pelín apretón, lo que nun quitó pa que toos esguilásemos hasta que la solombra nos alcanzó y nun había quien parara.

Y Richar dende baxo apretando munchísimu más jeje

Salimos a escape pa los parés d'enfrente onde sol tardaba menos en colar y ellí, nel seutor Sol de Invierno, tuvimos a gustu una horina más aproximáu, faciendo dos o tres víes más. La verdá ye que quedamos con munches ganes de pasar un día con más calma así qu'habrá que volver porque como mínimu el llugar ye precioso.

Recuevas
Croquis modificaos por mi de la escuela d'escalada de Recuevas, por mor de David Villegas y la Diputación de Palencia .Munches gracies pol trabayu y col so permisu.

miércoles, 15 de febrero de 2017

Bueida (Quirós) - Puertu Güeria - La Cigacha - Puertu Ventana - Torbaniel.lu

11 d'Avientu de 2016

Track: Bueida (Quirós) - Puertu Güeria - Cigal.la - Puertu Ventana - Torbaniel.lu


Última ruta del añu 2016 del GM Xuan de la Borrina, pero por dalgún motivu cayóse de la convocatoria mediu mundiu y pensándolo bien, pa esta ruta qu'escoyimos en cuestión, casi que nos xuntamos muncha más xente... nun sé como podría acabar la cosa.

A la fín, allá que fuímos Haritz y yo, más Pepa y Jóse que tan finando tolos dosmiles del macizu de Penubina y venía-yos al pelo acompañamos a esta ruta. Ye más, Pepa posiblemente seya la primer muyer que faiga los 58 dosmiles lo que presta más tovía.

Digo que salimos de Bueida en Quirós, pero na realidá xubiremos colos coches dos kms alantre pela pista qu'aporta al Puertu Ventana pasando per Torbaniel.lu, hasta una curva a la mandrecha onde hai bon sitiu p'aparcar y que nómase Les Garrafes.

Salimos dende Les Garrafes (922 m) cerquina de Bueida

miércoles, 8 de febrero de 2017

Monsacru - Otura (Morcín)

21 d'Ochobre y 9 d'Avientu de 2016

Pues unos meses dempués tornamos hasta Otura en dos ocasiones realmente especiales, siendo la primera facer la vía de cuatru llargos Sin Perdón. Pa ello, xuntámonos Alberto, Marie y yo, nuna tarde de tiempu agradable, pero de lluz escasa.

D'esta manera, metímonos a trepar, magar de salir del trabayu, aportando al pié de vía y poniéndonos al llabor lo más apriesa posible. Preparamos trastos y salgo al primer llargu, esperando que'l dolor de pié nun fuera pa muncho.


Faigo'l primer llargu nun tris y sal Marie al ataque nel más duru (6a+) y como ta más fuerte que'l vinagre nun tien mayores problemes, saliendo dempués Alberto y yo, dándome cuenta que ye un llargazu guapísimu con metros y muncha calidá, poro, quiero repetir esta vía de xuru.

Llueu salgo al tercer llargu, de V+, mui curiosín, más navegable que'l primeru y al caberu llargu métese Marie, tamién mui entreteníu, pa montar el rapel y tirar p'abaxo col atapecer amenazando. Otru rapel más, na segunda reunión y hasta'l suelu, pa descender a pata per un camín que nun ye mui evidente pero faise mediánamente bien hasta'l seutor de Mar Antiguo.

Silvia volviendo a trepar con mui bones sensaciones

Y per últimu, el segundu día que torné en 2016 per ellí, fué pa reecontrame con Silvia, la primer pareya de cordada cola qu'entamamos nesto de trepar, dempués d'un cursín de la Fempa allá pel 2009 lo menos.

Llevábemos ensín venos tres años y casi los mesmos ensin trepar ella, pero nun perdió res y merendóse tolos quintos de Capitán Garfio como si nun lo dexara enxamás. Prestó trepar de nuevu xuntos, relaxáu pela mió parte, al sol y cola calma, anque ella tuviera qu'apretar un pelín más.

A siguir esguilando...

Monsacru - Otura (Seutores visitaos)

Croquis modificaos por mi de la escuela d'escalada d'Otura, por mor de Piratas Free y el grupu del facebook d'Escuela d'Escalada del Monsacru. Gracies y col so permisu.


---------------------------------------------------------------   

lunes, 6 de febrero de 2017

Suarías Blincapeñas (Valle Baxu de Peñamellera)

4 d'Avientu de 2016

Track: Suarias Blincapeñas  (Valle Baxu de Peñamellera)


Web del Trail: Suarias Blincapeñas

Clasificaciones: Clasificaciones 2016  


Una carrera más llévanos hasta'l Valle Baxu de Peñamellera y más en concreto al guapu pueblín de Suarías. Tamos a Domingu 4 d'Avientu y esta nueche durmí en Colombres, con Fernan, Amaia y Juanan, dempués de facer una increyible ruta per Cabrales nel cordal de Portudera.

