martes, 17 de enero de 2017

Caldas (L.luna) - Foz del Pincuejo - Cirbanal

2 de Payares de 2016

Track: Caldas (L.luna) - Foz del Pincuejo - Cirbanal


Nueva ruta del GM Xuan de la Borrina, na que díbemos axuntanos al Baskonia Mendia Taldea, que ya llevaba dellos díes faciendo monte per Asturies. Na so última ruta, fuimos cola intención al menos de saludanos al entamu y final de la ruta, ya que llevábemos diferentes percorríos.

Quedamos nel pueblu de Caldas en L.luna, conocíu, aparte de por tener un balneariu y un área de serviciu del Güerna cara enforma, por alcontrase na so parte final del pueblu con una guapa Foz, la del Pincuejo, onde los escaladores puen facer metros en delles víes de calter alpín.

Grupín de paisanos a les afueres de Caldas (1141 m)

P'aportar a Caldas, saldríemos de Xixón pela Autovía Minera pa siguir dende Mieres del Camín hacia Llión pela A-66, pa metenos n'autovía del Güerna teniendo que pagar cinco euros y dalgo pa salir nel desvíu a Vil.lablino. Ellí, daremos vuelta p'atrás pela carretera que va al llau del banzáu de Barrios empobinándonos hacia'l pueblu de Caldas

Esti pueblu, asítiase baxo los paredones sur de les peñes Xenestosa y del Altu La Silla, dixebraes pela nomada foz del Pincuejo. Como somos dalgo más madrugadores que los collacios vascos entretenémonos dando cuatru pataes a un balón que teníemos pel maleteru, hasta qu'aporten nun autobús de luxu y dedicámonos a facer los saludos y abrazos de turnu.

Vamos adentrándonos na Foz del Pincuejo na parte transitable

Magar de la semeya en conxuntu, salimos caún pal so llau, yendo'l Baskonia hacia un llargu bordéu de la de la faldera del Altu La Silla pel Este y nós saliendo penriba'l pueblu hacia la Foz del Pincuejo, onde aparte de topanos coles paredes onde alcuéntrese les víes, tenemos la suerte d'alcontrar el cursu'l ríu secu.

Esto significa, que pierde un pocu d'interés de cara a semeyes guapes, pero tendremos más cenciello transitar penmediu la foz sin tener qu'andar llibrando poces y pequeños tabayones. Avanzaremos pela propia riega ensin mayores problemes, topándonos con pasos bien guapos, hasta un saltu vertical con unes peñes empotraes, onde tendremos que trepar y portiar a Kíla que-y queda mui grande la trepada.

Salimos a la segunda parte de la Foz del Pincuejo

Penriba del bloque empotráu, alcontramos una instalación de rapel de los barranquistes y entraremos nun tramu ampliu de la foz, pel que caleyaremos per una llera que baxa dende la canal de la Cabra que tendremos de tomar p'ascender hacia los collaos del mesmu nome.

Enantes, vamos dir conocer la parte más fonda y téunica de la foz, conocida como L'Apretadura, onde los parés zárrense casi tocándose y les dificultaes aumenten, nun pudiendo continuase per ella, ya que tenemos un champán que fai necesariu bañase y el saltu ye dafechu imposible d'ascender anque si de descender con material. 

Vamos conocer la parte más fonda de la Foz del Pincuejo conocida como L'Apretadura

El sitiu préstanos enforma y ya tenemos más que pensáu, facer esti barrancu pa cuando'l sol caleza con fuercia ya que tampoco albidramos rápeles mui complicaos. Asina que pudiera ser un bon barrancu pa pasar una mañana y adientranos nesti mundiu.

Saldremos p'atrás y garraremos la canal que comentamos anteriormente y pela qu'ascenderemos nun pindiu tarrén. Dicir que ye un tramu perguapu de la ruta, saliendo de la foz y metíendonos nesta canal encaxonada pente dos parés verticales.

