jueves, 19 de enero de 2017

Puirtu Braña (Ayer) - Picu Valmartín

13 de Payares de 2016

Track: Puirtu Braña (Ayer) - Picu Valmartín



Día de monte col GM Xuan de la Borrina dempués de la primer ñevada de la temporada y ye qu'anque retrasóse un pelín... siempre dicen que pa Tolos Santos, Ñeve nos Altos y cumplir, cúmplese, anque llueu se tiro tol mes d'Avientu ensin cayer gota y con un tiempu casi primaveral.

Pero nesi sen, nun fue'l nuesu día, ya dempués de la ñevada tocó una selmanina perbona de bon tiempu que la xente que por selmana pudo aprovecha hasta-y dió pa facer corredores cenciellos, pero a nós, como siempre, tocónos dir de finde y con un día perruno al máximu.

Salimos pelín más baxo del Puirtu Braña (1488 m)

Pa onde tiramos? Pues pal Puirtu Braña, nomatu dende la fastera asturiana o San Isidro dende la llionesa. Yo prefiero quedame col nome llocal astur y como siempre p'aportar al Puirtu Braña, que vien del ríu Braña, fadremos el camín dende Xixón pela Minera hasta Mieres del Camín pa siguir hacia L.lena, desviándonos pel corredor del Ayer.

Nesta carretera pasaremos pelos pueblos ayeranos de Morea, L'Escuyu, Los Estrul.lones, Cabanaquinta onde garraremos la AS-253 pasando por L.levinco, Entepenes, Col.lanzo, Yanos, La Pola Vieya, el Pino y Felechosa onde almorzamos y siguimos camín hacia'l Puirtu Braña pasando enantes por Cuevas, Roseco, Rufríu, El Fielato y La Raya.

Caleyamos per un claru senderu pegaos a la riega'l Llagu Las Piedras

Pente'l borrín y con fríu abondo aportamos al Puirtu Braña y baxaremos un pelín hasta la urbanización de San Isidro ya en tierres llioneses. Dexaremos el coche nel aparcaderu y saldremos per detrás de los edificios a la gueta d'un senderu que tien que percorrer la vega de la riega del Llagu Las Piedras.

Nun voi estendeme no guapu que pueden llegar a ser esta fastera, ya que nun vimos res y nun ye la primer vegada qu'ando per equí col tiempu pilláu con pinces como'l día de les Rapaínes. Otres tuviemos más suerte como va bien d'años ya, n'ascensió a la Peña'l Vientu.

Superamos dende'l ñacimientu una muria rocosa

El casu ye que con una ñeve paposa, que ya nos decía a les clares que tábemos pelín equivocaos en bregar nel día de güei, ficimos camín al llau de la riega, que baxaba con bon nivel d'agua allegrando la vista colos pequeños tabayones, fuimos a terminar de percorrela y plantanos nuna amplia mayada zarrada con unes muries rocoses y onde ñaz la propia riega Las Piedras.

Aportaremos a esti puntu y buscaremos el puntu más feble pa superar les muries, alcontrándonos un camín armáu, pero estráu de ñeve que fizo que l'ascensu fuera durísimu, fundiéndonos hasta'l cadril de pasu en pasu hasta que salimos a la parte alta d'esta especie d'anfiteatru.

Facemos una llarga xubida pela panda'l Picu Valmartín

Entrarermos agora nuna especie de cincha a mediu altor pente los valles y los altos cumales, na que caleyaremos con calma de cara a afrontar l'ascensión final al Picu Valmartín. Podríemos dir xubiendo hacia la collada Valmartín, pero casi ensin querer vamos ganándo-y tarrén al picu y ascendemos pela llomba averándonos al propiu cumal.

Magar de superar un últimu esfuerzu, en forma de trabe, fadremos l'arista cimera hasta'l cumal plantándonos nos 1926 m del picu Valmartín dempués de dos hores d'allegre caleyar, abrir buelga y demás hestories que siempre toca facer.

