martes, 3 de enero de 2017

Bejes (Cillórigu de Llébana) - Picu Samelar

9 d'Ochobre de 2016

Track: Bejes/Beyes (Cillórigu de Llébana) - Picu Samelar


Dempués d'un día trepando per Cuevas y durmir de camping en Llanes, llevantámonos prontín pa dir hasta Unquera onde xuntámonos tol GM Xuan de la Borrina col envís de facer monte. Como ye vezu, garraríemos l'autovía'l Cantábricu dende Xixón, pa dempués d'almorzar siguir pela N-621 en direición al desfiladeru de la Hermida, pa nel pueblu de la Hermida desvianos hacia'l pueblu de Bejes.

L'accesu a esti pueblín, nun pue ser más espeutacular y conduzco ensin poder parar de mirar pal valle del ríu Corvera, a través del cual avanza la carretera unes vegaes a un llau del ríu y otres al otru, hasta aportar a Bejes/Beyes, nomáu pueblu por facese'l quesu Picón.

Partimos del pueblu de Bejes (582 m) na Llébana

La toponimia del pueblu de Bejes, tien que ver col hidrónimu Beyu asturianu, que tantos nomes va dexando de llugar en llugar n'Asturies. Lo que nun tengo tan claro, ye'l momentu en que tresformóse'l mui posible Beyes a Bejes con una jota castellana marcada.

Términoloxía toponímica aparte, salimos dende l'aparcaderu del pueblu na parte baxa, pa dir ascendiendo peles sos cais, dándonos cuenta qu'había sitiu pa los coches al final d'esti y muncho más alto, xústamente onde la carretera tresfórmase en pista.

Ascendemos hacia'l colláu de la Hoja (820 m) y seguimos hacia los ivernales de la Hoja

De toes toes, tenemos que garrar la pista que fai unes enormes envueltes hacia los ivernales de la Hoja, anque si andamos espabilaos podemos llibrala hasta'l colláu de la Hoja, quitándonos más de kilómetru y mediu de pista formigonada.

Fadremos l'atayu per un senderín claru, pegaos a los parés que caen dende la xerra de Bejes y dende'l colláu empataremos cola pista, qu'esta vegada sí, siguiremos con calma, pasando al llau de los ivernales de la Hoja y siguiendo pista alantre p'atayar n'otra gran revuelta y camudar de camín hacia'l Puertu las Brañas.

Siguimos dende la Revuelta hacia'l Puertu las Brañas

El camín gana claramente en guapura, pasando al llau de les cabañes de la H.aya y averándose en tramos armaos al barrancu del ríu Corvera, el cual nun somos a ver por mor del borrín qu'anda xugando arriba y abaxo del valle a los altos y viceversa.

Siguimos dándo zapatu, alloñándonos del calce del Corvera p'averanos a lo que va ser l'esfuerzu mayor del día, la Canal del Valle. Esta canal, verde y amplia abondo, fadrános ascender bon desnivel col Paré Corvera a la mandrecha y la llomba que baxa del picu Las Agudinas a la manzorga.

Ascendemos sele tola pindia Canal del Valle hasta'l colláu de la Llaguna (1846 m)

Equí el grupu dixebraráse, pol ritmu d'ascensión y pol borrín que dexó d'esnalar pente nós y acabó por metese en condiciones, faciendo que nun fuéramos nin a venos nunes decenes de metros. Con tranquilidá esperámonos los unos a los otros pa reagrupanos y alcontrámonos toos nel colláu de la Llaguna a 1846 m, faciendo un bon descansu que ya llevábemos 3 hores y media enriba.

Magar d'una bona caminata, vamos pasar agora al tramu más téunicu de la ruta, xubiendo per una llomba hacia la baxera del paré del Altu Las Verdianas, pa llueu percorrer un bon tramu de senderín colgáu, que traviesa dellos argayos hasta alcontrar l'únicu puntu feble pa xubir a la parte alta, el pasu la H.endida.

Xubiermos baxo los paredones del Altu Las Verdianas hacia'l pasu de la H.endida

Pudiera dividise en un par de tramos, siendo'l primeru un guapu pasu talláu na roca, que dexarános nun senderín colgáu que va llevanos per una panda hasta un pindiu canalizu. Equí, sedrá onde alcuéntrense les úniques dificultaes de la ruta, anque tampoco son p'amedranase nin muncho menos.

Tendremos que posar les manes delles vegaes, pero siempre con bones preses, asína que diremos pendientes los unos de los otros, pero con un toque disfrutón en tol tiempu que tamos trepando pel canalizu.

Divertíes trepaes na H.endida pa salir hacia las Verdianas

Saldremos de la H.endida, tirándonos dalgunos hasta l'Altu Las Verdianas, el cual teníalu pendiente y ya que tábemos cerquina, pues una carrerina hasta ellí y pa la saca. Acompañaránme Alberto, Richar, Pau y Marie, demientres los demás dirán caleyando sele hacia l'oxetivu del día: el Picu Samelar.

Nós, con pocu más que buscar bien per onde caminar vamos ascendiendo hasta los 2024 m de las Verdianas, el cual albídrase que tien una guapa cayida hacia la canal del Valle, pero como nun vemos nada, tampoco paramos de más, descendiendo magar de la semeya de rigor.