D'esti xeitu, magar de una bona ruta nel día anterior, con un kilómetru vertical como ye la canal de Somas pa xubir y otru kilómetru vertical pa baxar per Calluenga, preséntome en Suarías a la que pueu dicir que ye la media maratón de montaña más téunica y posíblemente dura que fice pel momentu.

Salida dende Suarías

Saldremos los primeros kilómetros per pista, a unos ritmos mui potentes y cuando me doi cuenta voi a la par de Juan José Mier Mier, pastor de Picos y grandísimu corredor. Ehí, ye onde digo onde vas paisanu que más morrer.

Con camientos de lo muncho que se corrió al entamu, pasamos dempués a la primer xubida y mui llarga hasta'l Gamonal, qu'aparte de dureza tien un crestéu mui, mui complicáu. Asína que tolos sentíos puestos no que tamos faciendo y caltenemos el ritmu como meyor podemos.

Crestiando pela Gamonal
Fadré la primer baxada alcontrándome per bien, con bonos ritmos y según dixérenme en dalgún puntu, que diba na posición 25. Ésto dióme aliendu y siguí tirando, camentando que xubiera a lo más alto y que tendría que ser más relaxada la parte restante de la carrera.

Lloñe de ser así, tovía quedaben tres ascensiones más, qu'anque nun fueren mui llargues, pago con creces los altos ritmos de la primer parte de la carrera y les paso más putes que Caín, pero nun soi l'únicu ya qu'anque pierdo posiciones tamién soi a pillar xente, poro vamos toos bastante madurinos.

Bertín en llama tamién pela Gamonal

Si amestamos a los duros entepechos, unes baxaes gafes, pente praos de yerba llargo o de tramos con caliza onde nun se ve onde pisar, faise imposible recuperar sensaciones y coles pates cargaes, cometer erros y mancáse ye cenciello.

Durísimos entepechos finales que machucaben al más pintáu

Alcuérdome bien de la fotógrafa (Leonor Sanchez) de la última semeya que fué la que me comentó qu'entá quedaben tres xubides más y madre mía, que mal que lo pasé y que cansadísimu aporté a esta IV Blincapeñas de Suarías.

Últimu esfuerzu hacia la meta


Al final, puestu 50 en 3 hores y 19 min y ye que tovía nun soi a regulame bien nes carreres y alterno momentos de muncha soltura corriendo con tramos de pasalo mal. Eso sí, la comidina de dempués fué gloria y en xeneral l'ambiente que vivíase en Suarías dan ganes de repetir.

Como siempre dar les gracies a tolos fotógrafos de les carreres: (Jose Luis Lastra, Jose Manuel Menendez Suarez, Antonio Alvarez Moradiellos.

Camudando'l Camín nel Blincapeñas

sábado, 4 de febrero de 2017

Arenas (Cabrales) - Somas - Cabeza Llamedu - Calluenga

3 d'Avientu de 2016

Track: Arenas (Cabrales) - Somas - Cabeza Llamedu - Calluenga


A primeros d'Avientu cayeren delles ñevadines curioses y con un pocu fríu, tovía quedaba pelos altos, poro decidimos buscar una cota que nun fuera mui alta pero que diera munchu xuegu a la hora de tener bones vistes.

Portudera, yera perfeuta y les canales que la percorren yeren la cuenta, asína que tiramos p'Arenas en Cabrales pel camín davezu dende Xixón: Autovía'l Cantábricu hasta'l desvíu de Posada y dende ellí hacia l'Altu H.ortigueru pa baxar per Canales, Carreña, Po y Arenas onde almorzamos como tamién ye vezu.

Partimos d'Arenas (139 m) en Cabrales

miércoles, 1 de febrero de 2017

Cubiel.las d'Arbas (L.luna) - Peña La Barragana

27 de Payares de 2016

Track: Cubiel.las d'Arbas (L.luna) - Peña La Barragana


Pues ellí tábemos un añu más, nel segundu Alcuentru de Blogueros AsturLlioneses, nel que participaron una carrapetada de blogues de gran interés pa tola xente que nos presta, estes cosiquines d'andar pel monte y conocer llugares guapos y apartos solo al alcance de los que son a movese del putu sofá.

Asina, que nun podíemos faltar y acudimos a la llamada de los collacios de Cotoya Pindia, onde como podéis comprobar, tuvieron a bien, currase un reportaxe como ta mandáu, facer tol trabayu pa que tuviéramos a gustu tolos aconceyaos y facer d'enllaz pente tolos blogueros qu'entá nun mos conocíemos.

Semeya de grupu na Xuntaza de Blogueros del 2017 por Cotoya Pindia