Ganamos dalgo más de 200 m de desnivel per esta canalona

Con esfuerzu aportaremos a la parte alta, onde podremos tomar aliendu, beber agua y camudaremos un pocu de xeitu na ruta, teniendo un tramu de travesía d'un colláu a otru no que nómase como los pasos de la Cabra.

Equí, ábrense les vistes ya intentamos acolumbrar per onde andarán los collacios vascos, anque nun somos a ello. Siguiremos a lo nueso, siguiendo de colláu en colláu, superando pequeñes canales, con pasos empedraos en dalgún puntu y meterémonos pembaxo de tola arista que vien dende la Peña Xenestosa.

Entamamos una llarga travesía baxo la Peña Xenestosa

El siguiente tramu sedrá'l más repunante del día, faciendo una guapa traviesa baxo l'arista, na que piérdese de continuu'l bon camín y siempre hai que dir d'un senderu de robezos a otru, tornándose un pelín cansino'l caminar.

Unos más altos y otros más baxos, diremos ganándo-y altor al cordal hasta xuntanos p'algamar el colláu Los Bueis de 1950 m que da pasu ascender la primer cota del día, la Peña los Bueis, la cual regálanos dalguna trepadina.

Facemos cumal nos 2038 m de los Bueis y siguiemos pelos Estribos

El día nun acaba d'acompañar y les ñubes y un vientu fríu tan faciendo que nun temos tan a gustu como camentábemos al entamu del día. De toes formes, quédanos pocu, anque'l terrenu onde nos movemos nun dexa avanzar mui rápidu y vemos a lo lloñe como'l grupu vascu ya casi ta nel cumal del Cirbanal... oxetivu cimeru del día.

Crestiaremos un puquiñín de los Bueis hacia los Estribos, teniendo llueu que destrepar pente dos de los cumales de los Estribos. Nun vemos mui claru un destrepe más direutu y descendemos hacia la fastera de Fontanales, bordiando l'últimu cumal de los Estribos y más guapu mirándolo dende'l Este.

Danos por trepar a los Estribos (2026 m) per una guapa y pindia terraza

El grupu pasa ya de intentar ascendelu, pero Richar y yo nun mos resistimos y trepamos per una pindia terraza, que tien dellos pasinos aéreos depende per onde nos metamos, pa facer ya caleyando el restu d'arista hasta'l cumal de 2026 m.

Como siempre decimos, taba ehí y había que xubilo, pero malpenes tien colláu valoratible respeutu a los Bueis, asína que tampoco tien muncha importancia. Destreparemos coles mesmes, con más cuidadín que pa xubir y salimos a fueu hacia'l siguiente finxu del día... la Peña la Silla.

Pasamos pela Peña La Silla nel nuesu andar hacia'l Cirbanal

El restu'l grupu llévanos un pedacín de ventaxa y cuando aportamos a la Peña La Silla (2069 m) vemos como tan nel colláu col Cirbanal charrando con Fernan que ya van de retirada, ya que'l día nun ta pa tar muncho paráu nel cumal.

Entainaremos y falaremos con Fernan casi a glayíos, ascendiendo nun tris al Cirbanal (2077 m) onde xuntámonos toos, pa facer la semeya de cume, abriganos y tar un ratín intentado xintar con calma o al menos cola calma que'l vientu fríu nos dexa tar.

Cume nel Cirbanal de 2077 m

Pa cuando sentimos que tamos quedándonos fríos, colamos del Cirbanal, ensin ver gran cosa ya que púnxose'l cielu murniu y baxamos hacia'l colláu cola Silla, onde garraremos una canalina pela que diremos buscándonos la vida pa garrar el senderu más curiosu y descender hacia la Vicheriza onde ñaz la riega'l Pincuejo.