Ascendemos al Altu Las Verdianas (2024 m)

Baxaremos de las Verdianas pasando otra vegada pel colláu onde sal la H.endida y entamaremos un sele caleyar hacia'l Samelar, pasando, nel casu de tolos collacios, al llau del Rendixón otra pindia canal qu'asciende dende la Concha de Valcayo.

Nel mió casu, voi escapame corriendo p'ascender l'altu La Concha, qu'alcuéntrase un pelín más al norte del Picu Samelar y que malpenes ye un pequeñu hombru d'esti, pero teniendo nome y más de dosmil metros (2091 m) había que dir visitalo.

Descendemos de las Verdianas tirándome nuna carrera hasta l'Altu la Concha (2091 m)

Xubirelu corriendo pa entrenar un pelín, na so parte baxa y na parte alta, tocará trepar per unos tubos d'organu de caliza, hasta topame col h.itu que fai cumal. Semeya de turnu ensin ver res y ya tiro caleyando hacia la baxera del Picu Samelar, qu'anque paeza que ta pegadín, tien dende'l colláu al cumal casi doscientos metros de desnivel.

Métome un pelín de caña, col ruxerux de tar faciendo pasar fríu y perder el tiempu a tol grupu, y pa cuando aporto a los 2233 m del Samelar, alcuéntrome sólu nel cumal, hasta'l puntu d'echar un vistazu na redolada nun vaya ser que decidieran descender.

Demientres los demás ascienden pente'l borrín al Picu Samelar

Siéntome a beber agua y voi oyendo voces, pensando que vaya llarga que se-yos ficiera la panda final al Samelar. Cuando me doi cuenta, llega Kíla la primera y dedícase dellos minutinos a saludame a base de llambetones, como diciendo: Onde te metieras, ho!!

Cume nel Picu Samelar (22?? m)

Poquín a pocu van encumando tola xente del grupu y sentámonos cola calma a xintar, demientres el sol paez que quier facer fuercia y danos dalguna vista, pero nin con eses. Al menos, calez el borrín y tenemos una xinta agradable, casi tanto como pa echar una siestina y too.

Magar del descansu toca baxar hacia les pistes de las Vegas d'Ándara

Durante l'ascensu ya decidiera que nun pagaba la pena dir hasta'l San Carlos, porque pa nun ver na y meter más hores de ruta ensín xacíu, lo meyor yera baxar y pa facelo pente la borrina, lo meyor casi que tirar d'una pista qu'anque llarga fuera cómoda.

Asína lo facemos y personalmente dedícome a l'alcordanza de l'anterior ascensión a estos montes del macizu oriental de Picos: Samelar y San Carlos. Daquella, ficiéramoslo n'ivernal dende'l H.itu Escarandi, faciendo la ñeve de másimu esponente pa que la ruta fuera guapa ya qu'esta fastera estrada de mines tampoco ye que seya denguna maraviya.

Garramos pista dende la collada Tresmancondiu hacia Bejes

Por embargu, tengo que dicir, que tola fastera oriental dende los pueblos llebaniegos, tien un valir montañeru enorme, con enormes canales, guapos valles y llugares que bien paga la pena conocer, anque los averamientos seyan más llargos y cansaos.

D'esti mou, colo d'esta ruta con bon tastu, anque'l borrín fuera pelín gafu con nós y nun mos dexar tener les vistes que merecíemos. El restu de la ruta, fadrémosla entreteníos charrando de mil hestories, pasando pelas Vegas d'Ándara o el colláu Tresmancondiu, entre otros, pa garrar a lo postreru más pista hacia Bejes, ensin abandonar el GR-71.

Salimos del monte La Llama hacia'l Dobrillo y baxar a Bejes

Esti GR, fadrános pasar peles revueltes del Texu, enantes de facer una amplia travesía pel monte La Llama, hasta dar cola fonte Los Llobos, onde bordiaremos tola faldera que mira pal barrancu del ríu Urdón, pasando a la vertiente de Beh.es pasando al lláu del Dobrillo, onde empataremos cola pista que nos baxará al pueblu de nuevu.

En total, ruta que con un día más curiosu, diba dexanos de los meyores recuerdos como ficiera l'ascensión del picu H.onfría, pero que quedóse nuna llarga xornada de conocimientu del macizu d'Ándara durante 9 hores y media, nes que percorrímos 25.8 km y superamos un desnivel acumuláu de 1975 m positivos.

La próxima más y con mayor suerte espero...

2 comentarios:

  1. Por esa cara no subí nada, y mira que le tengo ganes...sobretodo a una subida que hay por la zona de Urdón hasta Tresviso, que uno de los colegas de salida la hizo y dijo que espectacular.
    Una pena lo de la borrina, pero rutonazo, el desnivel mete mieu....y la distancia....también!
    Un saludo!

    ResponderEliminar
  2. El Balcón de Pilatos... un clásicu de la Hermida jeje. Pues personalmente, Ándara nun me gusta muncho pero dende Llébana cuidadín que cambia esi rollu mineru y gana enteros una barbaridá.

    Saludos

    ResponderEliminar