Encumamos el Picu Valmartín de 1926 m

Nun paramos gran cosa y seguimos col envís de facer el restu la cordelera que dixebra los paises astur y llionés. De primeres nel menú tocónos descender hasta la Raya Valmartín (1819 m), faciéndolo per una arista preciosa de bona ñeve formada per un trabe continuu que daba un toque alpinu al caleyar.



Siguiremos camín pela Raya Valmartín hacia'l Porru Blancu (1863 m)

Llueu, ascenderemos cenciello hacia'l Porru Blancu, cumal de 1863 m que nun algama la categoría de monte como tal, siendo namái qu'un hombru separtáu pela raya Fontaniella, d'un monte de mayor altor, que va facenos apretar un pocu más hasta los 1880 m del Picu L'Arenal.

Pasaremos pel picu L'Arenal (1880 m) hacia la fonda Raya la Bueya

De secute, tendremos la mayor baxada del día nesti crestiar y sedrá hasta'l puntu de ver desapaecer la ñeve nos 2001 m de la Raya la Bueya. Nesti puntu, camentamos que facer ya que la verdá ye que tábemos pasando fríu y nun disfrutando de vistes, poro nun pagaba la pena siguir nestes condiciones.

La idega yera baxar, pero nun veíemos res, nun sabíemos si tendríemos otra muria pa baxar de la cincha intermedia, asína que decidimos siguir pel track que teníemos preparáu hasta que'l borrín amatagase y pudiésemos decidir con más seguridá.

Ascendemos nun últimu esfuerzu el Entrepicos (1860 m)

Lo malo ye que pa siguilo, tuviemos que fartucanos con un otru cumal, más como yera'l monte Entrepicos y esti diba llevanos una ascensión d'otros cien metros de desnivel, lo cual dempués d'hores fozando pela ñeve blando ya cuesta.

Ensín da-y muncha importancia y con cierta mala lleche por nun poder esfrutar de les vistes de Reres ende lo alto, encumamos l'Entrepicos y fuimos siguiendo cuerda alantre, avanzando pente peñes nomaes comos los Dientes onde decidimos parar un pelín a xintar, ya que Benjamín necesitaba reponer fuercies.

Pasaremos pelos Dientes y Los Negros pa baxar del Trabe a la pista

Magar de picar dalgo rápidin, porque nun había quien parase de cutu siguimos hacia les peñes de los Negros y pocu más alantre al altor de la fonte'l Trabe, ensín aportar al colláu L'Acebal, garramos la riega formada per esta fonte y descendimos direutamente a la pista Wamba la cual veíemos delles decenes de metros pembaxo.

Una vegada que ganamos la pista, anque por tramos tuviera ñeve abondo, avanzaremos apriesa percorriendo tol valle Los Fornos, casi ensin parar a mirar siquiera, pal suelu o pal cielu, qu'a bones hores paecía querer abrir.

Facemos tola pista'l Valle Los Fornos con tranquilidá hasta'l Puente Wamba


Percorreremos animaos tola pista charrando de mil coses y ye qu'un día que se sal de monte nunca ye perdíu, siempre ye un día ganáu a la vida y la rutina na qu'andamos empozaos nes nueses vides. D'esti xeitu, toparémonos na ponte Wamba cola carretera que vien dende Isoba hasta'l Puirtu Braña y diremos siguiéndola hasta aportar al aparcaderu onde dexamos los coches.

En resume, nun tuviemos suerte col día, nun vimos res, pero salimos en bona compaña a catar la primer ñeve del añu, Kíla pasólo bomba fozando pela ñeve, la cual paez ser cada día más la so dómina del añu prefería y por facer, pues caleyamos dalgo: 11,6 km y 715 m de desnivel acumuláu en 5 hores y 50 min.

Otru día más y con meyor tiempu... ta la próxima

Camudando'l Camín con Kíla... la perra de les ñeves

No hay comentarios:

Publicar un comentario