Aportaremos al mayáu de la Vicheriza, onde alcuéntrase dalgún restu de cabaña y hai fonte pa siguir per siendes cómodes, pembaxo tol cordal que percorriéramos enantes, empobinándonos de nuevu hacia los Pasos de la Cabra.

Descendemos hacia los praos de la Vicheriza

Percorreremos nel sen contrariu los collaos y canalinos de los Pasos de la Cabra, aportando a la forcada a la salida de la canal. Ellí, buscaremos siguir un senderín, que tien de dexanos baxar al traviés de vallines, pasando d'una a otra travesando dalgún espolón.

Nun se fai cómodu y a tramos toca movese per tarrén amestáu de peña, llera y vexetación hasta topar una clara canalina con llera, pela que baxaremos hacia los Barriales, onde vemos a lo baxo sebes de praos qu'anguaño alcuéntrense enllenes de rosales silvestres.

Descensu hacia Caldas a pinchu pente la Vallinona y la foz

Ensin más vamos alcontrando camín y na baxera ya alcontreremos un claru senderu que tien de devolvenos al entamu de la foz, aportando a la mesa de merenderu onde ya tan sólo tenemos que siguir la pista hacia'l pueblu de Caldas, onde tovía teníemos que saludar al Baskonia y tomar una cervecina con ellos.

En resume, ruta con dellos tramos distintos, quedándome cola parte de la Foz del Pincuejo y tol ascensu hasta los Pasos de la Cabra como lo destacable. Aún así, queda una ruta mui completa coles ascensiones que llevónos un total de casi 7 hores pa facer los 12 km y 1385 m de desnivel positivu algamáu.

Camudando'l Camín nel tardíu llionés

7 comentarios:

  1. Buena ruta que me apunto para cuando la hagamos, porque estar, estaba para este año 2016, pero al final, no hubo días para tanto. Llamáranos mucho la atención esa subida por Pincuejo que viéramos en algún reportaje aislado, pero ahora que te la veo, entiendo por qué, tiene pinta de tar entretenida.
    Saludos!

    ResponderEliminar
  2. Si, da un toque divertíu a la ruta y si nun hai muncha agua solo tendría un par de pasinos de trepada na foz.

    Un saludín

    ResponderEliminar
  3. Hicimos la ruta casi igual, excepto la foz en julio del año pasado. No teníamos muchas referencias de la foz, pero sí habíamos visto algunas fotos haciendo barranquismo y pensamos que tal vez no podríamos pasar fácilmente sin mojarnos o rapelar.. Ahora vemos tú repor y hasta Kila pudo pasar con ayuda!! Es una foz que nos atrae, habrá que volver para ver si la cogemos con menos agua. Excelente actividad!! Abrazos Berto!!

    ResponderEliminar
  4. La verdá ye que se pasa bien... tengo ganes de facela en direición contraria jeje. Habrá que descenla... porque'l tramu de L'Apretadura tien una pinta brutal.

    Saludos

    ResponderEliminar
  5. Joer... tengo esta rutina pendiente ya dende fai años!! Qué pasada. Non quita unu el gueyu cuando lo ve dende l'autopista. Dime: con desxelu puede subise si baxa augua en demasia? Necesitase material d'escalada?

    Gracias !

    ResponderEliminar
  6. Ye meyor dir en tiempu de seca... y sabéi que nun ye transitable (montañeramente falando) entera... de L'Apretadura p'alantre nun se pasa si nun ye moyándose (eso lo primeru) y dempués veo difícil la progresión pol altor de les parés y les poques posibilidaes d'agarre... por eso dempués del primer tramu que tien una trepada per bloques empotraos más espectacular que difícil se sale a los Pasos de la Cabra pola pindia canal que comento.

    Pero con agua en desxelu yo creo que nun se pasa... hai un tramu mui secu pero estrechu nel que'l calce estréchase... difícilmente se llibraría sin moyase.

    Quedé con ganes de descendela entera... habrá que probar esti branu jeje

    ResponderEliminar